Puso ea Motho e Lekantsoe Sekaleng
Karolo 1c: Puso ea Motho e Lekantsoe Sekaleng—Hobane’ng?
“Tsoha!” e thabela ho tsebisa letoto la lihlooho “Puso ea Motho e Lekantsoe Sekaleng”
HA HO motho ea ka latolang tšusumetso eo mebuso—ha re lebisa puisano ea rōna lipolotiking—e bileng le eona historing ea lefatše le ho e mong le e mong oa rōna. Puo eo u e buang, litekanyetso tsa bophelo tseo u li phehellang, mosebetsi oo u o etsang, tsamaiso ea sechaba eo u e thabelang, mohlomong le bolumeli boo u ipolelang hore ke ba hao, mohlomong ke mohopolo oo u o tliselitsoeng ke phetoho ea lipolotiki.
Kaha re hloka ’muso, ke mang ho rōna ea sa lakatseng ho phela tlas’a ’muso o tla khotsofatsa litlhoko tsa rōna ka tsela e molemohali? Empa ke ’muso oa mofuta ofe o molemo ka ho fetisisa? Hona na re na le khetho leha e le efe tabeng ea puso?
Tsoha! e thabela ho tsebisa letoto la lihlooho “Puso ea Motho e Lekantsoe Sekaleng.” Lihlooho tsena li tla tsoela pele litokollong tse latelang tsa makasine ona. Karolong e setseng ea 1990, e tla bua ka histori ea tsamaiso ea puso ea borena, tsamaiso ea puso moo ho lumeloang hore sehlotšoana sa batho se molemo ke sona se nang le lentsoe, tsamaiso ea puso moo sehlotšoana sa batho ka mabaka a boithati se nang le lentsoe, le tsamaiso ea puso ea barui. E tla hlahloba ka ho pharalletseng tsamaiso ea puso ea sechaba ka sechaba, hammoho le mefuta e mengata ea boipuso. E tla lebisa tlhokomelo tsamaisong ea puso moo ho lumeloang hore sehlotšoana sa batho se molemo ke sona se nang le lentsoe, puso ea bohatelli, mebuso ea bopolotiki ea bompoli joaloka oa Bofasi le oa Bonazi nakong ea Ntoa ea II ea Lefatše. Ho tla boetse ho buisanoa ka tsamaiso ea puso moo sechaba se nang le lentsoe lipolotiking le tlhahisong ea lintho le Bokomonisi.
Litsamaiso tsa puso ea batho li ngata ebile li rarahane, kahoo ha se sohle seo u se tsebang ka mebuso se tla tšohloa. Lihlooho tsena ha lia rereloa hoba pokello ea litaba tsa lipolotiki. Li ke ke tsa ntšetsa pele lithahasello tsa mebuso ea batho ka kakaretso kapa ho buella mofuta o mong oa ’muso ka tsela leha e le efe. Ho bapisa mebuso leha e le efe e ke ke ea ba ka morero oa ho phahamisa o mong ho o mong. Tsoha! e tla khomarela mehato ea eona haufi-ufi e boletsoeng leqepheng la 5, moo re balang: “E fata liketsahalo tsa hona joale le ho totobatsa se boleloang ke tsona, leha ho le joalo ha e itšunye litabeng tsa bopolotiki.”
Lihlooho tsa “Puso ea Motho e Lekantsoe Sekaleng” li reretsoe hoba karolo ea ho “fata liketsahalo.” Li tla “totobatsa se boleloang ke tsona,” e leng liketsahalo tse bontšang hore puso ea motho e talimane le tlokotsi.
Buka The Columbia History of the World e hlalosa tlokotsi ka tsela ena: “Boemo boo re fumanang ’muso, bolumeli, boitšoaro, kamano ea sechaba, puo, mesebetsi, bophelo bo tsoetseng pele le tšepo ea sechaba, bo re lumella ho etsa qeto e sa tsitsang ka boholo ba mebuso ea joale. ’Muso ke ’ona oa pele lethathamong ’me ke ’ona oa bohlokoa bo boholo. . . . [Ho na le] ho se utloe molao ’Musong o o qobellang, le babusi ba ntseng ba lumela linthong tsena ka bobeli. . . . Pono ea joale ea lintho ha e lumellane le ea lekholo le fetileng la lilemo . . . Likarolong tse ngata tsa lefatše masole ke malala-a-laotsoe ho hlasela holo ea motse, ho qhala lekhotla la sechaba, morusu univesithing, kapa ho koala ntlo ea boemeli ba ’muso o mong. . . . Takatso ea ho batla tokoloho ka ho felletseng e matla haholo. . . . Ka bokhutšoaane, khopolo e ’ngoe ea bopolotiki le ea sechaba, ke matla a mang a susumetsang a Karohano, ho sa tsotellehe hore na a hlahella tlas’a filosofi efe. Haeba sena ha e e-s’o be Karohano, ntle ho pelaelo ke Tšitiso.”
Na “Karohano” e tla potlaka ho lebisa ‘Tšitisong,’ ’me haeba ho joalo, phello e tla ba efe bakeng sa lefatše leo re phelang ho lona? Bonneteng, puso ea motho e kahlolong empa eseng ka batho feela ba ’nileng ba lekanya mebuso ea bona ka lilemo tse likete ’me ka makhetlo a mangata e fumanoa e le bobebe. Joale ’Mōpi oa bokahohleng bohle ka seqo o batla ba ikarabelle. Na tlaleho ea puso ea batho ka makholo a lilemo e lokafatsa ho lumelloa ha eona hore e tsoele pele ho busa? Kapa ho behoa ha eona sekaleng sa bomolimo ho bontša hore e lokela ho felisoa? Haeba ho joalo, e tla nkeloa sebaka ke eng?
Letoto la lihlooho “Puso ea Motho e Lekantsoe Sekaleng” le tla eketsa tsebo ea hao ka mebuso. Le tla u neha tšepo hobane u na le mabaka a utloahalang a ho ba le tšepo. ’Muso o molemohali oa tla. Ho molemo le ho feta, u ka phela hore u o thabele!
[Litšoantšo tse leqepheng la 9]
Ha tlaleho ea puso ea motho e lekanngoa sekaleng sa toka ea bomolimo, na kahlolo ea Molimo e tla ba e molemo?
[Tlhaloso ea Moo Setšoantšo se Nkiloeng Teng]
Foto ea WHO/PAHO ka J. Vizcarra