Khaolo ea 20

Mohlolo oa Bobeli ha a Ntse a le Kana

HA JESU a khutlela ha habo ka mor’a phutuho e telele ea ho bolela Judea, ha a ele ho phomola. Ho fapana le hoo, o qala tšebeletso e khōloanyane le ho feta naheng ea Galilea moo a hōletseng teng. Empa barutuoa ba hae, ho e-⁠na le ho tsoela pele le eena, ba khutlela malapeng a bona le mesebetsing ea bona ea pele.

Jesu o qala ho bolela molaetsa ofe? Ona: “’Muso oa Molimo o atametse; bakang, ’me le lumele Evangeli.” Karabelo e bile efe? Bagalilea ba amohela Jesu. O hlompshoa ke bohle. Leha ho le joalo, hona hase hakaalo ka baka la molaetsa oa hae, empa ke ka baka la hore ba bangata ho bona ba ne ba le teng Pasekeng e neng e le Jerusalema likhoeli pejana ’me ba bona lipontšo tse tsotehang tseo a ileng a li etsa.

Ho bonahala hore Jesu o qala tšebeletso ea hae e khōlō ea Galilea Kana. U tla hopola hore pejana, ha a khutla Judea, o ile a fetola metsi veine moketeng oa lenyalo o neng o le moo. Ka lekhetlo lena la bobeli ngoana oa ’musisi oa Morena Heroda Antipase o kula haholo. Ha ’musisi a utloa hore Jesu o khutlile Judea ho tla Kana, o nka leeto ho tloha ha habo Kapernauma ho ea batla Jesu. Monna eo o mo phehella a tšohile: ‘Tloo ka potlako pele ngoana oa ka a e-⁠shoa.’

Jesu oa arabela: ‘Khutlela hae, mora oa hao o folile!’ ’Musisi oa Heroda oa lumela ’me o qala leeto le lelelele ho khutlela hae. Ha a le tseleng o khahlanyetsoa ke bahlanka ba hae, ba potlaketseng ho tla ’molella hore tsohle li lokile​—⁠mora oa hae o folile! Oa botsa, ‘O ile a hlaphoheloa neng?’

Baa araba, ‘Maobane ka hora ea pele thapama.’

’Musisi o hlokomela hore ke eona hora eo Jesu a itseng, ‘Mora oa hao o folile!’ Ka mor’a moo, monna eo le lelapa lohle la hae ba fetoha barutuoa ba Kreste.

Kahoo Kana e tlotloa ka ho ba sebaka seo ho sona, ha Jesu a bontša hore o khutlile Judea, a entseng mehlolo e ’meli ho sona. Leha ho le joalo, ena hase eona feela mehlolo eo a e entseng ho tla fihlela joale, empa ke ea bohlokoa hobane e ne e tšoaea ho khutlela ha hae Galilea.

Joale Jesu o leba lapeng Nazaretha. O letetsoe ke eng moo? Johanne 4:43-54; Mareka 1:14, 15; Luka 4:14, 15.

▪ Ha Jesu a khutlela Galilea, ho etsahala’ng ka barutuoa ba hae, ’me batho ba mo amohela joang?

▪ Jesu o etsa mohlolo ofe, ’me o ba le phello efe ho ba amehang?

▪ Kahoo Jesu o tlotla Kana joang?