Jesu Bophelo le Tšebeletso ea Hae

Tsoalo ea Jesu—Hokae hona Neng?

NAKO e ntse e atamela ea hore Maria a belehe, ke hobane’ng ha Josefa a nka leeto le lelelele? ’Musisi oa Roma, Sesare Augusto, o entse molao oa hore e mong le e mong o tlameha ho khutlela motseng oo a tsoaletsoeng ho oona ho ea ngolisoa. Ka hona Josefa o ea moo a tsoaletsoeng teng, motseng oa Bethlehema.

Batho ba bangata ba Bethlehema ho ea ngolisa, ’me sebaka feela seo Josefa le Maria ba ka lulang ho sona ke setaleng. Mona, moo ho hlahleloang liesele le liphoofolo tse ling, Jesu o tsoalloa teng. Maria o mo thatela ka likotoana tsa masela ’me o mo bea sejelong, sebaka se tšelang lijo tsa liphoofolo.

Ruri e ne e le ka tataiso ea Molimo hore Sesare Augusto a etse molao oa hae oa ngoliso. O nolofalitse hore Jesu a tsoalloe Bethlehema, motse oo Mangolo e neng e le khale a boletse hore morena ea tšepisitsoeng o tla tsoalloa ho oona.

Bona ke bosiu ba bohlokoa hakaakang! Koana masimong khanya e khōlō e pota-potile balisa ba linku. Ke khanya ea Jehova! ’Me lengeloi la Jehova le re ho bona: ‘Kajeno le sa tsoa tsoalloa ’Moloki Bethlehema, e leng Kreste Morena. Le tla mo fumana a robalitsoe sejelong.’ Ka mohlolo ho se ho hlaha mangeloi a mang a mangata, a bina: “Khanya e isoe ho Molimo o holimo, ’me lefatšeng khotso har’a batho ba hauhetsoeng.”

Ha mangeloi a tloha, balisa baa bolellana: ‘A re eeng Bethlehema ho ea bona ntho ena eo Jehova a re tsebisitseng eona.’ Ba ea ka potlako ’me ba fumana Jesu hantle moo lengeloi le itseng ba tla mo fumana teng. Ha balisa ba pheta seo lengeloi le ba boleletseng sona, bohle ba utloang baa hlolloa. Maria o boloka lipolelo tsena tsohle ’me o li baballa pelong ea hae.

Batho ba bangata kajeno ba lumela hore Jesu o tsoetsoe ka la 25 Tšitoe. Empa Tšitoe ke khoeli ea lipula le lirame Bethlehema. Balisa ba ne ba ke ke ba be ba le ntle masimong bosiu le mehlape ea bona ka nako eo ea selemo. Hape, Sesare oa Roma ha ho bonahale ho le bonolo hore o ne a ka hloka hore batho ba neng ba se ntse ba sekametse ho mo fetoheleng ba nke leeto leo har’a mariha ho ea ngolisoa. Ka ho hlakileng Jesu o tsoetsoe hoo e ka bang mathoasong a hoetla (karolong e ka leboea ea lefatše) selemong. Luka 2:1-20; Mikea 5:2.

◆ Ke hobane’ng ha Josefa le Maria ba ile ba ea Bethlehema?

◆ Ke ntho efe e hlollang e etsahetseng bosiung ba ho tsoaloa ha Jesu?

◆ Re tseba joang hore Jesu ha a tsoaloa ka la 25 Tšitoe?

[Setšoantšo se tletseng leqephe la 9]