Khaolo ea 17

O Ruta Nikodema

HA JESU a sa le Pasekeng ea 30 C.E., o etsa lipontšo tse tsotehang, kapa mehlolo. Ka baka leo, batho ba bangata ba lumela ho eena. Nikodema, setho sa Sanhedrin, e leng lekhotla le phahameng la Bajode, o hlolletsoe haholo ’me o ne a batla ho ithuta ho eketsehileng. Ka hona o etela Jesu ka lenyele bosiu, mohlomong kahobane a tšaba hore botumo ba hae bo tla senyeha haeba baeta-pele ba bang ba Bajode ba ka ’mona.

O re: “Rabbi, rea tseba hobane u moruti ea tsoang ho Molimo; hobane ha ho motho ea ka etsang mehlolo eo u e etsang, ha Molimo o se ho eena.” Ha Jesu a arabela, o bolella Nikodema hore e le hore motho a kene ’Musong oa Molimo o lokela ‘ho tsoaloa la bobeli.’

Leha ho le joalo ke joang motho a ka tsoaloang la bobeli? Nikodema oa botsa: “Na a ka boela a khutlela popelong ea ’m’ae, a boela a tsoaloa?”

Che, ho tsoaloa la bobeli ha ho bolele hoo. Jesu oa hlalosa: “Motho ha a sa tsoaloe ka metsi le ka Moea, o sitoa ho kena ’musong oa Molimo.” Ha Jesu a ne a kolobetsoa ’me moea o halalelang o theohela holim’a hae, ka tsela eo o ile a tsoaloa ka “metsi le ka Moea.” Ka lentsoe le hlahang leholimong le reng, ‘Enoa ke Mora oa ka eo ke khahlisoang ke eena,’ Molimo o ne o tsebahatsa hore o tlisitse mor’a oona oa moea ea nang le tebello ea ho kena ’Musong oa leholimo. Hamorao, ka Pentekonta ea 33 C.E., ba bang ba kolobelitsoeng ba tla amohela moea o halalelang ’me ba tla tsoaloa hape e le bara ba moea ba Molimo.

Empa karolo ea Mora ea khethehileng oa Molimo eo e leng motho ke ea bohlokoa. Jesu o bolella Nikodema, “Joale ka ha Moshe a na a fanyehe noha feelleng, Mor’a motho e ka khona a fanyehoe joalo; hore e mong le e mong ea lumelang ho eena a se ke a timela, a mpe a be le bophelo bo sa feleng.” E, joalokaha Baiseraele bao ba neng ba lonngoe ke linoha tse mahloko ba ne ba lokela ho talima noha ea koporo hore ba bolokehe, ka hona ho hlokahala hore batho bohle ba lumele ho Mor’a Molimo hore ba bolokehe boemong ba bona ba ho shoa.

Ha Jesu a hatella karolo e lerato ea Jehova ho sena, o boetse o bolella Nikodema: “Hobane Molimo o ratile lefatše hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” Ka hona, mona Jerusalema ka mor’a likhoeli tse tšeletseng hoba Jesu a qale tšebeletso ea hae, o hlakisa hore ke eena eo Jehova Molimo a tla mo sebelisa ho boloka batho.

Jesu o tsoela pele ho hlalosetsa Nikodema: “Hobane Molimo o romile Mora oa oona lefatšeng, e seng hore a ahlole lefatše,” ke hore, eseng hore a le ahlole haboima kapa hore a le nyatse, ka hore a ahlolele moloko oa batho timetso. Ho fapana le hoo, joalokaha Jesu a bolela, o rometsoe hore “lefatše le bolokoe ke eena.”

Nikodema o tlile ho Jesu bosiu hobane a ne a tšaba. Kahoo ke ho thahasellisang hore Jesu o phetha puisano ea hae le eena ka ho re: “’Me kahlolo ke eona ena: Leseli [leo Jesu a le mothofalitseng bophelong ba hae le lithutong tsa hae] le tlile lefatšeng, ’me batho ba ratile lefifi ho leseli, kahobane mesebetsi ea bona e ne e le mebe. Hobane e mong le e mong ea etsang bobe, o hloile leseli, ’me ha a tle leseling, mesebetsi ea hae e tle e se ke ea khalemeloa. Empa ea etsang ’nete, o tla leseling, mesebetsi ea hae e tle e bonahatsoe hore e etselitsoe Molimo.” Johanne 2:23–3:21; Mattheu 3:16, 17; Liketso 2:1-4; Numere 21:9.

▪ Ke eng se susumelitseng ketelo ea Nikodema, hona ke hobane’ng ha a etile bosiu?

▪ ‘Ho tsoaloa la bobeli’ ho bolela eng?

▪ Jesu o bontšitse karolo eo a e phethang bakeng sa poloko ea rōna joang?

▪ Ho bolela eng hore Jesu ha aa tlela ho ahlola lefatše?