Bibele e Fetola Bophelo

• SELEMO SA TSOALO: 1963

• NAHA EA HESO: BRITHANI

• PELE: KE NE KE SEBETSA MOSEBETSI OA MAEMO

BOPHELO BA KA BA NAKONG E FETILENG:

Ke hlahetse Croydon, London Boroa ’me ke ngoana oa botšelela ho ba robong. Batsoali ba ka ba ne ba tsoa sehlekehlekeng sa Caribbean sa St. Vincent. ʼMè o ne a kena kereke ea Methodist. Le hoja ke ne ke e-na le takatso e matla ea ho tseba lintho, ke ne ke sa tsotelle ho ithuta ka Molimo. Ha likolo li koetsoe ke ne ke qeta nako ke lutse ka pel’a letša la sebakeng sa heso, ke bala libuka tse ngata tseo ke neng ke li alima laebraring.

Lilemo tse ’maloa ka mor’a hore ke qete sekolong, ke ile ka hlokomela hore ke batla ho thusa batho ba hlokang. Ke ile ka qala ho thusa batho ba se nang mahae, ba nang le bokooa ’meleng le ba thatafalloang ke ho ithuta. Ka mor’a moo ke ile ka ithutela saense ea tsa bophelo bo botle univesithing. Ha ke qeta lithuto tsa ka, ke ile ka sebetsa mesebetsi e mengata ea maemo a phahameng ʼme ke ne ke phela bophelo bo mabothobotho. Kaha ke ne ke itšebetsa ke le moeletsi litabeng tsa tsamaiso ea khoebo le mofuputsi oa litaba tsa sechaba, sohle seo ke neng ke se hloka e le hore ke sebetse e ne e le k’homphieutha ea ka ea laptop le Inthanete. Ke ne ke tsamaea ka sefofane ho ea linaheng tse ling ka libeke tse ’maloa, ke lula lihoteleng tseo ke li ratang, ke thabela tikoloho e ntle ʼme ke ikhatholla le ho ikoetlisa e le hore ke phele hantle. Ke ne ke nahana hore ke phela hamonate. Empa ke ne ke ntse ke amehile ka batho ba sotlehang.

KAMOO BIBELE E FETOTSENG BOPHELO BA KA KATENG:

Ka lilemo tse ngata ke ile ka ipotsa, ‘Ke hobane’ng ha re le lefatšeng moo, hona re phelela’ng?’ Empa ke ne ke sa ikhathatse ka ho batla likarabo ka Bibeleng. Ka letsatsi le leng ka selemo sa 1999, ’nake oa ka Margaret, eo e neng e se e le Paki ea Jehova, o ile a nketela le motsoalle oa hae oa Paki ea ileng a mpontša lerato. Se makatsang ke hore ke ile ka lumela ho ithuta Bibele le motsoalle oa ngoan’eso, empa ke ile ka lieha ho tsoela pele kaha ke ne ke qeta nako e ngata ke sebetsa le ho phela bophelo ba ka bo mabothobotho.

Lehlabuleng la selemo sa 2002, ke ile ka fallela ka boroa-bophirimela Engelane. Ha ke le moo, ke ile ka ntšetsa pele lithuto tsa ka tsa univesithi thutong ea liphuputso litabeng tsa sechaba, ka morero oa hore ke fumane lengolo le phahameng ka ho fetisisa lekaleng lena. Ke ile ka qala ho ea khafetsa Holong ea ʼMuso le mora oa ka e monyenyane. Le hoja ke ne ke thabela thuto e phahameng, ho ithuta Bibele ho ile ha nthusa hore ke utloisise mathata a bophelo haholoanyane le hore na a ka rarolloa joang. Ke ile ka hlokomela hore Matheu 6:24 e bua ’nete ha e bolela hore motho a ke ke a sebeletsa marena a mabeli. Ke ne ke tlameha ho khetha hore ke sebeletsa Molimo kapa maruo. Ke ne ke tseba hore ke tlameha ho etsa qeto ea hore na ke eng e tlang pele bophelong ba ka.

Selemo pele ho moo, ke ne ke atisa ho ba teng sehlopheng sa thuto ea Bibele moo Lipaki li neng li ithuta buka e bitsoang Is There a Creator Who Cares About You?a Ke ile ka kholiseha hore, ’Mōpi oa rōna, Jehova ke eena feela ea ka rarollang mathata a batho. Empa univesithing ke ne ke rutoa hore ha ho hlokahale hore re lumele ho ’Mōpi e le hore re tsebe hore na re phelela’ng. Ke ile ka halefa haholo. Ka mor’a likhoeli tse peli, ke ile ka tlohela lithuto tsa ka tsa univesithi ʼme ka etsa qeto ea ho ipha nako e eketsehileng ke ithuta ka Molimo.

Temana ea Bibele e ileng ea ntšusumelletsa hore ke fetole bophelo ba ka ke Liproverbia 3:5, 6, e reng: “Tšepa Jehova ka pelo ea hao eohle ’me u se ke ua itšetleha ka kutloisiso ea hao. U mo ele hloko litseleng tsohle tsa hao, ’me o tla otlolla litsela tsa hao.” Ho ithuta ka Molimo oa rōna ea lerato ho ne ho le molemo ho feta maruo le maemo leha e le afe ao ke neng ke tla a fumana ka lebaka la ho ba le lengolo le phahameng la univesithi. Ha ke ntse ke ithuta haholoanyane ka morero oa Jehova ka lefatše le ka karolo eo Jesu a e phethileng ha a re tella bophelo ba hae, takatso ea ka ea ho nehela bophelo ba ka ho ’Mōpi oa rōna e ile ea e-ba matla. Ke ile ka kolobetsoa ka April 2003. Ka mor’a moo, butle-butle ke ile ka fokotsa lintho tse sa hlokahaleng bophelong ba ka.

MELEMO EO KE E FUMANENG:

Setsoalle sa ka le Jehova ke sa bohlokoahali. Ho mo tseba ho entse hore ke fumane thabo le khotso ea ’nete. Ke boetse ke thabile haholo ka lebaka la ho tloaelana le barapeli ba ʼnete ba Molimo.

Takatso ea ka ea ho batla ho tseba lintho e ntse e khotsofatsoa haholo ke seo ke ithutang sona Bibeleng le libokeng tsa Bokreste. Ke rata ho qoqa le batho ba bang ka tumelo ea ka. E se e le mosebetsi oa ka ʼme ka oona nka thusa batho hore ba phele hamolemo hona joale le hore ba be le tšepo e babatsehang ea ho phela lefatšeng le lecha. Ho tloha ka June 2008, ke ile ka qala ho qeta nako e ngata ke ruta batho ka Bibele ʼme ke thabile ebile ke khotsofetse ho feta neng kapa neng. Joale ke se ke tseba hore na ha e le hantle ke phelela’ng ’me ke leboha Jehova e le kannete ka seo.

• SELEMO SA TSOALO: 1973

• NAHA EA HESO: AUSTRIA

• PELE: KE NE KE BECHA

BOPHELO BA KA BA NAKONG E FETILENG:

Ke hōletse motsaneng oa Braunau, Austria. E ne e le sebaka se emeng hantle moruong ʼme tlōlo ea molao e ne e sa ata. Lapeng e ne e le Mak’hatholike ʼme ke ile ka hōlisetsoa bolumeling boo.

Ho na le ketsahalo e ileng ea nkama habohloko bongoaneng ba ka. Ka 1984, ha ke le lilemo li 11, ke hopola ke bapala bolo le e mong oa metsoalle ea ka ea hlooho ea khomo. Motšehare oa mantsiboea hona letsatsing leo, o ile a hlokahala kotsing ea koloi. Lefu la motsoalle oa ka le ile la nkama habohloko haholo. Lilemo tse ngata ka mor’a kotsi eo, ke ne ke ipotsa hore na ho etsahala’ng ka rōna ha re e-shoa.

Ha ke qeta lithuto tsa ka tsa sekolo, ke ile ka sebetsa ke le setsebi sa motlakase. Le hoja ke ne ke tloaetse ho becha le ho bapalla chelete e ngata, ke ne ke se na mathata a chelete. Ke ne ke boetse ke qeta nako e ngata lipapaling ʼme ke ne ke rata le ’mino oa rock o morethetho o boima. Ke ne ke phelela ho ea meketjaneng. Le hoja ke ne ke phelela menate le boitšoaro bo bobe ba ho kopanela liphate, ke ne ke sa thaba ho hang.

KAMOO BIBELE E FETOTSENG BOPHELO BA KA KATENG:

Ka 1995, ntate-moholo e mong oa Paki o ile a kokota moo ke lulang ʼme a mpontša buka e neng e tšohla karabo ea Bibele ea potso e reng, Ho etsahala’ng lefung? Ke ne ke ntse ke tšoentsoe ke ho hlokahala ha motsoalle oa ka e monyenyane, kahoo ke ile ka nka buka eo. Ha kea ka ka bala khaolo e buang ka lefu feela empa ke ile ka bala buka eo kaofela!

Seo ke ileng ka se bala se ile sa araba lipotso tsa ka ka lefu. Empa ke ile ka ithuta lintho tse ling tse ngata. Kaha ke ne ke hōlisitsoe ke le Mok’hatholike, ke ne ke lumela haholo ho Jesu. Leha ho le joalo, ho ithuta Bibele ka hloko ho ile ha nthusa hore ke be le setsoalle se haufi le Ntate oa Jesu, e leng Jehova Molimo. Ke ile ka thabela ho ithuta hore Jehova oa re tsotella le hore o re khothalletsa hore re mo tsebe. (Matheu 7:7-11) Ke ile ka ithuta hore Jehova o na le maikutlo. Ka boela ka ithuta hore oa tšepahala. Sena se ile sa etsa hore ke thahaselle boprofeta ba Bibele haholo le hore ke batlisise hore na bo phethahetse joang. Seo ke ileng ka ithuta sona se ile sa tiisa tumelo ea ka ho Molimo.

Kapele ke ile ka lemoha hore Lipaki Tsa Jehova ke tsona feela tse thahasellang ho thusa batho e le kannete hore ba utloisise Bibele. Ke ne ke tšoaea litemana tsa Bibele tse hlahang libukeng tsa Lipaki ebe ke li bala Bibeleng ea ka ea K’hatholike. Ha ke ntse ke tsoela pele ke batlisisa, ke ile ka lemoha hore ke fumane ʼnete.

Ha ke ntse ke ithuta Bibele ke ile ka hlokomela hore Jehova o lebeletse hore ke phele ka melao ea hae. Ho latela seo ke ileng ka se bala ho Baefese 4:22-24, ke ile ka hlokomela hore ke lokela ho lahla ‘botho ba ka ba khale,’ bo neng bo susumetsoa ke ‘tsela ea ka ea pele ea boitšoaro’ le hore ke lokela ho ‘apara botho bo bocha bo ileng ba bōptjoa ho ea ka thato ea Molimo.’ Kahoo, ke ile ka tlohela bophelo ba ka ba boitšoaro bo bobe. Hape ke ile ka bona bohlokoa ba ho tlohela ho becha, kaha mokhoa oo o etsa hore motho a rate maruo le ho ba meharo. (1 Bakorinthe 6:9, 10) Ke ne ke tseba hore e le hore ke etse liphetoho tseo, ke lokela ho tlohela metsoalle ea ka ea khale ʼme ke batle e mecha e phelang ka melao ea boitšoaro e tšoanang le eo ke phelang ka eona.

Ho ne ho se bonolo ho etsa liphetoho tseo. Empa ke ile ka qala ho ba teng libokeng hammoho le Lipaki Holong ea ʼMuso ʼme ka qala ho etsa metsoalle e mecha ka phuthehong. Ke ile ka boela ka tsoela pele ho ithuta Bibele ka hloko ke le mong. Mehato eo e ile ea etsa hore ke fetole ’mino oo ke o mamelang, lintho tseo ke li phehellang le ho ntlafatsa tsela eo ke shebahalang ka eona. Ka 1995, ke ile ka kolobetsoa ke le e mong oa Lipaki Tsa Jehova.

MELEMO EO KE E FUMANENG:

Hona joale ha ke sa na lerato le feteletseng la chelete le la ho ba le lintho tse ngata. Ke ne ke le sefela-peloana, empa hona joale ke se ke khona ho laola bohale ba ka. Ebile ha ke sa tšoenyehile haholo ka bokamoso.

Ke rata ho ba karolo ea batho ba bangata ba sebeletsang Jehova lefatšeng lohle. Har’a bona, ho na le batho ba sebeletsang Molimo ka botšepehi le hoja ba e-na le mathata. Hona joale ke thabela hore ke qeta nako eohle ea ka le matla borapeling ba Jehova le ho etsetseng batho ba bang lintho tse molemo, ho e-na le ho leka ho khotsofatsa litakatso tsa ka.

• SELEMO SA TSOALO: 1963

• NAHA EA HESO: ENGELANE

• PELE: KE NE KE SE NA TŠEPO BOPHELONG

BOPHELO BA KA BA NAKONG E FETILENG:

Ke hlahetse Engelane empa ha ke le lilemo tse ka bang tse supileng lelapa leso le ile la fallela Australia. Re ile ra lula Gold Coast, e leng sebaka se neng se eteloa ke bahahlauli se neng se le Queensland, Australia. Le hoja lapeng re ne re se barui, re ne re sa hloke letho.

Le hoja ke hōtse ke sa hloke letho, ha e le hantle, ho ne ho se mohla ke thabileng. Ho hang ke ne ke se na tšepo bophelong. Ntate o ne a noa joala haholo. Ka lebaka la hore o ne a noa joala haholo a bile a sa tšoare ’Mè hantle, ke ne ke sa mo rate hakaalo. Ke ile ka qala ho utloisisa hore na ke hobane’ng ha a ne a itšoara joalo ka mor’a hore ke utloe ka lintho tseo a ileng a feta ho tsona ha e ne e le lesole Malaya.

Ke ile ka qala ho itlopa joala ha ke le lilemong tsa bocha. Ha ke le lilemo li 16 ke ile ka tlohela sekolo ka ea sesoleng sa metsing. Ke ile ka qala ho sebelisa lithethefatsi ’me ka ba lekhoba la koae. Hanyane ka hanyane ke ile ka iphumana ke se ke sa khone ho lula ke sa noa joala. Ke ne ke se ke sa itlope joala ka mafelo-beke feela empa e ne e se e le ntho ea letsatsi le letsatsi.

Ha ke kena lilemong tsa bo-20 ke ile ka qala ho belaela hore na Molimo o teng. Ke ile ka re: ‘Haeba Molimo o teng, ke hobane’ng ha a lumella batho hore ba utloe bohloko le hore ba shoe?’ Ke ile ka ba ka ngola thothokiso e neng e beha Molimo molato ka bokhopo bo teng lefatšeng.

Ke ile ka tlohela ho ba lesole la metsing ha ke le lilemo li 23. Ka mor’a moo ke ile ka etsa mesebetsi e fapa-fapaneng ka ba ka ea mose ka nako e etsang selemo empa ke ne ke ntse ke se na tšepo bophelong. Ho ne ho se na ntho eo ke e labalabelang bophelong. Ke ne ke sa khahloe ke letho. Ke ne ke sa bone bohlokoa ba ho ba le ntlo, ho ba le mosebetsi o tsitseng ebile ke sa khathalle hore na kea nyolloa mosebetsing kapa che. Ntho feela e neng e etsa hore ke “thabe” e ne e le ho noa joala le ho mamela ’mino.

Ke hopola hantle nako eo ke ileng ka ba le takatso e matla ea ho batla ho tseba hore na ke phelela’ng. Ke ne ke le Poland, ke etetse kampo ea mahloriso e neng e e-na le botumo bo bobe ea Auschwitz. Ke ne ke ile ka bala ka liketso tse sehlōhō tse ileng tsa etsahala moo. Empa ha ke ne ke eme moo ke bona kamoo kampo ena e leng khōlō kateng, ke ile ka ameha haholo maikutlong. Ke ne ke sa utloisise hore na ho tla joang batho ba tšoare batho ba bang ka sehlōhō hakaalo. Ke hopola ke ntse ke potoloha kampo eo ke lla, ke ipotsa, ‘Hobane’ng?’

KAMOO BIBELE E FETOTSENG BOPHELO BA KA KATENG:

Ka 1993, ka mor’a hore ke khutle mose ke ile ka qala ho batla likarabo ka Bibeleng. Nakoana ka mor’a moo, Lipaki Tsa Jehova tse peli li ile tsa fihla moo ke lulang ’me tsa ’memela kopanong e neng e tla tšoareloa lebaleng la lipapali le haufi le moo ke lulang. Ke ile ka ea.

Ke ile ka ba lebaleng leo likhoeli tse ’maloa pele ho moo ke il’o shebella papali, empa kopanong ena ke ile ka bona phapang e khōlō. Lipaki li ne li le mosa li bile li apere hantle ’me bana ba ne ba itšoere hantle. Seo ke ileng ka se bona ka nako ea khefu, se ile sa ’makatsa. Lipaki tse makholo li ile tsa jella lijo tsa motšehare lebaleng, empa ha li khutlela litulong tsa tsona li ile tsa siea lebala le hloekile joalokaha eka li ne li sa jelle moo! Ka holim’a tsohle, batho bana ba ne ba bonahala ba khotsofetse ebile ba e-na le khotso—e leng ntho eo ke neng ke e labalabela. Ha ke hopole lipuo tse neng li fanoa letsatsing leo empa ke ile ka lula ke hopola kamoo Lipaki li neng li itšoere kateng.

Mantsiboeeng ao ke ile ka nahana ka motsoal’a ka ea neng a bala Bibele ebile a ithuta ka malumeli a fapaneng. Lilemo tse ’maloa pejana, o ile a mpolella hore Jesu o itse re tla tseba bolumeli ba ’nete ka litholoana tsa bona. (Matheu 7:15-20) Ke ile ka re bonyane ke mpe ke batlisise hore na ke eng e etsang hore Lipaki li fapane le malumeli a mang. Ka lekhetlo la pele bophelong ba ka, ke ile ka ikutloa ke na le tšepo.

Bekeng e latelang, Lipaki tse peli tse ileng tsa ’memela kopanong li ile tsa khutla. Li ile tsa kōpa ho ithuta Bibele le ’na ’me ke ile ka lumela. Ke ile ka qala ho ea le tsona libokeng tsa Bokreste.

Ha ke ntse ke ithuta Bibele, tsela eo ke neng ke ikutloa ka eona ka Molimo e ile ea fetoha ka ho feletseng. Ke ile ka ithuta hore hase eena ea bakang bokhopo le mahlomola le hore eena ka boeena o utloa bohloko ha batho ba etsa lintho tse mpe. (Genese 6:6; Pesaleme ea 78:40, 41) Ke ile ka ikemisetsa hore ke tla leka ka matla hore ke se ke ka utloisa Jehova bohloko ka tsela leha e le efe. Ke ne ke batla ho thabisa pelo ea hae. (Liproverbia 27:11) Ke ile ka tlohela ho noa haholo le ho tsuba ’me ka tlohela le boitšoaro bo bobe ba ho kopanela liphate. Ka March 1994, ke ile ka kolobetsoa ’me ka ba e mong oa Lipaki Tsa Jehova.

MELEMO EO KE E FUMANENG:

Ke thabile e le kannete ebile ke khotsofetse. Ha ke sa leka ho rarolla mathata a ka ka hore ke noe joala. Ho e-na le hoo, ke ithutile hore ke lahlele moroalo oa ka ho Jehova.—Pesaleme ea 55:22.

Ke na le lilemo tse leshome ke nyalane le mosali e motle oa Paki eo lebitso la hae e leng Karen ea nang le morali ea babatsehang ea bitsoang Nella, eo ke mo nkang joaloka morali oa ka. Boraro ba rōna re thabela ho qeta nako e ngata re le tšebeletsong ea Bokreste, re thusa batho ho ithuta ’nete ka Molimo. Joale ke se ke tseba seo ke se phelelang.