Lentsoe la Molimo Lea Phela

Thapelo e Bohlokoa Hakae ho Uena?

Ho e ka bang lilemo tse 2 500 Dariuse, morena oa ba-Mede, o ile a bea Daniele ho ba khosana e khōlō ’musong oa hae. Dariuse o ne a ananela mosebetsi oa Daniele haholo ’me Bibele e re “a hopola ho ’mea holim’a ’muso oa hae kaofela.” Mahosana a mang a ba le mōna ’me a loha leqheka la ho kenya Daniele tsietsing. Leqheka la bona le ne le amana le thapelo, ’me hona ho hlahisa potso, Thapelo e bohlokoa hakae ho uena?

Lira tsa Daniele tsa ea ho Morena Dariuse ’me tsa kōpa hore a ngole molao, ‘o bolelang hore e mong le e mong ea tla etsa thapelo ho molimo o mong, leha e le ho motho, ka matsatsi a mashome a mararo, ha e se ho uena, morena, a akheloe lemeneng la litau.’ Ka ho se lemohe morero oa sena, Dariuse a tiisa molao. Haeba u ne u le mohlanka oa Jehova Molimo nakong eo, na u ne u tla khaotsa ho Mo rapela? Ha Daniele a utloa ka molao oo, a potlakela ntlong ea hae ’me a rapela Molimo. Ka tloaelo, o ne a rapela hararo ka letsatsi. Ka baka la sena lira tsa hae tsa ea ho Dariuse ho mo tlalehela hore Daniele o nyelisitse molao. Sena sa utloisa Dariuse bohloko kahobane a tiisitse molao ’me a leka ho nahana tsela eo a ka namolelang Daniele. Empa bona bosiung boo lira tsa Daniele tsa fihla ho Dariuse ’me tsa re: “Morena, tseba hore ka molao oa ba-Mede le ba-Persia taelo, leha e le molao o beiloeng ke morena, ha o na ho fetoha.” Kahoo Dariuse a qobelloa hore a fane ka taelo ea hore Daniele a akheloe ka lemeneng la litau.

Dariuse a hlomoha haholo a ba a hlobaela bosiung boo, a se ke a robala. A tsoha e sa le hosasa ’me a potlakela lemeneng la litau. Ha a atamela, a hoeletsa ka lentsoe le hlomohileng a re: “Daniele, mohlanka oa Molimo o phelang, Molimo oa hao, oo u o sebeletsang ka tiisetso, na o tsebile ho u namolela litaung na?” Kantle ho tika-tiko, Daniele a arabela: “Morena, . . . Molimo oa ka o romile lengeloi la oona, ’me o thibile melomo ea litau, hore li se ke tsa nketsa letho.”

Dariuse a thaba haholo hakaakang! ‘A laela hore Daniele a nyolloe lemeneng.’ Joale, morena a qetella a entse eng ka ba lohileng leqheka la hore Daniele e be lijo tsa litau? A laela hore banna bao ba akheloe lemeneng la litau! Le pele ba fihla fatše, litau tsa ba bjabjaretsa. Hamorao, Dariuse a ngolla batho bohle ba ’muso oa hae, a ba bolella hore ba hlomphe Molimo oa Daniele hobane O etsa mehlolo e meholo. E, Jehova o ile a namolela Daniele melomong ea litau.—Daniele 6:1-28.

Na u na le tumelo e joaloka eo Daniele a bileng le eona ho Jehova Molimo? Na u-ua lumela hore mohlang Molimo a tlisang bofelo tsamaisong ena e khopo o tla u namolela haeba u lula u tšepahetse ho oona? Haeba ho joalo, u ke ke ua lumella molao leha e le ofe kapa tšokelo eo batho ba ka e etsang ho u thibela ho mo sebeletsa.