Karolo 7
Haufinyane Morero oa Molimo o Tla Phethahala
1, 2. Ke hobane’ng ha re ka kholiseha hore Molimo o tla nka khato ea ho felisa bokhopo le ho utloa bohloko?
1 Le hoja Molimo a lumeletse ho se phethahale le ho utloa bohloko ka nako e telele ho latela pono ea batho, a ke ke a lumella maemo a mabe ho tsoela pele ka ho sa feleng. Bibele e re bolella hore Molimo o na le nako e khethehileng bakeng sa ho lumella lintho tsena ho etsahala.
2 “Bakeng sa ntho e ’ngoe le e ’ngoe ho na le nako e khethiloeng.” (Moeklesia 3:1, NW) Ha nako ea Molimo e behiloeng ea ho lumella bokhopo le ho utloa bohloko e fihla qetellong, joale o tla kenella litabeng tsa batho. O tla felisa bokhopo le ho utloa bohloko ’me a phethahatse morero oa hae oa pele oa hore lefatše le tlatsoe ka lelapa la batho ba phethahetseng, ba thabileng ba thabelang khotso e feletseng le tšireletseho ea moruo tlas’a maemo a Paradeise.
Likahlolo tsa Molimo
3, 4. Buka ea Liproverbia e hlalosa liphello tsa ho kenella ha Molimo joang?
3 Hlokomela boprofeta bo seng bokae ho bo bongata ba Bibele bo bolelang seo ho kenella ha Molimo, ke hore, liphello tsa likahlolo tsa hae, ho tla se bolela haufinyane bakeng sa lelapa la batho:
4 “Ba lokileng ba tla aha lefatšeng; ba hloekileng ba tla le rua. Empa ba babe ba tla khaoloa holim’a lefatše, ba lonya ba fotholoe ho lona.”—Liproverbia 2:21, 22.
5, 6. Pesaleme ea 37 e bontša joang se tla etsahala ha Molimo a kenella?
5 “Ba bolotsana ba tla felisoa, athe ba itšepetseng Jehova ba tla rua lefatše. Ho se ho se hokae, ’me molotsana o tla ba sieo; . . . empa ba bonolo ba tla rua lefatše, ba iketle khotsong e kholo.”—Pesaleme ea 37:9-11.
6 “U itšepise ka Jehova, u tiee litseleng tsa hae, ’me o tla u holisa, u tle u je lefa la lefatše; u tla bona le tšenyeho ea ba babe. Lemoha ea lokileng, u talime motho oa toka; hobane motho oa khotso o sa tla bona litloholo, empa ba bolotsana ba timela, ’me litloholo tsa ba babe lia felisoa.”—Pesaleme ea 37:34, 37, 38.
7. Ke keletso efe e utloahalang eo Lentsoe la Molimo le re fang eona?
7 Ka hona, ka lebaka la bokamoso bo tsotehang bo tla tlela ba hlokomelang tokelo ea ’Mōpi ea matla ’ohle ea ho re busa, rea phehelloa: “Pelo ea hao e ke e boloke likeletso tsa me; ’me u tla ekelletsoa ke tsona litšiu, le lilemo, le ho phela, le khotso.” Ha e le hantle, ba khethang ho etsa thato ea Molimo ba tla ekeletsoa bophelo bo sa feleng! Ka hona, Lentsoe la Molimo lea re eletsa: “U tšepe Jehova ka pelo ea hao eohle, u se ke ua itšepa hlalefo ea hao. U mo kenye mererong ea hao eohle, ’me o tla u tsamaisa litseleng tsohle tsa hao.”—Liproverbia 3:1, 2, 5, 6.
Puso ea Molimo ho Tsoa Leholimong
8, 9. Molimo o tla sebelisa eng ho hloekisa lefatše lee?
8 Molimo o tla finyella tlhoekiso ena ea lefatše ka puso e molemohali eo batho ba neng ba ka ba le eona. Ke puso e bonahatsang bohlale ba leholimo hobane e busa ho tsoa leholimong tlas’a taolo ea Molimo. ’Me ’Muso oo oa leholimo o tla tlosa mefuta eohle ea puso ea batho lefatšeng. Batho ba ke ke ba hlola ba ba le khetho ea ho leka ho busa ba sa itšetleha ka Molimo.
9 Tabeng ena boprofeta bo ho Daniele 2:44 bo re: “Mehleng ea marena ao [mebuso ea kajeno], Molimo oa leholimo o tla hloma ’muso [leholimong] o ke keng oa senyeha ka ho sa eeng kae, ’me borena ba oona bo ke ke ba fetela ho sechaba se seng [batho ba ke ke ba hlola ba lumelloa ho busa ba sa itšetleha ka Molimo]; o tla robaka o felise mebuso eo kaofela [e teng hona joale], empa oona o tla ba teng ka ho sa feleng.”—Bona le Tšenolo 19:11-21; 20:4-6.
10. Ke hobane’ng ha re ka kholiseha hore tlas’a ’Muso oa Molimo oa leholimo, ho ke ke ha hlola ho e-ba le ho silafala pusong?
10 Ka hona, batho ba ke ke ba hlola ba e-ba le mefuta e silafetseng ea puso, hobane ka mor’a hore Molimo a felise tsamaiso ena, puso ea batho ba sa itšetlehang ka eena e ke ke ea hlola e e-ba teng. ’Me ’Muso o busang ho tsoa leholimong o ke ke oa silafatsoa, kaha Molimo ke Mothehi le ’Moloki oa oona. Ho e-na le hoo, o tla sebetsa molemong oa lithahasello tsa bafo ba oona ba batho. Joale thato ea Molimo e tla etsoa ho pholletsa le lefatše joalokaha e etsoa leholimong. Ke kahoo Jesu a neng a ka ruta barutuoa ba hae ho rapela Molimo: “Ho tle ’muso oa hao; thato ea hao e etsoe lefatšeng, joale ka ha e etsoa leholimong.”—Mattheu 6:10.
Re Haufi Hakae?
11. Ke hokae Bibeleng moo re fumanang boprofeta bo tla re thusa ho lekanyetsa hore na re haufi hakae le bofelo ba tsamaiso ee?
11 Re haufi hakae le bofelo ba tsamaiso ee ea lintho e sa khotsofatseng le ho qaleha ha lefatše le lecha la Molimo? Ka ho hlakileng boprofeta ba Bibele bo re fa karabelo. Ka mohlala, Jesu o ile a bolela esale pele seo re lokelang ho se lebella e le hore re ka lekanyetsa hore na re hokae le, kamoo Bibele e bolelang ka teng, “bofelo ba tsamaiso ea lintho.” Sena se tlalehiloe ho Mattheu likhaolo 24 le 25 (NW), Mareka 13, le Luka 21. Hape, joalokaha ho tlalehiloe ho 2 Timothea khaolo 3, moapostola Pauluse o boletse esale pele hore ho tla ba le nako e bitsoang ‘mehla ea qetello’ eo ka eona liketsahalo tse sa tšoaneng li neng li tla tiisa ka ho eketsehileng hore na re hokae kemisong ea nako.
12, 13. Jesu le Pauluse ba itse’ng mabapi le nako ea bofelo?
12 Jesu o boletse hore nako ena e ne e tla qala ka liketsahalo tsena: “Sechaba se seng se tla futuhela sechaba se seng le ’muso khahlanong le ’muso o mong, ’me ho tla ba le khaello ea lijo le litšisinyeho tsa lefatše libakeng ka ho latellana.” (Mattheu 24:7, NW) Luka 21:11 (NW), e bontša hore hape o ile a bolela hore “libakeng ka ho latellana ho tla ba le mafu a seoa.” ’Me o ile a lemosa le ka “ho eketseha ha ho hloka molao.”—Mattheu 24:12, NW.
13 Moapostola Pauluse o boletse tjena esale pele: “Tseba hobane mehleng ea qetello ho tla hlaha linako tse bohloko. Hobane batho e tla ba baithati, le ba ratang leruo, le bakaki, le baikakasi, le banyefoli, le ba sa utloeng batsoali ba bona, ba hlokang teboho le borapeli; e tla ba ba se nang lerato la hlaho, leha e le ho tšepeha, ba etselletsang ba bang, ba sa tsebeng ho itšoara, ba sehlōhō, ba hloeang ba molemo; e be baeki, le bahalefi, le baikhohomosi, ba ratang menate ea nama, e seng Molimo; ba tla ba le sebopeho sa borapeli, empa e le ba latotseng matla a jona. . . . Batho ba lonya, ba thetsang, ba ea ’ne ba tsoele pele tšenyong, ba ntse ba thetsa, ba ntse ba thetsoa.”—2 Timothea 3:1-5, 13.
14, 15. Liketsahalo tsa lekholo lee la bo20 la lilemo li tiisa joang hore ka sebele re ’nile ra ba mehleng ea qetello?
14 Na lintho tseo Jesu le Pauluse ba li boletseng esale pele li etsahetse nakong ea rōna? Ka sebele ho joalo. Ntoa ea I ea Lefatše e bile ntoa e mpe ka ho fetisisa ho tla fihlela nakong eo. E bile ntoa ea pele ea lefatše ’me e bile nako ea phetoho e khōlō historing ea kajeno. Hammoho le ntoa eo ho bile le khaello ea lijo, seoa sa maloetse, le litlokotsi tse ling. Kamoo Jesu a boletseng ka teng, liketsahalo tseo tsa ho tloha ka 1914 ho ea pele e bile “qalo feela ea tlokotsi.” (Mattheu 24:8) Li ile tsa qalisa nako e boletsoeng esale pele e bitsoang ‘mehla ea qetello,’ qaleho ea moloko oa ho qetela nakong eo ka eona Molimo a neng a tla lumella bokhopo le ho utloa bohloko.
15 Mohlomong u tloaelane le liketsahalo tsa lekholo la bo20 la lilemo. U tseba pherekano e bileng teng. Batho ba ka bang limillione tse 100 ba bolailoe lintoeng. Ba bang ba makholo a limillione ba bolailoe ke tlala le ho kula. Litšisinyeho tsa lefatše li bolaile batho ba bangata. Ho se tsotelle bophelo le thepa ho ntse ho eketseha. Tšabo ea tlōlo ea molao e fetohile karolo ea bophelo ba letsatsi le letsatsi. Litekanyetso tsa boitšoaro li hlokomolohiloe. Sepenya sa baahi se hlahisa mathata a sa rarolleheng. Tšilafalo e senya boleng ba bophelo ’me e bo beha kotsing. Ka sebele, re bile mehleng ea qetello ho tloha ka 1914 ’me re ntse re atamela sehlohlolo sa boprofeta ba Bibele bo amanang le nako ea rōna.
16. Mehla ea qetello e akaretsa nako e telele hakae?
16 Mehla ee ea qetello e ne e tla ba nako e telele hakae? Mabapi le nako eo ho neng ho tla ba le “qalo feela ea tlokotsi” ho tloha ka 1914 ho ea pele Jesu o itse: “Moloko ona o ke ke oa feta, tseo tsohle li e-so ho etsahale.” (Mattheu 24:8, 34-36) Ka hona, litšobotsi tsohle tsa mehla ea qetello li tlameha ho etsahala nakong ea bophelo ba moloko o le mong, moloko oa 1914. Kahoo batho ba bang ba neng ba phela ka 1914 ba tla be ba ntse ba phela ha tsamaiso ena e fela. Moloko oo oa batho o se o hōlile haholo, ho bontšang hore ha ho sa na nako e ngata e setseng pele Molimo a felisa tsamaiso ena ea hona joale ea lintho.
17, 18. Ke boprofeta bofe bo bontšang hore re haufi haholo le bofelo ba lefatše lee?
17 Boprofeta bo bong bo bontšang hore bofelo ba tsamaiso ena bo haufi haholo bo fanoe ke moapostola Pauluse, ea ileng a bolela tjena esale pele: “Letsatsi la Morena le tla hlaha joale ka lesholu la bosiu. Hobane mohla ba tla re: Ho khotso, ho iketliloe! ke moo tšenyeho e tla ba oela holimo ka sehlōhō, . . . ’me ba ke ke ba phonyoha.”—1 Ba-Thessalonika 5:2, 3; bona le Luka 21:34, 35.
18 Kajeno Qhoebeshano Pakeng tsa Lichaba e felile, ’me ntoa ea machaba e ka ’na ea se hlole e e-ba tšokelo e khōlō. Kahoo lichaba li ka ’na tsa ikutloa hore li haufinyane haholo le taolo ea lefatše le lecha. Empa ha li ikutloa hore boiteko ba tsona boa atleha, sena se tla bolela se fapaneng le seo li se nahanang, hobane eo e tla ba pontšo ea ho qetela ea hore timetso ea Molimo ea tsamaiso ena e haufi. Hopola, lipuisano tsa lipolotiki le lilekane ha li tlise liphetoho leha e le life tsa sebele ho batho. Ha li etse hore batho ba ratane. ’Me baeta-pele ba lefatše ha ba felise tlōlo ea molao, leha e le hona hore ba felise boloetse le lefu. Kahoo u se ke ua beha tšepo khotsong le tšireletsehong leha e le efe e hlahisitsoeng ke batho eaba u nahana hore lefatše lena le lekhatheng la ho rarolla mathata a lona. (Pesaleme ea 146:3) Seo mohoo o joalo o tla beng o hlile o se bolela ke hore lefatše lena le haufi haholo le ho fela.
Ho Bolela Litaba tse Molemo
19, 20. Ke boprofeta bofe bo mabapi le boboleli mehleng ea qetello boo re bo bonang bo phethahala?
19 Boprofeta bo bong bo bontšang hore re bile mehleng ea qetello ho tloha ka 1914 ke boo Jesu a faneng ka bona: “E ka khona Evangeli e bolelloe lichaba tsohle pele.” (Mareka 13:10) Kapa kamoo Mattheu 24:14 e bolelang ka teng: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.”
20 Kajeno ho feta leha e le neng pele historing, litaba tse molemo tsa bofelo ba lefatše lena le tsa lefatše le lecha la Paradeise le tlang tlas’a ’Muso oa Molimo li ntse li boleloa lefatšeng lohle. Li ntse li boleloa ke bo-mang? Ke Lipaki tsa Jehova tse limillione. Li bolela naheng e ’ngoe le e ’ngoe lefatšeng.
21, 22. Haholo-holo ke eng se khethollang Lipaki tsa Jehova e le Bakreste ba ’nete?
21 Ho phaella ho boleleng ha tsona ka ’Muso oa Molimo, Lipaki tsa Jehova li itšoara ka mokhoa o li khethollang e le balateli ba ’nete ba Kreste, hobane o itse: “Seo bohle ba tla tseba hobane le barutuoa ba ka ka sona, ke ha le ratana.” Ka hona, Lipaki tsa Jehova li kopantsoe boeneng ba lefatše lohle ke tlamo e matla ea lerato.—Johanne 13:35; bona le Esaia 2:2-4; Ba-Kolosse 3:14; Johanne 15:12-14; 1 Johanne 3:10-12; 4:20, 21; Tšenolo 7:9, 10.
22 Lipaki tsa Jehova li lumela seo Bibele e se bolelang: “Molimo ha o ee ka tšobotsi ea batho. Empa har’a lichaba tsohle, ea o tšabang, le ea etsang ho lokileng, ke eena ea o khahlisang.” (Liketso 10:34, 35) Li talima Lipaki tse ling linaheng tsohle e le baena le bo-khaitseli ba moea, ho sa tsotellehe morabe kapa ’mala. (Mattheu 23:8) ’Me hore ebe boena bo joalo ba lefatše lohle bo teng lefatšeng kajeno ho tlatsetsa bopaking ba hore haufinyane morero oa Molimo o tla phethahatsoa.
[Setšoantšo se leqepheng la 26]
’Muso oa Molimo oa leholimo o phethahetseng e tla ba oona feela puso ea batho lefatšeng le lecha