Thuto ea 6

’Muso oa Molimo ke Eng?

’Muso oa Molimo o hokae? (1)

Morena oa oona ke mang? (2)

Na ba bang ba kopanela puso le Morena? Haeba ho joalo, ba bakae? (3)

Ke eng se bontšang hore re phela matsatsing a ho qetela? (4)

Ke eng seo ’Muso oa Molimo o tlang ho se etsetsa moloko oa batho nakong e tlang? (5-7)

1. Ha a ne a le lefatšeng, Jesu o ile a ruta balateli ba hae ho rapella ’Muso oa Molimo. ’Muso ke puso e etelletsoeng pele ke morena. ’Muso oa Molimo ke puso e khethehileng. O hlonngoe leholimong ’me o tla busa holim’a lefatše lena. O tla hloekisa, kapa o halaletse, lebitso la Molimo. O tla etsa hore thato ea Molimo e etsoe lefatšeng joalokaha e etsoa leholimong.—Matheu 6:9, 10.

2. Molimo o ile a tšepisa hore Jesu e ne e tla ba Morena oa ’Muso oa Hae. (Luka 1:30-33) Ha Jesu a ne a le lefatšeng, o ile a paka hore e ne e tla ba ’Musi ea mosa, ea nang le toka le ea phethahetseng. Ha a ne a khutlela leholimong, ha aa ka a behoa teroneng e le Morena oa ’Muso oa Molimo hang-hang. (Baheberu 10:12, 13) Ka 1914, Jehova o ile a fa Jesu matla a ho laela ao A neng a mo tšepisitse ’ona. Ho tloha ka nako eo, Jesu o ’nile a busa leholimong e le Morena ea khethiloeng oa Jehova.—Daniele 7:13, 14.

3. Jehova o boetse o khethile banna le basali ba bang ba tšepahalang lefatšeng hore ba ee leholimong. Ba tla busa le Jesu e le marena, baahloli le baprista holim’a moloko oa batho. (Luka 22:28-30; Tšenolo 5:9, 10) Jesu o ile a bitsa bana ba tlang ho busa le eena ’Musong “mohlape o monyenyane.” Palo ea bona ke 144 000.—Luka 12:32; Tšenolo 14:1-3.

4. Hang ha Jesu e e-ba Morena, o ile a leleka Satane le mangeloi a hae leholimong ’me a ba theolela sebakeng sa lefatšeng. Ke ka lebaka leo lintho li ileng tsa mpefala hakana lefatšeng ho tloha ka 1914. (Tšenolo 12:9, 12) Lintoa, litlala, mafu a seoa, ho hloka molao ho ntseng ho eketseha—kaofela ha tsona ke karolo ea “pontšo” e bontšang hore Jesu oa busa le hore tsamaiso ena e matsatsing a eona a ho qetela.—Matheu 24:3, 7, 8, 12; Luka 21:10, 11; 2 Timothea 3:1-5.

5. Haufinyane Jesu o tla ahlola batho, a ba khethe joalokaha molisa a khetha linku ho lipōli. “Linku” ke ba tla beng ba ipakile ho ba bafo ba hae ba tšepahalang. Ba tla fumana bophelo bo sa feleng lefatšeng. “Lipōli” ke ba tla beng ba hanne ’Muso oa Molimo. (Matheu 25:31-34, 46) Nakong e tlang e haufinyane, Jesu o tla timetsa bohle ba kang lipōli. (2 Bathesalonika 1:6-9) Haeba u batla ho ba e mong oa “linku” tsa Jesu, u tlameha ho mamela molaetsa oa ’Muso ’me u nke bohato tumellanong le seo u ithutang sona.—Matheu 24:14.

6. Hona joale lefatše le arotsoe ka linaha tse ngata. E ’ngoe le e ’ngoe e na le ’muso oa eona. Hangata lichaba tsena lia loantšana. Empa ’Muso oa Molimo o tla nkela mebuso eohle ea batho sebaka. O tla busa e le oona feela ’muso holim’a lefatše. (Daniele 2:44) Joale ho ke ke ha hlola ho e-ba le ntoa, tlōlo ea molao le pefo. Batho bohle ba tla phela hammoho ka khotso ba le bonngoeng.—Mikea 4:3, 4.

7. Nakong ea Puso ea Jesu ea Lilemo Tse Sekete, batho ba tšepahalang ba tla phethahala, ’me lefatše lohle le tla fetoha paradeise. Bofelong ba lilemo tse sekete, Jesu o tla be a entse ntho e ’ngoe le e ’ngoe eo Molimo a mo laetseng ho e etsa. Joale o tla khutlisetsa ’Muso ho Ntate oa hae. (1 Bakorinthe 15:24) Ke hobane’ng ha u sa bolelle metsoalle ea hao le baratuoa ba hao ka seo ’Muso oa Molimo o tlang ho se etsa?

[Setšoantšo se leqepheng la 13]

Tlas’a puso ea Jesu, ho ke ke ha hlola ho e-ba le lehloeo kapa leeme