Jesu—Bophelo le Tšebeletso tsa Hae

Na Johanne o ne a Haelloa ke Tumelo?

JOHANNE Mokolobetsi, eo joale e seng e batla e le selemo a le chankaneng, o fumana tlaleho e buang ka tsoho ea mora oa mohlolohali oa Naine. Empa Johanne o batla ho ikutloela ka ho toba ho Jesu mabapi le bohlokoa ba sena, ka hona o romela barutuoa ba hae ba babeli ho ea botsa: “Na ke uena ea boletsoeng, ho thoe, u tla tla, kapa re sa lebeletse e mong na?”

Potso eo e ka ’na ea utloahala e makatsa, haholo kaha Johanne o bone ha moea oa Molimo o theohela ho Jesu ’me o utloile lentsoe la Molimo la kamohelo ha a mo kolobetsa hoo e ka bang lilemong tse peli tse fetileng. Potso ea Johanne e ka ’na ea etsa hore ba bang ba fihlele qeto ea hore tumelo ea hae e ne e se e fokola. Empa ha ho joalo. Jesu a ka be a sa ka a bua ka hlompho hakana ka Johanne, e leng hoo a ho entseng ka lekhetlo lena, haeba Johanne joale a ne a se a belaela. Ke hobane’ng, he, ha Johanne a botsa potso ee?

Mohlomong Johanne o ne a mpa a rata ho hlakisetsoa ke Jesu hore ke eena Messia. Hona e ne e tla ba ho matlafatsang haholo ho Johanne ha a ntse a hlomohile chankaneng. Empa ho hlakile hore potso ea Johanne e khoaetse ho hoholoanyane ho feta moo. Ka ho hlakileng o batla ho tseba haeba ho na le e mong ea tlang, mohlahlami, kamoo re ka bolelang, ea tla phetha lintho tsohle tse profetiloeng hore li tla finyelloa ke Messia.

Ho latela boprofeta ba Bibele boo Johanne a tloaelaneng le bona, Motlotsuoa oa Molimo e lokela ho ba morena, molopolli. Leha ho le joalo Johanne e sa ntsane e le motlamuoa, leha e se e le likhoeli tse ngata Jesu a ne a kolobetsoe. Ka hona ka ho hlakileng Johanne o botsa Jesu: ‘Na ke uena ea tla hloma ’Muso oa Molimo ka matla a bonahalang, kapa na ho na le e mong osele ea tlang, mohlahlami, eo re lokelang ho mo emela hore a phethahatse boprofeta bohle bo amanang le khanya ea Messia?’

Ho e-na le ho bolella barutuoa ba Johanne, ‘Ke ’na ea neng a tla tla!’ Jesu ka hora eona eo o etsa pontšo e tsotehang ea ho phekola batho ba bangata mafu a mefuta eohle le mefokolo. Joale o bolella barutuoa bao: “E-eang, le tsebise Johanne tseo le li boneng, le tseo le li utloileng: lifofu lia bona, lihlotsa lia tsamaea, ba-Iepera ba ntlafala, ba thibaneng litsebe ba utloa, bafu ba tsoha, ’me Evangeli e bolelloa mafutsana. ’Me ho lehlohonolo ea sa tl’o ka a khopjoa ho ’na.”

Ka mantsoe a mang, kaha potso ea Johanne e ka ’na ea fana ka maikutlo a ho lebella hore Jesu a etse ho hoholoanyane ho feta hoo a ho etsang, ho kang ho lokolla eena Johanne, Jesu o bolella Johanne hore a se ke a lebella ho fetang hona hohle.

Ha barutuoa ba Johanne ba tsamaea, Jesu o retelehela ho matšoele ’me o a bolella hore Johanne ke “lenģosa” la Jehova le profetiloeng ho Malakia 3:1 le hore hape ke moprofeta Elia ea profetiloeng ho Malakia 4:5, 6. Kahoo o phahamisa Johanne e le ea lekanang le moprofeta ofe kapa ofe ea phetseng pele ho eena, a hlalosa:

“Ke re ho Iōna: Ka ’nete, har’a ba tsoetsoeng ke basali, ha ho e moholo ho Johanne Mokolobetsi; empa e monyenyane ’musong oa maholimo o moholo ho eena. Ho tloha mehleng ea Johanne Mokolobetsi, ho fihlela joale, ’muso oa maholimo o kenoa ka matla, ’me ba bohale ba o hapa.”

Mona Jesu o bontša hore Johanne a ke ke a ba ’Musong oa leholimo, kaha e monyenyane ho oona o moholo ho Johanne. Johanne o ile a lokisetsa Jesu tsela, empa o shoa pele Kreste a tiisa selekane, kapa tumellano, le barutuoa ba hae bao e tlang ho ba babusi le eena ’Musong oa hae. Ke ka lebaka leo Jesu a reng Johanne a ke ke a ba ’Musong oa leholimo. Ho e-na le hoo Johanne e tla ba mofo oa lefatšeng oa ’Muso oa Molimo. Luka 7:18-30; Mattheu 11:2-15.

◆ Ke hobane’ng ha Johanne a botsa hore na Jesu ke Ea Tlang kapa hore na ho lebelloe e mong osele?

◆ Jesu o re Johanne o phethahalitse boprofeta bofe?

◆ Ke hobane’ng ha Johanne Mokolobetsi a ke ke a ba leholimong le Jesu?