Lengolo le Tsoang ho Sehlopha se Busang
Basebetsi-’moho le Rōna ba Ratehang ba Lipaki Tsa Jehova:
Barab’abo rōna ba ratehang, re thabela ho le ngolla lengolo lena! Re ikutloa joaloka moapostola Johanne ea ileng a re ‘kannete o rata’ balumeli-’moho le eena ’me o thabela hore ebe “ba tsamaea ’neteng.” (2 Joh. 1, 4) Ruri ’nete ke ea bohlokoa ho rōna kaofela! ’Nete e re lokolotse Babylona e Moholo esita le lithutong le lineanong tsa eona tse hlomphollang Molimo. Ho mamela Molimo ho re thusitse hore re be batho ba lerato, ba mosa le ba mohau. Ho phaella moo, ’nete e re file monyetla oa hore re be batho ba hloekileng ka pel’a Molimo le hore re fumane bophelo bo sa feleng.
Ka sebele, re boetse re ananela moea oa Jehova o re tataisang le ho re matlafatsa letsatsi le leng le le leng. Re kholisehile hore Kopanong ea Setereke e sa tsoa feta ea “Re Tataisoa ke Moea oa Molimo,” le ile la thabela ho ithuta litsela tse sa tšoaneng tseo ka tsona Jehova a re tataisang le ho re matlafatsa ka lerato a sebelisa moea oa hae. Ha maemo a lefatše a ntse a mpefala, ke habohlokoa hore re itšetlehe ka moea oa Jehova o matla hore o re tataise matsatsing a mahlonoko a tlang.
Re kholisehile hore le ile la ameha maikutlo haholo ha le bala litlaleho tse thahasellisang tse hlahang Bukeng ea Selemo tse buang ka barab’abo rōna ba mameletseng lintho tse bohloko haholo ka lebaka la tumelo ea bona. Ntlha e ’ngoe e tsotehang ke hore, bongata ba batho bana ba tšepahalang ba ne ba sa tsoa kolobetsoa kapa ba e-s’o kolobetsoe ha mathata a hlaha. Re ba rata haholo ka lebaka la botšepehi ba bona le ho emela se lokileng! Ruri mohlala oa bona o babatsehang oa re matlafatsa hore re ikemisetse ho lula re tšepahalla ’Muso ho sa tsotellehe tlokotsi leha e le efe eo re ka thulanang le eona.—1 Bathes. 1:6-8.
Bara le barali babo rōna ba ratehang, rea tseba hore le lokela ho loana le mathata a mangata a moruo le a mang e le hore malapa a lōna a lule a momahane ka lerato. Bonneteng hase kamehla ho leng bonolo ho ba bang ba lōna hore ka botšepehi ba tšehetse mosebetsi oa ho bolela ka ’Muso le ho ea libokeng tsa phutheho. Ke ka lebaka leo ka mor’a ho tšohla taba ena haholo le ho e rapella, re ileng ra fetola kemiso ea liboka tsa phutheho ho tloha ka la 1 January, 2009. Re tšepa hore le tla etsa hore liphetoho tsena li le tsoele molemo e le hore le qete nako e eketsehileng le ithuta boinotšing kapa le ithuta le malapa a lōna.
E bile ho thabisang haholo ho bona ba bangata ba ileng ba tšoaneleha bakeng sa kolobetso likopanong tse sa tšoaneng tse khōlō le tse nyenyane selemong sena. Ba bang ba bona ba ne ba sa le banyenyane haholo. Rea le babatsa lōna batsoali ha e le mona le hōlisitse bana ba lōna ka tsela e entseng hore ba ananele ’nete le bile le ba khothalelitse hore ba inehele ho Jehova ba be ba mo sebeletse ba sa le banyenyane. Taba ea hore ebe bana bana ba ratehang ba ile ba tšoaneleha ho kolobetsoa le hoja ba thulana le mathata a mangata sekolong, e totobatsa hore ba koetlisitsoe hantle lapeng.—Pes. 128:1-6.
Ntlha e ’ngoe e babatsehang eo re lokelang ho e bolela ke hore mosebetsi oa ho ruta batho Bibele o eketsehile—’me baromuoa ba rōna le bo-pula-maliboho ba khethehileng ba sebetsang ka thata ba khathile tema e khōlō keketsehong ena. Kaofela ha rōna re le litho tsa Sehlopha se Busang, re ananela haholo mosebetsi oa bohlokoa oo bara le barali babo rōna ba o etsang lefatšeng ka bophara ha ba ntse ba re ho batho ba lipelo li ntle “Tloo!” ba bile ba mema bohle ba nyoriloeng hore ba “nke metsi a bophelo ntle ho tefo.” (Tšen. 22:17) Lōna ba 289 678 ba tšoantšelitseng boinehelo ba lōna ka ho kolobetsoa metsing selemong sena se fetileng, re le amohela ka liatla tse peli mokhatlong oa lefatše lohle oa bara ba motho!
E se eka re ka lula re ikhopotsa mantsoe a moapostola Johanne, ha a ne a re: “Lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.” (1 Joh. 2:17) Kaha re se re le haufi haholo le nako eo ka eona lefatše lena le tla ‘feta,’ ka sebele ke habohlokoa ho tiisa hore re phelela ho etsa thato ea Molimo ’me ‘re lule re lebetse.’ (Mat. 24:42) Haeba re etsa joalo, le ka mohla re ke ke ra ikoahlaea, ho e-na le hoo re tla kotula melemo ea mosa oa Jehova o lerato.—Esa. 63:7.
Re tšepa hore litlaleho tse susumetsang maikutlo tse tsoang linaheng tse ngata khatisong ena ea Buka ea Selemo, li tla le khothatsa kaofela ha lōna hore le behe lintho tse amanang le ’Muso pele bophelong ba lōna. Kholisehang hore re lula re nahanne ka lōna ebile re le rapella ka linako tsohle ’me re le rata haholo. E se eka Jehova a ka le tšollela litlhohonolofatso ka ho enneng.
Barab’abo lōna,
Sehlopha se Busang sa Lipaki Tsa Jehova