“Ba ka be ba Ile ba Lokolloa Hang-hang”
GENEVIÈVE DE GAULLE, e leng morali oa moholoane oa Charles de Gaulle, eo e kileng ea e-ba mopresidente oa Fora, o ile a tseba Lipaki Tsa Jehova kampong ea mahloriso ea Bonazi ea Ravensbrück, e karolong e ka leboea ea Jeremane. O ngotse mantsoe a ka holimo lengolong leo a le ngotseng ka August 1945.
Ka la 27 January, 1945, batšoaruoa ba ile ba lokolloa kampong ea mahloriso ea Auschwitz, Poland. Haesale ho tloha ka 1996, letsatsi lena e ’nile ea e-ba letsatsi la sehopotso Jeremane bakeng sa mahlatsipa a Puso ea Bonazi ea Hitler.
Ha Peter Straub, e leng mopresidente oa Paramente ea Profinse ea Baden-Württemberg, a ne a tšetleha puo ea molao ea sehopotso ka la 27 January, 2003, o ile a re: “Bohle ba ileng ba hlorisoa ka lebaka la litumelo tsa bona tsa bolumeli kapa ka mabaka a bopolotiki le ba neng ba ikemiselitse ho shoa ho e-na le ho inehela, re ba rolela khaebana, ha re tsebe hore na re re’ng ho hlalosa tlhompho eo re nang le eona ho bona. Bolumeli ba Lipaki Tsa Jehova ke bona feela bo ileng ba hana ka ho feletseng ho lumellana le se neng se batloa ke puso ea Hitler: Ha lia ka tsa phahamisa matsoho ho thoholetsa Hitler. Li ile tsa hana ho hlapanya ka ‘Moeta-pele le ’Muso,’ feela joalokaha li ile tsa hana ho sebetsa sesoleng kapa ho etsa mosebetsi o amanang le sesole. ’Me bana ba tsona ba ile ba hana ho ba litho tsa Mokhatlo oa Bacha oa Hitler.”
Jesu Kreste o itse ka balateli ba hae: “Hase karolo ea lefatše, feela joalokaha ke se karolo ea lefatše.” (Johanne 17:16) Kahoo, khato eo Lipaki Tsa Jehova li neng li e nkile e ne e thehiloe feela mabakeng a bolumeli. Ha Straub a tsoela pele o re: “Lipaki Tsa Jehova, tse neng li tlameha ho qhoaela lesela le pherese le likhutlo li tharo liaparong tsa tsona ho bontša hore e ne e le batšoaruoa kampong ea mahloriso, ke tsona feela tse ka beng li entse hore li se kenngoe chankaneng le ho qoba ho bolaoa. Ntho feela e neng e hlokahala e ne e le ho saena tokomane e bontšang hore li latola tumelo ea tsona.”
Lipaki tse ngata li ne li sa nahane ho hang ka taba ea ho latola tumelo. Kahoo, Lipaki tse ka bang 1 200 li ile tsa shoa nakong ea Puso ea Bonazi. Tse 270 li ile tsa bolaeloa ho hana ho kena sesoleng ka lebaka la letsoalo. Li ne li sa bue ka molomo feela mantsoe a reng: “Re tla mamela Molimo e le ’musi ho e-na le batho.”—Liketso 5:29.
Joalokaha Ulrich Schmidt, e leng mopresidente oa Paramente ea Profinse ea Rhine-Westphalia Leboea a ile a bolela pejana, Lipaki Tsa Jehova e ne e le batho ba tloaelehileng. Ha bukana e bitsoang Landtag Intern e bua ka puo ea hae, e itse Lipaki e ne e le “batho ba tloaelehileng bao, ka lebaka la ho mamela matsoalo a bona, ba ileng ba emela litumelo tsa bona ka tieo, ba bontša hore ke baahi ba sebete le ba hanyetsang leano la Bonazi ka lebaka la tumelo ea bona ea Bokreste.” Re ka kholiseha hore Jehova Molimo o thabisoa ke bohle ba lulang ba tšepahala ho eena ha ba tjamelane le maemo a boima. Ho Liproverbia 27:11, rea bala: “Mora oa ka, hlalefa ’me u thabise pelo ea ka, e le hore nka araba ea ’nyelisang.”
[Tlhaloso ea Moo Setšoantšo se Nkiloeng Teng e leqepheng la 30]
Courtesy of United States Holocaust Memorial Museum