Khaolo ea 15

Thuto ea ho ba Mosa

NA UA tseba hore na khethollo ke’ng?— Khethollo ke ho se rate motho e mong hobane feela a sa tšoane le uena kapa a bua puo e ’ngoe. Kahoo ho khetholla motho e mong ke ho ba le maikutlo a mabe ka eena kapa ho se mo tšepe empa u e-s’o iphe nako ea ho mo tseba.

Na u nahana hore ho nepahetse ho se rate motho e mong le pele u tseba hore na ke motho oa mofuta ofe kapa hobane feela a sa tšoane le uena?— Che, ho khetholla ha hoa loka, ebile hase ho bontša mosa. Ha rea lokela ho tšoara motho e mong hampe hobane feela a sa tšoane le rōna.

Ak’u nahane ka taba ena. Na u tseba motho e mong ea sa tšoaneng le uena ka ’mala kapa ea sa bueng puo ea hao?— Mohlomong u tseba le batho ba bang ba sa tšoaneng le uena hobane ba lemetse kapa ba kula. Na u bontša mosa le ho rata batho ba sa tšoaneng le uena?—

Haeba re mamela Mosuoe e Moholo, Jesu Kreste, re tla bontša motho e mong le e mong mosa. Ha hoa lokela ho etsa phapang ho rōna hore na motho o tsoa naheng efe kapa hore na o joang ka ’mala. Re lokela ho mo bontša mosa. Le hoja e se batho bohle ba lumelang seo, ke sona seo Jesu a se rutileng. A re ke re bue ka sona.

Mojuda e mong ea neng a khetholla batho ba bang o ile a tla ho Jesu a mo botsa a re, ‘Ke lokela ho etsa’ng hore ke phele ka ho sa feleng?’ Jesu o ne a tseba hore mohlomong monna eo o batla hore a re o lokela ho ba mosa ho batho ba morabe oa habo kapa ba sechaba sa habo feela. Kahoo ho e-na le hore a arabe potso ka boeena, Jesu o ile a botsa monna eo a re: ‘Molao oa Molimo o re re lokela ho etsa’ng?’

Monna eo a araba a re: ‘U lokela ho rata Jehova Molimo oa hao ka pelo ea hao eohle, hape u lokela ho rata moahelani oa hao joalokaha u ithata.’ Jesu a re: ‘U arabile hantle. Tsoela pele ho etsa seo ’me u tla fumana bophelo bo sa feleng.’

Leha ho le joalo, monna eo o ne a sa batle ho bontša mosa kapa ho rata batho ba sa tšoaneng le eena. Kahoo a leka ho batla lebaka la ho ikemela. A botsa Jesu a re: “Ha e le hantle moahelani oa ka ke mang?” Mohlomong o ne a batla hore Jesu a re: “Baahelani ba hao ke metsoalle ea hao” kapa, “Ke batho ba tšoanang le uena.” Jesu a araba potso ea hae ka ho mo phetela pale ea Mojuda le Mosamaria. Pale eo e re:

Monna e mong o ne a tsamaea tseleng a tsoa motseng oa Jerusalema a ea Jeriko. Monna eo e ne e le Mojuda. Ha a ntse a tsamaea tseleng, masholu a mo tšoara. A mo lihela fatše, a mo nkela chelete le liaparo. Masholu ao a mo otla a mo siea a rapaletse ka thōko ho tsela a le makhatheng a ho shoa.

Ka mor’a nakoana, ha feta moprista tseleng eo. A bona monna eo ea tsoileng likotsi tse mpe. Uena u ka be u ile ua etsa’ng?— Moprista eena o ile a tsamaela ka lehlakoreng le leng la tsela. Ha aa ka a ema le ho ema. Ha aa ka a etsa letho ho thusa monna eo.

Ka mor’a hae ha feta monna e mong hape ea chesehelang bolumeli. E ne e le Molevi ea sebeletsang tempeleng, Jerusalema. Na o ile a ema ho mo thusa?— Che. Le eena o ile a etsisa moprista.

Qetellong, ha feta Mosamaria. Na ua mo bona mola moo a hlahellang teng mothinyeng?— A bona Mojuda a rapaletse a tsoile likotsi tse mpe. U tsebe hore Basamaria ba bangata le Bajuda ba ne ba hloeane. (Johanne 4:9) Na Mosamaria eo o ile a feta monna eo a sa mo thuse? Na o ile a re: ‘Ke hobane’ng ha ke lokela ho thusa Mojuda eo? Akere eena o ne a sa tl’o nthusa haeba e ne e le ’na ea tsoileng kotsi’?

Mosamaria o ile a bona monna eo ea rapaletseng ka thōko ho tsela ’me a mo utloela bohloko. O ile a ikutloa hore a ke ke a mo siea hore a shoelle moo. Kahoo a theoha phoofolo eo a neng a e palame, a ea ho monna eo, eaba o qala ho mo oka maqeba. A mo tšela ka oli le veine maqebeng. Sena se ne se tla thusa maqeba ao hore a fole. A ntan’o tlamisa maqeba ka lesela.

Mosamaria a phahamisa hantle monna eo ea tsoileng kotsi a mo palamisa phoofolong ea hae. Eaba ba theosa butle ka tsela ho fihlela ba fihla tlung ea baeti, kapa hoteleng e nyenyane. Ha ba fihla moo, Mosamaria a batlela monna eo moo a tla lula teng, ’me a mo hlokomela hantle.

Joale Jesu a botsa monna eo a ntseng a buisana le eena a re: ‘Ke ofe ho banna baa ba bararo eo u nahanang hore e bile moahelani ea molemo?’ U ne u tla re ke ofe? Na ke moprista, Molevi, kapa ke Mosamaria?—

Monna eo o ile a araba a re: ‘Moahelani ea molemo ke monna ea ileng a ema ’me a hlokomela monna ea tsoileng kotsi.’ Jesu a re: ‘U nepile. Tsamaea ’me u etse ho tšoanang.’—Luka 10:25-37.

Na ee hase pale e molemo? E bontša ka ho hlaka hore na baahelani ba rōna ke bo-mang. Hase feela metsoalle ea rōna e haufi. Ebile hase feela batho ba tšoanang le rōna ka ’mala kapa ba buang puo ea rōna. Jesu o re rutile hore re be mosa ho batho ho sa tsotellehe hore na ba tsoa hokae, ba shebahala joang, kapa ba bua puo efe.

Ke kamoo Jehova Molimo a leng kateng. Ha a na khethollo. Jesu o ile a re: ‘Ntate oa lōna ea leholimong o chabisetsa batho ba babe le ba lokileng letsatsi la hae. Ebile o nesetsa batho ba babe le ba lokileng pula.’ Kahoo, re lokela ho ba mosa ho batho bohle joaloka Molimo.—Matheu 5:44-48.

Joale u tla etsa’ng ha u bona motho e mong a tsoile kotsi?— Ho thoe’ng haeba motho eo a tsoa naheng e ’ngoe kapa a sa tšoane le uena ka ’mala? E ntse e le moahelani oa hao, ’me u lokela ho mo thusa. Haeba u bona hore u sa le monyenyane hore u ka mo thusa, u ka kōpa motho e mong e moholo hore a mo thuse. Kapa u ka kōpa lepolesa kapa tichere sekolong hore e mo thuse. Ho etsa joalo ke ho bontša mosa, joaloka monna eloa oa Mosamaria.

Mosuoe e Moholo o batla hore re be mosa. O batla hore re thuse batho ba bang, ho sa tsotellehe hore na ke bo-mang. Ke ka lebaka leo a ileng a pheta pale ea Mosamaria ea mosa.

Tabeng ena ea ho ba mosa ho batho ba bang ho sa tsotellehe morabe oa bona kapa sechaba seo ba tsoang ho sona, bala Liproverbia 19:22; Liketso 10:34, 35; le 17:26.

[Litšoantšo tse leqepheng la 83]

Re lokela ho tšoara batho ba sa tšoaneng le rōna joang?

[Litšoantšo tse leqepheng la 84, 85]

Ke hobane’ng ha Mosamaria e bile moahelani ea molemo?

[Setšoantšo se leqepheng la 86]

U ka ba moahelani ea molemo joang?