Jesu Bophelo le Tšebeletso Tsa Hae

Ha Kreste a Fihla Matleng a ’Muso

JESU o sa ntsane a e-na le baapostola ba hae Thabeng ea Mehloare. Ha a arabela kōpo ea bona ea pontšo ea ho ba teng ha hae le ho fela ha tsamaiso ea lintho, joale o ba bolella setšoantšo sa ho qetela letotong la tse tharo. Jesu o qala ka ho re: “Mohla Mor’a motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae.”

Batho ba ke ke ba bona mangeloi khanyeng ea ’ona ea leholimo. Kahoo ho fihla ha Mor’a motho, Jesu Kreste, a e-na le mangeloi e tlameha ho ba ho sa bonahaleng mahlong a batho. Ho fihla hoo ho etsahala ka selemo sa 1914. Empa ke ka morero ofe? Jesu oa hlalosa: “Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli. O tla bea linku ka letsohong la hae le letona, a bee lipōli ho le letšehali.”

Ha a hlalosa se tla etsahala ho ba khethetsoeng ka lehlakoreng la ba amoheloang, Jesu o re: “Ke moo Morena a tla bolella ba ka letsohong la hae le letona, a re: Tlong, lōna ba hlohonolofalitsoeng ke Ntate, le amohele ’muso oo le o lokiselitsoeng ha e sa le lefatše le theoa.” Linku ha li na ho busa le Kreste leholimong empa li tla amohela ’Muso ka kutloisiso ea ho ba bafo ba oona ba lefatšeng. ‘Ho theoa ha lefatše’ ho etsahetse ha Adama le Eva ba qala ho ba le bana ba neng ba ka rua molemo tokisetsong ea Molimo ea ho lopolla batho.

Empa ke hobane’ng ha linku li khetheloa ka letsohong le letona la Morena la ba amoheloang? Morena oa arabela: “Hobane ke na be ke lapile, ’me le kile la ’nea ka ja; ke na be ke nyoriloe, ’me le kile la ’nea ka noa; ke na be ke le moeti, ’me la nkenya tlung ha lōna; ke na be ke hlobotse, ’me la nkapesa; ke na be ke baba, ’me le tlile ho mpona; ke na be ke le teronkong, ’me la tla ho ’na.”

Kaha linku li lefatšeng, li batla ho tseba hore na ke joang li etselitseng Morena oa tsona oa leholimo liketso tse ntle hakaalo. Lia botsa: “Morena, ke neneng re kileng ra u bona u lapile, ’me ra u nea ua ja; leha u nyoriloe, ’me ra u nea ua noa? Ke neng re u boneng u le moeti, ’me re kileng ra u kenya tlung ha rōna; leha u hlobotse, ’me ra u apesa? Ke neng re u boneng u baba, mohlomong u le teronkong, ’me ra ea ho uena?”

Morena oa arabela: “Ka ’nete kea le bolella, ke re: Tseo le li entseng e monyenyane ho baena ba ka, le li entse ’na.” Baena ba Kreste ke ba setseng lefatšeng ba sehlopha sa ba 144 000 ba tla busa le eena leholimong. ’Me Jesu o re ho ba etsa hantle ho tšoana le ho etsa eena hantle.

Ka mor’a moo, Morena o bua le lipōli: “Tlohang ho ’na, lōna ba rohakiloeng, le ee mollong o sa feleng, o lokiselitsoeng Diabolose le mangeloi a hae. Hobane ke na be ke lapile, ’me ha lea ka la ’nea ka ja; ke na be ke nyoriloe, ’me ha lea ka la ’nea ka noa; ke na be ke le moeti, ’me ha lea ka la nkenya tlung ha lōna; ke na be ke hlobotse, ’me ha lea ka la nkapesa; ke na be ke le pabong, le teronkong, ’me ha lea ka la tla mpona.”

Leha ho le joalo, lipōli lia ipelaetsa: “Morena, ke neng re kileng ra u bona u lapile, leha u nyoriloe, leha u le moeti, leha u hlobotse, leha u baba, leha u le teronkong, ’me re sa ka ra u thusa?” Lipōli li ahloloa haboima motheong o tšoanang le oo linku li ahloloang hamolemo ho oona. Jesu oa arabela: “Ereka ha le sa ka la etsa joalo ho e mong oa ba banyenyane bana [ba baena ba ka], ha lea ka la nketsa joalo le ’na.”

Kahoo ho ba teng ha Kreste matleng a ’Muso, pejana feela ho bofelo ba tsamaiso ena ea lintho e khopo mahlomoleng a maholo, e tla ba nako ea kahlolo. Lipōli li “tla ea bohlokong [“timetsong,” NW] bo sa feleng, empa ba lokileng [linku] ba tla ea bophelong bo sa feleng.” Mattheu 25:31-46; Tšenolo 14:1-3.

◆ Ke hobane’ng ha ho ba teng ha Kreste e tlameha ho ba ho sa bonahaleng, ’me ke mosebetsi ofe oo a o etsang nakong eo?

◆ Linku li amohela ’Muso ka kutloisiso efe?

◆ ‘Ho theoa ha lefatše’ ho etsahetse neng, ’me ke hobane’ng ha e bile ka nako eo?

◆ Batho ba ahloloa e le linku kapa e le lipōli motheong ofe?