Lokisang Bothata Kapele

Nahana ka mohlala ona, lesapo le robehileng le lokela ho okoa e le hore le sebetse hantle le sa ope. Empa le tla lula le opa haeba le sa tlamisoe kapele. Ho feta moo, lesapo leo le ka ’na la se ke la sebetsa hantle hobane le sa fola hantle.

Joaloka lesapo le robehileng, haeba setsoalle sa hao le Mokreste-’moho se senyehile, le lokela ho se lokisa kapele. Ho seng joalo, bohloko ba ho senyeha ha setsoalle sa lona bo ke ke ba fela. Le ka halefa haholo hoo le seng le sa batle ho ba metsoalle hape. Jesu o ile a re: “Potlakela ho lokisa litaba.” (Mat. 5:25) Kahoo, e ea ho motsoalle oa hao ’me ka mosa u mo bolelle hore na u ikutloa joang ka bothata boo. Ke hobane’ng ha ho ka ba thata ho etsa joalo? Nahana ka mabaka ana a mabeli.

La pele, mohlomong ha u motho ea ratang ho bua ka mathata a hao, kahoo u ka lekeha ho iphapanyetsa bothata ho e-na le ho bo rarolla.b Nahana ka Evodia le Sintike, e leng barali ba bo rona ba Bakreste ba neng ba sa khone ho rarolla bothata ba bona. Ho bonahala bothata boo bo ile ba tsoela pele ka nako e telele hoo le moapostola Pauluse ea neng a le hole Roma, a ileng a utloela ka bona. O ile a ba khothalletsa ho etsa sohle seo ba ka se khonang ho bopa khotso. (Bafil. 4:2) E ne e ka boela ea e-ba metsoalle haeba ba ikokobelitse, ba buisana ka bolokolohi ba bile ba tšoarelana ho tsoa pelong.

La bobeli, u ka ’na oa lebella hore motho e mong a amohele hore o entse phoso. Empa ha u batla hore le be metsoalle hape, u se ke oa batlana le hore na ke mang ea entseng phoso. Ngaka e tlamisang lesapo le robehileng, e ameha ka ho le khutlisetsa malulong ho e-na le ho batlana le hore na ho tlile joang hore le robehe. Ha u bua le motsoalle oa hao, u se ke oa batlana le hore na ke mang ea molato. Ho e-na le hoo, hopola hore na setsoalle sa lona se bohlokoa hakae ’me u tsepamise kelello ea hao ho seo u lokelang ho se etsa hore se loke.

Haeba u na le bothata le mora kapa morali oa bo rona, bua le eena kajeno e le hore le lokise setsoalle sa lona. “Letsatsi le se ke la likela le ntse le halefile.” (Baef. 4:26) Ha le nka mehato e tla le thusa hore le lokise bothata kapele, seo se tla le thusa hore “le lule le momahane ka hore le be le khotso.”—Baef. 4:1-3.