Jesu o Tuma ho Feta Johanne

Jesu le barutuoa ba hae ba tloha Jerusalema ka mor’a ho keteka Paseka ka selemo sa 30. Leha ho le joalo, ha ba ee hae hang-hang empa ba ea Judea moo teng ba kolobetsang batho ba bangata. E se e le nako e ka etsang selemo Johanne Mokolobetsi a etsa mosebetsi o tšoanang, mohlomong a o etsetsa Nokeng ea Jordane. Ba bang ba barutuoa ba Johanne ba ntse ba e-na le eena.

Jesu o laela hore barutuoa ba hae ba kolobetse batho ho e-na le hore a ba kolobetse ka boeena. Nakong ena, Jesu le Johanne ba ruta Bajuda ba ileng ba bakela libe tseo ba li entseng ka ho tlola molao oa Moshe.​—Liketso 19:4.

Barutuoa ba Johanne ba tlala mona ’me ba tletleba ka Jesu ba re: “[Jesu] ea neng a e-na le uena . . . oa kolobetsa ’me bohle ba ea ho eena.” (Johanne 3:​26) Johanne ha a shoele Jesu mona, empa oa thaba ha a atleha ’me o batla hore le barutuoa ba hae ba thabe. Kahoo oa ba hopotsa o re: “Lea mpakela hore ke itse, ha ke Kreste, empa, ke rometsoe ka pel’a eo.” O etsa mohlala oo ba ka o utloisisang o re: “Ea nang le monyaluoa ke monyali. Leha ho le joalo, motsoalle oa monyali, ha a ema ’me a mo utloa, o ba le thabo e kholo ka lebaka la lentsoe la monyali. Ka hona thabo ena ea ka e tlatsitsoe.”​—Johanne 3:​28, 29.

Likhoeling tse fetileng ha Johanne a ne a tsebisa barutuoa ba hae Jesu, o ile a thaba joaloka motsoalle oa monyali. Ba bang ba bona e ile ea e-ba balateli ba Jesu ’me hamorao ba ne ba tla tlotsoa ka moea o halalelang. Johanne o batla hore qetellong barutuoa bohle ba hae e be balateli ba Jesu. Ha e le hantle, morero oa Johanne ke ho betla tsela bakeng sa mosebetsi oa Jesu. Oa hlalosa o re: “Eo o tla tsoela pele ho eketseha, empa ’na ke tla tsoela pele ho fokotseha.”​—Johanne 3:30.

Johanne e mong eo pejana a ileng a fetoha molateli oa Jesu, hamorao o ile a ngola ka hore na Jesu o tsoa hokae le ka boikarabello boo a nang le bona ba ho pholosa batho. O ile a re: “Ea tsoang holimo o okametse ba bang kaofela. . . . Ntate o rata Mora ’me o fane ka lintho tsohle letsohong la hae. Ea bontšang tumelo ho Mora o na le bophelo bo sa feleng, ea sa mameleng Mora a ke ke a bona bophelo, empa khalefo ea Molimo e sala holim’a hae. Ea tsoang lefatšeng o tsoa lefatšeng ’me o bua ka lintho tsa lefatše. Ea tsoang leholimong o okametse ba bang kaofela.” (Johanne 3:​31, 35, 36) Eo ke ’nete eo batho bohle ba lokelang ho e tseba.

Nakoana ka mor’a hore Johanne Mokolobetsi a hlalose hore mosebetsi oa hae o tla fokotseha, Morena Heroda o mo isa teronkong. Heroda o nyetse Herodiase mosali oa mor’abo. Johanne o totobatsa hore bona ke boitšoaro bo hlephileng, kahoo Heroda o mo koalla teronkong. Ha Jesu a utloa hore Johanne o tšoeroe, o tsamaea le barutuoa ba hae ba tloha Judea ba ea Galilea.​—Matheu 4:​12; Mareka 1:​14.