Litaba Tsa Puso ea Molimo

◼ Afrika Boroa: Khoeling ea March ho ile ha neheloa Liholo tsa ’Muso tse ling hape tse peli, e leng ea Oukasie (Brits) le Maun (Botswana). Re thaba le bona hore ebe ka mor’a lilemo tse ngata hona joale ba na le libaka tsa bona tsa borapeli. Ka lebaka la hore baithaopi ba ne ba tsamaea sebaka se selelele ho ea thusa Phuthehong ea Maun, ho ba nkile lilemo tse tharo hore ba hahe holo ea bona. Komiti ea Kaho ea Libaka ea Botswana e ile ea thusa ho phetha holo eo. Hape, selemong se fetileng lelapa le leng le ile la arabela pitsong e neng e le ho Tšebeletso ea Rōna ea ’Muso ea November 1998 ea ho ea sebeletsa moo tlhokahalo e leng khōloanyane, ’me le ile la thusa ho phetha holo eo ha le ntse le sebetsa tšimong ea Senyesemane. Re leboha barab’abo rōna bohle le Likomiti tsa Kaho tsa Libaka ba ileng ba thusa ka merero ena. Re khothalletsa liphutheho tsohle tse hahang liholo tsa tsona hore li ipehele pakane ea ho li nehela pele selemo sena se fela. Komiti ea Kaho ea Libaka ea sebaka ka seng e tla thabela ho le thusa tabeng ena.