Pono ea Bibele

Ho Ratana ka Sepheo sa ho Kena Lenyalong

Julie le Lee ba ne ba ratana ’me ba ikemiselitse ho lula ba hloekile boitšoarong.a Empa mantsiboeeng a mang ba ile ba iphumana ba le babeli feela, ’me ba qala ho ba le takatso e matla ea ho kopanela liphate. Ka lehlohonolo ba ile ba hlaphoheloa pele ba etsa phoso e tebileng.

BORAPELI ba ’nete hase feela taba ea ho ea tšebeletsong ea bolumeli beke le beke. Ke tsela ea bophelo e susumetsang boitšoaro ba motho le melao ea boitšoaro eo a e latelang. Jesu Kreste o ile a re Molimo o tla amohela feela ba “etsang thato” ea Hae. (Matheu 7:21) E le hore re khahlise Molimo, re lokela ho boloka kamano ea rōna le batho ba bong bo fapaneng e hlompheha ’me re ratane ka sepheo sa ho kena lenyalong.

Le ka etsa’ng ho boloka kamano ea lōna e hloekile mahlong a Molimo, haholo-holo ka lebaka la khatello e matla eo baratani ba tobanang le eona ea hore ba furalle boitšoaro bo botle? Ntlha ea pele, elelloang hore melao ea Molimo e entsoe molemong oa rōna. Ea bobeli, amohelang ’nete ea seo batho ba leng sona. Ea boraro, ipeheleng meeli e tobileng ea boitšoaro bo loketseng. ’Me ea bone, le kenye Molimo kamanong ea lōna. A re tšohleng lintlha tsena ka bonngoe.

Melao e Etselitsoe ho re Tsoela Molemo

Ho Esaia 48:17, 18, rea bala: “’Na, Jehova, ke Molimo oa hao, ke ’na Ea u rutang hore u itsoele molemo, Ea etsang hore u tsamaee tseleng eo u lokelang ho tsamaea ka eona. Hoja u ka ela litaelo tsa ka hloko! Joale khotso ea hao e ne e tla tšoana le nōka, ’me ho loka ha hao ho tšoane le maqhubu a leoatle.”

Ha e le hantle, litaelo le melao-motheo tse boletsoeng ka Lentsoeng la Molimo le bululetsoeng, e leng Bibele e Halalelang, li molemong oa rōna. (2 Timothea 3:16, 17) Ke bopaki ba hore ruri ’Mōpi oa rōna oa re tsotella ’me o batla hore re thabe re be re atlehe linthong tsohle bophelong. (Pesaleme 19:7-10) Na ke kamoo le ikutloang kateng? Haeba ho joalo, le bontša hore le bohlale e le ka ’nete.

Amohelang ’Nete ka Seo le Leng Sona

Joaloka motsoalle oa ’nete, ka botšepehi Jehova o re bolella ’nete ka seo re leng sona. Ka mohlala, Lentsoe la hae le re lemosa hore “pelo e bolotsana ho feta ntho leha e le efe ’me e tsitlella seo e se batlang. Ke mang ea ka e tsebang?” (Jeremia 17:9) Bibele e boetse e re: “Ea tšepang pelo ea hae o hloka kelello, empa ea tsamaeang ka bohlale ke eena ea tla phonyoha.”—Liproverbia 28:26.

Baratani ba ka bontša joang hore ba tšepa lipelo tsa bona? Tsela e ’ngoe ke ka hore ba itumelle hore ba be maemong ao ba ka ’nang ba lekeha hore ba atamelane ho feta tekano, joaloka baratani ba boletsoeng ka holimo. Hape ke ka hore ba hlokomolohe keletso e bohlale ea batsoali ba bona ba hlomphang Molimo. Batsoali bao baa tseba hore takatso ea ho kopanela liphate, haholo-holo nakong ea bocha, e ka ba matla joaloka enjene e matla e lokelang ho laoloa ka hloko.

Kahoo, bacha ba ‘tsamaeang ka bohlale ba bomolimo’ ba nka tataiso ea batsoali ka ho teba. E, ba nka ka ho teba keletso ea batsoali ba bona ba ba ratang, hoo ba ba bolellang lintho tseo ba ka ’nang ba se ke ba rata ho li utloa. Ke ’nete hore ea le ratang ka ho fetisisa ke Ntate oa lōna oa leholimo, Jehova Molimo, ea le eletsang hore le ‘tlose matšoenyeho lipelong tsa lōna, ’me le qobe tlokotsi ’meleng.’ (Moeklesia 11:9, 10) Le ka etsa see joang? Ka hore le se ke la inehella litakatso tse fosahetseng.

Ipeheleng Meeli e Hlakileng ea Boitšoaro

“Ho ba rerisanang hammoho ho na le bohlale.” (Liproverbia 13:10) Qalong ea lefereho, baratani ba bohlale ba latela mantsoe ao ka hore ba lumellane ka lipontšo tse loketseng tsa lerato ho ea ka Mangolo ’me ba ikemisetsa hore ba se ke ba tlōla meeli eo. Ho etsa lipontšo tse sa lokelang tsa lerato kapa ho itšepa ho feta tekano ho tšoana le ho khanna ka bohlasoa. Ha ho thuse letho ho haha serobe phiri e se e jele, ha le se le kene mathateng!

Bibele e re: “Ea masene ke ea boneng tlokotsi ’me a ipata, empa ba se nang phihlelo ba fetetse pele ’me ba tla fumana kotlo.” (Liproverbia 22:3) Baratani ba ka qoba ho kena khathatsong ka hore ba intše le sehlopha sa batho ba itlhomphang kapa ba be le molebeli ea loketseng. Liphello tsa ho ba booatla nakong ea lefereho li ka ’na tsa akarelletsa ho cha letsoalo, ho se itlhomphe le ho se hlomphe motho e mong le ho soabisa bohle ba amehang, hammoho le ba lelapa. Kahoo, e-bang masene; sebelisang melao-motheo ea Mangolo ’me le e khomarele!

Etsang Jehova ‘Thapo ea Boraro’

Lenyalo le tšoana le thapo e meloho e meraro, ’me Molimo ke eena thapo e ka sehloohong. Moeklesia 4:12 e re: “Thapo e meloho e meraro e ke ke ea khaoloa likoto tse peli kapele.” Molao-motheo o tšoanang o ka sebetsa le ho batho ba leferehong. Ba batlang hore Molimo a ba hlohonolofatse kamanong ea bona, oa ba hlohonolofatsa ha ba lula ba le haufi le eena e le batho ka bomong. Pesaleme ea 1:1-3 e re: “Ho thaba motho ea sa kang a tsamaea keletsong ea ba khopo . . . Empa o thabela molao oa Jehova, molao oa hae o o bala ka lentsoe le tlaase bosiu le motšehare . . . , ntho e ’ngoe le e ’ngoe eo a e etsang e tla atleha.”

Ka sebele, haeba re etsa lintho ka tsela ea Jehova re tla atleha bophelong, ho akarelletsa leferehong le lenyalong. Etsoe ke eena ’Mōpi oa rōna, ’me maikutlo a lerato le lenyalo ke limpho tsa bohlokoa tse tsoang ho eena. Ka lebaka leo, re lokela ho li hlompha haholo.—Jakobo 1:17.

[Mongolo o botlaaseng ba leqephe]

NA U KILE UA IPOTSA?

● Re tseba joang hore Molimo o re batlela se molemo ka ho fetisisa?—Esaia 48:17, 18.

● Ke ’nete efe eo re lokelang ho e amohela ka seo re leng sona?—Jeremia 17:9.

● Ke’ng e ka atlehisang batho nakong ea lefereho le ha ba se ba nyalane?—Pesaleme ea 1:1-3.

[Setšoantšo se leqepheng la 13]

Qalong ea lefereho, baratani ba bohlale ba lumellana ka lipontšo tse loketseng tsa lerato ho ea ka Mangolo ’me ba ikemisetsa hore ba se ke ba tlōla meeli eo