Sebelisa Chelete ka Bohlale

BATHO ba bangata ba atisa hore maele a reng, “Chelete ke motso oa libe tsohle” a tsoa ka Bibeleng. Seo ha e le hantle Bibele e se buang ke hore: “Lerato la chelete ke motso oa libe tsohle.” (1 Timothea 6:10, King James Version) Batho ba bang ba rata chelete ba bile ba ikakhetse ka setotsoana ho bokelleng maruo. Ba bang ba laoloa ke chelete ’me ba kotutse liphello tse bohloko. Leha ho le joalo, chelete e ka tsoela motho molemo haeba a e sebelisa ka tsela e nepahetseng. Bibele ea lumela hore “chelete e rarolla mathata a mangata.”—Moeklesia 10:19, Holy Bible—Easy-to-Read Version.

Le hoja Bibele e sa bue ka litaba tsa lichelete, e na le keletso e molemo e ka u thusang hore u sebelise chelete ka bohlale. Mehato ena e latelang e mehlano e atisa ho khothalletsoa ke baeletsi ba tsa lichelete ’me e tsamaisana le melao-motheo e tlalehiloeng khale ka Bibeleng.

Boloka chelete. Tlaleho ea Bibele e bolela hore Baiseraele ba boholo-holo ba ne ba rutoa bohlokoa ba ho boloka. Ba ne ba boleletsoe hore selemo le selemo ba behelle ka thōko karolo ea leshome, eo ba neng ba tla e sebelisetsa ho ea meketeng ea sechaba feela. (Deuteronoma 14:22-27) Moapostola Pauluse le eena o ile a khothalletsa Bakreste ba mehleng ea pele hore ba behelle ka thōko chelete e itseng beke le beke, eo ba neng ba tla nehelana ka eona ho thusa balumeli-’moho le bona ba hlokang. (1 Bakorinthe 16:1, 2) Baeletsi ba bangata ba tsa lichelete ba khothalletsa batho hore ba boloke chelete. Qala ka ho e boloka. Hang feela ha u fumana chelete, isa eo u batlang ho e boloka bankeng kapa moo u e bolokang teng. Seo se tla u thusa hore u qobe ho e sebelisa.

Etsa moralo. Ke eona feela tsela eo u ka atlehang ho hlahloba, ho laola le ho fokotsa tsela eo u sebelisang chelete ka eona. Ho ba le moralo o motle oa tšebeliso ea chelete ho ka u bontša hore na u etsa’ng ka eona ha ba ha u thusa hore u finyelle lintho tseo u batlang ho li etsa. Tseba hore na u fumana bokae ’me u sebelise chelete e ka tlaase ho eo. Ithute ho khetholla lintho tseo u li hlokang ho tseo u li batlang. Tumellanong le sena, Jesu o ile a khothalletsa bamameli ba hae hore ba “bale litšenyehelo” pele ba etsa ntho leha e le efe. (Luka 14:28) Bibele e re eletsa hore re se ke ra ikenya likolotong tse sa hlokahaleng.—Liproverbia 22:7.

Rera lintho. Nahanisisa ka lintho tseo u tlang ho li hloka nakong e tlang. Ka mohlala, haeba u rera ho reka ntlo kapa folete, ho nka e nang le mokitlane o tlaase e ka ba qeto e bohlale. Kapa ntate oa lelapa le eena a ka ’na a bona ho hlokahala hore a be le inshorense ea ha a ka shoa, a kula, a holofala kapa a etsahalloa ke ntho leha e le efe, e le hore a sireletse ba lelapa la hae. Ho nahana ka lintho tseo u tla li hloka nakong e tlang ho ka ’na ha akarelletsa hore u rere seo u tlang ho se etsa ha u se u tloheletse mosebetsi. Liproverbia 21:5 e re hopotsa hore “ka sebele merero ea ea khothetseng e tlisa molemo.”

Ithute. Itlhomelle ka ho ithuta ho etsa lintho tse itseng ’me u itlhokomele ’meleng le maikutlong. Lintho tsena li tla u tsoela molemo hamorao. Itloaetse ho ithuta. Bibele e re “bohlale bo sebetsang le matla a ho nahana” ke tsa bohlokoa haholo ’me e re khothalletsa hore re ’ne re tsoele pele ho li hlaolela.—Liproverbia 3:21, 22; Moeklesia 10:10.

E-ba le teka-tekano. Boloka chelete e le sebakeng se loketseng. Liphuputso li bontša hore batho ba amehileng ka batho ba bang ho e-na le ho ameha ka chelete ba batla ba thabile bophelong. Ba bang ba lumella meharo hore e ba hlokise botsitso. Joang? Ha ba se ba khotsofalitse litlhoko tsa bona tsa motheo ka ho lekaneng, ba qalella ho phehella maruo. Empa ha motho a e-na le lijo, liaparo le bolulo, ke’ng hape eo a hlileng a e hlokang? Ha ho makatse hore ebe mongoli oa Bibele ea qotsitsoeng qalong ea sehlooho sena o ile a boela a ngola, a re: “Ha re e-na le lintho tsa ho iphelisa le liaparo le tšireletso, re tla li khotsofalla.” (1 Timothea 6:8) Ho ithuta ho khotsofalla seo re nang le sona ho tla re thibela ho rata chelete ’me ho re sireletse mathateng ’ohle a bakoang ke eona.

Ke ’nete hore lerato la chelete ke motso oa libe tse ngata. Chelete e tla u laola haeba u e lumella. Empa ha u e laola hantle, chelete e ka u fa bolokolohi ba hore u hahamalle lintho tsa bohlokoa le ho feta bophelong, joaloka ho ba le kamano e haufi le ba lelapa, metsoalle le Molimo. Leha ho le joalo, ho bonahala ho le thata hore batho ba se ke ba tšoenyeha ka ho feletseng ka chelete lefatšeng lena. Na chelete e tla lula e bakela batho matšoenyeho ka tsela ee? Na ho na le tšepo ea hore bofutsana bo tla fela? Sehlooho se qetellang letotong lena se tla araba lipotso tseo.

[Ntlha e Qolotsoeng e leqepheng la 5]

Tseba hore na u fumana bokae ’me u sebelise chelete e ka tlaase ho eo

[Ntlha e Qolotsoeng e leqepheng la 5]

Ithute ho khetholla lintho tseo u li hlokang ho tseo u li batlang

[Ntlha e Qolotsoeng e leqepheng la 6]

Ha motho a e-na le lijo, liaparo le bolulo, ke’ng hape eo a hlileng a e hlokang?

[Lebokose/Setšoantšo se leqepheng la 7]

RUTA BANA BA HAO HO SEBELISA CHELETE KA BOHLALE

Kaha batho ba bangata kajeno ba na le mathata a lichelete, litsebi li khothalletsa batsoali hore ba rute bana ka chelete—le hona ba qalelle ba sa le banyenyane. Ha u ka botsa bana ba bangata hore na chelete e tsoa hokae, ba ka ’na ba re “ho Ntate” kapa “bankeng.” Haeba u ruta bana ba hao bohlokoa ba chelete—u ba ruta ho khetholla lintho tseo ba li hlokang ho tseo ba li batlang, ho e boloka le ho etsa matsete—u ka ’na ua ba thusa ho qoba masisa-pelo a tlisoang ke ho ba likolotong. Litlhahiso tse seng kae ke tsena.

 1. Ba behele mohlala o motle. Ka tloaelo, bana ba etsisa seo u se etsang ho fapana le ho etsa seo u se buang.

 2. Ba behele meeli. Buisanang ka hore na uena u tla sebelisa e kae ’me bona ba sebelise e kae. Ithute ho hana ’me u khomarele ho seo u se buileng.

 3. Ba lumelle hore ba itšebelisetse chelete. Haeba ba fuoa chelete e itseng kapa ba sebetsa, ba tataise hore na ba etse’ng ka eona. ’Me u ba lumelle hore ba iketsetse qeto ea hore na ba tla e sebelisa joang.

 4. Ba rute ho arolela ba bang. Khothalletsa bana ba hao ho arolela ba bang seo ba nang le sona le hore kamehla ba behelle e itseng ka thōko eo ba tla rorisa Molimo ka eona.