“Jehova, Ke Kōpa U Ntumelle Hore ke U Sebeletse”

JOALOKAHA HO BOLETSE DANIELLE HALL

Ha ke ne ke sa le ngoananyana, ke ne ke rata ho chakela ha Nkhono, ea neng a lula pel’a lapeng. Kamehla o ne a robala ho se hokae thapama. Ha ke ne ke mo fumana a le liphateng, o ne a lula le ’na betheng ebe o mpalla lipale tsa Bibele. O ne a atisa ho re: “Le ka mohla u se ke ua lebala hore Jehova oa u rata. ’Me haeba u mo rata, o tla u hlokomela kamehla.” Mantsoe ao a hae a ile a hatiseha ka ho teba kelellong le pelong ea ka.

NKHONO o ile a hlokahala ka 1977, ha ke ne ke le lilemo li ’nè. E ne e le e mong oa Lipaki Tsa Jehova, joaloka ba bang bohle ba neng ba amana le Ntate, ba neng ba lula motseng oa heso oa Moe, Australia. Batsoali ba ka e ne e se Lipaki, empa Ntate o ne a li rata. Hamorao lelapa leso le ile la fallela motsaneng oa Tintenbar o lebōpong la leoatle, New South Wales. Ha re le moo ke ne ke ea libokeng tsa Lipaki ka linako tse itseng le moholoane oa ka, Jamie le Ntate.

Batsoali ba ka ba ile ba arohana ha ke le lilemo li robeli. Ntate o ile a khutlela Moe, empa ’na le Jamie ra sala le ’Mè. O ne a sa thahaselle Bibele a bile a sa rate ha re ea libokeng tsa Lipaki. Seo se ne se nkutloisa bohloko haholo. Mantsoe a Nkhono a ile a hanella pelong ea ka. Ke ne ke tseba hore Jehova eena ke hlile kea mo rata! Ke ne ke batla ho mo sebeletsa. Kahoo ke ile ka rapela Jehova ka mo bolella hore le ’na ke e mong oa Lipaki tsa hae. Jamie le eena o ne a ikutloa ka tsela eo.

Liteko Sekolong

Nakoana ka mor’a moo, mosuoe e mong sekolong o ile a re ngoana e mong le e mong ka tlelaseng ea rōna a bolele hore na ke oa bolumeli bofe e le hore a ngole bukeng. Ha ho fihla nako ea hore Jamie a bolele ba hae, o ile a buela holimo ka lentsoe le phefa, a re, “Ke Paki ea Jehova.” Mosuoe o ile a khefutsa a re a phete seo a se buileng, ’me a se pheta. Mosuoe o ile a re: “Ha ke nahane hore ho joalo, empa ke tla khutlela ho uena.” Ha ho fihla nako ea hore ke bolele ba ka, le ’na ke ile ka buela holimo ka re, “Ke Paki ea Jehova.” Kaha o ne a ferekane, mosuoe o ile a bitsa mosuoe-hlooho.

Mosuoe-hlooho o ile a bua a lomahantse meno, a re: “Ke tšoere lipampiri tseo le ngolisitsoeng ka tsona mona, ’me batsoali ba lōna ha baa le ngolisa le le Lipaki Tsa Jehova.” Ra araba ka tlhompho ra re: “Empa boo ke bona bolumeli ba rōna.” Mosuoe-hlooho le mosuoe ha baa ka ba hlola ba buoa ka taba eo hape.

Sekolong ke ne ke leka ho buisana le liithuti-’moho le ’na ka lintho tse seng kae tseo ke ithutileng tsona ka Bibeleng. Ke ne ke nka Buka ea ka ea Lipale Tsa Bibele, ’me ka linako tse ling ke bala lipale tsa eona le ngoanana e mong ea neng a lumela hore Molimo o teng.a Empa kaha ke ne ke leka ho phela ka tsela e lumellanang le melao-motheo ea Bokreste, ke ne ke se na metsoalle e mengata, ’me ka linako tse ling ke qetoa ke bolutu.

Ke ne ke rapela Jehova khafetsa le ka matla hoo a ileng a fetoha motsoalle ea haufi-ufi. Kamehla ha ke tsoa sekolong, ke ne ke lula betheng ke bolella Jehova tsohle tse etsahetseng letsatsing leo. Ke ne ke atisa ho lla. Ke ntse ke keleketlisa meokho, ke ne ke mo kōpa ka tieo, ke re, “Jehova, ke kōpa u ntumelle hore ke u sebeletse hammoho le batho ba hao.” Kamehla ha ke qeta ho rapela ke ne ke ikutloa ke imolohile.

Lengolo le Matlafatsang

Ha ke le lilemo li leshome, Jamie o ile a khutlela Moe ho ea lula le Ntate. Joale ke ile ka sala ke le motoaitoai linthong tsa moea. Empa ka letsatsi le leng ha ke etetse ha moahisani e mong, ke ile ka bona limakasine tse hatisitsoeng ke Lipaki Tsa Jehova. Ke ile ka thaba ’me ka tšoara aterese ea ofisi ea lekala ea sebakeng seo ka hlooho eaba ke mathela hae ho ea e ngola fatše. Ke ile ka ngolla ofisi ea lekala lengolo le amang maikutlo ke hlalosa boemo ba ka ke bile ke kōpa thuso litabeng tsa moea. Lengolo le maqephe a mabeli le amang maikutlo leo lekala le ileng la ’ngolla lona ka ho khetheha, le ile la etsa hore ke seke meokho. Boo e ne e le bopaki ba hore ke oa bohlokoa ho Jehova!

Lengolo leo le ile la nkhothalletsa hore ke etsise tumelo ea ngoananyana oa Moiseraele ea neng a sebeletsa Naamane, eo e neng e le molaoli oa lebotho la Syria mehleng ea Bibele. Le hoja e ne e le moholehuoa a bile a le hōle le naha ea habo, o ile a lula a le haufi le Jehova, Molimo oa hae. ’Me ka ho bua ka sebete ka seo a se lumelang, o ile a iponahatsa hore ke paki ea hae ea ’nete.—2 Marena 5:1-4.

Lengolo leo le tsoang ofising ea lekala le ile la phaella ka ho re: “Kaha u sa le ngoananyana, u lokela ho sebeletsa Jehova ka hore u mamele batsoali ba hao le ka hore u sebetse ka thata sekolong. Hape u lokela ho lula u le haufi le Jehova ka thapelo le ka ho ithuta.” Qetellong, lengolo leo le ile la re: “Danielle, u hopole hore ho sa tsotellehe hore na re lula hokae, kamehla Jehova o haufi le rōna. Rea tseba hore ke sona seo u se lumelang.” (Baroma 8:35-39) Lengolo lena le seng le tsofetse le bile le se le ntse le taboha, le ntse le lula ka Bibeleng ea ka. Ke le balile ka makhetlo-khetlo ho theosa le lilemo ’me kamehla le etsa hore ke lle.

Nakoana ka mor’a moo, ke ile ka fumana lengolo le leng. Lengolo leo le ne le ntsebisa hore Ntate o nketselitse tokisetso ea hore ke romeloe limakasine tsa Molula-Qhooa le Tsoha! ka poso. Ke ile ka thaba haholo! Joale ke ne ke lula ke fumana lijo tsa moea. Ha tokollo ka ’ngoe e fihla, ke ne ke e bala ke be ke e qete. Ke ntse ke e-na le limakasine tseo tse ntle tseo ke qalileng ka tsona. Hona nakong eo, moholo e mong oa Mokreste oa phuthehong ea sebakeng seo o ile a qala ho nketela. Le hoja a ne a qeta nakoana e seng kae feela a nketetse, ho nketela hoo ho ne ho nkhothatsa haholo.

Liphetoho li Tlisa Tsoelo-pele

Le hoja boemo ba ka ba moea bo ne bo ntlafatse, ke ne ke ntse ke labalabela ho rapela Jehova ka bolokolohi. Kahoo ha ke le lilemo li 13, ke ile ka kōpa ’Mè hore ke il’o lula le Ntate. Ke ne ke rata ’Mè haholo, ’me le eena a nthata haholo, empa ke ne ke ikemiselitse ho sebeletsa Molimo. O ile a lumela, eaba ke khutlela Moe moo ke ileng ka qala ho ithuta Bibele le phutheho ea moo. ’Na le Jamie, Ntate o ile a re lumella ho ea libokeng tsohle. Lipaki tsa sebakeng seo li ile tsa ikitlaelletsa ho re thusa. ’Na le Jamie re ile ra hatela pele hantle moeeng ’me ra kolobetsoa re latellana ka likhoeli. E, thapelo ea ka ea bongoaneng e ile ea arabeloa. Ke ne ke sebeletsa Jehova hammoho le batho ba hae!

Ha nako e ntse e ea, ke ile ka tloaelana haholo le rakhali Lorraine le monna oa hae Philip Taylor, bao le bona ba neng ba le Phuthehong ea Moe. Ba ne ba ntšoere joaloka morali oa bona. Ha ba fallela sehlekehlekeng sa Bougainville, se Papua New Guinea, ho ea sebeletsa moo ho neng ho e-na le tlhokahalo e khōlō ea baboleli ba ’Muso, ke ile ka amohela memo ea bona hang-hang ha ba re ke tsamaee le bona. Ke ne ke le lilemo li 15 feela, empa ’Mè le Ntate ba ile ba ntumella hore ke tsamaee le bona.

Ha ke le Bougainville ke ile ka ntšetsa pele lithuto tsa ka tsa sekolo ka ngollano. Ha ke ne ke sa etse mosebetsi oa sekolo, ke ne ke qeta boholo ba nako ke paka. Ho ne ho thabisa e le ruri ho sebetsa le baromuoa le bo-pula-maliboho! Batho ba moo ba ne ba ikokobelitse ka tsela e hlollang, ba bangata ba bona ba chesehela ho ithuta Bibele.

Hamorao hona selemong seo ho ile ha e-ba le qhoebeshano ea lipolotiki, ’me ha e-ba kotsi hore ke lule moo. Ke ile ka utloa bohloko haholo ha ke tloha sehlekehlekeng seo se senyenyane ’me ke siea batho ba sona ba batle. Ha sefofane se senyenyane seo ke neng ke se palame se tloha, ke ile ka bona Ntate Philip a ntsokela letsoho hore ke tsamaee hantle a eme tselaneng ea lifofane. Ha ke ntse ke se khitla joalo, ke ile ka kōpa Jehova ka pelong hore a ntumelle hore ka le leng ke mo sebeletse ke le moromuoa naheng e ’ngoe.

Lithapelo Tse Ling Hape Lia Arabeloa

Ha ke se ke khutletse Australia, ke qetile lithuto sekolong se phahameng, ke ile ka ithutela mosebetsi oa ofisi femeng e ’ngoe ea liakhente. Ka nako eo, Ntate o ne a se a nyetse mosali e mong ’me a hlokomela lelapa le leholo la bobeli. Jamie o ne a lula le ’Mè. Ke ile ka qeta nakoana ke theputsa, ke lula le ’Mè neng-neng ke lula le Ntate. Ho ne ho bonahala lintho li rarahane bophelong. Ho ne ho hlokahala hore ke bebofatse tsela eo ke phelang ka eona ’me ke tsepamise kelello lipakaneng tsa moea. Kahoo ka 1994, ke ile ka nka bopula-maliboho ba nako e tletseng Moe.

Ke ile ka boela ka thaba. Metsoalle ea ka e ne e le bacha ba sekametseng linthong tsa moea ka phuthehong, ’me ba ile ba nkhothatsa haholo. Ha e le hantle, ka 1996 ke ile ka nyalana le e mong oa bona—Will—e leng motho ea buang a iketlile, ea mosa le ea ikokobelitseng, eo ka sebele e leng tlhohonolofatso e tsoang ho Jehova.

Re ile ra tloaela bophelo ba lenyalo, ’me ho bonahala lintho li re tsamaela hantle. Ka letsatsi le leng, Will o ile a tla lapeng ka mor’a hore a sebetse le molebeli ea tsamaeang ea neng a etetse liphuthehong tse sebakeng sa rōna. O ile a nkōpa hore ke lule fatše, a ntan’o mpotsa, “Na u ka rata ho falla ho ea thusa phuthehong e ’ngoe?” Ke ile ka lumella ka pelong hang-hang. Empa ka ipotsisa ka bosoasoi, ka re: “Re fallele hokae? Vanuatu? Fiji?” Ha Will a re “Morwell,” ke ile ka phasoloha ka re, “Hona qholong ea nta moo!” Re ile ra tšeha ’me hang-hang ra lumellana hore re tla thabela ho fallela phuthehong eo ea boahisani ho ea sebeletsa re le bo-pula-maliboho teng.

Lilemo tse tharo tse latelang, tseo re li qetileng re le Morwell e bile tse thabisang le tse atlehileng. Ha ntan’o etsahala taba e ’ngoe eo re neng re sa e lebella. Re ile ra fumana memo e tsoang ofising ea lekala ea Lipaki Tsa Jehova e Australia e re memela ho sebeletsa re le bo-pula-maliboho ba khethehileng. E ne e re abela ho ea sebeletsa hokae? Ho ea sebeletsa East Timor, e leng naha e nyenyane e ntlheng e ka bochabela lihlekehlekeng tsa Indonesia.b Ke ile ka seka likeleli. Ka leboha Jehova ka hore ebe o arabile lithapelo tsohle tsa ka. Hase feela hore o ne a ntumeletse hore ke be mohlanka oa hae empa joale, ’na le mohats’a ka re ne re tlil’o sebeletsa naheng e ’ngoe.

Ho Sebeletsa Mose ho Maoatle

Re ile ra fihla motse-moholo, Dili, ka July 2003. Phutheho ea Dili—e leng eona feela phutheho naheng eo—e ne e e-na le bo-pula-maliboho ba khethehileng ba 13 ba tsoang Australia le Lipaki tse seng kae tsa sebakeng seo. Bara le barali babo rōna ba East Timor ba ne ba futsanehile haholo; ba bangata ba bona ba ne ba lahlehetsoe ke thepa ba bile ba shoeletsoe ke litho tsa malapa ntoeng ea lehae e ’nileng ea kupa ka lilemo tse 24 ’me ea lala ka 1999. Ba bangata ba bona ba ne ba boetse ba mameletse khanyetso ea litho tsa lelapa ka lebaka la seo ba seng ba se lumela. Le hoja ba ne ba e-na le matšoenyeho ba bile ba futsanehile, ba ne ba ruile moeeng ’me ba thabile.—Tšenolo 2:8, 9.

Re ile ra fumana hore batho ba bangata ba East Timor ba ne ba tšaba Molimo ba bile ba hlompha Bibele. Ha e le hantle, ka mor’a nakoana feela, re ile ra ba le lithuto tse ngata tsa Bibele ho feta tseo re neng re ka khona ho li khanna! Ha nako e ntse e ea, liithuti tse ling tseo re qalileng ho ithuta le tsona li ile tsa sebetsa le rōna e se e le bara le barali babo rōna ba kolobelitsoeng. Re ile ra thaba haholo ha re bona kamoo ba hatetseng pele kateng moeeng.

Ka 2006 ho ile ha boela ha e-ba le merusu Dili. Likhohlano tsa merabe li ile tsa fehla ntoa. Matlo a mangata a ile a utsoetsoa thepa kapa a chesoa, ’me Lipaki tsa moo li ile tsa balehela malapeng a bo-pula-maliboho ba khethehileng. Jarete le ntlo ea rōna e ile ea e-ba kampo ea batšabeli ka nakoana, ’me ka nako e ’ngoe re ne re lula le batho ba ka bang lekholo! Sebaka se seholo seo re pakang koloi ho sona se ile sa fetoha kichine, sebaka sa ho jela le Holo ea ’Muso ka nakoana.

Le hoja ho ne ho ntse ho utloahala lithunya le liqhomane haufi le moo, lehae la rōna la bo-pula-maliboho e ile ea e-ba setšabelo sa khotso. Kaofela ha rōna re ile ra hlokomela hore Jehova o re sirelelitse. Letsatsi ka leng re ne re qala ka ho tšohla temana ea Bibele. Re ne re tšoara liboka joaloka mehleng. Re ne re boetse re khannela batho ba thabelang thuto ea Bibele.

Ha libeke li ntse li feta, ho ile ha totobala hore barab’abo rōna ba hlahetseng karolong e ka bochabela ea naha ba ne ba tla ba kotsing ha ba ka tsoela pele ba le Dili. Kahoo barab’abo rōna ba ikarabellang ba ile ba etsa qeto ea ho theha sehlopha se secha Baucau, e leng motse oa bobeli o moholo ka ho fetisisa moo, oo ho ea ho oona e leng leeto la lihora tse tharo ho tloha Dili motho a leba nģ’a bochabela. Ke lona lebaka le ileng la etsa hore ’na le Will re fuoe kabelo e ncha.

Re ile ra fihla Baucau ka July 2006, ka mor’a ho qeta hoo e ka bang lilemo tse tharo re le East Timor. Sehlopha sa rōna se secha se ne se e-na le bo-pula-maliboho ba bane ba khethehileng le Lipaki tse tšeletseng tsa East Timor. Bara le barali babo rōna ba moo ba ne ba siile thepa eohle ea bona Dili, empa leha ho le joalo ba ne ba ntse ba bososela. Ka sebele re ile ra ananela botšepehi ba bona le moea oa bona oa boitelo!

’Na le Will re ntse re sebeletsa Baucau. Re rata kabelo ea rōna ’me re e nka e le e ’ngoe ea litlhohonolofatso tse tsoang ho Jehova. Ha ke hopola liketsahalo tse fetileng, kea hlokomela hore Nkhono o ne a nepile. Ka sebele Jehova o ntlhokometse ho theosa le lilemo. Ke mo leboha kamehla ka ho mpha monyetla oa ho mo sebeletsa hammoho le batho ba hae. Ke lebeletse ka thabo ho boela ke bona Nkhono tsohong ea bafu. Ka nako eo ke tla khona ho mo leboha ha a mphile senotlolo se bulang monyako o lebisang thabong ea sebele le bophelong bo khotsofatsang.

[Mongolo o botlaaseng ba leqephe]

[Setšoantšo se leqepheng la 26]

Ke ’na le Nkhono

[Setšoantšo se leqepheng la 28, 29]

Ke na le mohats’a ka, Will