Bibele e Fetola Batho
MOTHO ea neng a le sehlopheng sa litlokotsebe ebile e le lekhoba la matekoane o ile a etsa joang e le hore a tlohele mekhoa eo e kotsi? Ke hobane’ng ha motho e mong eo e neng e le setho sa sehlopha sa ’mino o morethetho o matla a ile a kuta moriri oa hae o molelele ’me a fetola maikutlo ka ’mino oo a neng a o rata? Ke eng e ileng ea susumelletsa monna ea neng a sa batle ho laoloa ke bolumeli kapa ke ’muso hore a qetelle a sebeletsa Molimo? Hlokomela hore na batho bana ba re’ng.
“Ke ile ka hlōla ho lemalla matekoane.”—PETER KAUSANGA
LILEMO: 32
NAHA EA HESO: NAMIBIA
PELE: KE NE KE LE SETHO SA SEHLOPHA SA LITLOKOTSEBE KE BILE KE LEMALETSE MATEKOANE
BOPHELO BA KA BA NAKONG E FETILENG: Ke hōletse Kehemu, e leng o mong oa metse e mene e meholo e toropong ea Rundu. Batho ba moo ba ne ba iphelisa ka ho rekisa nyalothe, patsi le mashala a entsoeng ka patsi.
Ha ke le lilemo li peli feela, ’Mè o ile a hlokahala eaba ke hōlisoa ke nkhono oa ka. Re ne re iphelela bophelo bo tloaelehileng. Ka tlhaho ke ne ke le motho ea seng likhathatso, empa ka lebaka la tšusumetso ea lithaka, ke ile ka iphumana ke kene mathateng. Ha ke ntse ke kena sekolo, ke ile ka ba sehlopheng sa litlokotsebe. Seo se ile sa etsa hore ke qetelle ke loantša batho, ke iketsa mpoli, ke utsoa, ke mokola litaemane, ke bile ke ba lekhoba la joala le la lithethefatsi. Ke ile ka hlahleloa teronkong habeli ka lebaka la ho thuha matlo le ho qhekella.
Ke ile ka tlohela sekolo ha ke etsa sehlopha sa leshome eaba ke qetella ke tlohile motseng moo ’me ke tsoile le sehlopheng sa litlokotsebe. Ke ne ke batla ho qala bophelo bo bocha. Empa ke ne ke ntse ke lemaletse matekoane. Ka linako tse ling ke ne ke tsamaea lik’hilomithara tse ngata hore feela ke fumane solo ea matekoane.
KAMOO BIBELE E FETOTSENG BOPHELO BA KA KATENG: Mathoasong a selemo sa 1999, ke ile ka teana le Lipaki Tsa Jehova tse neng li ntse li fa batho libuka seterateng. Li ile tsa bua le ’na ka tlhompho li bile li ntšiela seriti, e leng se ileng sa nkama pelo haholo. Molaetsa oo ke ileng ka o fumana libukeng tseo o ile oa nkholisa hore ke fumane bolumeli ba ’nete. Eaba ke qala ho ithuta Bibele ke khothetse, ’me ka potlako ka elelloa hore ke lokela ho fetola tsela eo ke phelang ka eona haeba ke batla ho khahlisa Jehova Molimo.
Ke ile ka ipehela letsatsi leo ke tla khaotsa ho tsuba ka lona eaba ke lahla ntho e ’ngoe le e ’ngoe e amanang le ho tsuba eo ke neng ke e-na le eona. Ke ile ka ba ka bolella metsoalle ea ka hore e se hlole e mpha koae kapa hona ho tsubela pel’a ka. Leha ho le joalo, lintho ha lia ka tsa tsamaea kamoo ke neng ke batla kateng. Ka makhetlo a mabeli ke ile ka hlōleha ho itšoara eaba ke tsuba koae le matekoane. Leha ho le joalo, ha kea ka ka nyahama. Ke ne ke lula ke nahana ka molao-motheo o ho Liproverbia 24:16, o reng: “Ea lokileng a ka ’na a oa esita le ka makhetlo a supileng, ’me ka sebele o tla ema.” Qetellong, ke ile ka khaotsa ho tsuba.
Ha ke ntse ke ithuta haholoanyane ka Jehova, ke ne ke batla hore e be motsoalle oa ka ea haufi. Lengolo le leng la Bibele le ileng la nkama maikutlo haholo ke la Pesaleme ea 27:10, le reng: “Haeba Ntate le ’Mè ba ne ba ka ntlohela, Jehova o ne a tla nthola.” Ha ke ntse ke tsoela pele ho ithuta Bibele, ke ile ka hlokomela hore mantsoe ao ke ’nete. Ke ile ka hlokomela hore Jehova ke Ntate oa ka oa sebele ebile oa ntsotella.
Hangata ke ne ke qeta nako e ngata le Lipaki Tsa Jehova. Ke ne ke bona hore ke metsoalle ea sebele ebile ba ratana haholo. Ke ne ke qala ho bona ntho e joalo.
MELEMO EO KE E FUMANENG: Ka thuso ea Jehova le Lipaki tse ling, ke se ke ntlafalitse boitlhopho ba ka, moaparo, boitšoaro esita le lipuo tsa ka. Ha ke hetla morao, ke hlokomela hore bophelo ba ka bo fetohile haholo joaloka ba sebōkō se sebe ha se fetoha serurubele se setle. Batho bao ke amanang le bona ba thabetse liphetoho tsena ’me hona joale ba se ba ntšepa. Joale ke se ke nyetse ’me ke leka ka matla hore ke rate mosali oa ka le ho hlokomela bana ba ka.
“Ke se ke e-na le ntho eo ke e phelelang.”—MARCOS PAULO DE SOUSA
LILEMO: 29
NAHA EA HESO: BRAZIL
PELE: KE NE KE LE SEHLOPHENG SA ’MINO O MORETHETHO O MATLA
BOPHELO BA KA BA NAKONG E FETILENG: Lelapa leso le ne le lula motseng oa Jaguariuna o São Paulo. Batsoali ba ka e ne e le Mak’hatholike a chesehang ’me ha ke sa le monyenyane ke ne ke le mosebeletsi oa aletare. Kahoo, bana bao ke neng ke le ka sehlopheng se le seng le bona sekolong sa mathomo, ba ne ba mpitsa Fatere. Leha ho le joalo, ha ke le lilemo li 15 ke ile ka qala ho rata ’mino oa rock o morethetho o matla. Eaba ke qala ho tloaelana le libini tsa rock, ka ba ka hōlisa le moriri. Ka 1996 ntate oa ka o ile a nthusa hore ke reke sete ea ka ea pele ea meropa.
Ka 1998, ke ile ka kena sehlopheng sa ’mino oa rock o morethetho o matla. Re ne re letsa ’mino oa bosatane o tletseng litlhapa. O ne o thoholetsa pefo. ’Mino oo o ile oa ama tsela eo ke nahanang ka eona, boitšoaro ba ka le maikutlo a ka. Ke ile ka qala ho nyatsa ntho e ’ngoe le e ’ngoe le ho ba bohale haholo.
KAMOO BIBELE E FETOTSENG BOPHELO BA KA KATENG: Ke qalile ho kopana le Lipaki Tsa Jehova ka 1999. Li ile tsa ithaopela ho ithuta Bibele le ’na, eaba kea lumela le hoja ke ne ke sa thahaselle hakaalo. Leha ho le joalo, seo ke ileng ka ithuta sona ka Bibeleng se ile sa fetola tsela eo ke neng ke nka bophelo ka eona.
Batho ba ne ba mpitsa “moshana ea moriri o molelele,” “khalala ea rock,” kapa “rameropa.” Empa ke ile ka hlokomela hore ho bina le sehlopha ho entse hore ke be motho ea inkang a le betere le ea sa batleng ho hlōloa, eaba ha ke sa khotsofalla tsela eo ke tsebahalang ka eona. Ke ile ka hlokomela hore libini tseo ke neng ke li rata haholo li ne li sa tsebe hore na ha e le hantle li phelela’ng. Butle-butle ka hlokomela hore haeba ke batla ho thabisa Jehova Molimo, ke lokela ho tlohela ’mino o morethetho o matla le lintho tse neng li amana le oona tse kang boitšoaro bo bobe le borapeli ba litšoantšo.
Ke ne ke rata ’mino oo haholo le moriri oa ka o molelele, ’me ke ipotsa hore na ke tla khona ho phela ntle le tsona. Ke ne ke bile ke le sefela-peloana ’me ke tseba hore ke tla lokela ho laola mokhoa oo. Leha ho le joalo, ha ke ntse ke ithuta Bibele, ka ’na ka rata Jehova le ho feta. Ho ithuta hore Molimo o lerato, oa mamella ebile o mohau ho ile ha etsa hore ke mo rate. Ke ile ka rapela Jehova hore a nthuse hore ke fetohe ’me o ile a fela a nthusa. Ke iponetse hore mantsoe a Baheberu 4:12 ke ’nete. Temana eo e re: “Lentsoe la Molimo lea phela ’me le fana ka matla.”
Ha ke qala ho tloaelana le Lipaki Tsa Jehova, ke ile ka hlokomela hore li fapane le batho ba bang. Ke ne ke qala ho bona batho ba bontšana lerato ka tsela e joalo. Lerato lena le ne le bonahala haholo likopanong tse khōlō tsa Lipaki. Ke ne ke khahloa ke tsela eo baithaopi ba neng ba sebetsa ka cheseho ka eona ho etsa hore ba bang ba thabele kopano.
MELEMO EO KE E FUMANENG: Jehova o nthusitse ’me ke se ke tseba ho laola bohale ba ka. Joale ke nahana hore ha ke sa le motho ea inkang a le betere le ea ikhohomosang.
Kea lumela hore ka linako tse ling ke ne ke hopola bophelo ba ka ba mehleng—empa ha ho sa le joalo. Joale ke se ke e-na le ntho eo ke e phelelang. Ke thabela hore ke se ke ithuta ho thahasella batho ba bang le ho batla hore ba phele hantle.
“Ke utloa monate oa ho tsotella batho ba bang.”—GEOFFREY NOBLE
LILEMO: 59
NAHA EA HESO: UNITED STATES
PELE: KE NE KE SA BATLE HO LAOLOA KE BOLUMELI KAPA KE ’MUSO
BOPHELO BA KA BA NAKONG E FETILENG: Ke hōletse Ipswich, Massachusetts, e leng toropo e haufi le lebōpo la leoatle ea batho ba maemo a tlaase. Ha ke se ke hōlile ke ile ka khetha ho ea lula sebakeng sa mahaeng se Vermont. Ho latela batho ba Amerika Leboea, tsela eo ’na le kharebe ea ka re neng re phela ka eona e ne e nkoa e le ea boholo-holo. Re ne re se na motlakase, kahoo re ne re futhumatsa ntlo ea rōna re bile re pheha ka patsi eo re neng re e roalla morung. Re ne re sebelisa ntloana ea ka ntle ’me ka nako e telele selemong ho ne ho sa be le metsi lipompong. Re ne re sa batle bophelo ba tsoelo-pele, ’me le tsela eo re neng re shebahala ka eona e ne e bontša seo. Ka nako e ’ngoe ke ile ka ikhantša ka hore ke qetile likhoeli tse tšeletseng ke sa ikame moriri.
Ka nako eo, United States e ne e loana Ntoa ea Vietnam. Sena se ile sa ama tsela eo ke neng ke nka bolaoli ka eona. Ke ile ka bona boikaketsi ba mebuso le ba bolumeli. Eaba ke ipolella hore ho ne ho se tharollo eo li ka fanang ka eona, ka hona motho e mong le e mong o lokela ho iketsetsa qeto ea hore na ke eng se fosahetseng le se nepahetseng. Kahoo ka ipolella hore hase phoso ha motho a utsoa ntho eo a e hlokang.
KAMOO BIBELE E FETOTSENG BOPHELO BA KA KATENG: ’Na le kharebe ea ka re ne re sa tsoa qala ho bala Bibele empa re sa e utloisise. Ke ne ke sebelisa lithethefatsi le hoja ke ne ke leka ho li tlohela. Kharebe ea ka e ne e batla hore ke e nyale le ho ba le bana. Ka nako eo, e mong oa Lipaki Tsa Jehova o ile a tla ha rōna eaba o qala ho re ruta Bibele.
Ka mor’a nakoana ke ile ka khona ho tlohela mekhoa ea ka e mebe; leha ho le joalo, ho ne ho ntse ho le thata haholo hore ke fetole tsela eo ke neng ke nka bolaoli ka eona. Ke ne ke itloaelitse ho belaella ntho ’ngoe le ’ngoe. Ke hōtse ke itaola, kahoo ho ne ho le thata ho amohela taba ea ho phela ka melao ea motho e mong.
Esale ke lumela hore ’Mōpi o teng, empa ke ne ke nka hore ha a hlalosehe. Empa ha ke ithuta Bibele, botho ba Jehova Molimo bo ile ba ntlhakela haholo. Ke ile ka hlokomela hore o bua ka ho toba hore na o batla hore ke etse’ng. Melao ea hae e ne e tobile ebile e hlakile. Hape ke ile ka ithuta hore o na le morero o hlakileng oa ho etsa lefatše paradeise. (2 Petrose 3:13) Litaba tseo li ile tsa etsa hore ke batle ho fetoha e le hore ke tšoanelehe hore ke mo sebeletse.
Ke ne khahluoe haholo ke taba ea hore Lipaki Tsa Jehova li ne li hana ho kenella lintoeng. Ha ho na bolumeli le ha bo le bong lefatšeng ka bophara boo ke neng ke bo tseba bo neng bo latela molao-motheo ona oa Bibele joaloka tsona.
Ke ile ka hlokomela hore haeba ke batla ho sebeletsa Jehova, ke lokela ho ntlafatsa tsela eo ke shebahalang ka eona. Qalong ke ne ke batla ke sa lumellane le mokhoa oo Lipaki li khothalletsang hore ho aparoe ka oona. Ha e le ’na kapa eona metsoalle ea ka, re ne re se na liaparo tse hlomphehang, ebang ke hempe, borikhoe, kapa lieta. Ha ke sa bua ka thae! Empa ke ile ka kuta moriri oa ka, ka ba ka ntlafatsa tsela eo ke shebahalang ka eona. Leha ho le joalo, ke hopola ha ke ne ke ea ka ntlo le ntlo ho ea bolela molaetsa oa Bibele ka lekhetlo la pele. Ke ile ka ipona khalaseng ea fensetere e ’ngoe hore na ke se ke shebahala joang. Eaba kea ipotsa, ‘Ebe ke ne ke etsa’ng?’ Qetellong, ke ile ka utloa ke se ke tloaela tsela eo ke shebahalang ka eona.
MELEMO EO KE E FUMANENG: Re ile ra nyalana le kharebe ea ka ’me re ntse re thabile lenyalong la rōna. Re atlehile ho hōlisa bana ba rōna ba bararo hore ba rate Jehova ba be ba mo sebeletse. Ke boetse ke thabetse ho thusa batho ba bang hore ba ithute ’nete ea Bibele e ileng ea nthusa hore ke fetole bophelo ba ka.
Ke ne ke tloaetse ho ikhantša ka hore ha ke tsotelle hore na ba bang ba nahana joang. Hona joale ke thabela ho utloa hore na ho monate hakaakang ho tsotella batho ba bang le hore le bona ba ntsotelle.
[Ntlha e Qolotsoeng e leqepheng la 26]
“Ke ne ke tsamaea lik’hilomithara tse ngata hore feela ke fumane solo ea matekoane”
[Ntlha e Qolotsoeng e leqepheng la 28]
“Seo ke ileng ka ithuta sona ka Bibeleng se ile sa fetola tsela eo ke neng ke nka bophelo ka eona”
[Ntlha e Qolotsoeng e leqepheng la 29]
“Ke ne ke batla ke sa lumellane le mokhoa oo Lipaki li khothalletsang hore ho aparoe ka oona”