Na Thelevishene ke Mohlokomeli ea Molemo oa Bana?
KA LINAKO tse ling, ho ka bonahala ho le molemo haholo ho tlosa bana ba hao bolutu ka ho ba lumella hore ba shebelle thelevishene ha u ntse u etsa mesebetsi e meng ea hao ea letsatsi. Empa see se ka ama bana ba hao joang?
The New York Times ea tlaleha: “Esita le bana ba banyenyane ba ka susumetsoa ke melaetsa e amang maikutlo e bontšoang thelevisheneng.” Phuputsong ea morao tjena, bana ba nang le selemo se le seng ba ile ba bontšoa likaroloana tse khutšoanyane tse nkiloeng thelevisheneng tseo ho tsona motšoantšisi a neng a itšoara ka litsela tse sa tšoaneng ha a bapala ka sebapalisoa se itseng. Times e re: “Ha motšoantšisi a ne a bontša tšabo ha a bapala ka sebapalisoa seo, bana ba ne ba sa bapale ka sona, ’me hangata ba ne ba bonahala ba tšoenyehile, ba sosobanya lifahleho, ba halefa kapa ba lla. Ha motšoantšisi a ne a thabela sebapalisoa seo, bana ba ne ba labalabela ho bapala ka sona.”
Ha ho pelaelo hore thelevishene e ka ama bana. E ka ba le tšusumetso efe ea nako e telele baneng? Dr. Naoki Kataoka, e leng moprofesa oa lefapha le sebetsanang le mafu a bana K’holejeng ea Bongaka ea Kawasaki e motseng oa Kurashiki, Japane, o bone bana ba bangata ba thōtseng haholo le bao lifahleho tsa bona li sa bontšeng boikutlo leha e le bofe. Bana bana kaofela ba ne ba ile ba shebella thelevishene kapa livideo ka nako e telele. Moshanyana e mong ea lilemo li peli o ne a sitoa ho qoqa le batho ’me o ne a tseba mantsoe a fokolang feela. O ne a ile a shebella livideo ho tloha hoseng ho fihlela mantsiboea letsatsi le leng le le leng ho tloha ha a ne a e-na le selemo se le seng. Ebile feela ka mor’a hore ’mè oa moshemane enoa a sebelise keletso ea ngaka, moo a ileng a mo thibela ho shebella livideo, a qala ho bapala le eena ’me butle-butle moshemane enoa o ile a tseba mantsoe a eketsehileng. Ka sebele, batsoali ba lokela ho qeta nako ba qoqa le bana ba bona.
Jehova Molimo, Moqapi oa tokisetso ea lelapa, o ile a hatisa kamoo ho leng bohlokoa kateng hore batsoali ba qoqe le bana ba bona. Khale koana o ile a bolella sechaba sa hae a re: “U . . . rute mora oa hao [mantsoe a Molimo] ka ho pheta-pheta ’me u bue ka ’ona ha u lutse ka tlung ea hao le ha u tsamaea tseleng le ha u robetse le ha u tsoha.” (Deuteronoma 6:7) Ke batsoali, eseng thelevishene, ba ka rutang bana hamolemo ka ho bua le bona le ka ho ba behela mohlala, “ho ea ka tsela” e ba loketseng.—Liproverbia 22:6.