Ke Lithapelo tsa Bo-mang tse Arabeloang?

JEHOVA ke Molimo o arabelang lithapelo. Ha e le hantle, Lentsoe la hae, Bibele, le ’mitsa “Moutloi oa thapelo.” (Pesaleme ea 65:2, NW) O ikemiselitse ho araba lithapelo. Empa ke lithapelo tsa bo-mang tseo a hlileng a li arabelang?

Molimo o arabela lithapelo tsa batho bao o khahlisoang ke bona. Ba na le boikutlo ba tlhompho e tebileng ba mopesaleme ea itseng: “Joale ka khama ha e tsetselela metsi a melatsoana, ho joalo le sephefumolohi sa ka se tsetselela uena, Oho Molimo. Sephefumolohi sa ka se nyoretsoe Molimo, Molimo o phelang.” (Pesaleme ea 42:1, 2) Leha ho le joalo, ke bopaki bofe bo teng ba hore Jehova o arabela lithapelo tsa barapeli ba hae ba ’nete?

Bopaki ba Hore Molimo o Arabela Lithapelo

Bibele e na le tlaleho e khōlō e pakang hore Jehova o arabela lithapelo tsa bahlanka ba hae ba tšepahalang. Ka mohlala, ha Morena Josafate oa Juda a ne a rapella ho pholosoa, Molimo o ile oa arabela thapelo ea hae ’me oa mo fa tlhōlo ka ho etsa hore lira tsa hae li bolaeane. (2 Likronike 20:1-26) Ha Morena Ezekiase le eena a ne a tobane le lebotho le matla la sesole, ka boikokobetso o ile a rapela Molimo bakeng sa thuso. Ezekiase o ile a bona poloko ea Jehova ha lengeloi le bolaea Ba-Assyria ba 185 000 ka bosiu bo le bong.—Esaia 37:14-20, 36-38.

Ke hobane’ng ha Molimo o ile oa arabela lithapelo tseo? Mabakeng ao ka bobeli, marena ao a ile a kōpa hore ho hlōloa ntoeng ho ne ho tla hlahisa lebitso la Jehova hampe. (2 Likronike 20:6-9; Esaia 37:17-20) A ne a amehile ka botumo ba hae. The International Standard Bible Encyclopedia, e re: “Morero oa motheo oa thapelo hase feela molemong oa mokōpi empa ke ho hlompha lebitso la Molimo.” Kahoo, bahlanka ba tšepahalang ba Jehova ba ka tiiseha hore o tla ba thusa “ka baka la lebitso la hae.” Tlaleho e bontšang hore lithapelo tseo li ’nile tsa arabeloa e fa batho ba Molimo tšepo ea hore o utloa lithapelo tsa bona.—Pesaleme ea 91:14, 15; 106:8; Liproverbia 18:10.

Leha ho le joalo, esita le haeba boemo bo kopanyelletsa lebitso la Jehova, Molimo o etsa qeto hore na o arabele lithapelo tse itseng kapa o se ke oa li arabela. O ka ’na oa ba le mabaka a tiileng a hore o se ke oa arabela lithapelo tse ling. Haeba re ikutloa hore lithapelo tsa rōna ha li utluoe, ho molemo hore re nahane hore na ke hobane’ng ha hona ho etsahala.

Lebaka Leo ka Lona Lithapelo tse Ling li sa Arabeloeng

Jehova o kile a bolella Baiseraele: “Leha le ka atisa lithapelo tsa lōna, nke ke ka li mamela.” Ha a hlalosa lebaka, o ile a tsoela pele: “Matsoho a lōna a tletse mali.” (Esaia 1:15) Ke joang motho ofe kapa ofe a ka hlokomolohang molao oa Jehova ’me a ’na a fumana monyetla oa ho utluoa ke eena? Maele a Bibele a fana ka karabo e hlakileng, ha a re: “Ea fapanyang tsebe le molao hore a se ke a o utloa, esita le thapelo ea hae e manyala.”—Liproverbia 28:9.

Bibele e fana ka lebaka le leng leo ka lona lithapelo tse ling li sa utluoeng, ha e re: “Lea kōpa, ’me ha le fuoe, kahobane le kōpa hampe, ho nkela litakatso tsa lōna.” (Jakobo 4:3) Che, Jehova a ke ke a araba lithapelo ho khotsofatsa litakatso tse sa lokang. Re boetse re lokela ho hopola hore Molimo ha o bolelloe ke batho hore na o etse eng. Ke Oona o etsang qeto ea hore na o tla araba lithapelo tsa rōna joang.

Lithapelo tse eang ho Molimo li tsoa pelong e hloekileng, ka sepheo se setle, ’me e le ka tsela e khethiloeng ke oona ka Jesu Kreste—ka sebele li tla arabeloa. (Johanne 14:6, 14) Empa esita le bao lithapelo tsa bona li finyellang litlhokahalo tse joalo ka nako e ’ngoe ba ’nile ba ikutloa hore ha ba utluoe. Ke hobane’ng ha Molimo o sa arabele lithapelo tse ling tsa bahlanka ba oona hang-hang?

Jehova o tseba nako e molemo ea ho araba lithapelo. Le hoja moshanyana a kōpa baesekele, ntat’ae a ka ’na a se ke a mo fumanela eona ho fihlela a hōlile ka ho lekaneng hore a ka e palama ka polokeho. Ho ka etsahala se tšoanang ka lithapelo tse ling tsa batho ba bang ba ratang Molimo. Ka ho tseba se molemo bakeng sa bona, o fana ka se hlokahalang ka nako e hlileng e loketseng haholo.

Leha ho le joalo, bahlanka ba Jehova ha ba fumane ntho e ’ngoe le e ’ngoe eo ba ka e rapellang. Ka lebaka la hobane ba sa phethahala, ba ka ’na ba lakatsa lintho tse ling tseo li ke keng tsa e-ba molemo bakeng sa bona. Ntate oa bona ea lerato oa leholimo a ke ke a ba fa eng kapa eng e kotsi, hobane ke Mofani oa “mpho e ’ngoe le e ’ngoe e ntle, leha e le neo e ’ngoe le e ’ngoe e phethehileng.” (Jakobo 1:17) Ka ho tšoanang, Molimo o ke ke oa fana ka eng kapa eng eo ponong ea oona eseng molemo. (Bapisa le 2 Ba-Korinthe 12:7-10.) O araba lithapelo tse tumellanong le thato le morero oa oona bakeng sa batho ba oona.—1 Johanne 5:14, 15.

Jesu “O Ile a Utluoa ka Mokhoa o Amohelehang”

Jesu Kreste e ne e le motho oa thapelo. (Mattheu 6:9-13; Johanne 17:1-26) O ne a e-na le tšepo e felletseng ea hore ntat’ae oa leholimo o tla mo mamela ’me a arabe lithapelo tsa hae. Jesu o kile a re: “Ntate, . . . Kea tseba hobane u nkutloa ka mehla.” (Johanne 11:41, 42) Empa na Jesu o ne a sa nyahama qetellong ea tšebeletso ea hae ea lefatšeng? Na joale ha aa ka a hoeletsa a re: “Molimo oa ka, Molimo oa ka, u ntloheletse’ng?”—Mattheu 27:46.

Ha Jesu a ne a bua mantsoe ao, ho hlakile hore o ne a phethahatsa boprofeta bo mabapi le lefu la hae. (Pesaleme ea 22:1) Ka kutloisiso e lekanyelitsoeng, Jesu o ne a ka boela a bolela hore Jehova o tlositse tšireletso ea hae ’me a lumella Mora oa hae ho shoa lefu le bohloko le le lihlong e le hore a ka leka botšepehi ba hae ka ho felletseng. Ho hlahlojoa ha liketsahalo tsa letsatsing leo la ho qetela la bophelo ba Jesu ba lefatšeng ho bontša hore Molimo o ile oa utloa lithapelo tsa hae.

Bosiung ba ho tšoaroa ha hae, Jesu o ile a rapela a le tšimong ea Gethsemane. Ka makhetlo a mararo o ile a kōpa: “Ntate, ekare ha ho ka etsoa, ak’u fetisetse senoelo sena hole le ’na!” (Mattheu 26:39, 42, 44) Jesu o ne a se leqe ho fana ka bophelo ba hae e le topollo bakeng sa batho ba lumelang. Che, empa kamoo ho bonahalang ka teng o ne a amehile haholo ka se neng se ka etsahala hore a hlompholle Ntat’ae ea ratehang haholo ka ho shoela thupeng ea tlhokofatso joaloka moetsalibe ea rohakiloeng. Na Jehova o ile a utloa thapelo ea Jesu?

Lilemo tse ’maloa hamorao, moapostola Pauluse o ile a ngola: ‘Ke Jesu eo, mehleng ea nama ea hae, ea kileng a hlahisa, ka mohoo o moholo le ka meokho, merapelo ea hae e bohloko ho ea neng a ka tseba ho mo loela lefung; ’me . . . a utluoa [“ka mokhoa o amohelehang,” NW], ka baka la borapeli ba hae.’ (Ba-Heberu 5:7; Luka 22:42, 44) E, bosiung bo bohloko bo neng bo etella pele lefu la hae, Jesu “o ile a utluoa ka mokhoa o amohelehang.” Empa joang?

Jehova o ile a romela lengeloi le ileng la “hlaha ho eena [Jesu], le e-tsoa leholimong, la mo matlafatsa.” (Luka 22:43) A matlafalitsoe joalo, Jesu o ile a khona ho tobana le lefu thupeng ea tlhokofatso. Kamoo ho bonahalang ka teng, Jehova o ile a mo fa tiiso ea hore lefu la hae thupeng le ke ke la tlisa thohako lebitsong la Molimo empa qetellong e tla ba lona le tla sebelisoa bakeng sa ho le halaletsa. Ka sebele, lefu la Jesu thupeng ea tlhokofatso le ile la bula tsela bakeng sa Bajode, bao hoja e ne e se ka baka la lona ba neng ba rohakiloe ka tlas’a Molao, ho pholosoa ho tloha thohakong ho isa lefung.—Ba-Galata 3:11-13.

Matsatsi a mararo hamorao, Jehova o ile a tsosa Jesu Kreste bafung ’me a tlosa qoso leha e le efe ea bonyefoli ho eena ka ho mo phahamisetsa boemong bo phahameng ba leholimo. (Ba-Filippi 2:7-11) Eo e bile tsela e babatsehang hakaakang ea ho arabela thapelo ea Jesu mabapi le “senoelo sena”! Thapelo eo e ile ea arabeloa ka tsela ea Jehova. ’Me Jesu o ile a fumana litlhohonolofatso tse babatsehang hobane o ne a ile a bolella ntat’ae oa leholimo: “Ho se ke ha etsoa thato ea ka, ho etsoe ea hao.”—Luka 22:42.

Kamoo Jehova a Arabelang Lithapelo ka Teng Kajeno

Joaloka Jesu, ba batlang ho khahlisa Jehova kajeno ba lokela hore ka mehla ba kōpe hore ho etsoe thato ea Molimo. Ba lokela ho ba le tumelo ea hore Jehova o tla araba lithapelo tsa bona ka tsela e tla ba tsoela molemo haholo. Ha e le hantle, o tla ‘etsa ho fetisang haholo tsohle tseo re ka li qelang le tseo re ka li hopolang.’—Ba-Efese 3:20.

Mosali e mocha oa Mokreste ea neng a lula le batsoali ba hae ba sa lumelang o ile a latsoa bonnete ba lengolo leo. Lengolong leo a ileng a le fumana ho tsoa Mokhatlong oa Watch Tower, o ile a kōptjoa ho nahana ka thapelo ka monyetla oa ho amohela kabelo e khethehileng ea boromuoa. Le hoja takatso ea hae e tlohang botebong ba pelo e ne e le ho lula hae hore a thuse batsoali ba hae hore e be Bakreste, o ile a kōpa Molimo ka thapelo: “Thato ea hao ke eng? Na ke hore ke amohele memo ena ho sa tsotellehe khanyetso ea batsoali ba ka, kapa na ke hore ke thuse batsoali ba ka ka ho tsoela pele ke lula le bona?” Ka linako tsohle ha a ne a rapela, letsoalo la hae le ne le ’molella hore a amohele memo. O ile a etsa qeto ea hore ena ke karabo e tsoang ho Jehova.

Molimo o ile oa matlafatsa mosali enoa ho khomarela qeto ea hae. Ha a ne a kōptjoa ho fallela Sehleke-hlekeng sa Awaji, Japane, batsoali ba hae ba ne ba tšohile ’me ba ile ba eketsa khanyetso ea bona. Leha ho le joalo, hobane ba ne ba sa khone ho mo kholisa hore a fetole kelello ea hae, ’mè oa hae o ile a etsa qeto ea ho ithuta Bibele hore feela a bone hore na ke hobane’ng ha morali oa hae a entse qeto e joalo. Likhoeli tse tharo hamorao batsoali ba hae ba ile ba mo etela. Hoba ba bone kamoo Lipaki tsa Jehova tse ling li mo hlokometseng hantle ka teng, ntat’ae o ne a amehile ka ho tebileng ’me o ile a lla ha a le mong. Kapelenyana le eena o ile a qala ho ithuta Bibele. Qetellong batsoali ba mosali enoa e mocha ka bobeli ba ile ba kolobetsoa ’me ba qala ho sebeletsa Jehova ka botšepehi. Na Jehova Molimo ha aa ka a hlohonolofatsa mosali enoa oa Mokreste haholo ka ho fetisisa?

Lithapelo tsa Bona Lia Arabeloa

Na u hopola mantsoe a mosali ea boletsoeng qalong ea sehlooho se fetileng? Le ka mohla o ne a e-s’o utloe boikutlo bo thabisang ba hore lithapelo tsa hae li arabeloe. Leha ho le joalo, hamorao o ile a lemoha hore Molimo o ne o arabela lithapelo tsa hae. Mosali enoa o ne a ile a boloka tlaleho ea lintlha tsa bohlokoa ea lithapelo tsa hae. Ka letsatsi le leng o ile a sheba bukeng ea hae ea lintlha ’me a hlokomela hore Jehova o arabetse lithapelo tse ngata tsa hae, esita le tseo eena ka boeena a li lebetseng! Kahoo o ne a tseba hore Molimo o ne o mo hlokomela ’me o arabela lithapelo tsa hae ka tsela e mosa le e mo tsoetseng molemo haholo.

Haeba u ikutloa hore lithapelo tsa hao ha li arabeloe, ipotse: ‘Na ke na le kamano ea botho le Jehova, “Moutloi oa thapelo”? Haeba ho se joalo, na ke nka bohato ho ithuta ka eena le ho ba e mong oa bahlanka ba hae ba inehetseng?’ O araba lithapelo tsa ba mo ratang le ba etsang thato ea hae. Ba ‘tiea lithapelong’ ’me ba utluoa ka mokhoa o amohelehang, joaloka Jesu. (Ba-Roma 12:12) Kahoo, ‘tšollela pelo ea hao’ ho Jehova ’me u etse thato ea hae. (Pesaleme ea 62:8) ’Me lithapelo tsa hao li tla utluoa.

Kajeno, batho ba limillione ba rapella ntho e ’ngoe e khethehileng. E, ’me lithapelo tsa bona lia utluoa. A re boneng hore na ke hobane’ng ha re ka tiiseha hore lithapelo tse joalo li tla arabeloa.