Bibele e Nka Tlhalo le Karohano Joang?

Jehova o lebeletse hore batho ba nyalaneng ba lule ba tšepahala kanong ea bona ea lenyalo. Ha a ne a kopanya monna oa pele le mosali ka lenyalo, Jehova o ile a re: “Monna . . . a khomarele mosali oa hae ’me e [be] nama e le ’ngoe.” Hamorao, Jesu Kreste o ile a pheta polelo eo eaba o eketsa ka ho re: “Ka hona, seo Molimo a se kopantseng hammoho jokong ho se ke ha e-ba le motho ea se arolang.” (Genese 2:24; Matheu 19:3-6) Kahoo, Jehova le Jesu ba nka lenyalo e le tlamahano ea bophelo bohle e felang feela ha molekane e mong a e-shoa. (1 Bakorinthe 7:39) Kaha lenyalo lea halalela, tlhalo ha ea lokela ho nkoa habobebe. Ha e le hantle, Jehova o hloile tlhalo e se nang lebaka la Mangolo.—Malakia 2:15, 16.

Lebaka la Mangolo la ho hlala ke lefe? ’Nete ke hore Jehova o hloile bofebe le bohlola. (Genese 39:9; 2 Samuele 11:26, 27; Pesaleme ea 51:4) Ha e le hantle, ho eena bohlola bo nyonyeha hoo a lumelang hore e be lebaka la tlhalo. (Bakeng sa moo ho tšohloang hore na bohlola bo akarelletsa eng, bona Khaolo ea 9, serapeng sa 7, moo ho hlalosoang hore na bohlola ke eng.) Jehova o fa molekane ea seng molato tokelo ea hore a etse qeto ea hore na o tla lula le molekane ea molato kapa hore na o tla mo hlala. (Matheu 19:9) Kahoo, haeba molekane ea seng molato a etsa qeto ea ho hlala, ha a nke bohato boo Jehova a bo hloileng. Leha ho le joalo, ka nako e tšoanang, phutheho ea Bokreste ha e khothalletse mang kapa mang hore a hlale. Ha e le hantle, maemo a ka ’na a susumelletsa molekane ea seng molato hore a lule le ea molato, haholo-holo haeba ea molato a bakile e le kannete. Leha ho le joalo, qetellong ba nang le lebaka la Mangolo la ho hlala ba lokela ho iketsetsa qeto le ho ikemisetsa ho kotula litholoana tsa eona.—Bagalata 6:5.

Maemong a itseng a feteletseng, Bakreste ba bang ba entse qeto ea ho arohana kapa ho hlalana le molekane oa lenyalo le hoja molekane eo a sa etsa bohlola. Boemong bo joalo, Bibele e qaqisa hore ea tsamaeang ‘a lule a sa nyala kapa a sa nyaloa kapa ho seng joalo a boelane le molekane oa hae.’ (1 Bakorinthe 7:11) Mokreste ea joalo ha aa lokoloha hore a batle motho e mong eo a ka nahanang ho nyalana le eena. (Matheu 5:32) Hlahloba maemo ana a seng makae a feteletseng ao ba bang ba a nkileng e le lebaka la ho arohana.

Ho se hlokomele lelapa ka boomo. Lelapa le ka ’na la futsaneha haholo, la kolla ntsi hanong, hobane feela monna a sa le hlokomele, le hoja a e-na le mokhoa oa ho etsa joalo. Bibele e re: “Haeba leha e le mang a sa lokisetse hore ho be le lintho tse hlokahalang . . . bakeng sa litho tsa lelapa la hae, o latotse tumelo ’me o mobe ho feta motho ea se nang tumelo.” (1 Timothea 5:8) Haeba monna ea joalo a hana ho fetola mekhoa ea hae, mosali o tla lokela ho etsa qeto ea hore na o tla batla ho itšireletsa le bana ba hae ka ho batla karohano ea molao kapa che. Leha ho le joalo, baholo ba Bakreste ba lokela ho nahanisisa ka hloko tletlebo ea hore Mokreste o hana ho hlokomela lelapa la hae. Ha motho a hana ho hlokomela lelapa la hae, sena se ka etsa hore a khaoloe.

Tlhekefetso e feteletseng. Molekane ea hlekefetsang a ka ’na a ba mabifi hoo molekane ea hlekefetsoang a ka ’nang a lemala kapa bophelo ba hae ba e-ba kotsing. Haeba molekane ea hlekefetsang e mong e le Mokreste, baholo ba phutheho ba lokela ho batlisisa hore na sena ke ’nete kapa che. Ho tlakoloha ka bohale le boitšoaro bo mabifi ke mabaka a ka etsang hore motho a khaoloe.—Bagalata 5:19-21.

Ho sitisa motho ka ho feletseng ho rapela Jehova. Molekane e mong a ka ’na a leka khafetsa ho thatafalletsa molekane oa hae hore a tsoele pele borapeling ba ’nete kapa a ka ba a leka ka tsela e itseng ho mo qobella hore a tlōle litaelo tsa Molimo. Boemong bo joalo, molekane ea kotsing o tla lokela ho etsa qeto ea hore na tsela feela ea ho “mamela Molimo e le ’musi ho e-na le batho” ke hore a arohane le molekane oa hae ka molao kapa che.—Liketso 5:29.

Litabeng tsohle tse amang maemo a feteletseng a kang ao re sa tsoa a tšohla, ha ho motho ea lokelang ho hatella molekane ea seng molato hore a arohane le molekane ea molato kapa a lule le eena. Le hoja Bakreste ba butsoitseng moeeng le baholo ba ka ’na ba fana ka thuso le keletso e thehiloeng Bibeleng, ba ke ke ba tseba lintho tsohle tse etsahalang pakeng tsa monna le mosali. Ke Jehova feela ea ka bonang seo. Ha e le hantle, mosali kapa monna oa Mokreste o ne a tla be a sa tlotle Molimo kapa a sa tlotle lenyalo haeba a ne a ka feteletsa bothata ba lelapa la hae e le hore feela a arohane le molekane oa hae. Jehova o bona karohano leha e le efe e etsoang ka mano, ho sa tsotellehe hore na motho a ka leka hakae ho a pata. Ka sebele, “lintho tsohle li hlobotse ’me li pepesitsoe phatlalatsa mahlong a eo re nang le boikarabello ho eena.” (Baheberu 4:13) Empa haeba boemo bo kotsi ka ho fetisisa bo tsoela pele, ha ho motho ea lokelang ho nyatsa Mokreste ea etsang qeto ea hore bothata ba hae bo ka rarolloa feela ka karohano. Qetellong, “bohle re tla ema ka pel’a setulo sa kahlolo sa Molimo.”—Baroma 14:10-12.