Thuto 10
U ka Khetholla Bolumeli ba ’Nete Joang?
1. Na ho na le bolumeli bo le bong feela ba ’nete?
“Itebeleng ho baprofeta ba bohata.”—MATHEU 7:15.
Jesu o rutile balateli ba hae hore ho na le bolumeli bo le bong feela ba ’nete. Bo tšoana le tsela e eang bophelong bo sa feleng. Jesu o itse: ‘Ke ba seng bakae ba fumanang’ tsela eo. (Matheu 7:14) Molimo o amohela feela borapeli bo thehiloeng Lentsoeng la hae la ’nete. Barapeli bohle ba ’nete ba lumela ntho e tšoanang.—Bala Johanne 4:23, 24; 14:6; Baefese 4:4, 5.
Shebella video ea Na Molimo o Amohela Malumeli ’Ohle?
2. Jesu o ile a re’ng ka Bakreste ba bohata?
“Ba bolela phatlalatsa hore ba tseba Molimo, empa ba mo latola ka mesebetsi ea bona.”—TITE 1:16.
Jesu o ile a lemosa hore baprofeta ba bohata ba ne ba tla silafatsa Bokreste. Ba bonahala eka ke barapeli ba ’nete. Likereke tsa bona li ipolela hore ke tsa Bokreste. Empa u ka khona ho lemoha seo batho ba joalo ba hlileng ba leng sona. Joang? Borapeli ba ’nete ke bona feela bo nang le Bakreste ba ’nete ba khetholloang ka mesebetsi ea bona le tsela eo ba phelang ka eona.—Bala Matheu 7:13-23.
3. U ka khetholla barapeli ba ’nete joang?
Hlokomela matšoao ana a mahlano a ba khethollang:
Barapeli ba ’nete ba hlompha Bibele ’me ba e nka e le Lentsoe la Molimo. Ba leka ka matla ho phela ka melao ea eona. Kahoo, bolumeli bona ba ’nete bo fapane le bolumeli bo thehiloeng maikutlong a batho. (Matheu 15:7-9) Batho bao e leng balumeli ba ’nete, ha ba rute ntho e itseng, ebe ba etsa e fapaneng.—Bala Johanne 17:17; 2 Timothea 3:16, 17.
Balateli ba ’nete ba Jesu ba hlompha lebitso la Molimo e leng Jehova. Jesu o ile a bontša hore o hlompha lebitso la Molimo ka ho le tsebahatsa. O ile a thusa batho hore ba tsebe Molimo ’me a ba ruta hore ba rapelle ho halaletsoa ha lebitso la Molimo. (Matheu 6:9) Ke bolumeli bofe bo tsebahatsang lebitso la Molimo sebakeng seo u lulang ho sona?—Bala Johanne 17:26; Baroma 10:13, 14.
Bakreste ba ’nete ba ruta ka ’Muso oa Molimo. Molimo o ile a roma Jesu hore a rute batho litaba tse molemo tsa ’Muso. ’Muso oa Molimo ke oona feela o tla lokisa maemo a lefatše. Jesu o ile a tsoela pele ho ruta ka ’Muso oo ho fihlela qetellong ea bophelo ba hae. (Luka 4:43; 8:1; 23:42, 43) O ile a re barutuoa ba hae ba tla ruta ka oona. Haeba motho e mong a tla ho uena ’me a bua ka ’Muso oa Molimo, hangata ho tloaelehile hore ke oa bolumeli bofe?—Bala Matheu 24:14.
Balateli ba Jesu hase karolo ea lefatše lena le khopo. U ka ba tseba ka hore ha ba nke karolo lipolotiking, ebile ha ba kenelle merusung ea sechaba. (Johanne 17:16; 18:36) Hape, ha ba latele mekhoa le litloaelo tse kotsi tse etsoang ke batho lefatšeng kajeno.—Bala Jakobo 4:4.
Bakreste ba ’nete ba ratana ka lerato la sebele. Ba ithutile ho hlompha batho ba merabe eohle Lentsoeng la Molimo. Le hoja malumeli a bohata a ile a tšehetsa lintoa tsa sechaba ka makhetlo, barapeli ba ’nete bona ha ba li tšehetse. (Mikea 4:1-3) Ho e-na le hoo, Bakreste ba ’nete ba sebelisa nako ea bona le matlotlo hore ba thuse le ho khothatsa batho ba bang.—Bala Johanne 13:34, 35; 1 Johanne 4:20.
4. Na u ka khetholla bolumeli ba ’nete?
Ke bolumeli bofe bo thehileng lithuto tsohle tsa bona Lentsoeng la Molimo, bo hlomphang lebitso la Molimo le bo tsebahatsang ’Muso oa Molimo e le oona feela o tla lokisa maemo a lefatše? Ke sehlopha sefe sa bolumeli se bontšang lerato le se qobang ho kenella lintoeng? U nahana hore ke sefe?—Bala 1 Johanne 3:10-12.