Litho Tse Ncha Tsa Sehlopha se Busang
LABORARO hoseng ka la 24 August, 2005, lelapa la Bethele la United States le la Canada, a ne a hokahantsoe ka video, ’me a ile a utloa tsebiso e thabisang. Ho qala ka la 1 September, 2005, Sehlopha se Busang sa Lipaki Tsa Jehova se ile sa eketsoa ka litho tse peli—e leng Geoffrey W. Jackson le Anthony Morris.
Mor’abo rōna Jackson o qalile ho bula maliboho ka February 1971, profinseng ea Australia ea sehlekehleke ea Tasmania. Ka June 1974, o ile a nyala Jeanette (Jenny). Nakoana ka mor’a moo, ba ile ba khethoa hore ba sebeletse e le bo-pula-maliboho ba khethehileng. Ho tloha ka 1979 ho isa ka 2003, ba ile ba sebeletsa e le baromuoa Tuvalu, Samoa le Fiji—e leng linaha tse lihlekehlekeng tsa Pacific Boroa. Mora le morali’abo rōna Jackson ba ile ba thusa haholo mosebetsing oa ho fetolela lingoliloeng tsa Bibele, ha ba ntse ba le lihlekehlekeng tseo. Ho qala ka 1992, Mor’abo rōna Jackson o ile a sebeletsa Komiting ea Lekala la Samoa, ’me ho tloha ka 1996, o ile a sebeletsa Komiting ea Lekala la Fiji. Ka April 2003, eena le Jenny e ile ea e-ba karolo ea lelapa la Bethele ea United States ’me ba ile ba qala ho sebetsa Lefapheng la Litšebeletso Tsa Phetolelo. Nakoana ka mor’a moo, Mor’abo rōna Jackson o ile a khethoa ho ba mothusi Komiting e Rutang ea Sehlopha se Busang.
Mor’abo rōna Morris le eena o qalile tšebeletso ea bopula-maliboho ka 1971 United States. Ka December selemong sona seo, o ile a nyala Susan, ’me ba ile ba tsoela pele ka bopula-maliboho ka lilemo tse ka bang ’nè ho fihlela ba e-ba le mora oa bona oa matsibolo, e leng Jesse. Ka mor’a nako, ba ile ba e-ba le mora e mong hape, e leng Paul. Mor’abo rōna Morris o ile a khutlela tšebeletsong ea nako e tletseng ka 1979 ’me ea e-ba pula-maliboho oa kamehla. Mosali oa hae le eena o ile a kena tšebeletsong ea nako e tletseng ha bashemane ba qala ho kena sekolo. Lelapa lena le ile la sebeletsa moo ho nang le tlhokahalo e khōlō ea baboleli Rhode Island le North Carolina, United States. Ha ba le North Carolina, Mor’abo rōna Morris o ile a sebeletsa e le molebeli oa potoloho ea tšoarang molepo, ’me bashemane ba ile ba kena tšebeletsong ea bopula-maliboho ba kamehla. Ha Jesse a le lilemo li 19, o ile a memeloa lekaleng la United States, ’me ho ile ha e-ba joalo le ka Paul. Khabareng, Mor’abo rōna Morris o ile a qalisa mosebetsi oa potoloho. Joale, ka 2002 eena le Susan ba ile ba memeloa Bethele, ’me ba ile ba qala kabelo ea bona e ncha ka la 1 August. Mor’abo rōna Morris o ile a sebetsa Lefapheng la Tšebeletso le Patterson eaba hamorao e ba mothusi Komiting ea Tšebeletso ea Sehlopha se Busang.
Ho phaella ho bara bana babo rōna ba babeli ba sa tsoa khethoa, Sehlopheng se Busang ho na le C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane le D. Sydlik. Litho tsohle tsa Sehlopha se Busang ke Bakreste ba tlotsitsoeng.