Re U Lome Tsebe?
Ke hobane’ng ha batho ba re “amen” ha thapelo e fela?
Lentsoe la Sesotho le la Segerike, “amen,” ke lentsoe le alimiloeng ka ho toba ho tsoa ho la Seheberu, a·menʹ. Lentsoe lena leo hangata batho ba le buelang hong ha ba mametse thapelo, kano, tlhohonolofatso, kapa thohako, hantle-ntle le bolela “ha ho be joalo” kapa “ka sebele.” Ha bamameli ba re amen, ba bontša hore ba lumellana le mantsoe a sa tsoa boleloa. Ho latela buka e ’ngoe, “lentsoe lena le bontša ho kholiseha, ho ba le bonnete, ho tšepahala le ho hloka pelaelo.” Mehleng ea boholo-holo, ha motho a ne a itse “amen” ha ho etsoa kano kapa selekane, ho ne ho nkoa a itlamme ka molao hore a ke ke a koenehela likano le hore o tla jara boikarabelo bo tsamaisanang le tsona.—Deuteronoma 27:15-26.
Ha Jesu a ntse a bolela evangeli a bile a ruta, o ile a qala lipolelo tse ling tsa hae ka lentsoe lena “amen.” Ka ho etsa joalo, o ne a hatisa hore joang kapa joang seo a neng a tl’o se bua se tla phethahala. Maemong ao, lentsoe la Segerike a·menʹ le fetoletsoe e le “kannete” kapa “ka sebele.” (Matheu 5:18; 6:2, 5) Ha Jesu a pheta lentsoe leo habeli, joaloka tlalehong e ’ngoe ea Kosepele ea Johanne, le fetoleloa e le “kannete-nete.” (Johanne 1:51) Ho thoe tsela ena eo Jesu a ileng a sebelisa amen ka eona ha ea tloaeleha libukeng tse halalelang.
Mangolong a Bakreste a Segerike, tlotla “Amen,” e sebelisoa ho Jesu ho bontša hore bopaki ba hae ‘boa tšepahala ebile ke ba ’nete.’—Tšenolo 3:14.
Urime le Thumime e ne e le eng?
Ho bonahala Urime le Thumime e ne e le lintho tseo Baiseraele ba mehleng ea boholo-holo ba neng ba li sebelisa e le hore ba tsebe hore na thato ea Jehova ke efe litabeng tse neng li ama sechaba kapa baeta-pele ba sona. Lintho tsena li ne li hlokomeloa ke moprista ea phahameng ’me li ne li kenngoa ka har’a “kotla ea sefuba ea kahlolo.” (Exoda 28:15, 16, 30) Le hoja ho se mohla Mangolo a hlalosang lintho tsena kapa hona hore na ha e le hantle li ne li sebelisoa joang, ho bonahala litemana tse sa tšoaneng ka Bibeleng li fana ka maikutlo a hore li ne li sebelisetsoa ho lahla lotho ’me Molimo o ne a ka araba ka ho re “e” kapa “che,” kapa ho hang a se ke a fana ka karabo.
Mohlala o mong oa ha ho ne ho sebelisoa Urime le Thumime ke oa ha Davida a ne a re Abiathare a mo tlisetse seo ho bonahalang e ne e le efoda ea moprista ea phahameng e neng e e-na le Urime le Thumime. Davida o ile a botsa Jehova lipotso tsena tse peli: ‘Na Saule o tla ntelekisa?’ le hore ‘Na beng ba naha ba Keila ba tla nehelana ka ’na letsohong la hae?’ Lipotso tseo tse peli li ile tsa arajoa ka ho re ho tla ba joalo, eaba Davida o etsa liqeto tse nepahetseng.—1 Samuele 23:6-12.
Pejana Morena Saule o ne a ile a sebelisa Urime le Thumime e le hore a tsebe hore na ke sechaba se molato kapa ke eena le Jonathane, ho tloha moo eaba o batla ho tseba hore ha e le eena, e le mora oa hae, ea molato ke mang. (1 Samuele 14:40-42) Hamorao ha Molimo a se a furaletse Saule, ha aa ka a hlola a mo fa tataiso “ebang ke ka litoro kapa ka Urime kapa ka baprofeta.”—1 Samuele 28:6.
Ho latela lipale tsa Bajuda, Urime le Thumime li ile tsa khaotsa ho sebelisoa ha tempele ea Jehova e timetsoa ka 607 B.C.E.
[Setšoantšo se leqepheng la 27]
“Amen,” Tšenolo 3:14. Codex ea Alexandrinus, Lekholong la Bohlano la Lilemo C.E.