Fihla ka Nako!

KORANTA ea USA Today ea tlaleha: “Baokameli ba ka sehloohong ba na le bothata ba ho lemalla ho fihla ka mor’a nako.” E qotsa patlisisong e entsoeng baokameling ba ka sehloohong ba 2 700, ea phaella: “Ba fihla ka mor’a nako libokeng tse tšeletseng ho tse leshome tseo ba bang le tsona.”

Lefatšeng la khoebo, ho lemalla ho fihla ka mor’a nako ho nkoa e le ntho e tebileng ho feta feela ho ba le mekhoa e mebe. Phuputso e entsoeng ho batho ba 81 000 ba batlang mesebetsi e ile ea fihlela qeto ena: “Lihora tse senyehang ka lebaka la batho ba lemaletseng ho fihla ka mor’a nako le ba tloaetseng ho lofa ke mohloli o ka sehloohong oa ho lahleha ha chelete ka bongata.” Ho hlakile hore ho lemalla ho fihla ka mor’a nako ha ho bake mathata lefatšeng la khoebo feela. Phuputso e entsoeng ho lihlooho tsa likolo tsa sekondari, e sibolotse hore “ho lemalla ho fihla ka mor’a nako ha barutoana e ne e le bothata bo ka sehloohong le bo etsahalang khafetsa bo hlokang khalemelo.”

’Mōpi oa rōna o ne a rerile hore re be hlokolosi ka nako. O entse “mehloli e ’meli e meholo ea leseli”—letsatsi le khoeli—hore li re thuse ho lekanyetsa nako. (Genese 1:14-16) Mehleng ena, lisupa-nako tsa sejoale-joale li re thusa hore re lekanyetse nako ka metsotso le metsotsoana. Leha ho le joalo, ho sa tsotellehe theknoloji e teng, bongata ba rōna re ntse re e-na le bothata ba ho fihla ka nako—mosebetsing, sekolong, kapa litaetsanong tse ling tsa bohlokoa.

Na e hlile bothata ke ho haella ha nako? Ke ’nete hore mosebetsi le ho hlokomela lelapa li ka ba boima. Leha ho le joalo, ’mè e mong ea sebetsang ea bitsoang Wanda Rosseland, o re: “Ke khaolitse ho tletleba ka hore ha ke na nako e lekaneng ha ke elelloa hore kaofela re na le lihora tse 24 ka letsatsi. Ke nahanne ka hona ’me ke entse qeto ea hore lefatšeng lena la kajeno, hase taba ea hore nako e nyane, empa re na le lintho tse ngata tse kenellang le tse re sitisang.”

Nahana hape ka Renee,a ’mè ea nang le bana ba bahlano eo e leng e mong oa Lipaki Tsa Jehova. Oa hopola: “Ha bana ba ka ba sa le banyenyane, e ne e le phephetso ho ba lokisetsa ho ea sekolong le libokeng tsa phutheho tsa Bokreste. Leha ho le joalo, ke ne ke se na bothata ba ho fihla ka nako. Empa hona joale ha ba se ba hōlile, ke se ke e-na le mokhoa o mobe oa ho fihla ka mor’a nako.” Na le uena u na le mokhoa oo o mobe? Haeba ho joalo, ho na le monyetla oa hore u ka fetoha! U ka etsa lintho tse latelang.

● NAHANA KA LIPHELLO. Ho tloaela ho fihla ka mor’a nako ho ka ’na ha bonahala eka ke ntho e nyenyane. Empa nahana ka mantsoe ana a Bibele: “Lintsintsi tse shoeleng li etsa hore oli ea moetsi oa mafura e nkhe hampe, e pute. Booatla bo bonyenyane bo etsa joalo ho motho eo e leng oa bohlokoa ka lebaka la bohlale le khanya.” (Moeklesia 10:1) E, “booatla bo bonyenyane” feela tabeng ea ho se bontše ho nahanela ba bang bo ka senya botumo ba hao bo botle ho tichere—kapa mohiri oa hao.

Ha mosali e mong ea bitsoang Marie a ne a le thupelong kolecheng e ’ngoe, o ile a hlokomela hore ba bang ka tlelaseng ea hae “ba ne ba sa tsotelle nako hakaalo,” hangata ba fihla ka mor’a nako tlelaseng. Oa hopola: “Empa ha baa ka ba etsa seo nako e telele. Liprofesa tsa rōna tse peli e ne e le batho ba sa batleng ho utloa letho ha ho tluoa tabeng ea nako. Ka hona, haeba seithuti se ne se fihla ka mor’a nako ka metsotso e ’maloa feela, se ne se tšoauoa joalokaha eka se lofile. ’Me makhetlo a itseng ao ka ’ona seithuti se neng se ka tšoauoa se lofile, a ne a etsa hore se feile.”

Ho tloaela ho fihla ka mor’a nako ho ka boetse ha senya botumo ba hao bo botle ho metsoalle ea hao kapa lithaka tsa hao. Monna e mong ea lilemong tse mahareng ea bitsoang Joseph, o hopola Mokreste-’moho le eena e mong eo a neng a mo tseba lilemong tse mashome tse fetileng. Le hoja monna enoa a ne a hlomphuoa ka lebaka la bokhoni ba hae ba ho ruta, o ne a e-na le bofokoli bo tebileng. Joseph oa hopola: “O ne a lula a fihla ka mor’a nako joalo. Ke bolela hore o ne a fihla ka mor’a nako nthong e ’ngoe le e ’ngoe! ’Me ho bonahala a ne a sa tšoenngoe ke seo. Batho ba ne ba etsa metlae ka ho fihla ha hae ka mor’a nako.” Na batho ba se ba qalile ho bua ka uena u le motho ea lulang a fihla ka mor’a nako? Haeba ho joalo, ba ka hlokomoloha litšoaneleho tsa hao tse ntle habonolo feela.

● NAHANELA BA BANG. Ho lemalla ho fihla ka mor’a nako ke ho hloka mekhoa ebile ho sitisa ba bang. Hape ho ka fana ka maikutlo a hore u inka u phahametse ba bang. Ha rakhoebo e mong a hlalosa hore na ke hobane’ng ha baokameli ba bangata hakana ba ka sehloohong ba khoebo ba lemaletse ho fihla ka mor’a nako, o ile a lumela: “Boholo ba rōna re mpa feela re ikhantša.” Ka ho fapaneng, Bakreste ba tšoara ba bang joalokaha eka ba ba phahametse. (Bafilipi 2:3) Ba boetse ba sebelisa Molao oa Khauta ’me ba tšoara ba bang joalokaha ba batla ho tšoaroa. (Matheu 7:12) Na ha u ke u teneha ha u tlameha ho emela ba bang? Joale, u se ke ua etsa hore ba bang ba u emele.

● ITHUTE TŠEBELISO E NTLE EA NAKO. Na u lulela ho chechisa lintho ebe motsotsong oa ho qetela ke hona u phothaselang? Na u ipehela pakane ea ho phetha mesebetsi e mengata, u leke ho etsa lintho tse ngata ka nako e nyane? Molao-motheo o ho Moeklesia 3:1 o ka u thusa: “Ho na le nako e behiloeng bakeng sa ntho e ’ngoe le e ’ngoe.” Ho ba le “nako e behiloeng” bakeng sa lintho ho tla etsa hore u li etse ka tsela e hlophisehileng.

Ntho ea pele, etsa lethathamo la lintho tseo u batlang ho li etsa. Joale latela molao-motheo o fumanoang ho Bafilipi 1:10: “Nepisisa lintho tsa bohlokoa haholo.” E, beha lintho tsa bohlokoa pele. Ke lintho life tseo joang kapa joang li lokelang ho etsoa? Ke lintho life tse ka ’nang ka behelloa ka thōko bakeng sa ho etsoa hamorao? Qetellong, hlahloba hore na ke nako e kae eo u e hlokang hore u etse lintho tseo le hore na u ka li etsa neng. Sheba lintho ka leihlo la sebele ’me u qobe ho ipehela pakane ea ho etsa mesebetsi e mengata ka nako e nyane.

Mosali e mong ea bitsoang Dorothy o rolela batsoali ba hae khaebana tabeng ea ho mo ruta ho fihla ka nako. Oa pheta: “Haeba re ne re lokela ho ba Sebokeng sa Bokreste ka 7:30 mantsiboea, ’mè oa ka o ne a etsa hore re lule re lokile hora le metsotso e 45 pele ho moo. Re ne re lokela ho ba le nako e lekaneng ea ho ja lijo tsa mantsiboea, ho hlatsoa lijana, ho apara le nako ea ho khanna ho ea libokeng. Ho fihla ka nako e ile ea e-ba karolo ea bophelo ba rōna ba letsatsi le letsatsi.” Ka linako tse ling hoa thusa ho nahanela maemo a sa lebelloang. Dorothy oa hopola: “Haufinyane tjena ke ne ke lokela ho lata batho ba ’maloa ho ba isa libokeng. Ha ke le tseleng, lebili le ile la pancha. Ke ile ka tlameha ho le lokisa empa ke ile ka ’na ka fihla ka nako ho ea ba lata. Taba ke ho re, ke lula ke iphile nako ea ha koloi e ka mpha mathata kapa haeba sephethe-phethe sa makoloi se ka ba matla.”

● FUMANA LITLHAHISO HO BA BANG. Ho Liproverbia 27:17, Bibele e re: “Tšepe e leotsoa ka tšepe. Ka ho tšoanang motho e mong o leotsa sefahleho sa e mong.” Tumellanong le molao-motheo oo, bua le ba bang bao maemo a bona a tšoanang le a hao—empa ba khona ho fihla ka nako. Hangata ba tla ba le litlhahiso tse ’maloa tse ka u thusang.

Renee ea qotsitsoeng pejana o ikemiselitse ho fetola mokhoa oa hae oa ho lemalla ho fihla ka mor’a nako. O re: “Haufinyane tjena ke iketselitse qeto ea ho ntlafatsa. Le hoja ho se bonolo, ho na le tsoelo-pele.” Le uena u ka ho etsa. Haeba u lokisitse kelello ea hao ’me u etsa boiteko, u ka ithuta ho fihla ka nako!

[Mongolo o botlaaseng ba leqephe]

[Litšoantšo tse leqepheng la 16]

Ho tloaela ho fihla ka mor’a nako ho ka u etsetsa botumo bo bobe ho bahiri ’me ha u hlahisa u se ea nahanelang ba bang

[Setšoantšo se leqepheng la 17]

Ho hlophiseha hantle ho ka u thusa hore u qobe ho senya nako