14 RAHABA
O Ile a Khetha ho ba ka Lehlakoreng la Jehova
MOTSE oa Jeriko o ne o lutse sebakeng seo o chabeloang ke letsatsi hantle. Ha Bibele e bua ka motse ona e re e ne e le “motse o nang le lifate tsa lipalema.” (Deut. 34:3) Motseng ona ho ne ho e-na le mosali oa letekatse ea bitsoang Rahaba. Ntlo ea hae e ne e le lerakong la motse, moo a neng a khona ho bona libaka tse ntle ka ntle ho lerako la Jeriko. Empa ka har’a motse, o ne a bona batho ba tšohileng le ba se nang tšepo. Batho ba Jeriko ba ne ba tseba hore Jehova o na le sechaba sa hae sa Iseraele le hore o ne a tla se thusa hore se ba loantše le ho ba felisa. Ha e le hantle ba ne ba tšoaneloa ke seo.
Lilemo tse 40 pejana, Jehova o ile a sireletsa batho ba hae ho Baegepeta ka ho etsa hore Faro le lebotho la hae ba khangoe ke metsi Leoatleng le Lefubelu. Ka mor’a moo, Jehova o ile a etsa hore batho ba hae ba lelere lehoatateng. O ile a boela a thusa sechaba sa hae ho hlola marena a matla a Baamore e leng Sihone le Oge. Joale sechaba sa Baiseraele se ne se tla Jeriko. Jehova o ne a tl’o se sebelisa hore se fane ka kotlo ho batho ba moo ba neng ba etsa lintho tse mpe.
Rahaba o ne a tseba hore batho ba habo ba ne ba le khopo. Joalokaha e ne e le letekatse ’me a phela bophelo bo hlabisang lihlong, ho ka etsahala hore o ne a labalabela ho phela bophelo bo betere. Seo a ileng a ithuta sona ka Jehova, ha sea ka sa etsa hore a tšohe empa se ile sa etsa hore a be le tšepo. O ile a utloisisa hore Jehova ke Molimo ea sireletsang batho ba hae le ea sebelisanang le bona ka tlhompho. Tsela ena e ne e fapane hole le ea melimo ea bohata eo Bakanana ba neng ba e sebeletsa. O ile a susumeletseha ho batla ho sebeletsa Jehova, e leng Molimo ea hloekileng, ea nang le toka le ea sireletsang batho ba hae.
Bosiung bo bong, banna ba babeli bao Rahaba a neng a sa ba tsebe ba ile ba kokota ha hae, ba kopa ho robaletsa. O ile a hlokomela hore ke lihloela tsa Baiseraele. Empa ha se eena feela ea ileng a li hlokomela. Morena oa Jeriko o ile a utloela ka lihloela tseo tse peli, eaba o romela banna ntlong ea Rahaba ’me a fana ka taelo ea hore a ntše lihloela tseo. Rahaba o ne a lokela ho etsa qeto e neng e tla fetola bophelo ba hae. Na o ne a tla khetha ho thusa batho ba habo ba khopo kapa o ne a tla nka lehlakore la Jehova?
Ka sebete Rahaba o ile a khetha ho ba ka lehlakoreng la Jehova. O ile a pata lihloela marulelong a ntlo ea hae eaba o bolella bahlanka ba morena hore lihloela tseo li se li tsamaile. Ka mor’a hore ba tsamaee, Rahaba o ile a nyolohela marulelong ’me a bolella lihloela tseo hore na ke hobane’ng ha a li sirelelitse. O ile a re ho tsona: “Kea tseba hore Jehova o tla le fa naha ena.” O ne a e-na le tumelo ho Molimo oa tsona. O ile a li bolella ntho e ’ngoe e khothatsang. A re banna ba Jeriko ba tšaba Baiseraele haholo. O ile a ba a kopa lihloela tseo hore a sireletsoe ha Jehova a sebelisa Baiseraele ho felisa motse.
Letekatse le ne le ka fumana matla a ho furalla batho ba habo lona le boitšoaro bo bobe boo le neng le bo etsa joang?
Rahaba o ile a pholosa lihloela tseo eaba lia bona hore o ka lehlakoreng la Jehova. Li ile tsa amohela kopo ea hae. Rahaba le ba lelapa labo ba ne ba tla sireletsoa. Lihloela li ile tsa mo bolella hore a se ke a bolella motho leha e le ofe hore li ne li le teng, tsa ba tsa re a leketlise khoele e khubelu fensetereng ea hae le hore a lule a le ka tlung ea hae ha Baiseraele ba hlasela motse. Haeba Rahaba a ne a ka etsa lintho tsena, eena le ba lelapa labo ba ne ba tla pholoha.
Rahaba o ile a thusa lihloela ho pholoha ka ho sebelisa khoele e neng e fasitsoe fensetereng ea hae. O ile a etsa feela joalokaha lihloela li ne li mo boleletse, a leketlisa khoele e khubelu fensetereng ea hae. Ka sebete o ile a boloka lekunutu la lihloela tseo. Haeba banna ba Jeriko ba ne ba ka tseba seo a se entseng, ha ho potang hore ba ne ba tl’o mo bolaea ka sehloho. O ile a mamela litaelo tsa lihloela, tsa hore a boloke ba lelapa labo ka tlung. Ha Rahaba a utloa hore Jehova o ile a etsa hore Noka ea Jordane e emise ho phalla e le hore Baiseraele ba tšele, ha ho potang hore o ile a kholiseha le ho feta hore o ne a entse qeto e nepahetseng. Ha lebotho la Baiseraele le ntse le potoloha motse ka matsatsi a supileng, baahi ba Jeriko ba ile ba haroha matsoalo le ho feta. Qetellong ka letsatsi la bosupa, ha baprista ba letsa manaka ’me Baiseraele ba hoeletsa, Rahaba le ba lelapa labo ba ile ba lula ka tlung ’me ba pholoha ha marako a Jeriko a oa putla!
Ka mor’a ntoa, lihloela tsane li ile tsa ntšetsa Rahaba le ba lelapa labo ka ntle ho motse. Ntlo ea hae e ne e le karolo ea lerako e ileng ea sala ha marako a oa. Joalokaha Joshua a ne a fane ka taelo, Rahaba le ba lelapa labo ba ile ba sireletsoa. Ka mor’a nakoana, Rahaba e ile ea e-ba karolo ea sechaba sa Baiseraele. O ile a nyaloa ke monna oa Moiseraele ’me ba e-ba le bana. Lilemo tse makholo hamorao, e mong oa litloholo tsa hae e ile ea e-ba Jesu Kreste, e leng motho ea sebete ka ho fetisisa ea kileng a phela. (Mat. 1:5, 16) Jehova o ile a hlohonolofatsa Rahaba haholo ka lebaka la tumelo le sebete seo a ileng a se bontša.
Bala litemana tsena:
U ka re’ng?
Rahaba o ile a bontša joang hore o sebete?
Etsa Lipatlisiso
1. Hlalosa hore na Rahaba o ne a phela bophelo bo joang Jeriko. (w13 11/1 12 ¶4–13 ¶1)
2. Re tseba joang hore lihloela li ne li sa ea ha Rahaba ho ea etsa boitšoaro bo bobe bo amanang le thobalano? (it “Letekatse” ¶16-wcgr)
3. Ke hobane’ng ha ho ne ho e-na le mahlaka a mangata marulelong a ntlo ea Rahaba? Mahlaka a ne a sebelisetsoa eng? (it “Folakse” ¶2-4-wcgr) A
Thanks for your interest in my photos/Moment Open via Getty Images
Setšoantšo A: Tšimo e lenngoeng folakse
4. Ke hobane’ng ha ho sa fosahala hore ebe Rahaba o ile a thetsa banna ba morena? (w04 12/1 8 ¶6) B
Setšoantšo B
Nahana ka Seo u Ithutileng Sona
Ke hobane’ng ha ho ne ho hlokahala sebete e le hore Rahaba a tlohele ho phela joaloka letekatse le hore a rapele Jehova hammoho le Baiseraele? Batho ba ntseng ba ithuta Bibele ba ka ithuta’ng mohlaleng oa hae?
Bibele ha e khothaletse batho ho bua leshano. Bakreste ba ka ithuta’ng mohlaleng oa Rahaba haeba lira tsa batho ba Molimo li ba qobella hore ba ntše makunutu ka Bakreste-’moho le bona? (Liprov. 11:13; Moek. 3:7; Baef. 4:25) C
Setšoantšo C
Setšoantšo C
Ke ka litsela life hape tseo u ka etsisang sebete seo Rahaba a ileng a se bontša?
Iphe Nako ea ho Nahana ka Jehova le ka Morero oa Hae
U ithutile’ng ka Jehova tlalehong ee?
Tlaleho ee e amana joang le morero oa Jehova?
U ka rata ho botsa Rahaba eng ha a se a tsositsoe?
Ithute Lintlha Tse Ling
Re ka ithuta’ng tlalehong ea Rahaba mabapi le hore na re lokela ho etsa’ng ho pholoha letsatsi la Jehova le haufi?
Sebelisa pale ena ea Bibele e tsamaisanang le litšoantšo ho thusa bana ba hao ho bona liketsahalo tse hlahang tlalehong ena.