Jesu, Mohlala oa ho Lateloa Haufi-ufi
“Hape, ke seo le bilelitsoeng sona; hobane Kreste le eena o utloisitsoe bohloko bakeng sa Iōna, a le siela mehlala, le tle le hate moo a hatileng teng.”—1 PETROSE 2:21.
1, 2. Petrose e ne e le morutuoa oa mofuta ofe nakong ea tšebeletso ea hae le Jesu?
NAKONG ea lilemo tse tharo le halofo, Simone, ea ileng a tsejoa e le Kefase, kapa Petrose, o bile le tokelo ea ho thabela kamano e haufi-ufi le Kreste Jesu. (Johanne 1:35-42) Kamor’a ho e ka bang selemo e le morutuoa, o ile a khethoa e le e mong oa baapostola ba 12. (Mareka 3:13-19) Litlaleho tsa Melaetsa li bontša hore Petrose o ne a le sebete, a phosumela litaba a bile a tseba ho itlhalosa hantle. Ke eena ea neng a itse a ke ke a latola Kreste le ka mohla, ho sa tsotellehe hore na ho etsahala’ng. Empa, tlas’a khatello, a mo latola ka makhetlo a mararo, joalokaha Jesu a ne a profetile.—Mattheu 26:31-35; Mareka 14:66-72.
2 Petrose ke moapostola ea ileng a re ho Jesu, “U ke ke ua ba ua hlatsoa maoto a ka le ka mohla o le mong.” Joale ha Jesu a mo eletsa, a feteletsa litaba ’me a re, “Morena, a e se be maoto a ka feela, e be le ’ona matsoho le hloho.” (Johanne 13:1-17) E ne e ntse e le eena Simone Petrose enoa eo, ha Jesu a tšoaroa, a ileng a ba sebete ka ho tsomula sabole ea hae ’me a hlatha tsebe e tona ea Malkuse, mohlanka oa moprista e moholo. Hona le hona ha etsa hore Jesu a mo khalemele: “Busetsa sabole ea hao selateng; na nke ke ka noa senoelo see ke se neiloeng ke Ntate?”—Johanne 18:10, 11.
3. Re ka ithuta eng mohlaleng oa Petrose?
3 Liketsahalo tsee le tse ling li bontša eng ka Petrose? Hore hangata haholo ha a ka a nahana le ho bea mabaka joaloka Jesu. Ho feta moo, hore hase kamehla a neng a e-na le khopolo ea Kreste. Hangata hona ke ’nete le ho rōna. Re hlōloa ho tsepamisa litaba tumellanong le tsela eo Jesu a neng a nahana ka eona. Boitšoaro ba rōna bo silafalitsoe ke tlhaho ea botho ba rōna bo sa phethahalang.—Luka 9:46-50; Ba-Roma 7:21-23.
4. Hamorao ke liketsahalo life tse ileng tsa ama tsela eo Petrose a nahanang ka eona? (Bona Ba-Galata 2:11-14.)
4 Leha ho le joalo, lintho li ile tsa qala ho fetoha ho Petrose ho tloha ka Pentekonta. A susumelitsoe ke moea o halalelang, a etella pele mosebetsi oa ho bolela har’a Bajode Jerusalema. (Liketso, likhaolo 2-5) Tlas’a khanya ea moea o halalelang, o boetse a lokisa monahano oa hae hore o be tumellanong le khopolo ea Kreste mabapi le Balichaba. (Liketso, khaolo ea 10) Petrose o bontšitse boikokobetso, tšoaneleho ea bohlokoa ho rōna haeba re batla ho ba tumellanong le Kreste.—Mattheu 18:3; 23:12.
Ha a Bonahale empa oa Tsejoa
5, 6. Na ’nete ea hore ha ho mohla re kileng ra bona Kreste e re thibela ho latela mohlala oa hae?
5 Nakong eo Petrose a ngolang lengolo la hae la pele le bululetsoeng, ka bo-62-64 C.E., o ne a bile le nako ea ho nahana ka tšebeletso ea hae le Jesu le ho utloisisa khopolo ea Jesu hamolemonyana litabeng. Qalong lengolong lena moapostola o hlokomela ntlha e bonolo—hore boholo ba baena Asia Minor ha ho mohla bo kileng ba tseba Jesu ka seqo joaloka eena. Empa na hoo e ne e le mokoallo oa ho ba le khopolo ea Kreste le ho etsisa mohlala oa hae? Petrose o re: “Leha le e-so ho ’mone ho fihlela joale, le lumetseng ho eena, ’me le nyakallang ka thabo e sa boleloeng, e tlotlehang; le ntse le ikhapela moputso oa tumelo ea lōna, e leng poloko ea meea ea lōna.”—1 Petrose 1:8, 9.
6 Mantsoe a Petrose a lokela ho sebetsa ka ho lekanang ho batho bohle ba Jehova kajeno. Ha re tsebe Kreste ka seqo, empa haeba le rōna re ‘batla haholo re bile re botsisisa’ ’me re ‘ntse re batlisisa’ joaloka baprofeta, joale re ka fumana khopolo ea Kreste ka tekanyo e itseng.—1 Petrose 1:10, 11.
Jesu, Mohlala o Phethahetseng
7, 8. (a) Petrose o fana ka keletso efe e akaretsang lengolong la hae la pele? (b) Moelelo oa motheo oa hy·po·gram·mosʹ ke ofe? Petrose o e sebelisa joang?
7 Ka kutloisiso ea hae e hlakileng haholoanyane ka monahano oa Jesu le ka tlas’a tataiso ea moea o halalelang, Petrose o ne a ka eletsa balumeli hammoho le eena kamoo ba ka bontšang khopolo ea Kreste maemong a bona a sa tšoaneng. (2 Timothea 3:16) Kahoo, o khothatsa Bakreste bohle “basele le baeti” hore ba ipoloke litakatsong tsa nama. Le hoja ba utloa bohloko ka lebaka la ho loka, o ba khothaletsa ho boloka boitšoaro bo botle bophelong ba bona ba letsatsi le letsatsi.—1 Petrose 2:11, 12.
8 Ka mela e seng mekae hamorao Petrose o hlahisa papiso e bohlale, a re: “Empa ekare ha le mamella bohloko le ntse le etsa hantle, hoo ke ntho e lebohuoang ke Molimo. Hape, ke seo le bilelitsoeng sona; hobane Kreste le eena o utloisitsoe bohloko bakeng sa lōna, a le siela mehlala, le tle le hate moo a hatileng teng.” (1 Petrose 2:20, 21) Lentsoe la Segerike le fetoletsoeng e le ‘mohlala,’ kapa “paterone” liphetolelong tse ling tse ngata, ke hy·po·gram·mosʹ. Ha e le hantle le bolela “ho kopitsa, ho akarelletsa litlhaku tsohle tsa alfabeta, tse fuoang ba qalang ho ea sekolong e le ho ba thusa ho ithuta ho li ngola.” (A Greek-English Lexicon of the New Testament, J. H. Thayer) Kahoo, bashanyana ba sekolo ka linako tse ling ba ne ba fuoa matlapa ao ho oona tichere e ngotseng litlhaku tsa mohlala ka pene. Seithuti se ne se lokela ho latela mohlala le ho leka ho etsa ho tšoanang hantle ka tlaase. Petrose o phahamisa ntlha e matla mona, hobane ke eena feela mongoli oa Mangolo a Segerike ea sebelisang lentsoe hy·po·gram·mosʹ. Kahoo o totobatsa ’nete ea hore Jesu o sietse balateli ba hae mohlala o phethahetseng hore ba o etsise.
9. Lentsoe la Segerike le fetoletsoeng e le “boikutlo ba kelello” le fana ka maikutlo afe? (Bapisa Mattheu 20:28.)
9 Hamorao, Petrose o re ruta ka ho mamella ha Jesu bohloko. “Joale, ereka ha Kreste a utloisitsoe bohloko nameng ka baka la rōna, hlomelang khopolo [enʹnoi·an ka Segerike; “boikutlo ba kelello,” NW] ena le lōna.” (1 Petrose 4:1) Mona o boetse o sebelisa lentsoe le sa tloaelehang, enʹnoi·a, le fumanoang habeli feela ka Mangolong a Segerike. (Bona Ba-Heberu 4:12, The Kingdom Interlinear Translation.) Ho latela J. H. Thayer, enʹnoi·a e bolela “kelello, kutloisiso, thato; mokhoa oa ho nahana le boikutlo.” Kahoo, re tlameha ho fetohela tseleng ea Kreste ea ho nahana le boikutlong ba hae. Empa re ka etsa phetoho eo joang? E lokela ho etsoa ho isa tekanyong efe?
10. Petrose o bolela eng ka mantsoe ‘le itlhomelle’?
10 Petrose o sebelisa ka bonoosing leetsi la Segerike ho·pliʹsa·sthe, le bolelang ho ‘itlhomella joaloka lesole.’ Lesole lefe kapa lefe le itlhomellang ka pelo e sa fellang ha ho bonolo hore le ka phela halelele ntoeng. Mantsoe a Petrose kahoo ha a siee sebaka sa ho etsisa ka mokhoa o foofo mokhoa oa Jesu oa ho nahana. Re tlameha ho ba ka moea ’ohle takatsong ea rōna ea ho ba le “boikutlo ba kelello” kapa “tsela ea ho nahana” ea Kreste. (1 Petrose 4:1, Today’s English Version) Hona ho re hopotsa kamoo Pauluse a ileng a hatisa hore Mokreste o tlameha ho itlhomella ka “lihlomo tsohle tsa Molimo” e le hore a ka khona ho ema a tiile khahlanong le Satane le lefatše la hae.—Ba-Efese 6:11-18.
Boikutlo ba Kelello ba Kreste ka Basali
11. Ke keletso efe eo Petrose a e fang basali ba Bakreste?
11 Bohareng ba lengolo la hae, Petrose o lebisa tlhokomelo ea hae ho basali le banna. Lefatšeng leo la boholo-holo la bohetene, moo basali ba neng ba e-na le litokelo tse fokolang haeba li ne li le teng, ho ne ho le thata ka ho fetisisa ho mosali oa Mokreste ea nang le monna ea sa lumelang hore a tšepahale. O ne a rohakoa, a utloisoa bohloko, ’me mohlomong a bile a ka hlaloa ka lebaka la ho furalla balimo. Boemo bo batla bo sa fapana haholo le ba mehleng ea kajeno. Empa Petrose o boetse o hatisa bohlokoa ba ho ba le boikutlo ba kelello bo kang ba Kreste, ho utloisisa ho utloa bohloko ka lebaka la ho loka. O re: “Ha e le lōna basali, le utloe banna bao e leng ba lōna joalo [ka mokhoa o kang oa Kreste joalokaha o boletsoe litemaneng tsa pejana], hore leha ba bang ba ka ba teng ba sa lumeleng lentsoe, ba mpe ba hapuoe, leha e ke ke ea e-ba ka lentsoe, e be ka metsamao ea basali ba bona, ha ba lemoha metsamao ea lōna e hloekileng, e nang le hlompho.”—1 Petrose 3:1, 2.
12. (a) Moea oa boikokobetso le o bonolo oa mosali o bontša mohlala oa Jesu joang? (1 Ba-Korinthe 11:3) (b) Moea oa hae o bonolo Molimo, o o talima joang? ’Me monna oa hae eena a ka ’na a o talima joang?
12 E, molekane ea sa lumelang ka linako tse ling a ka haptjoa, e seng hakaalo-kaalo ka ho phehella mekhoa e bohlale ea ho bolela, empa ka “hlompho” e tebileng le ka mohlala ‘o tšepahalang le o khabane’ oa mosali ea ikokobetsang. (1 Petrose 3:2, The Jerusalem Bible) ‘Moea oa hae o mosa, o bonolo; oo e leng oa bohlokoa mahlong a Molimo,’ le oona o ka thusa monna oa hae ho lemoha liphello tsa ho ba le khopolo ea Kreste bophelong ba letsatsi le letsatsi. (1 Petrose 3:4) Ke hobane’ng ha moea oo o bonolo o bontša boikutlo ba Jesu? Hobane Jesu ka boeena o itse: “Inkeleng joko ea ka, ’me le ithute ho ’na; hobane ke mosa le pelo e nolo, ’me le tla fumanela meea ea lōna phomolo.”—Mattheu 11:29.
Boikutlo ba Kelello ba Kreste Ka Banna
13. Banna ba lokela ho tšoara basali ba bona joang? (Ba-Efese 5:28, 29, 33)
13 Ka ho tšoanang banna ba tlameha ho bontša boikutlo ba kelello ba Kreste ha ba bontša lerato la ’nete ho basali ba bona. Petrose o boetse oa khothatsa: “Ka mokhoa o joalo, le lōna banna, le phelisane le bona ka hlokomelo, ka ho re, mosali ke pitsa e fetisang ka ho fokola, ’me le ba hlomphe.” (1 Petrose 3:7) Bakeng sa lefatše leo la boholo-holo la bohetene, keletso ena e ne e makatsa—ho hlompha mosali! Empa phutheho ea Bokreste e ne e tlameha ho fapana le lefatše. Lenyalong la Bokreste, ho ne ho tlameha ho ba le seriti le ho hlomphana.—1 Petrose 4:3, 4.
14. Monna a ka bontša ho hlompha le ho nahanela mosali oa hae joang?
14 Kamehla Kreste o ne a nahanela barutuoa ba hae le matšoele a neng a mo latela. (Mareka 6:30-44) Hona ho momahana hantle le keletso ea Petrose ho banna hore ba nahanele sebopeho sa bosali sa basali ba bona. Phetolelo ea Sepanishe e e bea ka tsela ena: “Mabapi le banna: ebang bohlale bophelong ba lōna boo le bo kopanetseng, le bontša ho nahanela mosali, hobane ke oa boemo bo tetemang haholoanyane.” (Nueva Biblia Española) Haeba monna a latela mohlala oa Kreste, o tla nahanela lehlakore la bosali le fokolang la bophelo ba mosali oa hae. Hoo ho akarelletsa matsatsi ao a thata ha a hloka mosa, mamello le ho nahaneloa haholoanyane. Ka sebele monna ea lerato o tla sebelisa boitšoaro ’me e ke ke ea e-ba ea khathatsang maemong a joalo. Lerato la ’nete lea itela.—Bapisa Levitike 15:24; 20:18; 1 Ba-Korinthe 7:3-6.
15. Jesu o fane ka mohlala ofe litabeng tsa bohlooho?
15 Ke ’nete, “monna ke hloho ea mosali” oa hae. Empa mohlala oa hae ke mang tšebelisong ea bohlooho boo? Pauluse o hlakisa sena ka ho phaella, “joale ka ha Kreste le eena e le hloho ea kereke.” (Ba-Efese 5:23) Mantsoe ana a hlalosang ha a fane ka monyetla oa matla a sa lekanyetsoang le bompolinyana kamanong ea Bokreste ea lenyalo. Litšebelisanong tsa hae le barutuoa, ha ho mohla Kreste a kileng a sebelisa matla (bohlooho ba hae) a hae hampe, empa, ho e-na le hoo o ile a sebelisa matla a hae tumellanong le melao-metheo ea Bibele.—Bapisa Mattheu 16:13-17, 20; Luka 9:18-21.
Mohlala oa Kreste bakeng sa Banna
16. (a) Ke hobane’ng ha Petrose a ne a tla ba hlokolosi haholo ka bohlokoa ba boikokobetso? (b) Ke bo-mang haholo-holo ba tlamehang ho bontša tšoaneleho ee?
16 Tšebeletsong ea hae Jesu ha a ka a khaotsa ho totobatsa tšoaneleho ea boikokobetso. Papisong ea hae ea ba memetsoeng moketeng oa lenyalo, o itse: “Hobane e mong le e mong ea ikhōlisang, o tla kokobetsoa; ’me e mong le e mong ea ikokobetsang, o tla hōlisoa.” (Luka 14:11) Petrose o ne a le hlokolosi haholo ka boikutlo ba kelello ba Jesu ntlheng ena. Na o ne a ke ke a hopola mohlala oa Jesu ha a hlatsoa barutuoa maoto? (Johanne 13:4-17) Ka baka leo, lengolong la hae la pele o khothatsa banna ba hōlileng le ba banyenyane hore ba bontše boikutlo ba boikokobetso. Baholo ‘ha ba lokela ho busa phutheho ka thata empa e be mehlala ea mohlape.’ Bahlankana ba lokela ho ikokobeletsa baholo. Empa kaofela ha bona, ba banyenyane le ba baholo, ba lokela ‘ho ikapesa ka boikokobetso; hobane Molimo o hanela ba ikhohomosang, empa o hauhela ba ikokobetsang.’—1 Petrose 5:1-5.
17. Leetsi la Segerike bakeng sa ‘ikapese’ le totobatsa tšebeletso e ikokobelitseng joang?
17 Mona Petrose o boetse o sebelisa lentsoe le ikhethang ho hlakisa ntlha ea hae ka boikokobetso. O re: “Le apare [eg·kom·boʹsa·sthe ka Segerike] bohle boikokobetso.” Leetsi lena le fumanoe motsong o bolelang ho fina kapa ho tlama, ’me moelelo oa lona o amana le “sek’hafo se sesoeu kapa feresekoto ea makhoba, e neng e fasoa momenong oa besete . . . ’me e ne e khetholla makhoba ho batho ba lokolohileng; kahoo, . . . ikapeseng ka boikokobetso joaloka seaparo sa lekhoba . . . ke hore ka ho ikapesa ka boikokobetso ho bontša ho ikokobeletsana.”—A Greek-English Lexicon of the New Testament, J. H. Thayer.
18. (a) Banna ba inehetseng ba lokela ho hopola eng mabapi le sepheo sa bona? (b) Ke ka tsela efe e khethehileng likhaitseli tse ngata e leng mehlala ea boikokobetso?
18 Banna ba inehetseng ba ka sebelisa keletso eo joang kajeno? Ka ho hlokomela hore boemo leha e le bofe ba boikarabelo ka hare ho phutheho ea Bokreste ke kabelo ea tšebeletso e ikokobelitseng. Ka phoso ba bang ba ka ’na ba nahana hore ho ba mohlanka ea sebeletsang, moholo oa phutheho, molebeli oa potoloho, oa setereke, kapa oa Bethele ke ho finyella boemo ba botumo le matla. Mabakeng a joalo ha ba na khopolo ea Kreste tabeng ena. Ha ho na sebaka sa takatso ea boithati haeba re e-na le boikutlo ba kelello ba Kreste. Sepheo sa rōna sa ho sebeletsa Molimo le baena ba rōna se tlameha ho hloeka. Ka mohlala, ba bangata ba likhaitseli tsa rōna tsa Bakreste ba etella pele tšebeletsong ea bopula-maliboho le ea boromuoa. Ba bang ke bahoeletsi ba chesehang ba litaba tse molemo ho sa tsotellehe mahloriso kapa khanyetso ea ka lapeng. ’Me tsena kaofela hase ka sepheo sa ho ba bahlanka ba sebeletsang kapa balebeli!
Lerato—Motheo oa Mohlala oa Kreste
19. Motheo oa mohlala oa Kreste ke ofe? Re tseba joang?
19 Ke eng seo Petrose a se hatisang ho feta tsohle mabapi le khopolo ea Kreste? Oa ngola: “Haholo-holo, le ratane ka phehello, hobane lerato le apesa libe tse ngata.” (1 Petrose 4:8) Jesu o bontšitse lerato leo joang? O rutile: “Molao oa ka ke hoba le ratane, joale ka ha ke le ratile. Ha ho motho ea nang le lerato le fetang la ea tellang metsoalle ea hae bophelo ba hae.” (Johanne 15:12, 13) Kapele kamor’a moo, Jesu a tela bophelo ba hae molemong oa batho. ’Me ka sebele lerato la hae le apesitse libe tse ngata! Kahoo, haeba re hlile re e-na le boikutlo ba kelello bo kang ba Jesu, le rōna, re tla bontša ‘ho ratana ka ho phehella’ ’me re be ba tšoarelang.—Ba-Kolosse 3:12-14; Liproverbia 10:12.
20. Haeba re batla ho latela mohlala oa Kreste haufi-ufi, bohle re tlameha ho etsa eng?
20 Mohlala oa Kreste o akaretsoa ka lentsoe le le leng—lerato. Haeba kannete re latela mohlala oa Jesu haufi-ufi ho sohle seo re se nahanang, re se buang, le ho se etsa, re tla be re sebelise le lerato. Joalokaha Petrose a boletse: “Ha e le ka ho hong, ke re: Bohle le be le khopolo e le ’ngoe, le hauhelane, le ratane le baena, le be le mohau, le be le mosa; le se ke la phetetsa bobe ka bobe, le hlapa ka hlapa; le mpe le hlohonolofatse, ke ho tseba hobane le bilelitsoe hona, hore le tle le rue hlohonolofatso.”—1 Petrose 3:8, 9.
Na u sa Hopola?
◻ Re lokela ho latela mohlala oo Kreste a re sietseng oona joang?
◻ Mosali oa Mokreste o lokela ho latela mohlala oa Kreste Joang?
◻ Banna ba Bakreste ba lokela ho hlompha basali ba bona joang?
◻ Petrose o ile a hatisa boikokobetso joang?
◻ Motheo oa mohlala oa Jesu ke ofe?
[Setšoantšo se leqepheng la 18]
Tichere e ngotse litlhaku tse khōlō meleng e ka holimo-limo; morutoana o loanela ho li kopitsa ka ho phethahetseng (hy·po·gram·mosʹ)