Balisa ba Lerato, Linku Tse Tšepang Balisa
MEHLENG ea Bibele kamano e haufi mahareng a molisa le linku tsa hae e ne e le taba e tloaelehileng. Hangata molisa e ne e le mong’a linku kapa setho sa lelapa la mong’a linku. Hoseng o ne a e-ea lesakeng ’me a bitse mohlape oa hae har’a e meng e mengata e koaletsoeng moo. O ne a tseba linku tsa hae; le tsona li ne li tseba lentsoe la hae. O ne a sa li khanne kamorao—o ne a li etella pele ’me le tsona li ne li mo latela. O ne a li isa makhulong a matala esita le metsing a pholileng. Mantsiboea ha boemo ba leholimo bo le bobe, o ne a li khutlisetsa lesakeng kapa a li sireletsa lehaheng. Ha boemo ba leholimo bo le botle, o ne a lula masiu le tsona tlas’a linaleli—joaloka lehoetleng la selemo sa 2 B.C.E. ha balisa “ba phelang metebong, ba lebetse mehlape ea bona bosiu.”—Luka 2:8.
Haeba nku e ’ngoe e ne e lahleha, molisa o ne a e batla ho fihlela a e fumana. (Luka 15:4) Tse 99 li ne li sa mo khotsofatse ho fihlela e lahlehileng e fumanoa.
Kamano ea molisa oa Bochabela le mohlape oa hae e ne e le ea maikutlo a tebileng, joaloka ha e mong oa bona a tiisa: “Ho lahleha ha nku ho ne ho tlisa masoabi moeeng oa ka. Ha e ’ngoe ea tsona e ne e kula kapa e rekisoa, ke ne ke lla hobane ke ne ke khaohana le motsoalle eo ke neng ke mo hlokomela ’me le eena a ntlhokomela. Tlas’a leholimo le hlakileng le phatsimang linaleli la Linaha tsa Bibele, ke moo ho neng ho hōla ntho e ’ngoe, e neng e hōla le ka hare ho ’na, kamano ea bonngoe le bonolo mahareng a molisa le mohlape oa hae. Boinotšing ba bona, ho se motho haufi, linakong tsa khotso kapa kotsi, molisa le linku ba ne ba ikutloa ka ho tšoanang.”
Molisa ea tšepahalang e ne e le mosireletsi ea sa tšabeng. O ne a loantša masholu a tlileng ho utsoa. O ne a nka mohlala oa libatana tse tlileng ho harola linku. ’Me joaloka molisa e monyenyane Davida, o ne a tseba ho betsetsa letjeketjane ka nepo. (1 Samuele 17:34-36, 49; bona hape Baahloli 20:16.) Haeba nku e ne e harotsoe, molisa o ne a batla likotoana tsa masapo kapa letlalo bakeng sa bopaki ba phoofolo e lahlehileng. Ho ne ho le joalo haholo-holo haeba molisa e ne e le motho ea hiriloeng—ntle ho bopaki bo joalo o ne a ka belaelloa hore o e utsoitse.—Exoda 22:12-15; bapisa Amose 3:12.
Linku li ne li tšepa balisa ba tsona. Tse ngata li ne li reiloe mabitso a hlalosang—e tsebe e letlere, e mohatla o mafura, e sefahleho se setšo, e tšoeu. Ha molisa a ne a bitsa mabitso a tsona, li ne li arabela. Mofuputsi e mong o netefalitse sena ha a feta mohlapeng oa linku. O pheta se latelang: “Ke ile ka kōpa [molisa] ho bitsa e ’ngoe ea linku tsa hae. O ile a etsa joalo, hang e ile ea tlohela ho fula ’me ea siea tse ling, ’me ea mathela matsohong a molisa, ka lipontšo tsa thabo, le ka kutlo e potlakileng eo ke neng ke e-s’o ka ke e bona liphoofolong tse ling. Ke ’nete hore naheng ena, hore ‘osele li ke ke tsa mo latela, empa li tla mo balehela.’”
Jesu o pakile ’nete ea taba e kaholimo ha a itsebahatsa e le Molisa ea Molemo ho balateli ba hae ba kang linku: “Linku li ee li utloe lentsoe la hae, ’me a bitse linku tsa hae ka mabitso a tsona, a li ise ka ntle. Ere hobane a ntše linku tsa hae, a li etelle pele, ’me linku li mo latele, ka hobane li utloa lentsoe la hae, osele li ke ke tsa mo latela, empa li tla ’malehela, ka hobane li sa tsebe lentsoe la osele. Ke ’na molisa ea molemo, ke tseba linku tsa ka, le linku tsa ka lia ntseba, joale ka ha Ntate a ntseba, le ’na ke tseba Ntate; ’me ke beela linku bophelo ba ka.”—Johanne 10:3-5, 14, 15.
Hase Kreste Jesu feela ea bitsoang molisa empa le Jehova Molimo o bitsoa molisa. “Jehova ke molisa oa ka,” ho boletse mopesaleme. Eena joaloka Jesu o bontša kameho e lerato bakeng sa “mohlape oa makhulo a hae.” Ka eena ho ngotsoe: “O tla alosa mohlape oa hae ka mokhoa oa molisa, o tla bokella likonyana matsohong a hae, a li jare sefubeng sa hae; le tse anyesang, a li sotetse butle.”—Pesaleme 23:1; 100:3; Esaia 40:11.
Empa ho balisa ba bohata ba hlokofatsang mohlape oa hae, Jehova o re: “Ke tla namolela mohlape oa ka melomong ea bona, ha e sa tla ba lijo tsa bona.”—Ezekiele 34:10.
Ka lebaka la boitšoaro le thuto ea balisa ba kajeno ba bolumeli, ba talimeha joang mahlong a Jehova? Sehlooho se latelang se tla bontša sena.
[Ntlha e qolotsoeng leqepheng la 27]
“Ke ofe motho har’a lōna, ea nang le linku tse lekholo, ha a lahlehetsoe ke e ’ngoe ea tsona, a ke keng a tlohela tse mashome a robileng mono o le mong a metso e robileng mono o le mong feelleng, a ee ho batla e lahlehileng, a tle a be a e bone?”