U ka Thaba ha U Bolela Litaba Tse Molemo

Ho ka etsahala hore ebe u utloa ho le thata ho bolela litaba tse molemo. Ha se uena u le mong. A mang a mabaka e ka ba hore ha re le tšimong re kopana le batho ba re hanyetsang kapa hore re tšaba ho qoqa le batho bao re sa ba tsebeng. Mabaka ana a ka etsa hore re utloe re sa rate ho bolela litaba tse molemo. Re sebeletsa Molimo ea thabileng ea bileng a ratang hore re mo sebeletse re thabile. (Pes. 100:2; 1Tim. 1:11) Kahoo re tl’o ithuta mabaka a mararo ao re nang le ona a ka re thusang ho lula re thabile ha re bolela litaba tse molemo.

La pele ke hore molaetsa oo re o bolelang o fa batho tšepo. Le hoja batho ba bangata ba felloa ke tšepo mehleng ena, re ka ba bolella “litaba tse molemo tsa ho hong ho molemo.” (Esa. 52:7) Litaba tsena ha li thabise batho bao re ba bolellang tsona fela li boetse lia re thabisa. Pele u bolella batho ka ’Muso oa Molimo, nahanisisa ka litlhohonolofatso tseo re tla li fumana ha Molimo a se a busa lefatše.

Lebaka la bobeli ke hore litaba tsena li thusa batho ho phela hantle le hore ba be le kamano e ntle le Molimo. Ba ithuta ho etsa lintho ka tsela e khahlisang Molimo hape ba ba le tšepo ea ho phela ka ho sa feleng. (Esa 48:17, 18; Bar. 1:16) Re ka tšoantša seo re se etsang le mosebetsi oa ho batla batho ba mathateng le ho ba pholosa. Le hoja batho ba bang ba sa batle ho mamela molaetsa oa rona, re tsoela pele ho batla ba ka thabelang ho pholoha.​—Mat 10:11-14.

Lebaka la boraro ebile e la bohlokoa ka ho fetisisa ke hore mosebetsi oo re o etsang o tlotlisa Jehova. O nka mosebetsi oo re o etsang e le oa bohlokoa haholo. (Esa 43:10; Baheb. 6:10) Ho feta moo, o re thusa ho etsa mosebetsi ona ka hore a re fe moea oa hae o halalelang. Kahoo, u kope Jehova hore a u fe moea oa hae, kaha u tla lula u thabile. (Bagal. 5:22) A ka re thusa hore re bolele ka sebete. (Lik 4:31) Ha ho le joalo, re tla thabela ho etsa mosebetsi ona ho sa tsotellehe hore na batho baa mamela kapa che.​—Ezek. 3:3.

SHEBELLA VIDEO EA THABELA HO ITHUTA BIBELE, EBE U ARABA LIPOTSO TSE LATELANG:

• Ke hobane’ng ha re lokela ho ipha nako ea ho ithuta Bibele le hoja re qeta nako e ngata re bolela litaba tse molemo?

• Re ka etsisa Mary joang?

• U nahanisisa ka Lentsoe la Molimo neng?

• Ke eng e u thabisang ha u bolela litaba tse molemo?