Tšepahala Linthong Tsohle

“Re tšepa hore re na le letsoalo le letle, hobane re lakatsa ho itšoara ka botšepehi linthong tsohle.”—BA-HEBERU 13:18, NW

 1, 2. (a) Ho etsahetse eng ka botšepehi mehleng ea rōna? (b) Ke batho ba mofuta ofe ba angoang ke ho se tšepahale?

BATHO ba baholo ba hopola nako eo, libakeng tse ngata, batho ba neng ba sa notlele mamati a bona. Ba ne ba sa nahane ka ho utsoetsa ba bang kapa ho ba qhekella. Ha ba ne ba kalimme chelete, ba ne ba fumana e le tokelo ho e khutlisa. Ba ne ba tšepahala lentsoeng la bona. E, ho se tšepahale ho ne ho le teng, empa ho ne ho sa ata. Leha ho le joalo, kajeno, bosholu, leshano, le boqhekelli li tloaelehile lefatšeng lohle. ’Me liketso tse ngata tsa ho se tšepahale li etsoa ke batho ba hlomphehang ba lulang le ho sebetsa libakeng tse ntle, ba aparang hantle, ba tsamaeang kereke, ’me ba inka e le baahi ba molemo. Ho se tšepahale ho tumme haholo har’a basebeletsi ba ’muso le khoebong.

² United States ho tlalehuoa litlōlo tse khōlō tsa molao tse kopanyeletsang ho se tšepahale tse fetang limillione tse 11 selemo le selemo. Le ho hlōleha ho lefa makhetho ’ohle a etsang liranta tse likete tsa limillione tse 640 ka selemo. Motseng oa New York batho ba ka bang likete tse makholo ba qoba ho lefa lipalangoang—letsatsi le letsatsi. Moofisiri o itse haeba baqhekelli bana kaofela ba ne ba ka tšoaroa, “tsamaiso ea khotla e ne e tla tšoareha haholo ka likhoeli tse ’nè.” Hlahlobo ea balefi ba lekhetho Japane e bontšitse hore karolo ea 96 lekholong e qhekella makhethong, ho kopanyeletsa le karolo ea 92 lekholong ea babuelli ba molao. Ka khoeli batho ba fetang 16 000 ba ile ba tšoaroa hobane ba kene litereneng ntle ho tefello.

 3. Ke joang ho se tšepahale ho atileng lenyalong?

³ Ho se tšepahale ho ja setsi bophelong ba lenyalo. Lilemong tse fetileng hlahlobo e bontšitse hore karolo ea 30 lekholong ea basali ba Maamerika “e kopanela liphate le banna bao e seng ba bona.” Hlahlobong ea haufinyana ea basali ba nyetsoeng ba fetang likete tse lekholo, ba 50 lekholong ba lumetse hore ba “kopanetse liphate le banna bao e seng ba bona, bonyane hang.” Mohlahlobi o hlalositse hore mohlomong “karolo ea 90 lekholong ea banna ba nyetseng” e ntse e sa tšepahale ka ho tšoanang.

Karolo ea ‘Mehla ea Qetello’

 4. Ke hobane’ng ha ho eketseha ha ho se tšepahale ho sa re makatse?

⁴ Bahlanka ba Jehova ha ba makatsoe ke ho eketseha ha ho se tšepahale. Ba tseba hore ke karolo ea pontšo ea ‘mehla ea qetello’. Lentsoe la Molimo le profetile hore mehleng ea rōna batho e tla ba ‘baithati, ba ratang leruo, ba sa tšepahaleng, ba hlokang boitšoaro, ba hloileng ba molemo, ba nang le sebopeho sa borapeli empa e le ba latotseng matla a bona, le ba tsoelang pele tšenyong.’ (2 Timothea 3:1-5, 13) Sehlopha sa bahlalefi se lumetse hore batho “ba bangata ba se ba behela thōko lintho tseo ka tloaelo li neng li nkoa e le tse nepahetseng le tse mpe le ho hlokomoloha letsoalo.”

 5. Ho etsahetse’ng ha boemo bo tšoanang le ba mehla ea rōna bo e-ba teng ’musong oa meloko e leshome oa boholo-holo oa Iseraele?

⁵ Boemo kajeno lefatšeng bo mpefetse ho feta nakoana pele Jehova a lihela kahlolo ’musong oa meloko e leshome ea Iseraele. Ha e bua ka nako eo, Hosea 4:1-3, NW, e re: “Jehova o na le tseko ea molao le baahi ba naha, hobane ha ho ’nete leha e le mohau kapa tsebo ea Molimo naheng eo. Ba bua mahlapa le thetso le ho bolaea le ho utsoa le ho feba, le liketso tsa ho tšolla mali holim’a liketso tse ling tsa ho tšolla mali. Ke ka lebaka leo naha eo e tlang ho lla, le moahi e mong le e mong a tlang ho timela.” Kahlolo e bohloko ea Jehova ea lihuoa ka 740 B.C.E. ha a ne a lumella Assyria ho hapa Iseraele le motse-moholo oa eona Samaria le ho isa baahi kholehong.

 6. Ke hobane’ng ha Molimo o tla liha kahlolo holim’a tsamaiso ea joale, ’me kahlolo eo e tiile hakae?

⁶ Ka ho tšoanang, Jehova o na le “tseko ea molao” le lefatše lena le sa tšepahaleng. Mangolo a bontša ka ho hlaka hore le se le ahlotsoe habohloko ke Jehova ’me le tla “timela” tšenyehong. “Ha e le maholimo a joale le lefatše la joale, li boloketsoe mollo ke lentsoe lona leo, li boloketsoe letsatsi la kahlolo, le la tšenyeho ea batho ba nyefolang.” (2 Petrose 3:7) Ho phethahala ha kahlolo eo ho tiile hoo Lentsoe la Molimo le buang ka eona joalekaha eka e se e etsahetse: “Bonang, Morena o tlile le bahalaleli ba hae ba likete-kete ho etsa kahlolo holim’a bohle, le ho khalemela banyefoli bohle ka baka la liketso tsohle tsa bonyefoli, tseo ba sitiloeng ka tsona.”—Juda 14, 15.

 7. Ho fihlela ha Jehova a felisa lefatše lena le khopo, ke liphephetso life tse talimaneng le bahlanka ba hae?

⁷ Leha ho le joalo, pele Molimo o felisa lefatše lena le sa tšepahaleng, bahlanka ba ’ona ba lokela ho phela ho lona. Bakreste ba “lefatšeng,” leha ho le joalo, Jesu o itse: ‘ha se ba lefatše.’ (Johanne 17:11-14) Kahoo, letsatsi le letsatsi botšepehi ba bona bo’a lekoa. Sena se kopanyeletsa maemo mosebetsing, sekolong, lelapeng, kapa ho metsoalle. Liphephetsong tsohle tsa matsoalo a bona a koetlisitsoeng ka Bibele, bahlanka ba Jehova ba batla ho ikutloa joale ka ha ho entse moapostola Pauluse ha a ngola: “Re tšepa hore re na le letsoalo le letle, hobane re lakatsa ho itšoara ka botšepehi linthong tsohle.”—Ba-Heberu 13:18, NW.

Ha se Feela ‘Tsela e Bohlale’

 8. Ke hobane’ng ha botšepehi e le tsela e bohlale ea bophelo bakeng sa bahlanka ba Jehova?

⁸ Ho ’nile ha boleloa hore ‘botšepehi ke tsela e bohlale,’ ho bolelang hore botšepehi bo tlisa liphello tse molemo. Empa ho Bakreste, botšepehi ha bo akarelletse feela liphello tse molemo. Ho bona, botšepehi ke tsela feela e molemo ea bophelo. Joaleka bahlanka ba Jehova, ha ba lokela ho etsisa ho se tšepahale ha lefatše lena le senyehileng—leha e le ka lebaka lefe. Ho e-na le hoo, ba lokela ho etsa mesebetsi eohle ea bona tumellanong le melao ea Molimo. ’Me tabeng ena melao ea ’ona ha e e-s’o fetohe.

 9. Ke joang Molao oa Jehova Iseraeleng ea boholo-holo o neng o hatisa botšepehi?

⁹ Ka mohlala, Jehova o itse ho Iseraele ea boholo-holo; “U se ke ua feba. U se ke ua utsoa. U se ke ua etselletsa oa heno ka leshano. U se ke ua lakatsa . . . leha e le ntho e ’ngoe e leng ea oa heno.” (Exoda 20:14-17) Ka ho tšoanang, Levitike 19:11, 12 e’a tlaleha; “Le se ke la utsoa, ’me le se ke la thetsana ka mashano, leha e le ho phoma ba bang. Le se ke la hlapanya ka leshano ka lebitso la ka, hobane moo etlaba ke ho nyefola lebitso la Molimo oa hao. Ke ’na Jehova.”

10. Ke joang Bokreste bo hatisang botšepehi?

¹⁰ Melao eo e ngotsoe hape bakeng sa Bakreste. Kahoo, Lentsoe la Molimo le re: “Ana ha le tsebe hoba bakhopo ha ba ka ke ba rua lefa la ’muso oa Molimo na? Le se ke la lahleha: Ha e le ba litšila, ha e le ba rapelang litšoantšo, ha e le babōki le bafebi, leha e le basodoma, le masholu, le ba lakatsang leruo, le matahoa, le ba sebang ba bang, le ba utsoang, ba joalo ba ke ke ba rua lefa la ’muso oa Molimo”; kapa ea “ratang leshano.” (1 Ba-Korinthe 6:9, 10; Tšenolo 22:15) Bohle ba batlang ho phela tsamaisong e ncha ea Molimo ba lokela ho bonahatsa litšobotsi tsa oona, e ’ngoe ea tsona ke “Molimo . . . ha o thetse.” (Tite 1:2; Ba-Heberu 6:18) Ho se tšepahale ho tsoa ho Satane, “ntate oa ea leshano.”—Johanne 8:44.

11, 12. (a) Ke hobane’ng ha re lokela ho ithuta ho tšepahala e sa le joale? (b) Ke hobane’ng ha re ikutloa re sireletsehile ka har’a mokhatlo o hlophisitsoeng o bonahalang oa Molimo?

¹¹ Erekaha ‘ho loka ho tla ikahela’ ‘lefatšeng le lecha’ le tšepisitsoeng ke Molimo, ‘batho ba lefatše ba tla ithuta ho loka.’ (2 Petrose 3:13; Esaia 26:9) Ke ka lebaka leo hona joale baahi ba eketsehang ba lebeletseng ho phela lefatšeng la Paradeise ba ‘rutoang ka mekhoa ea Jehova,’ ’me mekhoa eo e kopanyeletsa le botšepehi. (Esaia 2:3, 4) Lentsoe la Molimo le a re eletsa: “Le se ke la thetsana ka mashano; le hlobole motho oa khale le liketso tsa hae.” (Ba-Kolosse 3:9) Hape le re: “Ea neng a utsoa, a se ke a hlola a utsoa, a mpe a ineele ho sebetsa lintho tse molemo ka matsoho a hae, a tle a tsebe ho nea ea hlokang.”—Ba-Efese 4:28.

¹² Kahoo bahlanka ba Jehova ba lokela ho tšepahala linthong tsohle. Kaha eo e le tsela feela eo batho ba lokelang ho itšoara ka eona tsamaisong e ncha, batho ba Molimo ba lokela ho tšepahala hona joale. ’Me ho thabisa hakaakang ho kopana le mokhatlo oa batho ba limillione ba hlaolelang botšepehi! Re ikutloa re sireletsehile hakaakang paradeiseng ena ea moea e hlahisitsoeng ke moea o matla le o halalelang oa Molimo, “oo Molimo o o neileng ba o utloang.” (Liketso 5:32) O fapane le moea o litšila o atileng lefatšeng lena ka tlas’a “morena oa lefatše lena,” Satane Diabolose.—2 Ba-Korinthe 4:4; Ba-Galata 5:19-24.

Botšepehi bo Hlokometsoeng ke ba Bang

13, 14. Ke joang ba bang ba hlalositseng botšepehi ba batho ba Jehova?

¹³ Hangata botšepehi ba batho ba Molimo bo hlokomeloa ke ba bang. Ka mohlala, koranta ea Itali II Piccolo e tlalehile lengolo la ’mali e mong: “Koranteng ena, ke lakatsa ho leboha mosali ea boletseng hore ke Paki ea Jehova ’me a bontšitse mohlala oa botšepehi ka ho rōmela chelete e ngata e neng e lahlehile.” United States, The Indianapolis Star e ngotse ka banyalani ba Lipaki ba thotseng (R10 260) ’me ba e rōmela ho mong a eona. Koranta e tlalehile hore banyalani “ba ne ba sa qea-qee ka seo ba lokelang ho se etsa.” Hobane’ng? Ba itse: “Re ne re ke ke ra inkela eona. Re Lipaki tsa Jehova.”

¹⁴ Ha Paki Missouri e thola (R24 360) ’me e e isa sepoleseng, koranta ea qotsa moofisiri a re: “Ha se hangata ho etsahalang hore motho a thole chelete e kaana ’me a e khutlise. Ha re e-so ho be lea mong eo ke mo hopalang ea kileng a etsa sena. Ruri ho ne ho makatsa.” Sehlooho sena se boletse hore Paki ena “ha e-ea ba le maikutlo a ho inkela chelete.” Moofisiri ea ikarabelang o itse Paki ena “e tsosolositse tumelo ea hae ea hore ho ntse ho e-na le batho ba tšepahalang.” Paki ea arabela: “Re ithorisa ka ho tšepahala linthong tsohle.”

15, 16. Ke liphihlelo life tse bontšang hore le linthong tse nyenyane botšepehi bo hlokomeloa ke ba bang?

¹⁵ Ha rea lokela ho tšepahala lintho tse khōlō feela. Ho tšepahala hape ho a hlokela le linthong tse nyenyane. (Luka 16:10) Ka mohlala, ha lelapa le ne le robala hoteleng Florida, mora a nka selopo ka phoso, a nahana hore ke hempe ea hae. Lelapa la se romela hoteleng, ’me mookameli oa hotele a ngola: “Re lakatsa ho le leboha haholo ka botšepehi ba lōna. Leha ho romela selopo e le mokhoa oa lōna oa ho tšepahala, ho rōna o babatseha haholo.” Ka ho tšoanang, ha banyalani ba Lipaki ba nka pene ea hotele ea Georgia ka phoso ’me ba e khutlisa ka poso, mookameli a ngola: “Ke le leboha ka ho senya nako le romela pene eo le neng le e nkeletse ka phoso le liphahlo tsa lōna. Hoa khatholla ho fumana lengolo le tsoang bathong ba tšepahalang le ba tsotellang ba joale ka lōna!”

¹⁶ Moshemane oa Paki ea leng sehlopheng sa bobeli o ne a bapala baseball sekolong. o ne a atametse ho kena ka lesakaneng, empa o ne a tseba hore ha a “kena.” Ba sehlopha sa hae ba leka hore o “kene.” Empa setho sa sehlopha seo ba hlōlisanang le sona sa re ho na le tsela e le ’ngoe feela ea ho fumana ’nete. Sa re: “‘Motseng haeba o ne a kene kapa che. Ke Paki, ’me Lipaki ha li bue leshano.” Boitšoaro bo botle ba moshemane enoa litabeng tsa letsatsi le letsatsi bo ne bo hlokomeloa ke ba bang. Ke ’nete, ka ho phela ka litekanyetso tsa Molimo, le “melomo ea bana le ea ba anyang” e ka rorisa Jehova.—Mattheu 21:16.

17, 18. Ke phello efe e molemo eo melao-metheo ea Jehova ka botšepehi e nang le eona bathong ba pelo li molemo?

¹⁷ Nigeria, mosali oa Paki o ne a haneloa ho ea kopanong ea potoloho ke monna oa hae. Kahoo a mo sala morao ho ea kopanong ’me a leka ho baka khathatso. Kamor’a lenaneo, monna a re: “Joale ke tlilo le leka lōna Lipaki.” Moo a leng mong teng ’me ho se motho ea shebileng, a ntša chelete ea pampiri mokotlaneng oa hae, a e tšoaea, a e sosobanya, ’me a e lahlela fatše. Hamorao, a tlaleha hore o lahlehetsoe ke chelete. Leha ho le joalo, a bolelloa hore a se ke a khathatseha hobane e tla fumaneha. A khutlela moo a neng a lihetse chelete teng, empa e ne e le sieo. “Ha se moo, ke le fumane baqhekelli ting!” a rialo. Empa a bolelloa hore chelete e ke ke ea e-ba moo, e lokela hore e be e isitsoe Lefapheng la tse Lahlehileng le tse Fumanehileng. Chelete e tšoailoeng e ne e le lefapheng leo ’me ea khutlisetsoa ho eena. Phihlelo ena ea mo etsa hore a hlahlobe seo mosali oa hae a se lumelang, ’me kajeno ke e mong oa Lipaki tsa Jehova.

¹⁸ Lengolong le ngoletsoeng ntlo-khōlō ea lefatše ea Lipaki tsa Jehova New York, mosali eo e seng Paki a bolela hore o lakatsa ho pheta se etsahalletseng morali oa hae sekolong. Ka letsatsi le leng morali oa hae o ile a utsoetsoa tomo ea pere e theko e boima. Lilemo tse peli hamorao, morali a fumana lengolo le reng: “Lili ea Ratehang, tomo eo u e utsoelitsoeng lilemong tse ’maloa tse fetileng ke ena. Ke ’na ea neng a e utsoitse, empa kajeno ke e mong oa Lipaki tsa Jehova, ’me letsoalo la ka le lecha ha le ntumelle ho ipolokela eona. Kannete ke a inyatsa. Ke kōpa hore u ntšoarele.” E, ba lakatsang ho sebeletsa Jehova ba lokela ho hlaolela ‘letsoalo le tšepahalang, ha ba itšoara ka botšepehi linthong tsohle.’—Ba-Heberu 13:18, NW.

Ho Boloka Mokhatlo o Hlophisitsoeng o Hloekile

19. (a) Haeba Mokreste a sa tšepahala, o lokela ho etsa eng? (b) Haeba ba seng bakae har’a rona ba phehella liketsong tse sa tšepahaleng, ho tla etsahala eng ka bona, hona hobane’ng?

¹⁹ Haeba ka phoso mohlanka oa Jehova a etsa ketso e sa tšepahalang, o lokela ho e lokisa hang feela ha a e hlokomela kapa a e hlokomelisoa. ’Me haeba bang ba har’a rōna ba felloa ke kananelo bakeng sa melao-metheo ea Bibele ’me ba phehella ho etsa lintho tse sa tšepahaleng, ba ke ke ba lumelloa ho silafatsa batho ba Molimo. Ba tla khaoloa. (1 Ba-Korinthe 5:11-13) Mona re ka itšetleha ka thuso ea leholimo, hobane Jesu o profetile: “Mor’a motho o tla roma mangeloi a hae; a tla khetha ’musong oa hae likhopiso tsohle le ba etsang bokhopo . . . Mohlang oo, ba lokileng ba tla khanya joalo ka letsatsi ’musong oa Ntat’a bona.”—Mattheu 13:41-43.

20, 21. (a) Ke hobane’ng ha ka sebete re ka memela ba bonolo ho rapela Jehova le rōna? (b) Ke taba efe ea botšepehi eo ho tla buuoa ka eona sehloohong se latelang?

²⁰ Kahoo, mokhatlo o hlophisitsoeng oa Jehova o bolokoa o hloekile. Ka lebaka leo, o “khanya” joaloka leseli le beiloeng qhooeng hore le bonoe ke batho ba pelo li tšepahalang. Ke ka lebaka leo ka sebete re reng ho ba bonolo ba lefatše: ‘Tloong, re nyoloheleng thabeng ea Jehova [sebakeng se phahameng kapa boemo bo phahameng ba borapeli ba ’nete] . . . a tle a re rute litsela tsa hae, re tsamaee ka ’mila ea hae.’—Mikea 4:2.

²¹ Kaha bahlanka ba Jehova ba lokela ho tšepahala linthong tsohle, ha e le hantle, sena se lokela ho kopanyeletsa mesebetsi ea bona ea khoebo le Lipaki tse ling. Hape le mona, botšepehi bo ka thulana le liphephetso. Tse ling tsa tsona ke life? Re ka sebetsana le tsona joang? Sehlooho se latelang se tla bua ka taba ena ea botšepehi.

Lipotso tsa Hlahlobo

◻ Ho etsahetse’ng ka botšepehi mehleng ea rōna? Hobane’ng?

◻ Ke joang Lentsoe la Molimo le buang ka ho hlokeha ha botšepehi?

◻ Hobane’ng ha re lokela ho hlaolela botšepehi le pele ho tsamaiso e ncha?

◻ Ke liphihlelo life tse bontšang bohlokoa ba botšepehi?

◻ Ke tiiso efe e bontšang hore botšepehi bo tla bolokoa har’a rōna?

[Setšoantšo se leqepheng la 13]

Hona joale, baahi ba lebeletseng tsamaisong e ncha ea Molimo ba rutoa ka tsela ea Jehova ea botšepehi