Na U ‘Ruetse ho Molimo’?

HAR’A lipapiso tse ngata tse susumelletsang motho ho nahana ka ho teba tseo Jesu Kreste a faneng ka tsona, ho na le e ’ngoe e buang ka morui ea nang le tšimo. Mong’a tšimo eo o ile a rera ho haha matlo a maholoanyane a polokelo, e le ha a leka ho tiisa hore o tla ba le bokamoso bo sireletsehileng. Empa papisong ea Jesu, monna eo o ile a bitsoa “ea se nang kahlolo e molemo.” (Luka 12:16-21) Liphetolelo tse ’maloa tsa Bibele li bile li sebelisa lentsoe “leoatla.” Ke hobane’ng ha a ahloloa haboima joalo?

Kamoo ho bonahalang kateng, morui enoa ha aa ka a kenyelletsa Molimo mererong ea hae; ebile ha aa ka a tlotlisa Molimo ka chai eo a e fumaneng masimong. (Matheu 5:45) Ho e-na le hoo, o ile a re ka ho ithorisa: “Moea, u na le lintho tse ngata tse molemo tse bolokiloeng ka lilemo tse ngata; khatholoha, u je, u noe, u ithabise.” E, o ne a nahana hore chai ea hae e tla ba “lerako le sireletsang.”—Liproverbia 18:11.

Morutuoa Jakobo o ile a lemosa ka moea oo oa boikhohomoso, ha a re: “Joale, mamelang lōna ba reng: ‘Kajeno kapa hosasane re tla ea motseng ona ’me re tla qeta selemo moo, ’me re tla kena khoebong le ho etsa phaello,’ athe ha le tsebe hore na bophelo ba lōna bo tla ba joang hosasane. Etsoe le moholi o bonahalang ka nakoana o ntan’o nyamela.”—Jakobo 4:13, 14.

Mantsoe ao a ile a fela a phethahala, kaha ho ile ha thoe ho morui oa papisong ea Jesu: “Uena ea se nang kahlolo e molemo, bosiung bona ba batla moea oa hao ho uena. Joale, ke mang ea tla ba le lintho tseo u li bokeletseng?” Joaloka moholi o iphetelang, morui eo o ne a tla shoa pele litoro tsa hae li phethahala. Na re lemoha seo re ka ithutang sona ho see? Jesu o ile a re: “Kahoo ho joalo le ka motho ea ipolokelang letlotlo empa a sa ruela ho Molimo.” Na u ‘ruetse ho Molimo’?