Tsoela Pele u bo Batla Joaloka Matlotlo a Patiloeng
MABENYANE a bohlale a fumanoang ka Lentsoeng la Molimo, Bibele, ke a bohlokoa hakaakang! Mabenyane ana a senola morero oa Molimo ’me a beha ka pele ho rōna litebello tse thabisang. Aa re tšelisa ’me a re bontša kamoo re ka thabisang Molimo kateng. (Ba-Roma 15:4) Mabenyane ana a boetse a re thusa ho sebetsa ka bohlale litšebelisanong tsa rōna le ba bang. Ka sebele, bohlale bo tsoang ho Molimo bo re thusa ho tsamaea ‘tseleng ea bophelo’ ka khotsofalo le thabo.—Pesaleme ea 16:11; 119:105.
Kaha melemo ea bohlale e mengata, re lokela ho bo nka e le ba bohlokoa bo boholo. Bohlale bo mothofalitsoeng bo re: “Lipolelo tsohle tsa molomo oa ka li lokile; ho tsona ha ho na letho le sokameng, le khelohileng. Tsohle ke tse utloahalang ho motho ea nang le kelello, li lokile ho ea fumaneng tsebo. Amohelang thuto ea ka ho fetisa silevera, le tsebo ho fetisa gauda e hloekileng. Hobane bohlale ke ntho ea bohlokoa ho fetisa liperela, ’me tsohle tse hlokolosi ha li na ho bapisoa le bona.”—Liproverbia 8:8-11.
Ke Hobane’ng ha re Lokela ho Tsoela Pele re Batla?
Hangata, ho batla mabenyane, gauda, kapa silevera tse tsetelehileng ha ho na molemo. Ha hoa lokela ho ba joalo ha re batla bohlale ba Molimo. Empa re ka atleha joang mosebetsing oo oa ho batla? Katleho e itšetlehile ka hore na re lakatsa letlotlo lena haholo hakae le hore na ke ka thata hakae re tlang ho sebeletsa ho le fumana. Haeba re hlokomela molemo oa lona oa ’nete, re tla le nka e le la bohlokoa ho feta lintho tse ling tsohle tsa bohlokoa. Ho sa tsotellehe hoo, “ho rua bohlale ho fetisa ho rua gauda e hloekileng hakakang! Le ho rua masene ho feta ho rua silevera hakakang!”—Liproverbia 16:16.
Liproverbia 2:1-6 ea phehella: “Mora oa ka, etlere ha u amohela litaba tsa ka, ’me u ipolokela melao ea me ka ho uena, u e sekehela tsebe, ’me u lebisa pelo ea hao kutloisisong, ke re, ha u ka bitsa masene, ua hoeletsa kutloisiso, ua e batla joale ka silevera, ua e rafa joale ka matlotlo a patiloeng mobung; ke moo u tla tseba ho tšaba Jehova, u fihlele tsebo ea Molimo; hobane Jehova ke eena ea fanang ka bohlale; tsebo le kutloisiso li tsoa molomong oa hae.”
Kaha matlotlo a tsetelehileng a patehile, hoa hlokahala ho a batlisisa. Ha ho ntse ho chekoa, ba bang ba tela nako ea boikhathollo, ea lijo, le ea boroko. Empa boiteko bo joalo bo talingoa e le ba bohlokoa ha letlotlo le se le fumanoe. Ho hlokahala hore re etse boitelo bo tšoanang ha re batla bohlale ba Molimo. Joalokaha ho batla matlotlo a tsetelehileng ho hloka ho cheka ka matla, ka hona mosebetsi oa ho batla bohlale o hloka ho phehella. Ha hoa lekana ho bala Bibele le likhatiso tse ling tsa Bokreste mohoalotso. Nako, patlisiso, le ho nahanisisa lia hlokahala ho fumana mabenyane a moea. Empa ke ho thabisang hakaakang ha re fumana temoho ka Mangolong!—Nehemia 8:13.
Ho Batla Matlotlo ka Katleho
E, thabo e ba teng ha re cheka ka Lentsoeng la Molimo ’me re fumana mabenyane a bohlale. (Liproverbia 3:13-18) Ho isa bohōleng boo, re bohlale haeba re haha polokelo ea libuka e ntle ea botho kapa ea lelapa. Empa e lokela ho ba le eng? Ka ntle ho buka e molemo e hlalosang mantsoe, Lipaki tsa Jehova li ho fumana ho sebetsa ho ba le liphetolelo tsa Mangolo tse sa tšoaneng, hammoho le likhatiso tsa Bibele tsa Bokreste, ho akarelletsa likopi tsa selemo ka seng tsa Molula-Qhooa le makasine oa habo oona, Tsoha! Ha e le hantle, polokelo ea libuka e tlameha ho sebelisoa ka tsela e nepahetseng haeba e tla re thusa joaloka babatli ba letlotlo.
Mosebetsing oa rōna oa ho batla bohlale, re ka sheba taba eo ho buuoang ka eona le likarolo tsa Mangolo ho Watch Tower Publications Index kapa le tlhahlamano ea lihlooho karolong e ka morao ea libuka tsa Mokhatlo oa Watch Tower kapa meqolong ea limakasine e sekoahelo se thata. Tsena ke likofuto tsa motheo bakeng sa ho batla bohlale ba Molimo. Ha e le hantle, li tšoana le ’mapa o ka re lebisang ‘matlotlong a patiloeng’ a bohlale ba Molimo. (Liproverbia 2:4) Haeba re se na likhatiso tse itseng tse hlokahalang bakeng sa patlisiso, li ka ’na tsa e-ba teng Holong ea ’Muso ea Lipaki tsa Jehova e sebakeng sa habo rōna.
Hajoale, a re etse papiso ea ho batla letlotlo ka katleho. ’Malong oa rōna oa Bibele, re ka ’na ra ipotsa ka mokhoa oo Judase Iskariota a ileng a shoa ka oona ka mor’a hore a eke Jesu Kreste. Mattheu 27:5 e bolela hore Judase o ile “a tloha, a iphenetha.” Empa Liketso 1:18 e re: “A itihela, a phatloha ka lehare, mala a hae a ba a horometseha kaofela.” Ka hona Judase o shoele joang? Karabelo e ka fumanoa ka ho hlahloba lethathamo la litemana tsena ho “Scripture Index” (Tlhahlamano ea Mangolo) ea khatiso Insight on the Scriptures. E-ea re bolella: “Ho bonahala Mattheu a bua ka mokhoa oo teko ea ho ipolaea o entsoeng ka oona, ha Liketso a hlalosa phello. Ha litlaleho tsena tse peli li kopanngoa, ho bonahala eka Judase o ile a leka ho iphanyeha selomong, empa mohala kapa lekala le leholo la sefate le ile la robeha eaba o tsubellela tlaase ’me a phatloha ha a oela holim’a mafika. Setšoantšo se felletseng se nkiloeng ho pota Jerusalema se etsa hore ketsahalo e joalo e utloisisehe.” (Moqolo 2, leqephe 130) Mabapi le Insight on the Scriptures, ka kōpo bona leqephe 10 la makasine ona.
Re nolofalloa ho fumana litemana tsa Bibele ha re sebelisa concordance. Ha e le hantle, ha re bua ka lengolo, re lokela ho ela hloko taba e potolohileng. Ho bapisa sena, a re hlahlobe Pesaleme ea 144:12-14. Litemana tsena li hlalosa batho ba bang ba re: ‘Bara ba rōna ba bola bocheng ba bona joale ka limela, ’me barali ba rōna ba joale ka litšiea tse lintlha tse khabisitsoeng ka mokhoa oa matlo a borena; meliko ea rōna e tletse lijo tsa mefuta eohle; makhomo a rōna a atile ka likete, marole a rōna a tsoala, [‘ha a folotse,’ NW].’ Re ka ’na ra nahana hore mantsoe ana a sebetsa ho batho ba Molimo, empa taba e potolohileng e bontša hore ha ho joalo. Temaneng ea 11, mopesaleme Davida o kōpa ho lokolloa ho batho ba sa bueng ’nete. Ba ne ba ithorisa ka bara ba bona, barali, mehlape, le makhomo. Ho latela temana ea 15, baetsalibe ba joalo ba itse: “Ho lehlohonolo sechaba see ho leng joalo ho sona!” Leha ho le joalo, ka ho fapaneng, Davida o ile a hooa: “Ho lehlohonolo sechaba seo Jehova e leng Molimo oa sona.”
Mabenyane a Moea a Mangata!
Thabo ka sebele e tsoaloa ke mesebetsi ea ho batla bohlale e atlehang. ’Me mabenyane a moea a ka fumanoang ka patlisiso e akarelletsa likarabelo tse khotsofatsang tsa lipotso tsa Bibele. Re fumana likarabelo tse ntle hakaakang ha re tsoela pele re batla! Ka mohlala, Kaine o ile a fumana mosali kae? Molula-Qhooa (oa March 15, 1982) o itse: “Bibele e re bolella hore Adama le Eva ba bile le bana ba bangata, e seng ba babeli feela [Kaine le Abele]. ‘Eitse hobane Adama a tsoale Setha [mora e mong], a phela lilemo tse makholo a robileng meno e le ’meli; a tsoala bara le barali.’ (Gen. 5:4) Ka boitsebiso boo, u ka re Kaine o nkile mosali oa hae hokae? E, o tlameha a be a ile a nyala khaitseli e ’ngoe ea hae. Kajeno hoo ho ka ’na ha e-ba kotsi ho bana ba tsoaloang ke batsoali ba atamelaneng hakaalo ka tsoalo. Empa haufi le qaleho ea pale ea motho, ha batho ba ne ba le haufi haholo le phetheho, e ne e se bothata.”
A re re mohlomong re bala buka ea Bibele ea Liproverbia. Ha re hlokomela seo e se boletseng ho Liproverbia 1:7, re ka ’na ra ipotsa: ‘“Ho tšaba Jehova” ke eng?’ Patlisiso e ka ’na ea re lebisa ho Molula-Qhooa oa May 15, 1987, o ileng oa bolela: “Ke tlhompho e tletseng boikokobetso le e tebileng, le tšabo e hahang ea ho tšaba ho mo koatisa hobane re ananela mosa oa hae o lerato le molemo oa hae. ‘Ho tšaba Jehova’ ho bolela ho lumela hore ke Moahloli ea Phahameng le ea Matla ’Ohle, ea nang le tokelo le matla a ho tlisa kotlo kapa lefu holim’a ba sa mo utloeng. Ho boetse ho bolela ho sebeletsa Molimo ka botšepehi, re mo tšepa ka ho felletseng, ’me re hloea se sebe mahlong a hae.”
Tsoela Pele ho Batla!
Molula-Qhooa o hatisoa ho thusa babatli ba tiileng ba bohlale ho fumana mabenyane a moea a bohlokoahali. Kaofela ha rōna re hloka bohlale le kutloisiso tsa Lentsoe la Molimo. Liproverbia 4:7,8 e re: “Sehloho sa ntho tsohle ke bohlale; rua bona, u bo reke ka tsohle tseo u nang le tsona. U etse bohlale ntho e hlokolosi, ’me bo tla u phahamisa; ha u bo kopa ka matsoho, bo tla u phahamisa.”
Re ka fumana thabo ea ’nete hafeela re fumane temoho ka Mangolong ’me re sebelisa bohlale ka tsela e nepahetseng. E, ’me re ka thabisa Jehova Molimo hafeela re sebelisa bohlale ba Molimo. Ka hona se lumelle letho ho u thibela ho batla bohlale joaloka matlotlo a patiloeng.
[Litšoantšo tse leqepheng la 4, 5]
Ho batla matlotlo a tsetelehileng ho hloka ho cheka ka matla. Na re ke ke ra phehella mosebetsing oa rōna oa ho batla bohlale ba Molimo?