Khaolo ea 54

“Bohobe ba ’Nete bo Tsoang Leholimong”

KA SEBELE letsatsi la maobane e bile le tletseng liketsahalo. Jesu o ile a fepa batho ba likete ka mohlolo a ba a pholoha ha batho ba leka ho mo etsa morena. Bosiung boo o ile a tsamaea holim’a leoatle le befileng la Galilea; a pholosa Petrose ea ileng a qala ho teba ha a tsamaea metsing a tsokotsoang ke sefefo; ’me a khutsisa maqhubu ho pholosa barutuoa ba hae sekepeng se tsukutloang ke sefefo.

Joale batho bao Jesu a ileng a ba fepa ka mohlolo ka leboea-bochabela ho Leoatle la Galilea ba mo fumana haufi le Kapernauma ’me ba botsa: “U tlile neng mona?” Jesu o ba nyatsa ka hore ba ’matla hobane feela ba lebelletse ho fumana lijo tse sa lefelloeng. O ba phehella hore ba se sebeletse lijo tse felang, empa ba sebeletse lijo tse tla ba teng le bophelong bo sa feleng. Kahoo batho baa botsa: “Re tla etsa’ng hore re sebetse mesebetsi ea Molimo na?”

Jesu o bolela mosebetsi o le mong feela oa bohlokoa ka ho fetisisa. Oa hlalosa: “Mosebetsi oa Molimo ke hoba le lumele ho eo o mo romileng.”

Leha ho le joalo, batho ha ba lumele ho Jesu, ho sa tsotellehe mehlolo eohle eo a e entseng. Ka ho se lumele, esita le ka mor’a lintho tsohle tse babatsehang tseo a li entseng, baa botsa: “Hleka o etsa mohlolo ofe, re tle re o bone, ’me re lumele ho uena? U sebetsa eng na? Bo-ntat’a rōna ba jele manna feelleng, joale ka ha ho ngoliloe, ho thoe: O ba file bohobe bo tsoang leholimong, ba e-⁠ja.”

Ha a arabela kōpo ea bona bakeng sa mohlolo, Jesu o hlakisa Mohloli oa litokisetso tsa hae tsa mohlolo, ka hore: “Hase Moshe ea le neileng bohobe bo tsoang leholimong, empa ke eena Ntate ea le neang bohobe ba ’nete bo tsoang leholimong. Hobane bohobe ba Molimo ke bo theohileng leholimong, bo neang lefatše bophelo.”

Batho ba re, “Morena, re fe bohobe boo ka mehla eohle.”

Jesu oa hlalosa: “Ke ’na bohobe ba bophelo; ea tlang ho ’na a ke ke a lapa, ’me ea lumelang ho ’na a ke ke a nyoroa le ka mohla o le mong. Empa ke le boleletse hore le mpone, empa ha le lumele. Hohle hoo ke ho neoang ke Ntate, ho tla fihla ho ’na; ’me ea tlang ho ’na, nke ke ka mo lahlela ntle. Hobane ke theohile leholimong, e seng ho etsa ho ratoang ke ’na, empa e le ho etsa ho ratoang ke ea nthomileng. ’Me ho rata ha Ntate ea nthomileng ke hore ke se lahle letho la tsohle tseo a ’neileng tsona, ke mpe ke li tsose ka letsatsi la bofelo. Ho ratoang ke ea nthomileng ke hore, e mong le e mong ea talimang Mora, ’me a lumela ho eena, a be le bophelo bo sa feleng.”

Ha ba utloa tsena Bajode ba qala ho korotlela Jesu hoba a itse, “Ke ’na bohobe bo theohileng leholimong.” Ba mo talima e se letho ha e se mora oa batsoali ba batho ’me kahoo ba etsa ka tsela eo batho ba Nazaretha ba ileng ba etsa ka eona ba hanyetsa, ba re: “Na eo hase Jesu, mor’a Josefa, eo re tsebang ntat’ae le ’m’ae? Joale o bolela joang, ha a re: Ke theohile leholimong?”

Jesu oa arabela: “Le se ke la seba hammoho. Ha ho motho ea ka tlang ho ’na, ha a sa huloe ke Ntate ea nthomileng; ’me ’na, ke tla mo tsosa ka letsatsi la bofelo. Ho ngoliloe mangolong a baprofeta, ho thoe: Ba tla rutoa bohle ke Molimo. Ka baka leo, e mong le e mong ea utloileng Ntate, ea ithutileng ho eena, o tla ho ’na. Hase hore motho o kile a bona Ntate, ha e se ea tsoang ho Molimo; eena o bone Ntate. Ka ’nete-nete ke re ho lōna: ea lumelang ho ’na o na le bophelo bo sa feleng.”

Ha a tsoela pele, Jesu oa pheta: “Ke ’na bohobe ba bophelo. Bo-ntat’a lōna ba jele manna feelleng, ’me ba shoele. Ke bona bohobe bo theohang leholimong, hore motho a bo je, ’me a se ke a shoa. Ke ’na bohobe bo phelang, bo theohileng leholimong; ekare ha motho a e-⁠ja bohobe bona, o tla phela ka mehla.” E, ka ho lumela ho Jesu, eo Molimo o mo romileng, batho ba ka ba le bophelo bo sa felang. Ha ho manna, kapa bohobe leha e le bofe bo joalo, bo ka fanang ka seo!

Ho bonahala puisano e mabapi le bohobe bo tsoang leholimong e qalile nakoana ka mor’a hore batho ba fumane Jesu haufi le Kapernauma. Empa ea ntšetsoa pele, ho fihla sehlohlolong hamorao ha Jesu a ntse a ruta synagogeng Kapernauma. Johanne 6:25-51, 59; Pesaleme ea 78:24; Esaia 54:13; Mattheu 13:55-57.

▪ Ke liketsahalo life tse ileng tsa etella pele ho bua ha Jesu ka bohobe bo tsoang leholimong?

▪ Ha ho talingoa seo Jesu a sa tsoa se etsa, ke hobane’ng ha kōpo ea mohlolo e le e sa lokelang hakaale?

▪ Ke hobane’ng ha Bajode ba korotla ha Jesu a bolela hore ke eena bohobe ba ’nete ho tsoang leholimong?

▪ Puisano ka bohobe bo tsoang leholimong e ile ea tšoareloa hokae?