Jesu Bophelo le Tšebeletso tsa Hae

Ho Bitsoa Barutuoa ba Bane

KAMOR’A teko ea ho bolaea Jesu motseng oa habo oa Nazaretha, o fallela motseng oa Kapernauma pel’a Leoatle la Galilea. Hona ho phethahatsa boprofeta bo bong ba Esaia. Ke bo neng bo boletse esale pele hore batho ba Galilea ba lulang pel’a leoatle ba ne ba tla bona leseli le leholo.

Ha Jesu a tsoelapele ka mosebetsi oa hae o beang leseli oa ho bolela ka ’Muso mona, o fumana barutuoa ba hae ba bane. Bana ba ne ba kile ba tsamaea le eena pejana empa ba boela mosebetsing oa bona oa ho tšoasa litlhapi ha ba khutlela Judea le Jesu. Ho bonahala joale Jesu a ba batla kaha joale ke nako ea hore a be le bathusi ba tsitsitseng le ba kamehla bao a ka ba koetlisetsang ho tsoelapele ka boboleli kamor’a hore a tsamaee.

Ka hona ha Jesu a ntse a tsamaea lebōpong la leoatle ’me a bona Simone Petrose le metsoalle ea hae ba ntse ba hlatsoa matlooa a bona, o ea ho bona. A kena sekepaneng sa Petrose ’me a mo kōpa hore a se suthise hanyenyane lebopong. Ha ba le hojana le lebōpo, Jesu o lula ka sekepaneng ’me o qala ho ruta matšoele a lebōpong.

Kamor’a moo Jesu o re ho Petrose: “Sesisetsa koetseng, ’me le akhele matlooa a lōna, le tšoase.”

“Monghali,” Petrose o-oa araba, “re hlotse bosiu bohle re sebetsa, ’me ha rea ka ra tšoasa letho; leha ho le joalo, ka polelo ea hao ke tla akhela letlooa.”

Ha matlooa a akhetsoe, ho tšoasoa litlhapi tse ngata hoo matlooa a bileng a batla ho phatloha. Kapele-pele banna ba bitsa balekane ba bona ba sekepaneng se haufinyane ho tla ba thusa. Ka potlako likepana tseo ka bobeli li tlala litlhapi hoo li qalang ho teba. Eitse ha a bona hoo, Petrose a itihela faatše maotong a Jesu ’me a re: “Morena, tloha ho ’na, hobane ke monna oa moetsalibe.”

Jesu o araba a re: “Se tšabe; ho tloha joale, u tla ba motšoasi oa batho.”

Jesu o boetse o mema moena oa Petrose ea bitsoang Andrease. “Ntateleng,” a ba phehella, “’me ke tla le etsa ba tšoasang batho.” Balekane ba tšoasang le bona Jakobo le Johanne, bara ba Zebedea, ba mengoa ka ho tšoanang, ’me le bona ba amohela ntle le tikatiko. Ka hona bana ba bane ba tlohela mosebetsi oa bona oa ho tšoasa litlhapi ’me e e-ba balateli ba pele ba Jesu ba tsitsitseng le ba kamehla. Luka 5:1-11; Mattheu 4:13-22; Mareka 1:16-20; Esaia 9:1, 2.

◆ Jesu o bitsa barutuoa ba hae hore ba mo latele ka lebaka lefe, ’me ke bo-mang?

◆ Ke mohlolo ofe o tšosang Petrose?

◆ Jesu o memela barutuoa ba hae ho tšoasa hoa mofuta ofe?