‘Le Lokela ho ba Baruti’
“Mohlanka oa Morena . . . e ka khona . . . a lokele ho ruta.”—2 TIMOTHEA 2:24.
1, 2. Bakreste ba lokela ho etsisa Jesu ka tsela efe e hlahelletseng?
KA LETSATSI le leng la selemo ka 31 C.E., Jesu a fana ka puo ea pontšeng ho bongata bo boholo bo kopaneng bo neng bo phuthehile ho tla utloa ha a ruta. Ha a ka a bua a sebelisa lihōlisa lentsoe tsa kajeno, a mpa a sebelisa mokhoa oa tlhaho oa ho hōlisa molumo oa thaba hore a utloahale. ’Me a bua lintho tse tsotehang. Hoba a qete, ba neng ba mo mametse ba lumela hore ha ba e-s’o utloe ntho e joalo le ka mohla. Tlaleho e-ea re bolella: “Matšoele a tsota thuto ea hae.” (Mattheu 7:28) Ka lekhetlo lena le ka a mang a mangata, Jesu a bontša hore ruri ke moruti e moholo.
2 Ho feta moo, a bolella balateli ba hae hore le bona, e tla ba baruti. A re: “E-eang ke hona, le rute lichaba tsohle; . . . ’me le ba rute ho boloka tsohle tseo ke le laetseng tsona.” (Mattheu 28:19, 20) Moapostola Pauluse a boela a hatisa hore Bakreste ba na le boikarabelo ba ho ruta. “Le ne le lokela ho ba baruti” ke mantsoe a hae ho Bakreste ba Baheberu. (Ba-Heberu 5:12, NW) A boela a re ho Timothea: “Mohlanka oa Morena ha a tšoanela ho loana; empa e ka khona a be mosa ho bohle, a lokele ho ruta.”—2 Timothea 2:24.
3. Mokreste a ka ’na a biletsoa ho ruta libakeng life?
3 Ke hobane’ng ha ho hatisoa ho ruta hakaale? Hobane Bakreste ba tlameha ho tseba ho ruta ha ba bolela ka ntlo le ntlo le literateng, kapa ha ba khutla ho etela le ho tsamaisa lithuto tsa Bibele le batho ba thabelang. Ba leka ho sebelisa ho kopana hohle ha bona le ba bang e le menyetla ea ho ruta. (Bona Johanne 4:7-15.) Ho phaella moo, mosebeletsi oa Mokreste o lokela ho ruta ha a buisana le phutheho Holong ea ’Muso, kapa ha a eletsa motho. ’Me basali ba hōlileng tsebong ba khothalletsoa ho ruta basali ba banyenyane ‘se molemo.’ (Tite 2:3-5) Batsoali ba Bakreste le bona ba leka ho hōlisa bana ba bona ka ‘ho ba rutela Moreneng’—ntho e batlang bohlale bo bongata ba ho ruta. (Ba-Efese 6:4; Deuteronoma 6:6-8) Hase feela moapostola Pauluse a itseng Mokreste o tšoanela a “lokele ho ruta”!
4, 5. Re na le thuso efe hore re be baruti ba molemo?
4 Empa ho ruta ha ho bonolo. Hase bohlale ba tlhaho. (2 Timothea 4:2, NW) E be Bakreste, bao bongata ba bona ba ‘seng bohlale ka mokhoa oa nama,’ ba ka hōlisa joang bohlale bona boo e seng ba tlhaho? (1 Ba-Korinthe 1:26) Ho ka etsoa feela ka thuso ea Jehova. (Mattheu 19:26) Ba batlang bohlale Jehova o ba nea bona. (Jakobo 1:5) Moea o halalelang oa hae o tšehetsa ba batlang ho etsa thato ea hae, ’me o re file Bibele, e nang le “molemo oa ho ruta,” le e tsebang ho re thusa hore re “rutehele mesebetsi eohle e molemo,” e akarelletsang ho ruta.—2 Timothea 3:16, 17.
5 Bibele e re thusa hore re be baruti ba molemo. Hona e ho etsa haholo-holo ka ho tlaleha ka bokhabane tšebeletso ea Jesu, eo bohlale ba hae ba ho ruta bo neng bo makatsa lithaka tsa hae haholo. (Mareka 1:22) Haeba re ithuta hore na ke eng e mo entseng moruti ea molemo hakaalo, re ka leka ho mo etsisa. ’Nete ke hore, ho na le lintlha tse peli tse lokelang ho nahaneloa tabeng ea ho ruta: litšobotsi tsa moruti ka boeena, le tsela eo a rutang ka eona. A re boneng hore na hona ho bile joalo joang tabeng ea Jesu, le hore na re ka ithuta eng ka mohlala oa hae.
Moruti . . .
6. Tšobotsi e ’ngoe ea thuto ea Jesu eo e leng habohlokoa hore re e etsise ke efe? Hobane’ng?
6 Ka lekhetlo le leng Jesu o itse: “Thuto ea ka hase ea ka, empa e le ea ea nthomileng.” (Johanne 7:16) Ka lekhetlo le leng a re: “Ha ke etse letho ke ’notši, ke mpa ke bolela litaba tseo joale ka ha Ntate a nthutile.” (Johanne 8:28) Ka hona, Jesu a hlokomelisa ka Ntate oa hae oa leholimo. Le hoja e ne e le Messia, sepheo sa hae e ne e le ho tlotlisa lebitso la Jehova, e seng la hae. (Mattheu 6:9; Johanne 17:26) Boikutlo bona bo ikokobelitseng ba thusa hore Jesu e be moruti ea fetisisang. Baruti ba Bakreste ba kajeno ba lokela ho ba le boikokobetso bo joalo. Sepheo sa bona hase ho itlisetsa thoriso e le baruti, empa ho e tlisetsa Jehova e le Moqapi oa seo ba se rutang. Ka tsela eo barutuoa ba bona ba fetoha bahlanka ba Molimo, e seng barutuoa ba motho ea itseng.—Bapisa Liketso 20:30.
7, 8. (a) Jesu o bile le boikutlo bofe bo botle malebana le ’nete? (Pesaleme ea 119:97) (b) Boikutlo bo joalo bo ka ntlafatsa matla a rōna a ho ruta joang?
7 Joale nahana hore Jesu o tlile ho tla ‘paka ’nete,’ le hore o ne a tsebisisa taba ea hae. (Johanne 17:17; 18:37) Leha a le lilemo li 12, o ne a thahasella litaba tsa Mangolo ka botebo. (Luka 2:46, 47) Ka ho hlakileng, Jesu o ne a rata ’nete. (Pesaleme ea 40:8) Kutloisiso ena e tebileng le lerato la ’nete tsa kholisa Jesu hore ba bang ho hlokahala ba utloe molaetsa oa hae, ’me a ikemisetsa ho o ruta hamolemo kamoo a ka khonang.—Johanne 1:14; 12:49, 50.
8 Ho thoe’ng ka rōna? Mohlomong re tseba ho hongata ka ’nete, empa na rea e rata? Na re ipha sebaka sa ho ithuta hore re be bohlale haholoanyane ho e sebeliseng? Na re thabela ho bua le ba bang ka eona? Ha tsebo ea rōna ea ’nete e teba, le lerato la rōna bakeng sa eona le tla hōla, le cheseho ea rōna bakeng sa ’nete e tla hōla hore re e arolelane le ba bang. Mopesaleme o boletse thabo e le ea motho ea ‘thabelang molao oa Jehova, a o nahana motšehare le bosiu.’ Ka motho ea joalo, Bibele e re, “see a se etsang kaofela sea mo atla,” ’me hoo ho akarelletsa ho ruta.—Pesaleme ea 1:1-3.
9. Ke tšobotsi efe hape ea Jesu e ileng ea tlatsetsa bohlaleng ba hae bo botle ba ho ruta?
9 Leha ho le joalo, ho ba le tsebo ka taba hase hona feela ho tla re etsa baruti ba batle. Ho ka ’na ha etsahala hore ebe ha u le sekolong u bile le tichere e tsebang thuto ea eona empa e sa tsebe ho ruta. Hobane’ng? Mohlomong e ne e haelloa ke tšobotsi eo Jesu a neng a e-na le eona ka bongata: lerato le tebileng le kameho bakeng sa ba bang. Tlaleho e re bolella ka ketsahalo ena: “[Jesu] ha a bona matšoele, a a utloela bohloko, hobane ba ne ba khathetse, ba saretsoe joale ka linku tse se nang molisa.” (Mattheu 9:36) Ha ho mohla a neng a khathetse haholo kapa a phathahane haholo hore a ka thusa ba bang. (Johanne 4:6-26) O ne a le mosa, a le bonolo a mamella mefokolo ea bona. O ne a batla ho thusa. (Luka 5:12, 13) Moruti oa Mokreste kajeno le eena o hloka litšobotsi tsona tsena haeba a tla atleha.
10. Ke hobane’ng ha mohlala o motle e le karolo ea bohlokoa ea ho ruta ka katleho?
10 Hape, hlokomela ntho ea bone e tšoaileng Jesu e le moruti. Ha ka “a etsa sebe, ’me le thetso ha ea ka ea fumanoa molomong oa hae.” (1 Petrose 2:22) Ha a ka a etsa letho le neng le ka faposa tlhokomelo ea batho thutong ea hae. Na re joalo? Pauluse a ngolla Baroma: “Uena ea bolelang hore ho se ke ha utsuoa, ua utsoa!” (Ba-Roma 2:21) Ka ho tšoanang, na moholo ea rutang phutheho bohlokoa ba tšebeletso ea tšimo ka boeena o mafolo-folo tšebeletsong ea tšimo? Na ea fanang ka puo e khothalletsang ho bala Bibele o na le kemiso ea ho bala Bibele? Maemong a mang boitšoaro feela, ho se lipolelo tsa letho, bo ka ‘hapa’ bahanyetsi. (1 Petrose 3:1) Liketso li ka bua haholo ho feta mantsoe. Ka sebele, haeba liketso tsa rōna li hanyetsa mantsoe a rōna, seithuti se tla potlakela ho bona phapang, ’me thuto ea rōna ho bonolo hore e be ea lefeela.
11. Ke tšobotsi efe e ’ngoe ea ho ruta eo ho buuoang ka eona mona?
11 Takatso ea moruti ea ho rorisa Jehova, kutloisiso ea hae le lerato la ’nete, kameho ea hae e mosa bakeng sa ba bang le mohlala oa hae o motle kaofela ke karolo ea bohlokoa ea ho ba moruti ea molemo. Liithuti tse tiileng li futhumatsoa ke litšobotsi tse joalo le haeba moruti a hlile a se na bohlale bo ikhethang ba ho ruta. Leha ho le joalo, ho ruta ke bohlale boo e seng ba tlhaho, ’me ho nahana ka mahlale le mekhoa ea ho ruta ho ka ntlafatsa ho ruta ha rōna. Nahana ka litšobotsi tse ling tse sebetsang tsa ho ruta ha Jesu ’me u bone haeba li ka thusa ho u etsa moruti ea molemo.
. . . le Thuto Ea Hae
12. (a) Ho Mattheu 5:3-12 ho totobala tšobotsi efe ea ho ruta ea Jesu? (b) U ka sebelisa tšobotsi ee ho ntlafatsa bohlale ba hao ba ho ruta joang?
12 Ho latsoa thuto ea Jesu, ipalle litemana tse seng kae tse qalang tsa Thuto ea hae ea Thabeng. (Mattheu 5:3-12) U haptjoa ke eng ka potlako? E, Jesu o ne a hloaea mantsoe a hae ka hloko. Letoto la lipolelo tse khutšoaane tse kenyelletsoang ka, “Ho lehlohonolo ba . . .” le etsa kenyelletso e hopolehang. Empa hlokomela: Ha a sebelise mantsoe kapa lipolelo tse thata le tse utloahalang li phahame. Linnete tse boleloang li tebile, empa li boleloa ka bonolo. Lekunutu la thuto e hlahisang litholoana ke lena: BONOLO. Bala polelo eohle ea Jesu ’me u lemohe mehlala e meng ea linnete tse tebileng tse boletsoeng habonolo le ka ho hlaka. (Mattheu 5:23, 24, 31, 32; 6:14; 7:12) E be joale u nahana ka hore na u ka hlalosa ka bonolo joang linnete tse ling tse tebileng, tse kang, Mehla ea Balichaba, kapa hore na ke hobane’ng ha Bibele e tšepisa bophelo ba leholimong le ba lefatšeng.
13, 14. Litšoantšo li ile tsa phelisa mantsoe a Jesu joang?
13 Joale bala Mattheu 5:14-16. Jesu o khothalletsa bamameli ba hae ba baikokobetsi ho jala ’nete ka bophara ka mantsoe le liketso tsa bona tse ntle. Mohlomong maikutlo ana a ile a ba makatsa. Mehleng eo bangoli le Bafarisi ba ne ba talingoa e le baruti ba sechaba sa Bajode. Empa Jesu a totobatsa ntlha, e le hore e utloahale hantle haholo. Joang? Ka ho sebelisa setšoantšo se matla. Mona ke thuso ea bohlokoa ea ho ruta eo Jesu a neng a e sebelisa hangata: LITŠOANTŠO.
14 Litšoantšo li sebelisoa ka mabaka afe? Hobane likelello tsa rōna li nahana hamolemo ka litšoantšo. ’Me ka ho bua ka lintho tse tloaelehileng, litšoantšo li ka etsa hore lintho tsa moea li utloisisoe habonolo. Ka hona, Jesu o tšoantšitse Jehova, Ea Utloang merapelo, le ntate ea neang bana ba hae lintho tse molemo. Tsela e thata ea bophelo ea hlalosoa e le monyako o patisaneng o kenang tseleng e tšesaane. Baprofeta ba bohata ba tšoantšoa le liphiri tse ikhakantseng joaloka linku kapa le lifate tse beang tholoana e bolileng. (Mattheu 7:7-11, 13-21) Litšoantšo tsena tsa lintho tsa ’nete bophelong tsa phelisa mantsoe a Jesu. Lithuto tsa hae tsa hopoleha, li ke ke tsa lebaloa.
15. Fana ka mehlala ea kamoo kajeno Bakreste ba ka sebelisang litšoantšo ho ntlafatsa ho ruta ha bona.
15 Baruti ba Bakreste ka ho tšoanang kajeno ba sebelisa litšoantšo ho etsa hore maikutlo a macha a amohelehe ho ba bang. Ba bang ba tšoantšelitse ho se utloahale ha thuto ea mollo oa lihele ka ho botsa seo momameli a ka se nahanang ka motsoali ea otlang ngoana ea sa utloeng ka ho tšoarella letsoho la hae mollong. Taba ea hore ke batho ba fokolang haholo ka palo ba eang leholimong, ha bongata bo e-na le tšepo ea ho phela lefatšeng ka ho sa feleng, e ka tšoantšetsoa ka sechaba moo e leng ba fokolang ka palo ba etsang ’muso, ha bongata bo thabela melemo ea ’muso oo. Empa setšoantšo se etsoe ka lintho tseo momameli a tloaelaneng le tsona. Ha hoa lokela hore se hlalosoe halelele, kapa se be selelele hoo ntlha e rutoang e hlokomolohuoang.
16. Ke litšoantšo tsa mofuta ofe tse hlileng li hlakileng?
16 U se lebale hore litšoantšo li ka etsoa hape ka ntho e bonoang. Ha Jesu a botsoa hore na ho loketse ho lefa makhetho a Sesare, a kōpa hore ba mo nee chelete, denare, ’me a e sebelisa ho tšoantšetsa karabelo ea hae. (Mattheu 22:17-22) Ha a hatisa bohlokoa ba boikokobetso, a tšoantšetsa ntlha ka ho bitsa ngoana e monyenyane. (Mattheu 18:1-6) ’Me ha a bua ka boinehelo bo feletseng, a supa mohlolohali ea neng a nyehela sohle sa hae—lichelete tse nyenyane tse peli—letlotlong la tempele. (Mareka 12:41-44) Ka ho tšoanang, libui tse ling libokeng tsa Bokreste Holong ea ’Muso li sebelisa “blackboard,” litšoantšo, lichate kapa li-slide ’me lithutong tsa mahae tsa Bibele ho ka sebelisoa litšoantšo tse hatisitsoeng kapa lithuso tse ling. Litšoantšo tsa lintho tse bonoang li molemo haholo-holo ho feta mantsoe feela.
17. Bolela mokhoa o mong oa ho ruta o neng o sebelisoa hangata ke Jesu.
17 Qetellong, bala kamoo Jesu a ileng a sebetsana le Bafarisi ka lekhetlo le tlalehiloeng ho Mattheu 12:10-12. Hlokomela kamoo a ileng a arabela ka bohlale potso e qhekellang haholo. E, a etsa setšoantšo, empa na u hlokometse hore na o se beile ka mantsoe afe? E le potso. Ka tsela e bohlale joalo o tataisa bamameli ba hae hore ba talime Sabbatha ka tsela e tsitsitseng haholoanyane. Ka hona, LIPOTSO ke thuso e ’ngoe ea bohlokoa ea ho ruta e sebelisitsoeng ke Jesu. Hlokomela kamoo Jesu a sebelisitseng lipotso ho etsa hore bamameli ba hae ba re khefu ba nahane le ho tlamella bahanyetsi hore ba inahane kahosele.—Mattheu 17:24-27; 21:23-27; 22:41-46.
18. Fana ka mehlala e meng ea kamoo kajeno Bakreste ba ka sebelisang lipotso ha ba bua ka litaba tsa thuto.
18 Kajeno Bakreste ba ka sebelisa lipotso ka ho tšoanang. Ka hona, ha ea lumelang Boraro-bo-bong a sebelisa Mattheu 28:18 ho paka hore Jesu o matla ’ohle, ’me ka lebaka leo o lekana le Molimo, baruti ba nang le tsebo ba ’nile ba ho fumana ho le molemo ho sebelisa lipotso ho mo thusa ho nahana. Mohlomong re ka ’na ra botsa: ‘Haeba Jesu a neiloe matla ’ohle, joalokaha temana e bolela, o a neiloe ke mang? Hona boemo ba Jesu e ne e le bofe pele a a neoa?’ Ka hona, ea lumelang Boraro-bo-bong o thusoa ho talima lengolo leo ka leseli le lecha. Ka ho tšoanang, ea lumelang mollo oa lihele a ka ’na a sebelisa setšoantšo sa morui le Lazaro ho leka ho paka hore mollo oa lihele o teng. (Luka 16:19-31) Lipotso tse kang tsena li ka ’na tsa mo thusa: Mofutsana o ile a ea kae ha e-shoa? Haeba o ile leholimong, na hoo ho bolela hore motho e mong le e mong ea leholimong o sefubeng sa Abrahama? Ntle ho moo, Abrahama o ne a etsa’ng moo, kaha Jesu o itse ho tla fihlela mehleng ea Hae ha ho motho ea neng a kile a nyolohela leholimong? (Johanne 3:13) Lipotso tse joalo li ka thusa ho bontša hore boemo ba mofutsana kamor’a lefu joalokaha bo hlalosoa setšoantšong e tlameha e be ba tšoantšetso. Ka baka leo, boemo ba morui kamor’a ho “shoa” le bona bo ne bo tšoantšetsa, e seng hore bo ka utloisisoa ka tsela ea sebele—haholo ha ho talingoa seo mangolo a mang a se buang ka lihele.—Moeklesia 9:10.
19. Ke hobane’ng ha lipotso e le tsa bohlokoa hakana maemong ‘ohle a ho ruta?
19 Lipotso li etsa hore seithuti se kopanele thutong. Le lipotso tse sa hlokeng likarabelo (moo sebui se sa lebellang bamameli ba sona hore ba se arabele) li susumetsa monahano oa momameli. Hlokomela kamoo Jesu a sebelisitseng lipotso tse sa hlokeng ho arabeloa ho Mattheu 11:7-11. Lipotso li na le mosebetsi o mong hape. Hangata re lokela ho tseba se monahanong oa motho pele re ka mo thusa. Kaha, ho fapana le Jesu, re ke ke ra tseba se leng lipelong tsa batho, tsela e ’ngoe feela ea ho fumana boitsebiso bona: ka ho botsa lipotso tse nahannoeng hantle.—Liproverbia 18:13; 20:5.
20. Ke litholoana life tse beoang ke ha re ‘itebela le thuto ea rōna’? (1 Timothea 4:16)
20 E, ho ruta, ke bohlale boo e seng ba tlhaho. Ho bo hlaolela, moruti o tlameha ho hōlisa ka ho eena litšobotsi tsa ho ruta le ho etsa ka matla ho ithuta hore na a ka ruta joang. Ha ho bonolo, empa ho ka hlaoleloa. Empa, leha ho le joalo ho ba Mokreste ke ho ba moruti. Ho phethahala ha litlameho tse ngata hakana tsa Bokreste ho ama ho ruta. Ka hona, ke hantle ha re sebelisa keletso ea Pauluse: “U ke u itebele, u lebele le eona thuto.” Ke ’nete hore ka tlhaho ba bang ba na le neo ho sena ho feta ba bang. Empa bohle ba ka ruta ka katleho haeba ba etsa ka matla ’me ba lebella thuso ho Jehova. Litholoana tsa ho etsa sena li ngata haholo. Joalokaha Pauluse a ile a tsoela pele ho re: “U tiee teng; hobane, ha u etsa joalo, u tla ipholosa, u pholose le ba u utloang.”—1 Timothea 4:16.
Na u Ka Hlalosa?
◻ Ke litšobotsi life tse thusitseng Jesu ho ba moruti ea molemo?
◻ Litšobotsi tsee li ka re thusa joang?
◻ Ke hobane’ng ha bonolo e le ba bohlokoa ho moruti?
◻ Ke hobane’ng ha ho sebelisa litšoantšo le lipotso ho tla phahamisa thuto ea rōna?
[Setšoantšo se leqepheng la 8]
Jesu o ne a fapane le baeta-pele ba bolumeli ka tsela eo a rutang ka eona
[Setšoantšo se leqepheng la 10]
Joaloka Jesu, Bakreste ba sebelisa menyetla eohle ea ho ruta