Lipotso Tse Tsoang ho Babali
Noe o ile a kenya liphoofolo tse kae tse hloekileng ka arekeng—na mofuteng ka mong oa liphoofolo tse hloekileng o ile a kenya tse supileng kapa mofuteng ka mong o ile a kenya tse supileng tse tona le tse supileng tse tšehali?
Ha Noe a qeta ho haha areka, Jehova o ile a re ho eena: “E-ea, uena le bohle ba ntlo ea hao, le kene ka arekeng, hobane ke uena eo ke mo boneng a lokile ka pel’a ka har’a moloko ona. Ho phoofolo e ’ngoe le e ’ngoe e hloekileng u inkele tse supileng, e tona le molekane oa eona; ’me ho phoofolo e ’ngoe le e ’ngoe e sa hloekang e be tse peli feela, e tona le molekane oa eona.” (Genese 7:1, 2) Liphetolelo tse ling, tse kang The New English Bible, The New Jerusalem Bible, le Tanakh—The Holy Scriptures, li fetolela polelo ea Seheberu sa pele e le “tse supileng tse tona le tse supileng tse tšehali.”
Ka Seheberu, polelo e reng “tse supileng” ka ho toba e bolela “tse supileng tse supileng.” (Genese 7:2) Leha ho le joalo, ho pheta-phetoa ha palo e itseng ka puo ea Seheberu ha ho hlile ha ho bolele hore lipalo tseo li lokela ho kopanngoa. Ka mohlala, 2 Samuel 21:20 e hlalosa “monna ea boholo bo sa tloaelehang” e le ea nang le “menoana e tšeletseng ho le leng le le leng la matsoho a hae le menoana e tšeletseng ho le leng le le leng la maoto a hae.” Ka Seheberu, ho phetiloe palo ea ‘tšelela.’ Leha ho le joalo, sena ha se bolele hore seqhenqha sena se ne se e-na le lipara tse tšeletseng tsa menoana letsohong ka leng (kapa menoana e 12) le lipara tse tšeletseng tsa menoana ea maoto leotong ka leng. Ho phetoa hona ha lipalo ho bolela feela hore letsohong ka leng ho ne ho e-na le menoana e tšeletseng ’me leotong ka leng ho e-na le menoana e tšeletseng.
Melao ea puo ea Seheberu e hlalosa joang taba ee ea ho pheta-pheta lipalo? Ha Introductory Hebrew Method and Manual ea William R. Harper e tšohla Genese 7:2, 9, e re: “Hangata mantsoe a phetoa bakeng sa ho hlalosa kamano pakeng tsa ntho e le ’ngoe eo e leng karolo ea lintho tse ngata.” Hebrew Grammar ea Gesenius (Khatiso ea Bobeli ka Senyesemane) e re bolella hore ntlheng ena, “ho sebelisoa mantsoe a hlalosang ntho e le ’ngoe eo e leng karolo ea lintho tse ngata . . . ka ho pheta-pheta hore na lintho li kae ka palo, eseng hore na li hlophisitsoe joang.” E fana ka mohlala ho Genese 7:9, 15 le 2 Samuele 21:20, moo ho phetiloeng palo ea ‘peli’ le ‘tšelela’ ka ho latellana.
Kahoo palo e reng, “tse supileng tse supileng” e boletsoeng ho Genese 7:2 ha e bolele lipara tse supileng, kapa 14, feela joalokaha ho Genese 7:9, 15 ho pheta “peli” ho sa bolele lipara tse peli, kapa ’nè. Ho phetoa ha palo temaneng ka ’ngoe ho bolela feela ntho e le ’ngoe eo e leng karolo ea lintho tse ngata—eseng ho kopanngoa ha lipalo. Kahoo, le hoja liphoofolo tse hloekileng li ile tsa kenngoa ka arekeng e le “tse supileng” mofuta ka mong, ho tse sa hloekang teng, ho ile ha nkuoa “tse peli feela” mofuta ka mong.
Leha ho le joalo, ho thoe’ng ka polelo e reng “e tona le molekane oa eona” e hlahang ho Genese 7:2 hang feela ka mor’a polelo e reng “tse supileng”? Sena se entse hore batho ba bang ba nahane hore Noe o ile a laeloa hore a nke lipara tse supileng har’a mofuta o mong le o mong oa phoofolo e hloekileng. Leha ho le joalo, liphoofolo tse hloekileng tsona, li ne li sa bolokoa feela ka morero oa hore li tsoale. Genese 8:20 e re bolella hore ha Noe a qeta ho tsoa ka arekeng, o ile “a qala ho hahela Jehova aletare le ho nka tse ling tsa liphoofolo tsohle tse hloekileng le tse ling tsa libōpuoa tsohle tse fofang tse hloekileng ’me a nyehela linyehelo tsa secheso aletareng.” Ho ba le phoofolo ea bosupa e nkiloeng har’a mofuta o mong le o mong o hloekileng ho ile ha etsa hore Noe a be le phoofolo eo a neng a ka etsa sehlabelo ka eona, ’me tse tharo tse nang le balekane ba tsona li ne li ka salla hore li atise mofuta oa tsona lefatšeng.