Bophelo Paradeiseng—Na Bo Tla Tena?
“LIRA tse peli tsa thabo ea batho ke bohloko le ho teneha.” Na u lumellana le maikutlo ao a mohlalefi oa lekholo la bo 19 la lilemo? Boholo ba batho bo ’nile ba teneha ka linako tse ling, empa hobane’ng?
Ho teneha ho amahanngoa le “ho tšerehana, ho pheta-pheta,” “boikutlo ba ho khathatseha le ho se khotsofale.” Hangata ho hlaha mosebetsing kapa tšebetsong e sa susumetseng kapa e sa khotsofatseng. Empa e boetse ke ’nete hore ho teneha ke boikhethelo. Ntho e tenang motho e mong e ka ’na ea hlasimolla e mong.
Na Bophelo bo sa Feleng bo Tla Tena?
Ha ho bapisoa boemo bo teng ba motho, bohle ba fumanang bophelo Paradeiseng e tšepisitsoeng ba tla lumellana le bolulo ba bona le Moetsi oa bolulo boo. Hobane’ng? Hobane ba tla amohela thuto e lekaneng ho ba lokisetsa bophelo bo thahasellisang le bo nang le litholoana tikolohong ea Paradeise. Re ho tseba joang? Hobane Moprofeta Esaia o ile a bululeloa hore a ngole: “Lefatše le tla tlala tsebo ea Jehova, joale ka ha metsi a aparetse leoatle.” E, tsebo ea Jehova, Mofani oa melemo e meholohali ho batho, e tla ba senotlolo se isang thabong ea sebele ea bophelo bo sa feleng lefatšeng la Paradeise.—Esaia 11:9.
Lefatše lohle phethehong le tla bontša litšoaneleho tse babatsehang tsa ’Mōpi e Moholo. Batho ba mamelang ba tla rata Molimo ka ho teba ’me ka hona ba tla ba le takatso ea ho tseba le ho utloisisa litsela tsa hae le bohlale ba hae joalokaha li tšoantšetsoa lefatšeng. Le kajeno, batho ba sa phethahalang baa makala ha ba ithuta limakatso le ho rarahana ha tlhaho. Empa esita le setsebi se seholohali mosebetsing ofe le ofe ha ho mohla se khotsofalang—kamehla se rata ho tseba haholoanyane. ’Me kamehla ho na le lintho tse ngata tseo re ka li tsebang. Bohlale ba motho le ho laba-labela ho tseba ho sa khotsofaleng li bontša hore bophelo bo sa feleng e tla ba bo thahasellisang kamehla!—1 Johanne 4:7, 8.
Mohlala oa sena, le tlas’a maemo a sa phethahalang a hona joale, ke boikutlo ba Andrés Segovia ea lilemo li 90, seletsi sa katara se tsebisahalang lefatšeng ’minong oa katara oa “classic.” Na o fumana bophelo bo tena? O ntse a tsamaea le lefatše a letsa lipina. Le hoja a bone ba bang ba khathetse ke lefatše, “o thabile haholo, o hapehile ho hang ke mosebetsi oa hae hore a ka khathala.” Eena ka boeena o boletse: “Ke bala le ho ithuta histori, filosofi, bohlale ba kelello boitšoarong bohle ba bona le ’mino.” E, ho sa na le ho hongata ho lokeloang ho ithutoa. Empa nahana hore na ho tla ba le ho ho kaakang ho ithutoang paradeiseng ea lefatše e phethahetseng! ’Me ka tebello ea thabo ea bophelo bo sa feleng e tsosolositsoeng, batho ba tla ba le nako ea ho ho etsa.
Taba ea Andrés Segovia e boetse e fana ka mohlala oa ntlha e ’ngoe—bokhoni ba motho bakeng sa tsebo. Joaloka ha seithuti sa kelello Peter Russell a ngotse ho The Brain Book: “Ka har’a lihlooho tsa rōna ho teng tsamaiso e ’ngoe ea tse rarahaneng ka ho fetisisa bokahohleng bo tsejoang. . . . Ha ho motho le ka mohla kae le kae ea batlileng a sebelisa bokhoni ba hae kaofela.” Nakong ea bophelo bo bokhutšoane ba lilemo tse ka bang 70 kapa 80, matla a boko a sala e ka ha a sebetsa. Joalokaha Russell a bolela: “Hangata ho boleloa hore re sebelisa feela karolo ea 10 lekholong ea matla a kelello ea rōna a tletseng. Hona ho bonahala e le ho feteletsa litaba. Ha e le hantle ha re sebelise le karolo ea 1 lekholong—e ka ’na ea e-ba 0,1 lekholong kapa ka tlaase.” Nahana feela seo boko ba motho bo tla se etsa Paradeiseng ntle ho likhatello tsa ho kula le botsofali!
Mosebetsi oa Lilemo tse Sekete
Ho ke ke ha latoloa hore bophelo boa tena ho ba bangata kajeno feela hobane ba koaletsoe ka har’a tselana e lumellang ho thabela lintho tse nyenyane tse fapa-fapaneng kapa tšusumetso ea kelello. Empa ha Bibele e bua ka bophelo bo sa feleng tlas’a Puso ea ’Muso oa Molimo ka Kreste, e bolela ka mokhoa oa bophelo oo motho oa kajeno a e-song ho o tsebe. Pele ho tsohle, puso ena ea ’Muso ha e na tokisetso ea lilemo tse hlano joalo ka ha linaha tse ling tsa kajeno li etsa, empa ke tokisetso ea lilemo tse sekete tseo e mpang e le qalo feela! Morero oo o boleloa likarolong tse ’maloa tsa Bibele ’me o fana ka tebello e hlasimollang ea mesebetsi e sa tšoaneng, ’me mesebetsi eo kaofela e tla ba e hahang le e hlahisang litholoana.—Tšenolo 20:1-7.
Ho tla ba le ho hongata ho lokeloang ho etsoa le ho hongata ho ithutoang, lintho tsena ka bobeli li tla ba matla hoo ho “teneha” e tlang ho ba lentsoe le lebetsoeng. Ka mohlala, Jehova o tšepisitse hore o tla “senya ba senyang lefatše.” (Tšenolo 11:18) Hona ho bolela hore lefatše le sentsoeng le tla lokela ho hloekisoa. Nahana feela ka mosebetsi o matla oa ho tsosolosetsa lefatše botleng le bohloeking ba pele—ho tlosa matlo a litšila le libaka tse hahiloeng ka ho petetsana; ho hloekisa linōka tsa lefatše le metsi a silafalitsoeng. Ho rata Molimo le baahelani ho tla susumeletsa banna le basali ba mamelang ho kopanela ka thabo mosebetsing ona o moholo.
Lenaneo la ho Haha, ho Lema le ho Ruta
Ka molao boemo ba Paradeise bo ke ke ba kopanyelletsa matlo a tšabehang a teng kajeno. Ke mang ea hlileng a ratang ho phela maemong a petetsaneng meahong e bolang, metseng ea mekhoro kapa literateng? Batho ba bangata ba ne ba tla thabela ho ba le matlo a bona le tšimo eo ba tla e hlaola! Eo ke Tšepiso ea Molimo ho bao ba bontšang botšepehi ba bona ho eena hona joale. Phello e tla ba lefatše la Paradeise le ahiloeng ke batho ba thabileng, ba khotsofetseng ke bophelo bo nang le morero, ba thabelang ho sebeletsa ba bang.—Liketso 20:35.
Molimo o tiisitse “maholimo a macha le lefatše le lecha” tse tlang ho bolela phetoho e feletseng ea maemo a ho phela bakeng sa batho ba limillione. Esaia o profetile: “Ba tla haha matlo, ba lule ho ’ona; ba tla hloma merara, ba je litholoana tsa eona. . . . Hobane matsatsi a sechaba sa ka a tla lekana le matsatsi a lifate, ’me bakhethoa ba ka ba tla bona mesebetsi ea matsoho a bona e tsofalla ho bona.”—Esaia 65:17-23; 2 Petrose 3:13.
Litšepiso tsena li bile le phethahatso e fokolang ha Bajode ba khutlisetsoa naheng ea bona ka 537 B.C.E. Li phethahala haholoanyane ka tsela ea moea lekholong lena la bo20 la lilemo, ’me li fana ka pontšo ea hore bophelo bo tla ba joang nakong ea Puso ea Lilemo tse Sekete ea ’Muso oa Kreste holim’a lefatše. Hona joale ha re hlahloba mantsoe a Esaia kapele re bona hore a bolela mosebetsi o nang le morero, mosebetsi o beang. Lenaneo lena la ho haha le ho lema le tla ba teng ka nako e telele hobane matlo a tla be a sa hlokahale feela bakeng sa baphonyohi ba Harmagedone empa hape le bakeng sa ba libillione ba tla ’ne ba khutle ka tatelano nakong ea tsoho. Ho tla ba le menyetla e sa feleng hakaakang bakeng sa ho qapa mehaho ea mefuta-futa!—Tšenolo 16:14-16; 21:3, 4.
Nahana feela hore na tsoho ka boeona e bolela eng. Baholo-holo ba hao ba tla tsosoa bafung. Leloko la heno le tla phutholoha ka pel’a mahlo a hao! U tla khona ho batlisisa metso ea hao le ho qala ha hao, e seng litlalehong tse sieo, empa ka ho bua le baholo ba hao ba tsositsoeng. Ka sebele hoo ho ke ke ha tena!—Johanne 5:28, 29.
Ho ekelletsa moo, nakong ea Puso ea Lilemo tse Sekete ea ’Muso oa Kreste lenaneo la thuto lefatšeng ka bophara le tla ntšetsoa pele e le hore ba tsositsoeng ba ka khema le phethahatso ea morero oa Molimo ka lefatše le seo ba tlamehang ho se etsa hore ba tšoanelehe ho phela ka ho sa feleng. Ha ho pelaelo Jehova o tla senola litaelo tse ncha tse loketseng maemo a batho a fetotsoeng. Ka hona batho ba tla ahloloa ka melao le litaelo tse ka ‘Libukeng’ tse phetliloeng nakong ea Puso ea Kreste ea Lilemo tse Sekete.—Tšenolo 20:12.
Ho Sebelisa Matla a Boko
Na joale bophelo bo tla tena, nakong ea Puso ea Lilemo tse Sekete le kamorao ho moo? Hopola matla a babatsehang a boko ’me u bapise seo u se tsebang hona joale le seo u tla se tseba.
Ka mohlala, ke liphoofolo tse kae, limela le likokoanyana tseo u ka li bolelang ka mabitso kapa tseo u ka li hlalosang ka ho li tseba? Tse mashome a mabeli? A mahlano? Tse lekholo? Bakeng sa baahi ba bang ba litoropo, ba leng hole le lintho tsa tlhaho, hoo e ka ba phephetso ea bohlokoa. Empa seithuti se seng sa bophelo sea ngola: “Lintho tse phelang tsa mefuta e sa tšoaneng tse ngata ba limillione tse 5 li arolelana bophelo holim’a lefatše [bo nang le libopuoa tse phelang le tikoloho ea tsona].” Mefuteng eo e limillione li hlano ea lintho tse phelang lefatšeng u tseba e mekae? Ka mohlala, bophelong ba hao ke mefuta e mekae ea likokoanyana eo u e boneng? Ho na le mefuta e 700 000 ea likokoanyana! ’Me ho thoe’ng ka mefuta e babatsehang ea linonyana ka masiba a tsona a sa tšoaneng, moetso le lipina? U tseba tse kae? Empa ho na le mefuta e phelang ea linonyana e 8 600. Motho o ne a tla ba hokae ntle ho lifate? Re itšetlehile ka tsona bakeng sa lijo, moriti, patsi le mafura. Ho ne ho tla u nka nako e kae ho tseba mefuta eohle e fapaneng ea lifate e 20 000?
Tsena e mpa e le lintho tse fokolang feela har’a lintho tse likete-kete tse hlasimollang tse khahlang motho. (Bapisa Jobo, likhaolo 38 le 39.) Ho fapana ha tsona le botebo ha li hlahise bothata bakeng sa matla a boko ba rōna. Ha e le hantle, re na le boko bo entsoeng ka matla a sa feleng. Ka lebaka leo, motho, a hlohonolofalitsoe ka kelello e matla le e batlisisang, a ke ke a ba le sebaka sa ho teneha. Leha ho le joalo, seo re se hlokang, ke bophelo bo lekaneng ho lekana le matla a boko. ’Me eo ke eona tšepiso ea Molimo bakeng sa batho ba mamelang—bophelo bo sa feleng lefatšeng la Paradeise.—Johanne 17:3; Tšenolo 22:1, 2.
Bosafeleng ha bo Tene
Empa tebello e ’ngoe ea Paradeise e-ea itlhahisa—ho tseba lefatše lohle, hanyane-ka-hanyane. Ha ho na ho ba le meeli ea bochaba, lithibelo tsa ho eta. Matla a fokolang a ho nahana a bochaba, khethollo ea mebala le merabe e tla ba lintho tsa nako e fetileng. Bohle ba tla hlokomela hore ba ikarabella lelapeng le le leng la motho le kopaneng. Etlaba ho thabisang hakaakang ho tsamaea ’me butle-butle re tseba “baena” le “bo-khaitseli” ba rōna ba limillione ba phelang ka khotso lefatšeng lohle. Oo e tla ba mohloli oa thabo e sa feleng—e seng ho teneha!
Litšepiso le merero tsa Jehova li tla tlisoa phethahatsong e feletseng mabapi le lefatše lena: “Ba malimabe ba tla ’ne ba je, ba khore; ba batlang Jehova ba tla bina lithoko tsa hae; lipelo tsa lōna li tla phela ka ho sa feleng. Lipheletso tsohle tsa lefatše li tla hopola Jehova, li sokolohele ho eena, mefuta eohle ea lichaba e tla khumama pel’a hao.” Haeba u lakatsa ho ba har’a bao ba malimabe ba tla phela ka ho sa feleng, ikutloe u lokolohile ho kopana le Lipaki tsa Jehova kapa bahatisi ba makasine ona. Lipotso tsa hao li tla arabeloa ntle ho tefello ’me le uena u ka ba le tšepo ea bophelo bo sa feleng lefatšeng la Paradeise!—Pesaleme ea 22:26, 27; Tite 1:2.
[Setšoantšo se leqepheng la 6]
U tseba mefuta e mekae ea linonyana, liphoofolo, litlhapi le limela? Paradeiseng ho tla ba le nako ea ho ithuta ka tsona kaofela