Botle ba Botho ba Bokreste
‘Le apare motho e mocha, ea bopiloeng ka setšoantšo sa Molimo, ho lokeng le khalalelong ea ’nete.’—BA-EFESE 4:24.
1. Re lakatsa ho hlalosa botle bofe?
KA SENYESEMANE ho na le maele a reng ‘botle bo bonoa feela ke ’mohi,’ hona ho bolela hore botle bo sehetsoe moeli. Botle ba monna oa Mokreste kapa mosali ke bofe? Ke sona seo re batlang ho bua ka sona.
Ho Hlalosa Botle ho Monna oa Mokreste
2. Ke hobane’ng ha litšobotsi tsa ’mele li ’notši li hlōleha ho etsa monna oa Molimo?
2 A ke re nahanele litšoaneleho tse neang monna oa Mokreste ponahalo e ntle e tla etsa hore ba bang ba thabele botsoalle ba hae. Litšoaneleho tsa ’mele ha lia lekana ho etsa “monna oa Molimo.” (1 Timothea 6:11) Ponahalo ea monna, le hoja e ka ba ntle hakae, ke lefeela haeba a hloka kutloisiso. Haeba a ikhohomosa, a se na mekhoa, a le tala, a le hloohontšo, ha a hulele batho ho eena—oa ba leleka. Haeba mekhoa ea hae e mo pepesa e le motho ea sa ananeleng, ka sebele a ka khopisa ba bang. Haeba a amehile feela ka lithahasello tsa hae le kamoo a shebahalang kateng le kamoo a khahlisang ba bang, batho ba ke ke ba rata botsoalle ba hae.
3, 4. (a) Ke litšoaneleho life tsa monna oa Molimo tse bonahalitsoeng ke monna Jesu Kreste? (b) U ka hlalosa litšoaneleho tse ling tsa monna oa Molimo joang?
3 Ho e-na le hoo, monna oa Molimo o tla hlaolela litšoaneleho tse kang toka, mohau, lerato, le mosa. Jesu Kreste o ne a sa tsejoe ka ’mele o phethahetseng empa ka ho tšepahala ha hae motheong le ’neteng. O ne a ruta e se e ka o na le borena bo tsoang ho Molimo. (Mattheu 7:28, 29; Johanne 7:46) Monna oa Molimo a ke ke a silafatsoa ke takatso ea ho batla borena kapa botumo. Melemo e fanoang ke boemo bo itseng e ke ke ea mo eka. Ke monna ea nang le taolo e phethahetseng. O rata boikokobetso ’me ha a bue leshano. O bontša tšabo e ntle ea Jehova. (Liproverbia 22:4) Litšoaneleho tsena li lokela ho fumanoa ho monna oa Molimo.
4 Monna oa Molimo o na le letsoalo, pelo e molemo, le maikutlo a nepahetseng. (1 Timothea 1:5; Liproverbia 4:23) Ha a etse lintho tse nyelisang letsoalo la hae, tse hlokomolohang melao-metheo e lokileng. Kaha o na le pelo e molemo le maikutlo a nepahetseng, a ke ke a sebelisa mekhoa ea bolotsana ha a sebelisana le ba bang. (Ba-Heberu 13:18) A ke ke a lumella hore boikutlo ba hae bo botle bo qhaphaletsoe ke boitšoaro bo litšila le liketso tse litšila. (Hosea 4:11) O ikhalemela kamehla hore pelo ea hae e se fetohe e mano. Mantsoe a hae le liketso li totobatsa hore ke monna ea nang le metheo.—Pesaleme ea 15:1, 2.
5. Khauhelo e nka sebaka sefe bophelong ba monna oa Molimo?
5 Monna oa Molimo o hauhela ba bang, oa tšoarela le ho ba mosa. Monna ea hauhelang o na le kutloelo bohloko. O bontša kutloelo bohloko le kutloisiso ha ba bang ba e-na le mathata a tebileng a ba tlisetsang lipelaelo. Ho feta moo, ke monna ea tšoarelang ba mo sitelang. O hlōla boikutlo ba hlaho ba ho batla ho phetetsa bobe ka bobe. Mantsoe a 1 Petrose 3:8, 9 a mo tšoanela hantle hakaakang. Ka hore a hlohonolofatse ho e-na le hore a rohake o iponahatsa a le mosa, ’me o laola litakatso tsa botho tse bonahalang ho monna ea fokolang, monna ea se nang khauhelo, ea sa tšoareleng, le ea sa bontšeng mosa ho ba bang.—Ba-Efese 4:31, 32.
6. (a) Litšoaneleho tse ling tse totobetseng tsa monna oa Molimo ke life, ’me li bolela eng? (b) ’Me mosali le bana ba monna ea joalo ba tla ikutloa joang?
6 Tšoaneleho e ’ngoe e qollang monna oa Molimo ke moea oa ho fana. Haeba a nyetse, ke monna oa ’nete le ntate ea tšepahalang. Monna oa Molimo ea nyetseng o na le monyetla o moholo oa ho susumetsa le ho behela mosali oa hae le bana mohlala. (Ba-Kolosse 3:19, 21) Tabeng ea ho fana, monna eo o latela keletso e ntle ea Morena Jesu Kreste, ea itseng: “Fanang, ’me le tla fuoa; ’me le tla feloa sefubeng ka tekanyo e kholo, e hlohliloeng, e katiloeng, e tšolohang; hobane tekanyo eo le lekanyang ka eona, le tla lekanngoa ka eona le lōna.” (Luka 6:38) Likamanong tsa lelapa, monna ea joalo o tla hlokomela ba ntlo ea hae. Empa hape o sebelisa khothatso e ntle e ho Ba-Efese 4:28, hore ‘a inehele ho sebetsa lintho tse molemo ka matsoho a hae, a tle a tsebe ho nea ea hlokang.’ Monna oa Molimo ke monna oa sebele, o tšepahala litokelong tsa lenyalo. Mosali oa hae o tla mo tšepa ka pelo eohle ’me ba tla ba tlamong e le ’ngoe ea lenyalo. (Liproverbia 5:18, 19) Ho phaella moo, haeba ba e-na le bana, e tla ba ntate ea tšepahalang, e seng moqhekelli kapa ea sa tšepahaleng litšebelisanong le ba bang. Ka ho etsa joalo o kenya metheo ea botšepehi baneng ba hae. (Liproverbia 4:1-5) Monna ea joalo ke mohlala o motle hakaakang baneng ba hae ba kelello li bonolo! Ba tla mo talima e le monna ea tšepahalang.—Liproverbia 11:3, 4.
7. Monna oa Molimo o tla ba le pono efe e leka-lekaneng tabeng ea melato?
7 Tabeng ena, monna oa Molimo o tla lebella hore eena le lelapa la hae ba se ikimetse ka melato, a tseba hore e ka isa mathateng a maholo. Sena se bolela hore eena le lelapa la hae ba ke ke ba batla ho phela ka lintho tseo ba se nang tsona. Ke motho ea balang litšenyehelo pele a qalisa lenaneo le itseng. (Luka 14:28-30) O itima lintho hona joale bakeng sa nako e tlang ’me o tela tse bonahalang bakeng sa tse sa bonahaleng. (Bapisa Ba-Heberu 11:8-10.) Ho phela ka tsela ena ho tla thusa monna oa Molimo ho boloka metheo ea Bokreste bophelong ba letsatsi le leng le le leng.
8. Monna ea joalo o tla talima maemo a sa thabiseng a bophelo ba hae joang?
8 Bophelong ba batho bohle, ho ee ho hlokahale hore re thulane le maemo a sa thabiseng, ka baka la sebe le ho se phethahale. Empa monna oa Molimo o tla ba sebete le ho bontša taolo maemong a joalo, a etsisa mohlala oa Jesu. (Johanne 16:33) Ka matla a Molimo oa hae, Jehova, o tla thulana ka hlooho le mathata, a itšetlehile ka thuso le tataiso ea Jehova.—Liproverbia 18:10.
9. U ka hlalosa boitšoaro ba monna ea batlang ho thabisa Jehova joang?
9 Monna oa ’nete oa Molimo ke monghali oa ’mele oa hae. O laola litakatso tsa hae, o seli hore ’mele oa hae e be mohlanka ea motle, e seng monghali ea mobe. Kamehla o hopola mantsoe a bulutsoeng a moapostola Pauluse: “Ke tuba ’mele oa ka le ho o khanna joale ka lekhoba.” (1 Ba-Korinthe 9:27, NW) Ka baka leo, kamehla o batla ho hlaolela tholoana “ea moea . . . boitšoaro,” o qoba lintho tse ka mo silafatsang. (Ba-Galata 5:22, 23) O bohlale ho tseba hore ho inehela mohopolong o litšila oa boitšoaro ho ka isa ketsong e litšila ea boitšoaro ba ka likobong. Hape, o itšetlehile ka Molimo oa hae, Jehova, Ea mo neang matla.—Ba-Filippi 4:13.
10, 11. (a) Ke tšoaneleho efe e fanang ka maikutlo a hloekileng e bonahatsoang ke monna oa Molimo ha a fositse kahlolong ea hae? (b) Lihlooho tsa lelapa li tla latela mohlala ofe le thutong ea lelapa?
10 Ho lihela taba, monna oa Molimo o amohela liphoso tsa hae, o kōpa tšoarelo, ’me o bontša molekane oa hae oa lenyalo le bao a ba sitetseng kapa a ba ntšitseng kotsi hore o soabela ketso eo ka baka la ho se phethahale. ’Me joale a ka rapela Jehova ka pelo e hloekileng a kōpa hore a mo tšoarele libe tsa hae kahobane a kōpile mosali oa hae, batho hammoho le eena, bana ba hae, tšoarelo. Ho re, “Ke kōpa tšoarelo, ke ne ke fositse” ke letšoao la monna oa sebele, haholo-holo monna oa Molimo.—Mattheu 18:21, 22; Mareka 11:25.
11 Na u ne u ke ke ua bolela hore monna, ntate, ea nang le botho bo joalo o tla amohela thuso ea Jehova? (Pesaleme ea 54:4) Ka sebele, o tla matlafatsoa hore a jare ka katleho mathata a tlisoang ho rōna kaofela ke lefatše la mehla ena ka baka la mano a Diabolose le morero oa ho senya botle bo bong le bo bong, ho akarelletsa le kopano ea lenyalo le lelapa le thabileng. O tla hlokomela haholo boemo ba moea ba litho tsa lelapa, a li etella pele thutong ea kamehla ea Lentsoe la Molimo le ka thapelo, a etsisa mohlala oa bahlanka ba tšepahalang ba Molimo ba mehleng ea Bibele.—Deuteronoma 11:18-21; Liproverbia 7:1-3.
12. Ke karolo efe ea bohlokoa e tla hlahlojoa?
12 Empa ho na le ho eketsehileng. Ho na le karolo ea mosali tabeng ea ho lokisa mathata a lelapa. Joale a ke re lebise tlhokomelo ea rōna litšoanelehong tseo mosali a ka lakatsang ho li hlaolela bophelong ba hae.—Liproverbia 19:14.
Ho Hlalosa Botle ba Mosali oa Mokreste
13, 14. Mosali a ka nka mehato efe hore a hape kamohelo ea Jehova ’me, haeba a nyetsoe, a hape kamohelo ea lelapa la hae, ’me keletso ea moapostola Petrose ho 1 Petrose 3:1-5 ke efe ho basali?
13 Buka ea Liproverbia e re phetela ka mosali oa Molimo: “Khahleho ea thetsa; botle ke bosaoana! Mosali ea tšabang Jehova ke eena ea tla rorisoa.” (Liproverbia 31:30) Ke joang mosali a ka fumanang litšoaneleho tseo tse ratoang ke monna le bana, kapa le ba bang haesale e le lesoha, tse tla mo etsa motho eo ba bang ba thabelang ho ba haufi le eena? Taba ea pele, mosali oa Molimo ke motho ea pelo e bulehileng, ka mantsoe a mang, ke motho ea fanang, ea ratang ho thusa ba bang ka litsela tseo a ka khonang ka tsona, nameng kapa moeeng. Haeba ho e-na le ba hlokang, o har’a ba pele ba batlang ho thusa, o thahasella ba hlokang. Empa o lekanya thahasello e joalo le tlhokomelo eo a e nehang lelapa la hae, haeba a nyetsoe.—Tite 2:3-5.
14 Ho tsoela pele, mosali ea joalo o ikokobelitse, ha a ikhohomose; o mosa, ha a pelontšo; o makhethe, ha a bohlasoa; o kutloelo bohloko, ha se ’mantoa. ’Me, haeba a nyetsoe, o mamela keletso e fanoeng ke moapostola ho 1 Petrose 3:1-5.
15. (a) Sepheo sa mosali oa Molimo ke sefe, ’me o se phehella joang? (b) O tšehetsa monna oa hae joang? (c) Ke hobane’ng ha a tsoela pele a ratoa ke lelapa la hae?
15 Ho phaella moo, mosali oa Molimo ha a rate bolefatše, o loanela ho hlaolela boemo ba moea. Ke sebali se khothetseng sa Bibele ’me o thahasella ho sebelisa metheo ea eona bophelong ba hae. (Pesaleme ea 119:66) Ha se moithati, ha a batle ho ipokella tsebo molemong oa hae a ’notsi, empa, ho e-na le hoo, o hopotse ka ho abelana lintho tse molemo tseo a ithutang tsona, bakeng sa tšebeletso ea hae ea Bokreste le likamanong tsa hae tsa letsatsi le letsatsi le baahisani, beng ka eena, le metsoalle. Monna oa Mokreste o thabela mosali eo a ka qoqang le eena litaba tsa moea, e le motlatsi oa hae, motho ea ananelang lintho tsa moea le ea lakatsang ho abelana le eena thutong ea ho tseba Jehova hamolemo. (Liproverbia 9:9, 10) Ka hona mosali oa Molimo o masene ’me o kutloisiso. Haeba a nyetsoe, o tseba karolo ea hae e le motlatsi oa monna. O tšehetsa monna oa hae ka ho ruta bana lintho tsa moea, haholo ha monna a le sieo hae. (Bapisa 2 Timothea 1:2, 5; 2 Johanne 1, 2.) Mosali eo o ratoa ke lelapa la hae esita le kamor’a hore botle ba bocha bo pone. Monna oa hae a ka mo tšepa bakeng sa temoho e ntle le e lokileng, mehopolo e utloahalang le khothatso e tšepahalang, kahobane ke motho ea lumellanang le eena kamehla le ea kelello. (Liproverbia 25:11) E ne e le kamor’a hore Abigaele a etse ka masene le ka bohlale Davida a itseng ho eena: “Ho bokoe le kelello ea hao.”—1 Samuele 25:32, 33.
16. Ke mantsoe a mofuta ofe le liketso tse khethollang mosali oa Molimo?
16 Tšusumetso e khabane e bontšoang ke mosali ea tšehetsang monna oa hae e ke ke ea ba ka mantsoe a hlabang, a bohloko, kapa a somang. Kamohelo e fumanoa ka ponahalo e ntle, mantsoe a tšoanetseng, liketso tse bonolo tsa lerato, mahlahahlaha, mosa le kutloisiso e tebileng. (Bapisa Liproverbia 25:11; 31:10-28; 1 Ba-Thessalonika 2:7.) Bonolo, tumelo, boinyenyefatso, ke lintho tse hapang lerato le sa feleng bakeng sa mosali oa Molimo.—Pesaleme ea 37:11; Ba-Heberu 11:11, 31, 35; Liproverbia 11:2.
17. Lerato le bohlokoa hakae ho mosali oa Molimo?
17 Tšoaneleho e ’ngoe e qollang mosali oa Molimo ke kutloelo bohloko le kameho e lerato. (Ba-Roma 12:10) Mokhabo oa hae o motle ka ho fetisa ke lerato, le mo thibelang hore a se halefisoe ke lintho tse sa reng letho. Lerato leo le hlalosoa ka tsela e ntle hakaakang ho 1 Ba-Korinthe 13:4-7. Phetolelo ea The New English Bible, e baleha tjena: “Lerato le na le mamello; lerato le mosa ’me ha le honohele. Lerato ha ho mohla le ikhantšang, kapa le ikhohomosang, kapa le se nang mekhoa e metle; ha ho mohla le ithatang, ha le halefe kapele. Lerato ha le hopole liphoso; ha le thabele libe tsa ba bang, empa le thabela ’nete. Ha ho letho leo lerato le ke keng la tobana le Iona; ha ho moeli tumelong ea Iona, tšepong ea Iona, le mamellong ea Iona.”
Re Eng?
18. Kaofela ha rōna re talimane le lipotso life tsa botho, ’me boitlhahlobo bo tla re etsetsa’ng?
18 Joale potso ea bohlokoa ke ena: Na re Bakreste ho sa tsotellehe hore na re lenyalong kapa re masoha? Na ho na le likarolo tseo re ka ntlafatsang ho tsona ha re ntse re phehella ho thabisa Jehova le batho hammoho le rōna? Boitlhahlobo leha e le bofe boo re bo etsang bo tla bontša likarolo tseo re ka ntlafatsang ho tsona. Empa e tla ba thabo e khōlō hakaakang ha re bona phetoho molemo, ’me ho feta moo, ha ba bang ba hlokomela ’me ba babatsa liphetoho tseo re li etsang kahobane re iphaphatha le Lentsoe la Molimo le lithuto tsa Iona!—2 Ba-Korinthe 13:5; 1 Timothea 4:15, 16.
19. Ha re ntse re phehella bophelo ba khotso le ba bomolimo re lokela ho rarolla mathata a rōna joang?
19 Nakong eo u leng lesoha, o lokela ho phehella ho hlaolela litšoaneleho tsena. (1 Ba-Korinthe 7:32) ’Me haeba ka letsatsi le leng motho a rera ho nyala kapa ho nyaloa, litšoaneleho tsena li tla thusa haholo ba li hlaoletseng. Ba keneng lenyalong ba tsoele pele ba hlaolela bokhabane ba Bokreste bo hlahisang thabo e khōlō le nyakallo. (Ba-Filippi 4:8, 9) Ho lokisa mathata ho hloka tšebelisano ea balekane ba babeli ba nyalaneng. Ho ithaopela ho fetola mekhoa e mebe le e sa rateheng ho tla tlatsetsa bothong bo khahlisang ba Bokreste. (Ba-Kolosse 3:8-10) Hopola hore letšoao la monna kapa mosali oa Mokreste ke hore a tsebe hore, “Ke kōpa tšoarelo.” Kaofela re etsa liphoso. Haeba re li lumela, re bontša hore re hlaoletse litšoaneleho tse enneng tsa boinyenyefatso le boikokobetso.—Mikea 6:8, NW; Jakobo 3:2.
20. Ke mantsoe afe a tšoanelehang a moapostola Pauluse ho Ba-Kolosse 3:12-17 ao e leng thuso le a loketseng e mong le e mong?
20 Mantsoe a Pauluse phuthehong ea Kolosse a tšoaneleha hantle hakaakang: “Le apare ke hona, ka ha le le bakhethoa ba Molimo, ba halalelang, ba ratoang, maikutlo a mohau, a molemo, a boikokobetso, a bonolo, a mamello. Le mamellane, le rekolohelane, ’me ekare ha e mong a e-na le komang le e mong joale ka ha Kreste a le hauhetse, etsang joalo le lōna. Ka holim’a tsohle le apare lerato, e leng tlamo ea phetheho. ’Me khotso ea Molimo, eo le e biletsoang ho ba ’mele o le mong, e buse pelong tsa lona; hape le be le teboho. Lentsoe la Kreste le ikahele ho lōna ka moeno, ho le hlahisetsa bohlale bohle; le ’ne le rutane, ’me le khothatsane ka lipesaleme, le lithoko, le lifela tsa Moea, le ntse le binela Morena ka lipelo tsa lōna, ka bokhabane. ’Me seo le se etsang, leha e ka ba eng le eng, ka ho bua, kapa ka ho sebetsa, le etse tsohle ka lebitso la Morena Jesu, le ntse le leboha ka eena Molimo Ntate.”—Ba-Kolosse 3:12-17.
21. Boitšoaro ba rōna le mosebetsi oa rōna li ka khothatsa ba bang joang?
21 Mehlala e metle ka Bibeleng, hammoho le mehlala ea phutheho ea Bokreste lekholong lena la bo20 la lilemo, e lokela ho re khothatsa hore re tsoele pele re apara botho bo bocha. (Ba-Efese 4:22-24) Re tla fetoha tlhohonolofatso ho bohle ba kopanang le rōna. Ho feta moo, ba bang ba bangata ba amohelang molaetsa oa ’Muso ba tla thabisoa le ho khothatsoa, e seng feela ke mantsoe a rōna, empa hape le boitšoaro ba rōna bo mafolo-folo le bo botle ha ba bona lelapa la lefatše lohle la Lipaki tsa Jehova.—Johanne 13:34, 35.
Ho akarelletsa taba e kaholimo, u ka re’ng?
◻ Monna oa Molimo o lokela ho hlaolela litšoaneleho life?
◻ Monna oa Mokreste o tla hlokomela mosali oa hae le lelapa la hae joang?
◻ Mosali oa Mokreste o khetholloa ke litšoaneleho life?
◻ Batho ba masoha ba ka haha bokamoso ba bona ka bohlale joang?
[Setšoantšo se leqepheng la 22]
Monna oa moea o bonahatsa litšoaneleho tse hohelang ba bang ho eena
[Setšoantšo se leqepheng la 24]
Mosali oa Molimo o bontša lerato, ’me o amohela lerato
[Setšoantšo se leqepheng la 26]
Bakreste ba masoha ba ka hlaolela botho bo bocha ka tekanyo e feletseng ’me ba nyakalle bophelong