Karolo 6
Na Molimo o Amohela Malumeli ’Ohle?
1. Ho ea ka Lentsoe la Molimo, ho na le mefuta efe e ’meli feela ea bolumeli?
JESU o ile a re: “Kenang ka heke e moqotetsane; hobane tsela e isang timetsong e pharaletse ebile e khōlō, ’me ba kenang ka eona ba bangata; athe heke e isang bophelong e moqotetsane le tsela e isang teng e patisane, ’me ke ba seng bakae ba e fumanang.” (Matheu 7:13, 14) Ho ea ka Lentsoe la Molimo, ho na le mefuta e ’meli feela ea bolumeli: bo bong ke ba ’nete, bo bong ke ba bohata; bo bong bo nepahetse, bo bong bo fosahetse; bo bong bo isa bophelong, bo bong bo isa timetsong.
2. Mangolo a bontša joang hore hase malumeli ’ohle a khahlisang Molimo?
2 Batho ba bang ba nahana hore malumeli ’ohle a khahlisa Molimo. Litemana tse latelang tsa Bibele li bontša hore sena hase ’nete:
● “Bara ba Iseraele ba boela ba etsa se sebe mahlong a Jehova, ’me ba qala ho sebeletsa bo-Baale le litšoantšo tsa Ashtorethe le melimo ea Syria le melimo ea Sidone le melimo ea Moabe le melimo ea bara ba Ammone le melimo ea Bafilista. Kahoo ba tlohela Jehova ’me ha baa ka ba mo sebeletsa. Eaba bohale ba Jehova bo tukela Baiseraele.” (Baahloli 10:6, 7) Haeba re rapela melimo ea litšoantšo kapa molimo leha e le ofe ntle ho Molimo oa ’nete, Jehova ha a na ho re amohela.
● “Sechaba sena se ntlhompha ka melomo, empa lipelo tsa sona li suthetse hōle le ’na [Molimo]. Ke ha lefeela hore ebe se ntse se nthapela, hobane se ruta litaelo tsa batho e le lithuto.” (Mareka 7:6, 7) Haeba batho ba ipolelang hore ba rapela Molimo ba ruta likhopolo tsa bona ho fapana le seo Bibele e se rutang, borapeli ba bona ke ba lefeela. Ha bo amohelehe ho Molimo.
● “Molimo ke Moea, ’me ba mo rapelang ba tla rapela ka moea le ka ’nete.” (Johanne 4:24) Borapeli ba rōna bo lokela ho lumellana le ’nete ea Lentsoe la Molimo.
Litholoana Tsa Bolumeli ba Bohata
3. Tsela e ’ngoe ea ho khetholla bolumeli ba ’nete ho ba bohata ke efe?
3 Re ka tseba joang hore bolumeli boa amoheleha ho Molimo kapa che? Jesu o ile a re: “Sefate se seng le se seng se setle se hlahisa litholoana tse ntle, empa sefate se seng le se seng se bolileng se hlahisa litholoana tse se nang thuso . . . Ka sebele, le tla tseba batho bao ka litholoana tsa bona.” Ka mantsoe a mang, haeba bolumeli bo tsoa ho Molimo, bo tla beha litholoana tse molemo; empa haeba bolumeli bo tsoa ho Satane, bo tla beha tse mpe.—Matheu 7:15-20.
4. Barapeli ba Jehova ba bonahatsa tšobotsi efe?
4 Bolumeli ba ’nete bo hlahisa batho ba ratanang le ba bontšang lerato ho ba bang. Sena se etsoa ke hobane Jehova ka boeena ke Molimo ea lerato. Jesu o ile a re: “Bohle ba tla tseba ka sena hore le barutuoa ba ka, haeba le e-na le lerato har’a lōna.” Na malumeli a finyella tekanyetso ee ea borapeli ba ’nete?—Johanne 13:35; Luka 10:27; 1 Johanne 4:8.
5. Encyclopedia e ’ngoe e hlalosa khoebo ea makhoba Afrika joang?
5 Nahana ka khoebo ea makhoba Afrika. The New Encyclopædia Britannica e re: “Ho ile ha nehelanoa ka Maafrika a ka bang 18 000 000 khoebong ea Maislamo ea makhoba ho pholletsa le Sahara le Leoatle la Indian pakeng tsa 650 le 1905. Batho ba Europe ba ile ba qala ho hoeba lebōpong le ka bophirimela ho Afrika karolong ea bobeli ea lekholo la bo15 la lilemo, ’me ka 1867 Maafrika a ka bang 7 000 000 ho isa ho 10 000 000 a ne a nkiloe ka likepe ho ea ba makhoba Linaheng tsa Bophirimela.”
6. Bolumeli bo ile ba kenella joang khoebong ea bokhoba?
6 Bolumeli bo ile ba etsa’ng nakong ee ea pherekano, Afrika, ha banna, basali le bana ba tlosoa mahaeng a bona ba arohanngoa le malapa a bona, ba tlangoa ka liketane, ba tšoauoa ka tšepe e chesang, ba bile ba rekoa le ho rekisoa joaloka likhomo? Bethwell Ogot oa ngola ho Daily Nation ea Nairobi, Kenya: “Malumeli a Bokreste le Boislamo a tsetsepetse thutong ea tumelo ea hore moloko oa batho o be bonngoeng, leha ho le joalo ke ’ona a thehileng mekhatlo e tšehetsang bokhoba le lehloeo la morabe. . . . Re lokela ho elelloa molato o jeroeng ke Mamosleme le Bakreste, linaha tsa Bophirimela le tsa Bochabela bo Hare, le ho iphapanyetsa boitšoaro bo bobe o lebisitseng tšotlehong ea Maafrika e ke keng ea lekanngoa ka lilemo tse makholo.”
Bolumeli le Ntoa
7. Baeta-pele ba bolumeli ba phethile karolo efe ntoeng?
7 Bolumeli ba bohata bo bonahalitse litholoana tsa bona tse bolileng ka litsela tse ling hape. Ka mohlala, le hoja Bibele e re “u rate moahelani oa hao,” baeta-pele ba bolumeli lefatšeng ka bophara ba tšehelitse ntoa ka cheseho le ho e khothalletsa.—Matheu 22:39.
8. (a) Baeta-pele ba bolumeli ba ile ba khothalletsa ho bolaea joang lintoeng tsa Afrika? (b) Moruti e mong o ile a re’ng ka baeta-pele ba bolumeli nakong ea ntoa ea lehae ea Nigeria?
8 Ke taba e tsebahalang hore baitlami le baprista ba bang ba kentse letsoho polaong e sehlōhō ea batho, Rwanda, selemong sa 1994. Bolumeli bo bile le seabo se seholo le lintoeng tse ling Afrika. Ka mohlala, ntoeng ea lehae ea Nigeria e bolaileng batho ba bangata, malumeli ka mahlakoreng a mabeli a ile a khothalletsa batho hore ba loane. Ha ntoa eo e ntse e kupa, moruti e mong o ile a re baeta-pele ba kereke ba “iphapanyelitse mosebetsi oo Molimo a ba fileng oona.” A boela a re: “Rōna ba ipitsang basebeletsi ba Molimo re fetohile basebeletsi ba Satane.”
9. Bibele e re’ng ka basebeletsi ba Satane?
9 Bibele le eona e re: “Satane o ntse a iphetola lengeloi la leseli. Ka hona hase letho le leholo haeba basebeletsi ba hae le bona ba ntse ba iphetola basebeletsi ba ho loka.” (2 Bakorinthe 11:14, 15) Feela joalokaha batho ba bangata ba khopo ba iketsa eka ba lokile, Satane o thetsa batho ka basebeletsi ba bonahalang eka ba lokile empa bao mesebetsi ea bona e leng khopo le ba behang litholoana tse bolileng.
10. Baeta-pele ba bolumeli ba latotse Molimo ka tsela efe?
10 Lefatšeng ka bophara, baeta-pele ba bolumeli ba ’nile ba ruta lerato, khotso le molemo, empa bona ba bile le seabo lehloeong, ntoeng le bokhopong. Bibele e ba hlalosa hantle. E re: “Ba bolela phatlalatsa hore ba tseba Molimo, empa ba mo latola ka mesebetsi ea bona.”—Tite 1:16.
Tsoang “Babylona e Moholo”
11. Bibele e hlalosa bolumeli ba bohata joang?
11 Re ka bona seo Jehova a se nahanang ka bolumeli ba bohata ha re bala buka ea Bibele ea Tšenolo. Ho eona bolumeli ba bohata bo hlalosoa e le mosali oa tšoantšetso, “Babylona e Moholo.” (Tšenolo 17:5) Hlokomela kamoo Molimo a mo hlalosang kateng:
● “Seotsoa se seholo . . . seo marena a lefatše a ileng a etsa bohlola le sona.” (Tšenolo 17:1, 2) Ho fapana le hore bo tšepahale ho Molimo, bolumeli ba bohata bo itšunya-tšuntse lipolotiking, hangata bo bolella mebuso hore na e etse’ng.
● “Ho eena ho ile ha fumanoa mali a baprofeta le a bahalaleli le a bohle ba bolailoeng lefatšeng.” (Tšenolo 18:24) Bolumeli ba bohata bo hlorisitse le ho bolaea bahlanka ba Molimo ba tšepahalang hape bo molato oa polao ea batho ba limilione ba shoeleng lintoeng.
● ‘O ile a itlotlisa le ho phela ka menono ea ho se hlajoe ke lihlong.’ (Tšenolo 18:7) Bolumeli ba bohata bo kena-kene ka har’a maruo, ao baeta-pele ba bona ba a sebelisetsang ho phela mabothobothong.
● “Ka ho tloaela ha [hae] ho sebelisana le meea lichaba kaofela li ile tsa khelosoa.” (Tšenolo 18:23) Ka thuto ea bona ea bohata ea hore moea ha o shoe, bolumeli ba bohata bo buletse mofuta o mong le o mong oa tšebelisano le meea le boloi monyako ’me bo khothalelitse tšabo ea bafu le borapeli ba balimo.
12. Bibele e lemosa eng ka bolumeli ba bohata?
12 Bibele ha e lemosa batho ka matla hore ba ikarole bolumeling ba bohata, e re: “Tsoang ho eena, sechaba sa ka, haeba le sa batle ho kopanela le eena libeng tsa hae, le haeba le sa batle ho amohela karolo ea likotlo tsa hae.”—Tšenolo 18:4, 5.
13. Ho tla etsahala’ng ka bolumeli ba bohata le litho tsa bona?
13 Haufinyane, Babylona e Moholo, ’muso oa lefatše oa bolumeli ba bohata, e tla felisoa ka ho feletseng. Bibele e re: “Likotlo tsa hae li [tla] tla ka letsatsi le le leng, lefu le ho siama le tlala, ’me o tla chesoa ka ho feletseng ka mollo, hobane Jehova Molimo, ea mo ahlotseng, o matla.” (Tšenolo 18:8) E le hore re qobe ho oeloa ke karolo ea likotlo tsa hae, re lokela ho khaola maqhama ’ohle le bolumeli ba bohata, re ikarole ka ho feletseng liketsong, meketeng le litumelong tse sa khahliseng Molimo. Ena ke taba e potlakileng. Bophelo ba rōna bo kotsing!—2 Bakorinthe 6:14-18.
[Litšoantšo tse leqepheng la 20, 21]
Bolumeli ba bohata bo bile le seabo lintoeng le khoebong ea makhoba
[Litlhaloso Tsa Moo Litšoantšo li Nkiloeng Teng]
Blessing troops: Daily Times of Nigeria; slave boat: Schomburg Center for Research in Black Culture/The New York Public Library/Astor, Lenox and Tilden Foundations; starving boy: UN PHOTO 186797/J. Isaac