Pono ea Bibele
Na Malumeli ’Ohle ke Litsela Tse sa Tšoaneng Tse Lebisang ho Molimo?
MONGOLI Marcus Borg o ile a re: “Ka sebele ke fumana e le ntho e makatsang hore ebe Molimo oa bokahohle o khethile hore a tsejoe ke sehlopha se le seng sa bolumeli.” Mohapi oa Khau ea Khotso ea Nobel, Desmond Tutu, o ile a re: “Ha ho na bolumeli bo ka bolelang hore bo na le ’nete ka ho feletseng ka sephiri” sena sa tumelo. Khopolo e tloaelehileng ea Mahindu ke ho re “Jotto moth, totto poth,” eo ha e fetoleloa e bolelang hore malumeli ’ohle ke litsela tse sa tšoaneng tse lebisang pakaneng e tšoanang. Mabuddha le ’ona a na le pono ena. Ka sebele, batho ba limilione ba nahana hore malumeli ’ohle ke litsela tse sa tšoaneng tse lebisang ho Molimo.
Rahistori Geoffrey Parrinder o ile a re: “Ka linako tse ling ho boleloa hore malumeli ’ohle a na le lipakane tse tšoanang, kapa ke litsela tse tšoanang tse lebisang ’neteng, kapa esita le hore a ruta lithuto tse tšoanang.” Ka sebele lithuto, lineano, le melimo ea malumeli lia tšoana. Malumeli a mangata a bua ka lerato ’me a ruta hore ho bolaea, ho utsoa, le ho bua leshano ke lintho tse fosahetseng. Lihlopheng tse ngata tsa malumeli, ba bang ba etsa boiteko bo tiileng ba ho thusa ba bang. Kahoo haeba motho a tšepahala linthong tseo a li lumelang ’me a leka ka hohle ho phela bophelo bo botle, na hoa tsotelleha hore na ke oa bolumeli bofe? Kapa na malumeli ’ohle ke litsela feela tse sa tšoaneng tse lebisang ho Molimo?
Botšepehi Feela—Na bo Lekane?
Ak’u nahane ka mohlala oa monna oa Mojuda oa lekholong la pele la lilemo ea bitsoang Saule, ea ileng a fetoha moapostola oa Mokreste ea ileng a tsejoa e le Pauluse. E ne e le molateli ea chesehang oa tsamaiso ea bolumeli ea Sejuda ’me sena se ile sa etsa hore a batle ho felisa borapeli ba balateli ba Kreste, borapeli boo a neng a nahana hore bo fosahetse. (Liketso 8:1-3; 9:1, 2) Empa ka lebaka la mohau oa Molimo Saule o ile a lemoha hore batho ba tšepahalang joaloka eena ba ka chesehela Molimo, empa leha ho le joalo, ka lebaka la ho haelloa ke tsebo, ho ka etsahala hore ebe ba fositse. (Baroma 10:2) Ha Saule a ithuta ho eketsehileng ka Molimo le litšebelisano tsa hae, o ile a fetoha ’me a qala ho rapela le bona bao a neng a ntse a ba hlorisa, balateli ba Jesu Kreste.—1 Timothea 1:12-16.
Na Bibele e re ho na le litumelo tse makholo tseo ho ka khethoang ho tsona le hore ho sa tsotellehe hore u khetha efe ho lokile ho Molimo? Moapostola Pauluse o ile a amohela litaelo ho Jesu Kreste ea tsositsoeng tse neng li hlalosa se fapaneng. Jesu o ile a mo romela ho batho ba lichaba “ho bula mahlo a tsona, ho li reteletsa ho tloha lefifing ho tla leseling le ho tloha matleng a Satane ho tla ho Molimo.” (Liketso 26:17, 18) Ka sebele, ka ho hlakileng hoa tsotelleha hore na re khetha bolumeli bofe. Batho ba bangata bao Pauluse a neng a rometsoe ho bona ba ne ba se ba ntse ba e-na le bolumeli. Empa ba ne ba le “lefifing.” Ka sebele, haeba malumeli ’ohle ke litsela tse sa tšoaneng feela tse lebisang bophelong bo sa feleng le ho amoheloeng ke Molimo, ho ka be ho sa ka ha hlokahala hore Jesu a koetlise balateli ba hae bakeng sa mosebetsi oa ho etsa barutuoa oo a ba laetseng hore ba o etse.—Matheu 28:19, 20.
Thutong ea hae e tummeng ea Thabeng, Jesu o ile a re: “Kenang ka heke e moqotetsane; hobane tsela e isang timetsong e pharaletse ebile e khōlō, ’me ba kenang ka eona ba bangata; athe heke e isang bophelong e moqotetsane le tsela e isang teng e patisane, ’me ke ba seng bakae ba e fumanang.” (Matheu 7:13, 14) Bibele e hlalosa ka ho hlakileng hore “tumelo e ’ngoe.” (Baefese 4:5) Ho hlakile hore, ba bangata ba tseleng e “pharaletseng” ba na le bolumeli ba bona. Empa ha ba na ‘tumelo e le ’ngoe.’ Kaha ho na le mofuta o le mong feela oa borapeli ba ’nete, ba batlang ho fumana tumelo ea ’nete ba lokela ho o batla.
Batla Molimo oa ’Nete
Ho tloha tšimolohong ea moloko oa batho, Molimo o ile a bolella batho seo a batlang hore ba se etse. (Genese 1:28; 2:15-17; 4:3-5) Kajeno seo a se batlang se hlalositsoe ka ho hlaka ka Bibeleng. Sena se re nolofalletsa ho khetholla lipakeng tsa borapeli bo amohelehang le borapeli bo sa amoheleheng. (Matheu 15:3-9) Batho ba bang ba jele bolumeli ba bona lefa, athe ba bang ba sala letšoele morao. Ho ba bangata, bolumeli ke taba ea hore na ba tsoetsoe neng le hona ba tsoalloa hokae. Leha ho le joalo, na ho khetha ha hao bolumeli e lokela ho ba ntho e iketsahallang feela tjee kapa u rata hore ba bang ba u etsetse qeto?
U lokela ho khetha bolumeli boo u tsebang ho itseng ka bona le boo u hlahlobileng motheo oa bona ka hloko ho latela Mangolo. Lekholong la pele la lilemo, batho ba bang ba rutehileng ba ile ba etsa se fetang feela ho amohela mantsoe ao moapostola Pauluse a neng a ba bolella ’ona. Ba ile “ba hlahloba Mangolo ka hloko letsatsi le leng le le leng mabapi le hore na lintho tsena li joalo kapa che.” (Liketso 17:11; 1 Johanne 4:1) Ke hobane’ng ha u sa etse se tšoanang?
Bibele e bolela hore Molimo oa bokahohle o batla hore batho ba mo rapele ka ’nete. Joalokaha ho tlalehiloe ho Johanne 4:23, 24, Jesu o ile a hlalosa: “Leha ho le joalo, hora ea tla, ’me ke eona hona joale, eo ka eona barapeli ba ’nete ba tla rapela Ntate ka moea le ka ’nete, etsoe, ka sebele, Ntate o batla ba joalo hore ba mo rapele. Molimo ke Moea, ’me ba mo rapelang ba tla rapela ka moea le ka ’nete.” “Mofuta oa borapeli o hloekileng le o sa silafalang ponong ea Molimo le Ntate oa rōna” ke oona feela o amohelehang ho eena. (Jakobo 1:27) Jehova o hlohonolofalitse boiteko ba ba limilione ba batlang tsela e patisaneng e lebisang bophelong. A ke ke a fa ba iphapanyang bophelo bo sa feleng empa ho e-na le hoo o tla bo fa ba etsang boiteko ba sebele ba ho fumana tsela e patisaneng eo a e behileng le ba tsamaeang ho eona.—Malakia 3:18.