13 JOSHUA
O Ile a Mamela Litaelo Tse Makatsang
JOSHUA o shebile Jeriko, e leng motse oo Molimo a mo laetseng hore a o felise. O hopola mantsoe ao Jehova a ileng a mo bolella ’ona pele Moshe a shoa ha a ne a re: “U be sebete ’me u be matla.” (Deut. 31:23) Ka mor’a hore Moshe a shoe, Jehova o ile a bua mantsoe a tšoanang ho Joshua, a re: “U be sebete ’me u be matla haholo.” (Josh. 1:7) Hona joale Joshua o ne a hloka ho ba sebete ho feta leha e le neng pele. Ke hobane’ng ha re cho joalo?
Jeriko e ne e se motse o moholo, leha ho le joalo o ne o sirelelitsoe ka marako. E ne e le motse oa pele oo Baiseraele ba neng ba lokela ho o hlola Naheng e Tšepisitsoeng. Batho ba lulang motseng oo ba ne ba etsa lintho tse mpe. Lilemo tse makholo pejana, Jehova o ile a bolella Abrahama hore na o tla etsa’ng ka Baamore, ha e le hantle o ne a bua ka batho bohle ba lulang naheng ea Kanana. O ile a re ho na le nako eo ka eona a neng a ke ke a hlola a mamella lintho tse mpe tseo ba neng ba li etsa le hore o ne a tla ba felisa. (Gen. 15:16) Nako eo e ne e se e fihlile. Batho bao ba ne ba rapela melimo ea litšoantšo, ba e-na le matekatse a tempele, ba robala le liphoofolo le batho ba amanang le bona hammoho le ba bong bo tšoanang. Ba ne ba bile ba etsa mahlabelo ka bana ho melimo ea bona e nyonyehang. Bakanana ba ne ba etsa lintho tse mpe ebile ba ne ba tl’o lelekoa naheng eo. (Lev. 18:3, 6, 21-27) Empa ba ne ba tla lelekoa joang?
Pele Baiseraele ba hapa Naha e Tšepisitsoeng, Jehova o ile a fa Joshua leano leo masole a neng a ka bona eka le ke ke la sebetsa
Jehova o ne a tla qala ka ho felisa Jeriko ha a felisa batho ba khopo naheng ea Kanana. O ne a tla sebelisa Joshua le lebotho la hae. Banna bao ba ne ba ikemiselitse ho mamela tataiso ea Jehova. Leha ho le joalo, litaelo tseo Jehova a ileng a li fa Joshua li ne li makatsa. Jehova ha aa ka a ba bolella hore ba hlasele kapa ba thibelle motse oo, empa o ile a re ba o potolohe. Ba ne ba lokela ho o potoloha hanngoe ka letsatsi, ka matsatsi a tšeletseng. Baprista le bona ba ne ba lokela ho potoloha motse, ba jere areka ea selekane ebile ba ntse ba letsa manaka. Letsatsing la bosupa, ba ne ba lokela ho potoloha motse ka makhetlo a supileng, ebe baa hoeletsa.
Joshua e ne e le lesole ’me o ne a kile a loana lintoa tse ngata. Ho motho eo e neng e le lesole, taelo ena e ne e ke ke ea utloahala ho hang. Ho ne ho ka etsahala’ng haeba Baiseraele ba ne ba ka hloloa? Na seo se ne se ka etsa hore lichaba tse ling Kanana li nahane hore li matla ho feta Baiseraele ebe li a ba loantša?
Leha ho le joalo, Jehova o ne a se a file Joshua mabaka a hore a mo tšepe. Ha Joshua a ne a roma lihloela tse peli ho ea hloela Jeriko, li ile tsa ithuta hore batho ba moo ba ne ba tšohile Baiseraele haholo. Hape Jehova o ile a emisa metsi a Noka ea Jordane, e le hore Baiseraele ba ka tšela.
E tlameha ebe Joshua o ile a nahana ka liketsahalo tsena ’me tsa etsa hore a be le tumelo ho Molimo oa hae. Tumelo ea hae e ile ea etsa hore a be le sebete sa ho mamela. Kahoo o ile a etella pele lebotho la hae eaba ba potoloha motse oa Jeriko. Baprista le bona ba ile ba letsa manaka a bona. Ha ho na le motho ea mong ea ileng a tsoa motseng oa Jeriko ho ea ba loantša hobane ba ne ba tšohile. Letsatsing le hlahlamang, Joshua le lebotho la hae ba ile ba etsa se tšoanang, ba etsa feela joalokaha Jehova a ne a ba laetse. Ka matsatsi a tšeletseng, ba ile ba ’na ba etsa ntho e tšoanang.
Letsatsi la bosupa le ile la fihla. Ka letsatsi leo, Joshua le lebotho la hae ba ile ba potoloha Jeriko ka makhetlo a supileng. Ha ba qeta ba ile ba etsa ntho e ’ngoe e fapaneng. Joshua o ile a re ho sechaba: “Hoeletsang hobane Jehova o le file motse ona!” Bibele e re: “Hang ha sechaba . . . se hoeletsa ka molumo o moholo oa ntoa, lerako la oa.”
Joshua le banna ba hae ba ile ba kena motseng oo ’me ba felisa ntho e ’ngoe le e ’ngoe e phelang feela joalokaha Jehova a ne a laetse. Ha Jehova a ne a e-na le Joshua le banna ba hae ba ile ba hlola metse le lichaba tse ngata. Ka mor’a nako e telele, Jehova o ile a hloekisa naha ka ho felisa Baamore le liketso tsa bona tse mpe.
Leha ho le joalo, ho na le karolo e nyenyane ea lerako la Jeriko e sa kang ea oa. Ke hobane’ng ha e sa ka ea oa? Ke hobane motseng oo ho ne ho e-na le mosali ea neng a le sebete le ea ileng a bontša tumelo e matla ho Molimo. Re tla ithuta ka eena haholoanyane khaolong e latelang.
Bala litemana tsena:
U ka re’ng?
Joshua o ile a bontša joang hore o sebete?
Etsa Lipatlisiso
1. Ke libuka life tsa Bibele tseo Joshua a neng a ka li bala? (w09 12/1 17 ¶4, nal.) A
Setšoantšo A
2. Pele Baiseraele ba ka potoloha motse oa Jeriko, Jehova o ile a laela Joshua hore a etse’ng? Ke hobane’ng ha litaelo tseo li ne li ka bonahala eka li tla beha Baiseraele ka mosing? (Josh. 5:2-8; w18.10 23 ¶5-7)
3. Ke bopaki bofe bo tiisang hore Jeriko e ile ea haptjoa ka nako e khutšoanyane? (w15 11/15 15) B
Kennedy, Titus (2023). The Bronze Age Destruction of Jericho, Archaeology, and the Book of Joshua. Accessed via researchgate.net. Licensed under CC by 4.0 DEED
Setšoantšo B: Linkho tse tšetseng lijo-thollo tse cheleng, tse fumanoeng moo Jeriko e neng e le teng
4. Boprofeta bo amanang le Jeriko bo hlahang ho Joshua 6:26 bo ile ba phethahala joang? (w98 9/15 21 ¶8)
Nahana ka Seo u Ithutileng Sona
Ke hobane’ng ha Joshua a ne a kholisehile ka litšepiso tsa Jehova? (Josh. 23:14) Rona re ka ba le kholiseho e tšoanang le ea hae joang ea hore litšepiso tsa Molimo li tla phethahala?
Mohlala oa Joshua o ka re thusa joang ho latela litataiso tseo re li fuoang ke mokhatlo oa Molimo? C
Setšoantšo C
U ka etsisa sebete seo Joshua a ileng a se bontša joang?
Iphe Nako ea ho Nahana ka Jehova le ka Morero oa Hae
U ithutile’ng ka Jehova tlalehong ee?
Tlaleho ee e amana joang le morero oa Jehova?
U ka rata ho botsa Joshua eng ha a se a tsositsoe?
Ithute Lintlha Tse Ling
Mohlala oa Joshua o ka re thusa joang hore re ithute ho batho ba baholo, re tšepe litšepiso tsa Molimo le hore re lule re tšepahala ha Bakreste-’moho le rona ba re utloisitse bohloko?
Thusa bana ba hao ho ithuta lintlha tsa bohlokoa liketsahalong tse etsahetseng bophelong ba Joshua.