Pono ea Bibele

Na Moea o Halalelang ke Motho?

MOEA o halalelang oa Molimo ke eng? Mantsoeng a eona a qalang, Bibele e bua ka moea o halalelang—oo hape o bitsoang “matla a sebetsang a Molimo”—o “e-ea koana le koana holim’a metsi.” (Genese 1:2) Tlalehong ea ha Jesu a ne a kolobetsoa, le hoja Molimo a hlalosoa a le “maholimong,” moea o halalelang oona o bonahala o ‘theohela [ho Jesu] joaloka leeba.’ (Matheu 3:16, 17) Ho phaella moo, Jesu o ile a bua ka moea o halalelang e le “mothusi.”—Johanne 14:16.

Mangolo ana le a mang a Bibele a entse hore ba bang ba etse qeto ea hore moea o halalelang ke motho, joalokaha Molimo, Jesu le mangeloi e le batho ba moea. Ha e le hantle, ka makholo a lilemo a mang a malumeli a nang le tšusumetso e matla a Bokreste-’mōtoana a ’nile a hlalosa moea o halalelang e le motho. Ho sa tsotellehe thuto ena eo e leng khale e le teng, litho tse ngata tsa kereke li lula li ferekane, ’me tse ling li bile li ngangisana le baeta-pele ba tsona ba bolumeli. Ka mohlala, ho latela phuputso e sa tsoa etsoa, ba etsang karolo ea 61 lekholong ea bao ho ileng ha buisanoa le bona ba lumela hore moea oa Molimo ke “letšoao la boteng ba Molimo kapa la hore o matla, empa e seng hore ke ntho e phelang.” Leha ho le joalo, Bibele eona e re’ng?

Seo Bibele e se Buang

Motho ea balang Bibele ka botšepehi o susumelletseha ho etsa qeto ea hore moea o halalelang hase seo thuto ea likereke e se rutang e le motho. Nahana ka litlaleho tsena tsa Bibele.

1. Ha Maria, ’mè oa Jesu, a ne a etetse Elizabetha, motsoal’ae, Bibele e re ngoana ea e-s’o hlahe ea neng a le ka pōpelong ea Elizabetha o ile a tlōla, ’me “Elizabetha a tlala moea o halalelang.” (Luka 1:41) Na ke taba e utloahalang hore motho e mong o ile a “tlala” e mong?

2. Ha Johanne Mokolobetsi a ne a bua le barutuoa ba hae hore Jesu ke eena ea neng a tla mo hlahlama, Johanne o ile a re: “’Na, ke le kolobetsa ka metsi . . . empa ea tlang ka mor’a ka o matla ho mpheta, eo ke sa tšoaneleheng ho mo rōlisa meqathatso. Eo o tla le kolobetsa ka moea o halalelang.” (Matheu 3:11) Ho hlakile hore Johanne o ne a sa bue ka moea o halalelang e le motho ha a ne a bua ka hore batho ba tla kolobetsoa ka oona.

3. Ha moapostola Petrose a ne a etetse molaoli oa lebotho la ntoa oa Moroma le lelapa la hae, o ile a bua ka Jesu e le ea tlotsitsoeng ke Molimo “ka moea o halalelang le matla.” (Liketso 10:38) Nakoana ka mor’a moo, “moea o halalelang oa theohela” ho ba lelapa la molaoli oa lebotho la ntoa. Tlaleho eo e re ba bangata ba ne ba hloletsoe “hobane mpho e sa lefelloeng ea moea o halalelang e ne e ntse e tšolleloa le holim’a batho ba lichaba.” (Liketso 10:44, 45) Le mona mantsoe a sebelisitsoeng a hanana le khopolo ea hore moea o halalelang ke motho.

Ho tloaelehile hore Lentsoe la Molimo le mothofatse lintho tse ling tseo e seng batho. Tsona li akarelletsa bohlale, temoho, sebe, lefu le mosa o sa tšoanelang. (Liproverbia 8:1–9:6; Baroma 5:14, 17, 21; 6:12) Jesu ka boeena o ile a re “bohlale bo pakoa ke bana bohle ba bona hore bo lokile,” kapa ke liphello tsa bona tse ntle. (Luka 7:35) Ka ho hlakileng, bohlale hase motho ’me ha bo na bana ba sebele! Ka ho tšoanang, moea o halalelang hase motho hobane feela libakeng tse ling o mothofalitsoe.

Moea o Halalelang ke Eng?

Ka Bibeleng, moea o halalelang oa Molimo o hlalosoa e le matla a Molimo a sebetsang. Ka hona, phetolelo e nepahetseng ea temana ea Seheberu ea Bibele e bua ka moea oa Molimo e le “matla a sebetsang a Molimo.” (Genese 1:2) Khopolo ena e tšehetsoa hohle ka ho hlaka ka Bibeleng.—Mikea 3:8; Luka 1:35; Liketso 10:38.

Ho fapana le tumelo e atileng, Molimo ha a hohle ka linako tsohle. Ho e-na le hoo, o lula sebakeng sa moea, ‘sebakeng se tiisitsoeng sa bolulo,’ kapa moo a lulang teng. (1 Marena 8:39; 2 Likronike 6:39) Mangolo a boetse a bua ka sebaka se tobileng seo Molimo a lulang ho sona e le “terone” ea hae. (1 Marena 22:19; Esaia 6:1; Daniele 7:9; Tšenolo 4:1-3) Leha ho le joalo, a le ‘sebakeng sa hae se tiisitsoeng sa bolulo,’ a ka sebelisa matla a hae a sebetsang ho fihla hohle leholimong le lefatšeng.—Pesaleme ea 139:7.

Morao koana ka 1879, Charles L. Ives, seithuti sa Bibele, o ile a bontša ka nepo tsela eo Molimo a sebelisang matla a hae ka eona a ntse a le sebakeng se le seng. O ile a ngola: “Ka mohlala, re re, ‘Bula likharetene e le hore letsatsi le kene ka tlung.’ Ha re bolele hore letsatsi ka bolona le kene, empa re bolela mahlaseli a lona, a tsoang letsatsing.” Hoa tšoana le ka Molimo, ha ho hlokahale hore a ee libakeng tsohle moo a batlang ho sebelisa matla a hae a sebetsang ho tsona. O romela moea oa hae o halalelang, o ka fihlang pōpong e libakeng tsohle. Ho utloisisa hore na moea o halalelang ke eng—e leng matla a Molimo a sebetsang—ho ka u fa kholiseho ea hore Jehova o tla phethahatsa litšepiso tsa hae.

NA U KILE UA IPOTSA?

◼ Na Bibele e ruta hore moea o halalelang ke motho?—Liketso 10:44, 45.

◼ Moea o halalelang ke eng?—Genese 1:2.

◼ Moea o halalelang oa Molimo o ka fihla hokae?—Pesaleme ea 139:7.