Bacha Baa Botsa

Nka Tobana Joang le ho Shoeloa ke Motsoali?

“Ha ’Mè a hlokahala, ke ile ka ikutloa ke lahlehetsoe ’me ke sithabetse. Ke eena ea neng a momahantse lelapa leso.”—Karyn.a

HO HLOKAHALLOA ke motsoali ke e ’ngoe ea lintho tse bohloko ka ho fetisisa bophelong. Hase feela hore u lokela ho mamella bohloko ba ho hlokahalloa ke motsoali, empa u boetse u lokela ho tobana le bokamoso bo ka ’nang ba fapana hōle le seo u neng u se lebeletse.

Mohlomong u ne u tšepile hore ’mè kapa ntate oa hao eo u mo ratang o tla be a le teng ha u fumana lengolo la ho khanna kapa ha u qeta sekolong se phahameng kapa hore o tla be a le teng mohla u chatang. Joale lintho tsena tseo u neng u li tšepile li ke ke tsa hlola li etsahala, ’me u setse u le mahlomoleng, u ferekane kapa ebile u halefile. U ka sebetsana joang le maikutlo a mangata a tlisoang ke ho shoeloa ke motsoali?

‘Na Boo ke Boikutlo ba Tlhaho?’

Ha taba ea ho hlokahalloa ke ’mè kapa ntate e qala ho thopothela, u ka ’na ua tlameha ho loantšana le maikutlo a mangata a fapaneng ao u qalang ho ba le ’ona. Brian ea neng a le lilemo 13 ha ntate oa hae a bolaoa ke lefu la pelo, o re: “Bosiung boo Ntate a hlokahetseng ka bona, sohle seo re ileng ra se etsa ke ho lla le ho hakana feela.” Natalie ea neng a le lilemo li leshome ha ntate oa hae a bolaoa ke lefu la kankere, o re: “Ke ne ke sa tsebe hore na ke etse’ng. Kahoo ke ile ka ema hlooho. Ka ikutloa ke rebehile.”

Lefu le ama batho ka litsela tse sa tšoaneng. Ha e le hantle, Bibele e re “e mong le e mong” o na le “lefu la hae le bohloko ba hae.” (2 Likronike 6:29) Ka lebaka leo, ak’u iphe nako ea hore u ke u nahane kamoo lefu la motsoali oa hao le u ammeng kateng. Ka tlaase mona, hlalosa (1) kamoo u ileng ua ikutloa kateng ha u ne u qala ho tseba hore motsoali oa hao o hlokahetse le (2) kamoo u ikutloang kateng hona joale.#

(1) ․․․․․

(2) ․․․․․

Mohlomong likarabo tsa hao li bontša hore tsela eo u ikutloang ka eona e batla e khutlela setloaeling. Boo ke boikutlo ba tlhaho. Hoo ha ho bolele hore u se u lebetse motsoali oa hao. Ka lehlakoreng le leng, u ka ’na ua fumana hore u ntse u saretsoe kapa u bile u saretsoe le ho feta. Mohlomong bohloko boo u bo utloang bo tšoana le maqhubu a leoatle le khutsitseng ao ka tšohanyetso a befang ’me a khahlellana lebōpong. Boikutlo boo le bona ke ba tlhaho—esita le haeba ho se ho fetile lilemo motsoali oa hao a hlokahetse. Potso ke hore na, U ka sebetsana le boemo boo joang—ho sa tsotellehe hore na u utloile bohloko hakae?

Litsela Tsa ho Sebetsana le Boemo Bona

U se ke ua thiba likhapha! Ho lla ho thusa ho kokobetsa bohloko ba ho shoeloa. Leha ho le joalo, u ka ’na ua ikutloa joaloka Alicia ea neng a le lilemo li 19 ha ’mè oa hae a hlokahala. O re, “Ke ne ke nahana hore ha ke bontša hore ke hlomohile haholo, ba bang ba tla bona eka ke fokolloa ke tumelo.” Empa hopola: Jesu Kreste e ne e le motho ea phethahetseng a bile a e-na le tumelo e matla ho Molimo. Leha ho le joalo, o ile “a ntša meokho” ha Lazaro, motsoalle oa hae ea ratehang a ne a hlokahetse. (Johanne 11:35) Kahoo u se ke ua tšaba ho lla. Kaha seo ha se bolele hore u fokolloa ke tumelo! Alicia o re: “Qetellong ke ile ka lla haholo. Ke ne ke lla letsatsi le chabang le le likelang.”b

Bua ka se etsang hore u ikutloe u le molato. Karyn ea neng a le lilemo li 13 ha ’Mè oa hae a hlokahala, o re: “Kamehla bosiu pele ke robala, ke ne ke ea ka kamoreng ea ’Mè ho ea mo aka. Bosiung bo bong ha kea ka ka mo aka. Hoseng ka le hlahlamang, ’Mè o ile a hlokahala. Le hoja e le ho sa utloahaleng, ke ikutloa ke le molato ka hore ebe ha kea ka ka mo bona bosiung boo—le ka lintho tse ngata tse ileng tsa etsahala hoseng. Ntate o ne a tsamaile ka mosebetsi ’me a itse ’na le ausi oa ka re sale re hlokometse ’Mè. Empa re ile ra robala bosiu haholo. Ha ke kena ka kamoreng ea hae o ne a se a sa heme. Ke ile ka utloa bohloko haholo, kaha o ne a ntse a phela hantle ha Ntate a tsamaea!”

Joaloka Karyn mohlomong u ikutloa u le molato ka lebaka la lintho tseo u sa kang ua li etsa. U ka ’na ua boela ua ipolaisa pelo ka ho ’na u re “hoja ebe.” ‘Hoja ebe ke ile ka phehella Ntate hore a ee ngakeng.’ ‘Hoja ebe ke ile ka e’o hloela ’Mè pejana.’ Haeba ho nahana ka lintho tse kang tsena ho u tšoenya, hopola: Ke ha tlhaho hore u ikutloe u le molato ka lintho tseo u lakatsang eka u ka be u li entse ka tsela e fapaneng. ’Nete ke hore u ka be u li entse ka tsela e fapaneng haeba u ne u tsebile se tla etsahala. Empa u ne u sa tsebe. Ka hona, ha ua lokela ho ikutloa u le molato. Hase molato oa hao hore ebe motsoali oa hao o hlokahetse!c

Hlalosa tsela eo u ikutloang ka eona. Liproverbia 12:25 e re: “Mantsoe a mosa a tla u hlasimolla.” (Today’s English Version) Ha u bipetsa maikutlo u ka ’na ua thatafalloa ho tobana le boemo bona bo bohloko. Ka lehlakoreng le leng, ho hlalosetsa motho e mong tsela eo u ikutloang ka eona ho tla etsa hore a u khothatse ka “mantsoe a mosa” nakong eo u saretsoeng. Kahoo, re u khothalletsa hore u sebelise tse ling tsa litlhahiso tse latelang.

Bua le motsoali oa hao ea setseng. Le hoja e le nako e bohloko ho motsoali ea setseng, ha ho pelaelo hore o ntse a batla ho u thusa. Kahoo mo bolelle kamoo u ikutloang kateng. Ka sebele ho ba le puisano e joalo ho tla u thoba pelo ho be ho etse hore le momahane.

E le ho u thusa hore u qalise moqoqo, leka sena: Thathamisa lintho tse seng kae tseo u lakatsang ho li tseba ka motsoali oa hao ea hlokahetseng, ebe u kōpa ea setseng hore le tšohle tse ling tsa tsona.d

․․․․․

Bua le metsoalle e haufi-ufi. Bibele e re metsoalle ea ’nete ke e “tsoaletsoeng ha ho e-na le mahlomola.” (Liproverbia 17:17) Alicia o re: “Motho eo u sa nahaneng hore a ka u thusa, e ka ’na ea e-ba eena ea u thusang. Kahoo u se ke ua tšaba ho bua ka se u tšoenyang.” Bonneteng, ho ka ’na ha e-ba thata ho buisana ka seo le motsoalle oa hao, kaha le ka ’na la se ke la tseba hore na le re’ng. Empa qetellong ho tla u tsoela molemo hore u bolelle ba bang se u utloisang bohloko. David ea neng a le lilemo li robong ha ntate oa hae a bolaoa ke lefu la pelo, o re: “Ke ile ka bipetsa maikutlo a ka. Haeba ke ne ke a ntšitse, nka be ke ile ka thuseha. Seo se ka be se nthusitse ho amohela se etsahetseng.”

Bua le Molimo. U ka ’na ua ikutloa u imolohile ka mor’a hore u ‘tšollele pelo ea hao’ ho Jehova Molimo ka thapelo. (Pesaleme ea 62:8) Thapelo hase feela tsela ea ho kokobetsa bohloko. Ha u rapela, u ipiletsa ho “Molimo oa matšeliso ’ohle, ea re tšelisang matšoenyehong ’ohle a rōna.”—2 Bakorinthe 1:3, 4.

Tsela e ’ngoe eo Molimo a re tšelisang ka eona ke ka moea oa hae o halalelang. Ka oona a ka u fa “matla a fetang se tloaelehileng,” e le hore u mamelle bohloko ba ho shoeloa. (2 Bakorinthe 4:7) Molimo o boetse o fana ka “matšeliso a tsoang Mangolong.” (Baroma 15:4) Kahoo kōpa Molimo hore a u fe moea o halalelang ’me u iphe nako ea ho bala molaetsa o khothatsang o ka Lentsoeng la hae, e leng Bibele. (2 Bathesalonika 2:16, 17) U ka thathamisa mangolo a u tšelisang ka ho khetheha.e

Na Mahlomola a Tla ke a Fele?

Ho sareloa ho nka nako. Brianne ea hlokahaletsoeng ke ’mè ha a le lilemo li 16, o re: “Hase ntho feela eo motho a ka e lebalang habonolo. Ho na le matsatsi a mang ao ke llang ho fihlela ke robala. Ka linako tse ling, ke leka hore ke se ke ka nahana haholo ka hore ke hlokahalletsoe ke ’Mè, ho e-na le hoo ke leka ho nahana ka litšepiso tseo Jehova a re behetseng tsona Paradeiseng.”

Bibele e re tšepisa hore Paradeiseng eo Brianne a buang ka eona, “lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.” (Tšenolo 21:3, 4) Ho thuisa ka litšepiso tse kang ena ho ka ’na ha u thusa hore u tobane le bohloko ba ho shoeloa ke motsoali.

Lihlooho tse ling tsa “Bacha Baa Botsa” li ka fumanoa mocheng oa boitsebiso oa Inthanete ho www.watchtower.org/ype

[Mongolo o botlaaseng ba leqephe]

Ba bang ba ’nile ba khothatsoa ke mangolo a latelang: Pesaleme ea 34:18; 102:17; 147:3; Esaia 25:8; Johanne 5:28, 29.

SEO U KA NAHANANG KA SONA

◼ U tla sebelisa litlhahiso life tse sehloohong see? ․․․․․

◼ Ka tlaase mona, thathamisa mangolo a seng makae a tla u khothatsa ha u ikutloa u sithabetse haholo. ․․․․․

[Lebokose le leqepheng la 11]

HO LLA HO LOKETSE . . . BA ILE BA LLA!

Abrahama—Genese 23:2.

Josefa—Genese 50:1.

Davida—2 Samuele 1:11, 12; 18:33.

Maria, khaitseli ea Lazaro—Johanne 11:32, 33.

Jesu—Johanne 11:35.

Maria Magdalena—Johanne 20:11.

[Lebokose/Setšoantšo se leqepheng la 12]

NGOLA KAMOO U IKUTLOANG KATENG

Ho ngola kamoo u ikutloang kateng ka motsoali oa hao ea hlokahetseng ho ka u thusa haholo hore u tobane le lefu la hae. Ho na le lintho tse ngata tseo u ka li ngolang. Ka tlaase mona ho fanoe ka litlhahiso tse seng kae.

◼ Ngola lintho tse ling tse u thabisang tseo u li hopolang ka motsoali oa hao.

◼ Ngola lintho tseo u lakatsang eka u ka be u mo boleletse tsona ha a ntse a phela.

◼ Nka hore u na le ngoan’eno e monyenyane ea itjarisang molato ka lefu la motsoali oa lōna. Ngola seo u neng u ka se bua ha u mo tšelisa. Sena se ka u thusa hore u loantše boikutlo ba ho ipeha molato.

[Lebokose le leqepheng la 13]

MOLAETSA HO MOTSOALI EA SETSENG

Ho shoeloa ke molekane ke boemo bo utloisang bohloko haholo. ’Me sena se etsahala ka nako eo ngoana oa hao a hlokang hore u mo thuse. U ka mo thusa joang hore a tobane le bohloko ba ho shoeloa, empa u sa hlokomolohe taba ea hore le uena u ntse u utloile bohloko?

U se ke ua hatella maikutlo a hao. Ngoana oa hao o ithutile lintho tse ngata tsa bohlokoa bophelong ka ho sheba tsela eo u etsang lintho ka eona. O tla ithuta ho tobana le bohloko ba ho shoeloa ka ho sheba seo u se etsang. Kahoo, u se ke ua nka hore u tlameha ho itiisa pelo ka ho patela ngoana maikutlo a hao. Sena se ka ’na sa mo ruta hore a u etsise. Empa haeba u bontša hore u utloile bohloko, o tla ithuta hore maemong a mangata ho molemo hore a ntše maikutlo ho e-na le hore a a koalle ka pelong le hore ke ha tlhaho hore a ikutloe a saretsoe, a ferekane, kapa a bile a halefile.

Khothalletsa ngoana hore a bue. Le hoja u sa mo qobelle hore a bue, mo khothalletse hore a hlalose tsela eo a ikutloang ka eona. Empa haeba a bonahala a le leqe, u ka ’na ua tšohla sehlooho sena le eena. Hape, bua ka lintho tse thabisang tseo u li hopolang ka molekane oa hao ea hlokahetseng. Mo bolelle kamoo lintho li tlil’o u thatafalla kateng. Ha a mametse kamoo u hlalosang maikutlo a hao kateng, seo se tla mo thusa hore a ithute ho u etsisa.

Tseba moo matla a hao a fellang teng. Ka ho utloahalang, u batla ho tšehetsa ngoana oa hao ka hohle-hohle nakong ena e bohloko. Empa u hopole hore lefu la molekane oa hao eo u mo ratang le u amme habohloko. Kahoo u ka ’na ua qeta nako u ikutloa u nyahame, u khathetse kelellong le ’meleng. (Liproverbia 24:10) Ka lebaka leo, ho ka ’na ha hlokahala hore u kōpe litho tse ling tsa lelapa kapa metsoalle e hōlileng tsebong hore e u thuse. Ha u kōpa thuso u bontša hore u hōlile tsebong. Liproverbia 11:2 e re: “Bohlale bo ho ba inyenyefatsang.”

Jehova Molimo ke eena ea ka u thusang ka tsela e molemo ka ho fetisisa, ’me o tšepisa barapeli ba hae: “’Na, Jehova Molimo oa hao, ke u tšoara ka letsoho la hao le letona, ke ’na Ea reng ho uena, ‘U se ke ua tšoha. Ke tla u thusa.’”—Esaia 41:13.

[Setšoantšo se leqepheng la 11]

Bohloko bo tlisoang ke lefu bo ka tšoana le maqhubu a khahlellanang lebōpong ka tšohanyetso