Na U Hahamalla Litokelo?

“Haeba monna ofe kapa ofe a hahamalla tšebeletso ea molebeli, o lakatsa mosebetsi o motle.”—1 TIMOTHEA 3:1, “NW.”

 1. Seo e leng sa bohlokoa ka ho fetisisa har’a Lipaki tsa Jehova ke ho phethahatsa sepheo sefe?

LIPAKI TSA JEHOVA li na le lipheo tse nepahetseng tse laoloang le tse phethoang ka tsela ea bomolimo. Sena ha se makatse, kaha Molimo oa tsona o na le lipheo tse ntle haholo ’me ka mehla o phethahatsa merero ea oona. (Esaia 55:8-11) Bahlanka ba Jehova ha baa lokela ho tšoana le batho ba hlokang sepheo se setle bao ka ho hloka kutlo ba iphelelang feela ba sa etsetse motho leha e le ofe e mong se molemo haese bona feela. Seo e leng sa bohlokoa ka ho fetisisa ho Lipaki tsa Molimo ke ho phethahatsa sepheo se setle haholo sa ho phatlalatsa molaetsa oa ’Muso le ho arolelana le ba bang tsebo e fanang ka bophelo ea Lentsoe la Molimo.—Pesaleme ea 119:105; Mareka 13:10; Johanne 17:3.

 2. Ke sepheo sefe se loketseng banna ba Bakreste seo Pauluse a se boletseng ho 1 Timothea 3:1?

² Ka hare ho mokhatlo o hlophisitsoeng oa Jehova, ho na le lipheo tse ling hape tse ntle haholo. Moapostola Pauluse o boletse se seng sa tsona ha a ngola: “Polelo eo ea tšepahala. Haeba monna ofe kapa ofe a hahamalla tšebeletso ea molebeli, o lakatsa mosebetsi o motle.” Monna ea joalo o batla ho finyella ho hong ho tla tsoela ba bang molemo. O lakatsa “mosebetsi o motle,” eseng bophelo ba boiketlo le bophahamo. Phetolelo e ’ngoe e re: “Efela ke ’nete ho bolela hore monna ea behang pelo ea hae boeta-peleng o na le pakane e babatsehang.”—1 Timothea 3:1, Phillips.

Likotsi Tse ka Hlahelang Baholo

3, 4. Ke hobane’ng ha monna ea hahamallang ho ba molebeli a lokela ho lebela pelo ea hae?

³ Ke ka tsela efe monna ea behang pelo ea hae tabeng ea ho ba molebeli oa Mokreste a nang le “pakane e babatsehang”? Pakane (ambition, ka Senyesemane) ke takatso e matla ea ho finyella sepheo se itseng. Ke ’nete hore ho na le lipakane tse ntle le tse mpe. Empa haeba ka boikokobetso monna a hahamalla tšebeletso ea molebeli kahobane a batla ho sebeletsa ba bang, tšebeletso ea hae e etsoa ka merero e nepahetseng ’me e ka tlisa mahlohonolo a moea. Empa ho hlokahala hore a lebele pelo ea hae.—Liproverbia 4:23.

⁴ Batho ba bang ba nang le lipakane tse khōlō ba batla bophahamo. Ba bang ba batla ho busa batho ba bang. Meharo ea ho fumana bophahamo kapa matla e tšoana le motso o bolileng o ka etsang hore sefate se shebahalang se phela hantle se oe soahla! Mokreste le eena a ka inehela pakaneng e joalo e susumetsoang ke merero e mebe. (Liproverbia 16:18) Moapostola Johanne o itse: “Ke ngoletse kereke; empa Diotrefe, ea ratang ho ba oa pele oa bona [“ea batlang ho ba hlooho ea ntho e ’ngoe le e ’ngoe,” Phillips], ha a re amohele. Ka baka leo, mohla ke tlang ha heno, ke tla le hopotsa liketso tsa hae, tseo a li etsang, ha a ntse a re seba ka mantsoe a lonya, ’me ha a kholoe ke hoo, empa, ere a sa amohele baena, o thibela le ba ratang ho ba amohela, a be a ba leleke kerekeng.” (3 Johanne 9, 10) Pakane ea Diotrefe e ne e se ea Bokreste. Boikakaso le pakane ea ho phehella ho ba le matla holim’a ba bang ha li na sebaka har’a balateli ba ’nete ba Jesu.—Liproverbia 21:4.

 5. Balebeli ba lokela ho etsa mesebetsi ea bona ka boikutlo bofe?

⁵ Molebeli oa Mokreste ea etsang mesebetsi ea hae ka morero o nepahetseng a ke ke a phehella lipakane tsa boikhabi. O tla talima mosebetsi ona o motle oa bolebeli ba Bokreste e le tokelo e fanoeng ke Molimo ’me ha a na ho alosa mohlape oa Molimo ‘ka ho qōbelloa; empa ka lerato, e seng ka ho ipatlela maruo ka mano. E seng ka ho busa ba beiloeng tlhokomelong ea hae ka thata, empa ka ho ba mohlala ho mohlape.’ (1 Petrose 5:2, 3, BPN) E, balebeli ba lokela ho itebela khahlanong le ho ikhohomosa le ho batla ho sebelisa matla hampe.

 6. Ke hobane’ng ha moholo a tlameha hore a se iketse morena oa batho ba Molimo?

⁶ Moholo ha aa lokela ho iketsa morena holim’a Bakreste ba bang, hobane ke mosebetsi-’moho le bona, hase ‘morena oa tumelo ea bona.’ (2 Ba-Korinthe 1:24, NW) Ha baapostola ba bang ba ne ba batla bophahamo, Jesu o ile a re: “Lea tseba hore babusi ba lichaba ba li busa ka thata, ’me ba baholo ba li tšoara ka thata. Empa ha ho na ho ba joalo ho lōna; ea batlang ho ba e moholo har’a lōna, e tla ba mosebeletsi oa lōna, ’me ea batlang ho ba oa pele har’a lōna, e tla ba mohlanka oa lōna. Ka mokhoa o joalo Mor’a Motho ha a ea tlela ho sebeletsoa, empa ho tla sebeletsa le ho neelana ka bophelo ba hae hore e be topollo ea ba bangata.” (Mattheu 20:20-28, BPN) Moholo hase Molisa e Moholo empa ke molisa ea tlaasana feela. Haeba a iketsa morena oa mohlape, o bontša moea oa boikhohomoso. Kotsi e ne e tla hlaha haholo-holo haeba a ne a ka eka ba bang hore ba mo thuse ho ntšetsa pele lipakane tsa hae tsa boikhohomoso. Maele a re: “Motho ka mong ea ikhohomosang ka pelong, ke manyala ho Jehova, ruri o tla otloa, a ke ke a phonyoha.”—Liproverbia 16:5.

7, 8. (a) Ke hobane’ng ha ho hlokahala hore baholo ba Bakreste e be ba ikokobelitseng? (b) Fana ka mohlala oa moholo ea ikokobelitseng.

⁷ Ka hona baholo ba Bakreste ba lokela ho ‘ikokobetsa ka tlas’a letsoho le matla la Molimo.’ Boikhohomoso bo sitisa monna hore a sebelisoe linthong tsa moea, hobane ke ba ikokobetsang feela bao lipelo le likelello tsa bona li leng boemong bo nepahetseng ba ho etsa thato ea Molimo. “Molimo o hanela ba ikhohomosang, empa o hauhela ba ikokobetsang.” (1 Petrose 5:5, 6) E, Jehova o hlohonolofatsa ba likelello li ikokobelitseng. Banna ba tšoanelehang ba khethoa har’a batho ba joalo hore ba sebeletse e le baholo ba Bakreste.

⁸ Histori ea kajeno ea Lipaki tsa Jehova e tletse litlaleho tsa tšebeletso ea boikokobetso e etsoang ke batho ba nang le bomolimo. Ka mohlala, nahana ka W. J. Thorn ea bonolo, eo e kileng ea e-ba pilgrim, kapa molebeli ea tsamaeang, a ba a sebetsa Bethele ka nako e telele. Mokreste e mong o boletse tjena ka eena: “Le ka mohla nke ke ka lebala mantsoe ao Moena Thorn a neng a a bue a nthusitseng ho fihlela kajeno. O ne a re, kea qotsa, ‘Neng le neng ha ke qala ho inahana ho tlōlisa, ke leba sekhutloaneng, e be ke re: “Uena thōlenyana tooe ea lerōle. U na le eng eo u ka ikhohomosang ka eona?”’” Eo ke tšoaneleho e babatsehang hakaakang eo baholo le ba bang ba lokelang ho e bontša! Hopola, “moputso oa boikokobetso le oa ho tšaba Jehova ke leruo, le khanya, le bophelo.”—Liproverbia 22:4.

Takatso ea ho Sebeletsa e Fanoeng ke Molimo

 9. Ke hobane’ng ha ho ka boleloa hore takatso ea ho sebeletsa joaloka moholo e fanoe ke Molimo?

⁹ Na takatso ea ho sebeletsa joaloka molebeli e fanoe ke Molimo? E, hobane moea oa Jehova o fana ka tšusumetso, sebete, le matla a ho nehelana ka tšebeletso e halalelang ho eena. Ka mohlala, ho ile ha etsahala’ng ha balateli ba Jesu ba neng ba ntse ba hlorisoa ba rapella sebete sa ho bolela? “Sebaka seo ba neng ba kopanetse ho sona sa reketla, ’me bohle ba tlala Moea o Halalelang, ba bolela lentsoe la Molimo ka sebete.” (Liketso 4:27-31, BPN) Kaha moea o halalelang o ile oa hlahisa liphello tse joalo, o ka boela oa susumelletsa monna ho hahamalla litokelo.

10. (a) Lebaka le leng leo ka lona e ka ’nang eaba monna oa Mokreste ha a hahamalle litokelo ke lefe? (b) Haeba Molimo o re fa tokelo e itseng ea tšebeletso, re ka kholiseha ka eng?

¹⁰ Ke eng e ka ’nang ea etsa hore Mokreste ea hōlileng moeeng a se ke a hahamalla litokelo? E ka ’na ea e-ba monna oa moea empa a ikutloa a sa tšoanelehe. (1 Ba-Korinthe 2:14, 15) Ho hlakile hore re lokela ho italima ka tsela ea boikokobetso, re elelloe mefokolo ea rōna. (Mikea 6:8) Ho e-na le hore ka boikakaso re nahane hore ke rōna ba tšoanelehang ka ho fetisisa bakeng sa boikarabelo bo itseng, ho hotle ho hopola hore “bohlale bo ho ba ikokobetsang.” (Liproverbia 11:2) Empa hape re lokela ho hlokomela hore haeba Molimo o re fa tokelo e itseng ea tšebeletso, o tla boela o re fe matla a hlokahalang ho e phetha. Ho joalokaha Pauluse a itse: “Bakeng sa lintho tsohle ke na le matla ka ho matlafatsoa ke ea mphang matla.”—Ba-Filippi 4:13, NW.

11. Mokreste ea sa hahamalleng litokelo ka lebaka la hore o ikutloa a haelloa ke bohlale bo lekaneng ba ho fana ka keletso a ka etsa’ng?

¹¹ E ka ’na eaba Mokreste ha a hahamalle litokelo ka lebaka la hore o ikutloa a haelloa ke bohlale bo lekaneng ba ho fana ka keletso. Mohlomong a ka fumana bohlale ka ho ba seithuti se mafolo-folo haholoanyane sa Lentsoe la Molimo, ’me ka sebele o lokela ho rapella bohlale. Jakobo o ngotse: “Ha e mong ho lōna a hloka bohlale, a bo kōpe ho Molimo, o sitsang bohle ka phano e kholo, o se na ho khanana, ’me o tla bo neoa. Feela, a kōpe ka tumelo, a se ke a lika-lika; hobane motho ea lika-likang o joale ka leqhubu la leoatle le tsukutloang, le akheloang hohle ke moea. Ea joalo a se ke a tšepa hobane a ka neoa letho ke Morena. Ke motho ea pelo tse peli, ea lika-likang metsamaong ea hae eohle.” (Jakobo 1:5-8) Ha o arabela thapelo, Molimo o ile oa fa Salomone “pelo e bohlale le e utloisisang” e ileng ea etsa hore a khone ho lemoha se setle le se sebe ha a ahlola. (1 Marena 3:9-14, NW) Boemo ba Salomone e ne e le bo khethehileng, empa ka ho ithuta ka mafolo-folo le ka thuso ea Molimo, banna ba tšepetsoeng boikarabelo ka phuthehong ba ka eletsa ba bang ka tsela e lokileng. “Jehova ke eena ea fanang ka bohlale; tsebo le kutloisiso li tsoa molomong oa hae.”—Liproverbia 2:6.

12. Haeba ka lebaka la matšoenyeho monna a sa hahamalle litokelo, ke eng e ka mo thusang?

¹² Ho tšoenyeha ho itseng ho ka ’na ha thibela monna ho hahamalla litokelo. A ka ’na a nahana hore a ke ke a khona ho jara boikarabelo bo boima ba ho ba moholo. Esita le Pauluse o ile a lumela: “Ho na le ho nkhatellang letsatsi le letsatsi, ho tšoenyeha ka liphutheho tsohle.” (2 Ba-Korinthe 11:28, NW) Empa moapostola eo o ne a tseba seo a lokelang ho se etsa ha a le matšoenyehong, hobane o ngotse: “Le se ke la belaella [“la tšoenyeha ka,” NW] letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho. ’Me khotso ea Molimo, e fetisang kutloisiso eohle, e tla boloka lipelo tsa lōna le mehopolo ea lōna ho Jesu Kreste.” (Ba-Filippi 4:6, 7) E, thapelo le ho tšepa Molimo li ka thusa ho kokobetsa matšoenyeho.

13. Monna a ka ’na a rapela joang haeba a le leqe ho hahamalla litokelo?

¹³ Haeba ho tšoenyeha ho itseng ho ntse ho qophella, monna ea leqe ho hahamalla litokelo a ka ’na a rapela joalokaha Davida a ile a rapela: “Molimo, u ntlhohlotse, u lekole pelo ea ka; u nteke, u tsebe mehopolo ea ka, u talime hoba a tsela ea bokhopo e teng ho ’na na, ’me u ntsamaise tseleng e isang bophelong bo sa feleng.” (Pesaleme ea 139:23, 24) Ho sa tsotellehe sebōpeho sa mehopolo ea rōna e “toutisang” kapa e “tšoenyang,” Molimo o ka re thusa ho loana le eona ka katleho e le hore re etse tsoelo-pele moeeng. (Bona The New International Version.) Sena se hlalositsoe hantle pesalemeng e ’ngoe: “Moo ke reng: ‘Leoto la ka lea thella,’ mohau oa hao oa ntšehetsa, Morena. Ha pelo ea ka e touta haholo, matšeliso a hao a hlabolla moea oa ka.”—Pesaleme ea 94:18, 19, BPN.

Ka Thabo Sebeletsa Kamoo Jehova a Ratang ka Teng

14. Ke hobane’ng ha monna ea sa hahamalleng litokelo a lokela ho rapella moea o halalelang oa Molimo?

¹⁴ Haeba ka lebaka la matšoenyeho, maikutlo a ho se tšoanelehe, kapa ho haelloa ke tšusumetso monna oa Mokreste a hlōleha ho hahamalla litokelo, ka sebele e ne e tla ba ho loketseng ho rapella moea oa Molimo. Jesu o itse: “Ha esita lōna ba lonya, le tseba ho nea bana ba lōna lintho tse molemo, Ntat’a lōna ea leholimong o tla fetisisa hakakang ka ho nea Moea o Halalelang ho ba o kōpang ho eena!” (Luka 11:13) Kaha khotso le boitšoaro ke tse ling tsa litholoana tsa moea oo, moea ona o ka re thusa ho loana ka katleho le matšoenyeho kapa maikutlo a ho se tšoanelehe.—Ba-Galata 5:22, 23.

15. Ke lithapelo tsa mofuta ofe tse ka thusang ba haelloang ke tšusumetso ho itlhahisa bakeng sa litokelo tsa tšebeletso?

¹⁵ Ho thoe’ng ka ho haelloa ke tšusumetso? Joaloka Bakreste ba kolobelitsoeng, ho hlokahala hore re rapelle hore Molimo o etse hore re etse se o khahlisang. Davida o ile a kōpa: “Jehova, mpontše litsela tsa hao . . . U ntsamaise ’neteng ea hao, u nthute.” (Pesaleme ea 25:4, 5) Lithapelo tse tšoanang le ena li tla re thusa ho qoba tsela e fosahetseng, ’me re ka rapela ka tsela e tšoanang haeba re haelloa ke tšusumetso ea ho hahamalla litokelo. Re ka kōpa Jehova hore a etse hore re batle ho amohela litokelo tsa tšebeletso. Ha e le hantle, haeba re rapella moea oa Molimo ’me re ikokobeletsa tsamaiso ea oona, ntle le pelaelo re tla itlhahisa haeba re fuoa litokelo tsa tšebeletso. Ho feta moo, bahlanka ba Molimo ba ke ke ba batla ho ba khahlanong le moea oa oona ka tsela leha e le efe.—Ba-Efese 4:30.

16. Ke boikutlo bofe bo fanang ka tšusumetso e matla ea ho hahamalla litokelo tsa boikarabelo ka phuthehong?

¹⁶ Kaha re na le “khopolo oa Kreste,” re fumana thabo ho etseng thato ea Molimo. (1 Ba-Korinthe 2:16) Jesu o ne a e-na le boikutlo bo tšoanang le ba mopesaleme, ea ileng a re: “Ho etsa ho ratoang ke uena, Molimo oa ka, ke sona seo ke se ratang, molao oa hao o ngoliloe pelong ea ka.” (Pesaleme ea 40:8) Kreste o ile a re: “Bona, Molimo, ke tlile ho etsa thato ea hao,” ’me thato eo e ile ea ba ea isa bohōleng ba ho shoela thupeng ea tlhokofatso. (Ba-Heberu 10:9, 10) Takatso ea ho etsa ntho e ’ngoe le e ’ngoe e ka etsoang tšebeletsong ea Jehova e fana ka tšusumetso e matla ea ho hahamalla litokelo tsa boikarabelo ka phuthehong.

Talima Nakong e Tlang

17. (a) Ke hobane’ng ha banna bao hona joale ba sa sebeletseng ka botlalo joalokaha ba ne ba etsa pele ba sa lokela ho nyahama? (b) Tokelo e khōlō ho feta tsohle ke efe?

¹⁷ Ka lebaka la mathata a bophelo kapa mabaka a mang, ba bang bao ka nako e ’ngoe ba neng ba etsa mesebetsi ea bohlokoa ka phuthehong ha ba sa na litokelo tse joalo hona joale. Bana ha baa lokela ho nyahama. Rea tseba hore banna ba bangata ba tšepahalang ba seng ba sa khone ho sebeletsa ka botlalo joalokaha ba ne ba etsa pele ba ntse ba eme ba tiile e le baboloki ba botšepehi. (Pesaleme ea 25:21, NW) Ka sebele, baholo ba ikokobelitseng ba sebelelitseng ka nako e telele ba ka tsoela pele ho hlahisa phihlelo ea bona ka ho lula sehlopheng sa baholo. Le hoja ba se ba fokolisitsoe ke ho hōla kapa mefokolo e itseng, ha ho hlokahale hore ba tlohe boemong ba ho ba baholo. Khabareng, Paki e ’ngoe le e ’ngoe ea Jehova a e ke e thabele tokelo e ntle ho feta tsohle, ea ho ‘bua ka khanya ea borena ba Molimo’ joaloka ba phahamisang lebitso la oona le halalelang.—Pesaleme ea 145:10-13.

18. (a) Haeba moholo kapa mohlanka ea sebeletsang a tlositsoe lethathamong, ho ka ’na ha hlokahala eng? (b) Ke boikutlo bofe bo botle boo moholo e mong ea tlositsoeng lethathamong a ileng a bo bontša?

¹⁸ Haeba u kile ua ba moholo kapa mohlanka ea sebeletsang empa hona joale ha u sa sebeletsa boemong boo, kholiseha hore Molimo o ntse o u tsotella, ’me mohlomong o tla u fa litokelo tse ling tse sa lebelloang nakong e tlang. (1 Petrose 5:6, 7) Haeba ho hlokahala hore u etse liphetoho tse itseng, utloisisa ho amohela phoso ’me u sebeletse ho eona ka thuso ea Molimo. Ba bang ba tlositsoeng lethathamong la baholo ba bile le boikutlo boo e seng ba Bokreste, ’me ba ’maloa ha ba sa le mafolo-folo kapa ba se ba oele ’neteng. Empa ke ho bohlale hakaakang ho tšoana le ba bontšitseng moea o motle! Ka mohlala, ha moholo e mong ea neng a sebelelitse ka lilemo-lemo Amerika Bohareng a tlosoa lethathamong, o ile a re: “Ho nkutloisa bohloko haholo hore e be ke lahlehetsoe ke tokelo eo ke ’nileng ka e nka e le letlotlo ka nako e telele hakana. Empa ke tla sebetsa ka thata ka tsela efe kapa efe eo baena ba batlang ho ntšebelisa ka eona ’me ke tla sebeletsa ho fumana litokelo tsa ka tsa tšebeletso hape.” Ka mor’a nako, moena enoa o ile a fuoa tokelo ea ho sebeletsa e le moholo hape.

19. Moena ea tlositsoeng lethathamong bakeng sa ho sebeletsa joaloka moholo kapa mohlanka ea sebeletsang o fuoa keletso efe e loketseng?

¹⁹ Haeba u ile ua tlosoa lethathamong ’me ha u sa sebeletsa joaloka moholo kapa mohlanka ea sebeletsang, e-ba le moea oa boikokobetso. Qoba boikutlo ba ho hlonama bo tla etsa hore u se tšoanelehele litokelo tse ling nakong e tlang. Ho ba le moea oa bomolimo ho hapa tlhompho. Ho e-na le ho nyahama, nahanisisa kamoo Jehova a hlohonolofatsang tšebeletso ea hao kapa lelapa la hao ka teng. Matlafatsa lelapa la hao moeeng, etela ba kulang, ’me u khothatse ba fokolang. Ka holim’a tsohle, thabela tokelo ea hao ea ho rorisa Molimo le ho phatlalatsa litaba tse molemo u le e mong oa Lipaki tsa Jehova.—Pesaleme ea 145:1, 2; Esaia 43:10-12.

20. Sehlopha sa baholo se ka khona ho thusa motho eo e neng e le moholo kapa mohlanka ea sebeletsang joang?

²⁰ Sehlopha sa baholo se lokela ho hlokomela hore ho tlosoa ha motho lethathamong ho ka ’na ha bakela motho eo e neng e le moholo kapa mohlanka ea sebeletsang khatello, esita le haeba a tlohela tokelo eo ka boithaopo. Haeba a sa khaoloa, empa baholo ba bona hore moena eo o tepelletse maikutlo, ba tšoanela ho fana ka thuso ea moea e lerato. (1 Ba-Thessalonika 5:14) Ba lokela ho mo thusa ho hlokomela hore oa hlokahala ka phuthehong. Esita le haeba keletso e matla e ile ea hlokahala, e ka ’na eaba ha ho na ho feta nako e telele hakaalo pele monna ea ikokobelitseng le ea nang le kananelo a ka boela a amohela litokelo tse eketsehileng tsa tšebeletso ka phuthehong.

21. Ke bo-mang ba ileng ba emela litokelo tsa tšebeletso nako e telele, ’me ho etsoa tlhahiso efe ho ba ntseng ba li emetse kajeno?

²¹ Haeba u hahamalla litokelo, u ka ’na ua lokela ho ema nakoana e itseng pele u amohela litokelo tse eketsehileng tsa tšebeletso. U se felloe ke mamello. Moshe o ile a ema lilemo tse 40 pele Molimo o mo sebelisa ha o lokolla Baiseraele bokhobeng Egepeta. (Liketso 7:23-36) Pele Joshua a khetheloa ho ba mohlahlami oa Moshe, o ile a sebeletsa e le mohlanka oa hae ka nako e telele. (Exoda 33:11; Numere 27:15-23) Davida o ile a ema nako e itseng pele a behoa teroneng ea Iseraele. (2 Samuele 2:7; 5:3) Ho bonahala eka Petrose le Johanne Mareka ba ile ba feta linakong tsa ho hlokoloa. (Mattheu 26:69-75; Johanne 21:15-19; Liketso 13:13; 15:36-41; Ba-Kolosse 4:10) Kahoo haeba hona joale ha u na mesebetsi e itseng ka phuthehong, e ka ’na eaba Jehova o u lumella hore u fetoloe ke ho fumana phihlelo e eketsehileng. Ho sa tsotellehe hore na boemo ke bofe, batla thuso ea Molimo ha u ntse u hahamalla litokelo, ’me o ka ’na oa u hlohonolofatsa ka litokelo tse eketsehileng tsa tšebeletso. Khabareng, sebetsa ka mafolo-folo hore u tšoanelehele boikarabelo ka phuthehong ’me u bontše moea oa Davida, ea ileng a phatlalatsa: “Molomo oa ka a o ke o bolele lithoko tsa Jehova, libopuoa tsohle li ke li boke lebitso la hae le khethehileng ka mehla le mehla.”—Pesaleme ea 145:21.

U ne u Tla Arabela Joang?

◻ Baholo ba Bakreste ba lokela ho itebela khahlanong le likotsi life?

◻ Ke eng e ka thusang bao ka lebaka la matšoenyeho kapa maikutlo a ho se tšoanelehe ba sa hahamalleng litokelo?

◻ Ke eng e ka susumelletsang motho ho itlhahisa bakeng sa boikarabelo ka phuthehong?

◻ Bao e neng e le baholo le bahlanka ba sebeletsang ba lokela ho talima nako e tlang ka boikutlo bofe?

[Setšoantšo se leqepheng la 19]

W. J. Thorn o ile a beha mohlala o motle oa ho ba moholo ea ikokobelitseng

[Setšoantšo se leqepheng la 21]

Joaloka Jesu, na u utloisisa ho etsa ntho e ’ngoe le e ’ngoe e ka etsoang tšebeletsong ea Jehova?