Boprofeta ba Bohlokoa Haholo

“Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”—MATHEU 24:14.

LITSEBI li re temana eo ke ea bohlokoa haholo. Ke ea bohlokoa hobane mosebetsi oo e buang ka oona o lokela ho etsoa lefatšeng ka bophara. Hape ke ea bohlokoa hobane e bua ka seo Bakreste ba lokelang ho se etsa, e leng mosebetsi oa ho bolela o tla etella pele seo Jesu a ileng a se bitsa “bofelo” le o tla phatlalatsa ketsahalo eo ea bohlokoa e tla etsahala hohle.

Boprofeta ba temana eo boa phethahala kajeno. Boa u ama hobane litaba tse molemo li na le memo hammoho le temoso. Bo u fa khetho: Amohela ’Muso oa Molimo kapa u o hanyetse. Khetho eo u e etsang e ama bophelo ba hao.

Nahanisisa ka se neng se tšohloa ha ho tla hlaha taba ena. Matsatsi a ’maloa pele Jesu a khokhotheloa, barutuoa ba hae ba ile ba tla ho eena ’me ba mo botsa ka bokamoso. Ba ne ba thahasella ho tseba hore na ’Muso oa Molimo, oo Jesu a neng a bua ka oona khafetsa, o tla thehoa neng. Hape ba ne ba batla ho tseba ka “qetello ea tsamaiso ea lintho” kapa joalokaha Libibele tse ling li beha taba, “ho fela ha lefatše.”—Matheu 24:3, Bibele ea Sesotho.

Ha Jesu a arabela, o ile a re ho tla ba le lintoa libakeng tse ngata tse sa tšoaneng, tlala ea sekoboto, mafu a seoa hammoho le litšisinyeho tse khōlō tsa lefatše. Hape o ile a re tlōlo ea molao e tla eketseha, baruti ba bolumeli ba bohata ba khelose ba bangata, le hore Bakreste ba ’nete ba tla hlouoa le ho hlorisoa. Tsena kaofela e ne e le litaba tse bohloko.—Matheu 24:4-13; Luka 21:11.

Empa ho ne ho boetse ho e-na le litaba tse molemo. Ka mor’a moo, Jesu o ile a bua mantsoe a qotsitsoeng ka holimo, e leng mantsoe a ’nileng a hlolla le ho susumetsa batho ba bangata ka lilemo tse makholo. Le hoja batho ba lumela hore mantsoe ao a Jesu ke a bohlokoa, ha ba lumellane tabeng ea hore na a bolela’ng. Hantle-ntle litaba tsee tse molemo ke eng? ’Muso ke eng? Boprofeta boo bo tla phethahala neng, hona bo phethahatsoa ke bo-mang? Hona “bofelo” ke eng? A re ke re hlahlobe lintlha tsena.

[Setšoantšo se maqepheng a 2, 3]

Kopi ea Buka e Ngotsoeng ka Letsoho ea Likosepele tse ’Nè ea Washington. Ho totobalitsoe Matheu 24:14

[Tlhaloso ea Moo Setšoantšo se Nkiloeng Teng]

From the book Facsimile of the Washington Manuscript of the Four Gospels in the Freer Collection 1912