Ho Fumana Mohloli oa Mefuta Eohle ea Matla

LETSATSI ke mohloli o ka sehloohong oa matla a lefatše. Bo-rasaense ba bangata ba lumela hore mashala le oli ke mesaletsa e bolileng ea lifate le limela tse fumaneng matla a tsona letsatsing.a Metsi a phallelang matamong a fehlang motlakase qalong a tsoa maoatleng a le ka sebōpeho sa maru ’me a isoa moo ho omileng ke mocheso o tsoang letsatsing. Mahlaseli a futhumetseng a letsatsi le ’ona a fokisa moea o tsamaisang lijenereithara tse sebetsang ka moea. Leha ho le joalo, ho hakanngoa hore matla a letsatsi a fihlang lefatšeng e ka ba halofo ea karolo e le ’ngoe ho tse limilione tse likete.

Le hoja e e-na le matla a tšabehang, naleli eo re e tsebang e le letsatsi ke o mong oa mehloli e libilione ea matla a maholo a teng bokahohleng. Moqapi ea ka sehloohong oa matla aa ’ohle ke mang? Ha a bua ka linaleli, mongoli oa Bibele Esaia o re: “Phahamisetsang mahlo holimo ’me le bone. Ke mang ea bōpileng lintho tsee? Ke Ea hlahisang lekhotla la tsona ka palo, e ’ngoe le e ’ngoe o e bitsa le ka lebitso. Ka lebaka la bonatla ba hae bo boholo, kaha o boetse o na le matla a maholo, ha ho le e ’ngoe ea tsona e haellang.”—Esaia 40:26.

Ha re nahana feela ka matla a linaleli, re ka ’na ra ikutloa re hloletsoe—’me re ka ba ra ikutloa re hloletsoe le ho feta ha re nahana ka ’Mōpi oa tsona. Leha ho le joalo, Bibele e ea re khothatsa: “Atamelang ho Molimo, ’me o tla atamela ho lōna.” (Jakobo 4:8) E, ’Mōpi oa lefatše le lirafshoa tsa lona tse ngata tse hlahisang matla, eena ea re fileng tlhase ea bophelo, a ka fumanoa ke ba mo batlang.—Genese 2:7; Pesaleme ea 36:9.

Ha ba bona lefatše le lirafshoa tsa lona li ntse li silafatsoa le ho abjoa ka tsela e leeme, batho ba bang ba ka ’na ba fumana ho le thata ho lumela hore Molimo o thahasella lefatše le batho ba ho lona. Leha ho le joalo, Bibele e re tiisetsa hore phetoho e tla tla kapele, e tšepisa phetoho e khōlō tseleng eo matlotlo a lefatše a abjoang ka eona le tsela eo lefatše ka bolona le busoang ka eona. (Daniele 2:44; Matheu 6:9, 10) Ka ho hloma ’muso o le mong oa leholimo lefatšeng tlas’a tataiso ea Mora oa hae, Kreste Jesu, Jehova Molimo o tla etsa bonnete ba hore e mong le e mong ea phelang o tla arolela ba bang matlotlo a mangata a lefatše ka ho lekana. (Mikea 4:2-4) Hape o tla “felisa ba senyang lefatše,” ke hore, ba senyang tikoloho ea lefatše, ebang ke ka tsela ea moea kapa ea sebele.—Tšenolo 11:18.

Nakong eo, tšepiso e tlalehiloeng ho Esaia 40:29-31 e tla ipaka e le ’nete moeeng le nameng: “O fana ka matla ho ea khathetseng; ’me o etsa hore matla a feletseng a atele ea se nang matla. Bashanyana ba tla khathala ’me ba tepelle, ’me ruri bahlankana ba tla khoptjoa, empa ba tšepileng Jehova ba tla boela ba fumane matla. Ba tla nyoloha ka mapheo a kang a ntsu. Ba tla matha ’me ba ke ke ba tepella; ba tla tsamaea ’me ba ke ke ba khathala.” Le uena u ka ithuta ho eketsehileng ka Mohloli oa mefuta eohle ea matla le tharollo ea mathata a matla a lefatše haeba u ipha nako ea ho ithuta Bibele.

[Mongolo o botlaaseng ba leqephe]