Jesu Bophelo le Tšebeletso tsa Hae

Thuto e Tsoelang Pele ka Letsatsi la Bosupa

LETSATSI la bosupa, e le letsatsi la ho qetela la Mokete oa Metlotloane, le ntse le tsoela pele. Jesu o ntse a ruta ka karolong e ’ngoe ea tempele e bitsoang “polokelong ea letlotlo.” Ho bonahala e le ka sebakeng se bitsoang Lekhotla la Basali moo ho nang le mabokosana a chelete ao batho ba tšelang menehelo ea bona ho oona.

Bosiu bo bong le bo bong ba mokete, ho na le pontšo e khethehileng ea leseli sebakeng sena sa tempele. Liluloana tse ’nè tse khōlō tsa likerese li beoa mona, se seng le se seng se na le likotloloana tse ’nè tse tletseng oli. Khanya ea likotloloana tsena tse 16 tsa oli e tukang e matla ka ho lekaneng ho bonesa le libaka tse potolohileng tse hole haholo bosiu. Seo Jesu a se buang se ka ’na sa hopotsa bamameli ba hae ka pontšo ena. Jesu oa bolela: “Ke ’na leseli la lefatše; ea ntatelang a ke ke a tsamaea lefifing, empa o tla ba le leseli la bophelo.”

Bafarisi baa hanyetsa: “Ua ipaka e le uena; bopaki ba hao hase ba ’nete.”

Ha a ba araba Jesu o re: “Leha ke ipaka, bopaki ba ka ke ba ’nete; hobane ke tseba moo ke tsoang teng le moo ke eang teng; empa lōna, ha le tsebe moo ke tsoang teng le moo ke eang teng.” Oa phaella: “Ke ’na ke ipakang, ’me Ntate ea nthomileng oa mpaka le eena.”

Bafarisi ba batla ho tseba: “Ntat’ao o kae?”

Jesu oa araba: “Ha le ntsebe, ha le tsebe le Ntate; hoja lea ntseba, le ka be le tseba le eena Ntate.” Le hoja Bafarisi ba batla hore Jesu a tšoaroe, ha ho ea mo amang.

Jesu o boela a re: “Kea ea, . . . moo ’na ke eang teng, lōna le sitoa ho tla.”

Ka sena Bajode ba qala ho makala: “Hleka o tla ipolaea, ha a re: Moo ’na ke eang teng, lōna le sitoa ho tla?”

Jesu oa hlalosa: “Lōna, le ba tlase, ’na, ke oa holimo; lōna, le ba lefatše lena, ’na, ha ke oa lefatše lena.” Joale a phaella: “Ekare ha le sa lumele hobane ke ’na enoa, le tla shoa libeng tsa lōna.”

Ha e le hantle, Jesu, o supa nakong ea pele a tsoaloa e le motho le hore ke eena Messia ea tšepisitsoeng, kapa Kreste. Ho sa tsotellehe hoo, ntle ho pelaelo e le ka ho nyatsa ho hoholo, baa botsa: “U mang, uena?”

Khanyetsong ea bona, Jesu oa araba: “Ke hlile ke seo ke le boleletseng sona ho qaleng.” Eaba o tsoela pele o re: “Empa ea nthomileng ke oa ’nete; ’me litaba tseo ke li utloileng ho eena ke li bolella lefatše.” Jesu o tsoela pele: “Etlare hobane le fanyehe Mor’a motho, ke moo le tla tseba hobane ke ’na enoa, le hobane ha ke etse letho ke ’notši, ke mpa ke bolela litaba tseo joale ka ha Ntate a nthutile. Ea nthomileng o na le ’na. Ntate ha a ka a ntlohela ke ’notši, kahobane ke ntse ke etsa ka mehla se mo khahlisang.”

Ha Jesu a ntse a bua lintho tsena, ba bangata ba lumela ho eena. Ho bana o re: “Ekare ha le tiisetsa lentsoeng la ka, le tla ba barutuoa ba ka ka ’nete; le tla tseba ’nete, ’me ’nete e tla le lokolla.”

Bahanyetsi ba hae ba mo kena hanong: “Re leloko la Abrahama, ha re e-so ho be bahlanka ba motho le ka mohla o le mong; u bolela joang, ha u re: le tla lokolloa?”

Le hoja ka makhetlo a mangata Bajode ba kile ba e-ba tlas’a puso ea lichaba lisele, ha ba nke mohatelli leha e le ofe e le morena. Ba hana ho bitsoa bahlanka. Empa Jesu o totobatsa hore e hlile ke bahlanka. Ka tsela efe? Jesu o re: “Ka ’nete-nete ke re ho lōna: E mong le e mong ea etsang sebe, ke mohlanka oa sebe.”

Ho hana ho lumela hore ke bahlanka ba sebe ho bea Bajode boemong bo kotsi. Jesu oa hlalosa: “Mohlanka a ke ke a ’na a lula hae ka mehla; empa mora ke eena ea lulang teng ka mehla.” Kaha mohlanka ha a na litokelo tsa lefa, a ka ’na a ba kotsing ea ho lelekoa neng kapa neng. Ke feela mora ea hlileng a hlahetseng moo kapa ea holiselitsoeng lelapeng leo ea lulang “ka mehla,” ke hore, ha feela a ntse a phela.

Jesu o tsoela pele: “Ka baka leo, ekare ha Mora a le lokolla etlaba le lokolotsoe ka sebele.” Ka hona, ’nete e lokollang batho ke ’nete e amang Mora, Jesu Kreste. Ke feela ka sehlabelo sa bophelo ba hae ba botho bo phethahetseng motho mang le mang a ka lokolloang sebeng se bolaeang. Johanne 8:12-36.

◆ Jesu o rutela hokae ka letsatsi la bosupa? Ke eng se etsahalang bosiu moo, ’me see se amana joang le thuto ea Jesu?

◆ Jesu o re’ng ka tsa qaleho ea hae, ’me see se lokela ho senola eng ka botho ba hae?

◆ Ke ka tsela efe Bajode e leng bahlanka, empa ke ’nete efe e tla ba lokolla?