Balepera ba Leshome Baa Folisoa, Empa ke a le Mong Feela ea Lebohang

Jesu o nyopisa morero oa lekhotla la Sanhedrine oa ho mo bolaea ka ho tloha a ea motseng oa Efraime, o karolong e ka leboea-bochabela ho Jerusalema. O lula teng le barutuoa ba hae, hole le lira tsa hae. (Johanne 11:​54) Leha ho le joalo, Paseka ea selemo sa 33 e ntse e atamela, kahoo ho e-s’o ee kae Jesu o kena tseleng hape. O nyolohela Galilea ka tsela e fetang Samaria, ’me o etela sebaka sena ka lekhetlo la ho qetela pele ho lefu la hae.

Ha Jesu a ntse a tsamaea a kena motse le motse, o kopana le banna ba leshome ba tsoileng lepera. Mefuta e meng ea lefu lena e ka etsa hore, likarolo tse ling tsa ’mele tse kang menoana ea matsoho le ea maoto, kapa litsebe li ’ne li senyehe hanyane ka hanyane. (Numere 12:​10-12) Molao oa Molimo o re molepera o lokela ho hoeletsa a re, “Ha kea hloeka, ha kea hloeka!” ’me a lule sebakeng se ka thoko.​—Levitike 13:​45, 46.

Kahoo, balepera bana ba leshome ba emella hojana le Jesu. Leha ho le joalo, baa hooa ba re: “Jesu, Morupeli, re hauhele!” Ha Jesu a bona balepera bana, o re: “E-eang ’me le iponahatse ho baprista.” (Luka 17:​13, 14) Ka tsela ena o bontša hore o hlompha Molao oa Molimo, o laelang hore ha molepera a folile o lokela ho ea ho moprista, e be eena ea phatlalatsang hore o folile. Ka mor’a moo, ke hona ba ka lulang har’a batho ba bang.​—Levitike 13:​9-17.

Balepera bana ba leshome ba kholisehile hore Jesu o na le matla a ho ba folisa ka mohlolo. Pele ba ka fola, baa tloha ba ea ho baprista. Ha ba le tseleng, tumelo ea bona ea putsoa. Baa bona ebile baa utloa hore ba folile!

Balepera ba robong ba tsoela pele ho ea ho baprista, empa a le mong o khutlela ho Jesu. Monna enoa ke Mosamaria. Ebe o khutlela’ng? Monna eo o ananela ho menahane hore ebe Jesu o mo folisitse. O “tlotlisa Molimo ka lentsoe le phahameng,” kaha oa elelloa hore ha e le hantle Jesu a mo folisitse ka matla a Molimo. (Luka 17:​15) Ha a fumana Jesu, o itihela fatše ka pel’a hae, ’me oa mo leboha.

Jesu o bua le ba mo potolohileng o re: “Ho hloekisitsoe ba leshome, na ha ho joalo? Joale, ba bang ba robong ba hokae? Na ha hoa fumanoa ba khutlileng ho tla tlotlisa Molimo haese monna enoa oa sechaba se seng?” Joale Jesu o re ho Mosamaria enoa: “Ema u tsamaee, tumelo ea hao e u folisitse.”​—Luka 17:​17-19.

Hore ebe Jesu o folisitse balepera bao ba leshome, ho paka hore Jehova Molimo o mo tšehelitse. Ho feta moo, ho ka etsahala hore ebe ho phaella tabeng ea hore o folisitsoe, monna enoa oa Mosamaria o se a e-na le tšepo ea bophelo bo sa feleng. Hona joale ha re phele nakong eo Molimo a sebeliseng Jesu ho folisa batho ka mohlolo. Leha ho le joalo, ha re e-na le tumelo ho Jesu re ka ba le tšepo ea ho fumana bophelo bo sa feleng. Na le rona re ka bontša kananelo joaloka monna oa Mosamaria?